1. Moota heeni ninttottelaahu mureerelo vaavo hiyo nnoonelaahu muthukumano wa wuupuwelela okhwa wa Yesu?

 MOOHIHOVELA, nyuwo munnaakhulela weera yoowoopola yoovaha ya nsivelo! (2 Akor. 9:15) Okhala weera Yesu oovaha ekumi awe, nyuwo pooti okhalano onthamwene woolipa ni Yehova Muluku. Nyuwo-tho pooti okhalano yooweherera ya ekumi yoohimala. Onnatthuneya oxukurela yoowoopola ni omuxukurela Yehova, yoowo onivanhe yoowoopola mwaha wa nsivelo. (Arom. 5:8) Weera anikhavihere ovirelela oxukurela ni ohittiwala yoowoopola, Yesu ooruma weera nuupuweleleke okhwa wawe kata eyaakha. — Luka 22:19, 20.

 2. Etthu heeni ninrowaahu othokorora mwa yoosoma ene yeela?

² Eyaakha ela, nihiku na wuupuwelela ninrowa okhala Esaabadu 12 a Abril a 2025. Moohihovela, ootheene hiyo ninniireherera weera noonele muthukumano owo. Nnoottottela mureerelo vantxipale wakhala weera nnimwiihiyera etempu isemana sa wuupuwelela, weera niphimelele a etthu Yehova ni Mwanawe enipakenlaaya. Mwa yoosoma ene yeela, nnoorowa woona etthu heeni yoowoopola ennixuttihaaya woohima sa Yehova ni Mwanawe. Ni mwa yoosoma enttharelana, nnookhaviheriwa wiiwexexa moota heeni ninrowaahu ottottela mureerelo yoowoopola ni  moota ninrowaahu woonihera oxukurela mwaha wa yoowoopola eyo.

ETTHU YOOWOOPOLA ENNIXUTTIHAAYA WOOHIMA SA YEHOVA

 3. Moota heeni okhwa wa mulopwana mmoha onaavuluxaaya atthu antxipale? (Nwehe efootu.)

³ Yoowoopola ennanxuttiha woohima sa exariya ya Yehova. (Ola. 32:4) Moota heeni? Muupuwele ela: Mwaha wa ohiiwelela wa Adamu, noovala yoottheka yeeyo enneeriha okhwa. (Arom. 5:12) Weera anivuluxe wa yoottheka ni okhwa, Yehova oomuruma Yesu weera avahe yoowoopola. Mene moota heeni mukuttho wa mutthu mmoha oomalela onrowaaya waavuluxa atthu antxipale? Murummwa Paulo onniiwanyeiha eeraka: “Khweli sawasawa mwaha wohìwelela wa mutthu mmosaru [Adamu] ekhalihiwaya atthu antxipale anamattheka, siso tho mwaha wowiwelela wa mutthu mmosaru mukina [Yesu], atthu antxipale àkhalihiwa anaxariya.” (Arom. 5:19; 1 Tim. 2:6) Ni masu makina, aari mutthu mmoha oomalela yoowo aahiiwelenle, aneerinhe okhala akaporo a yoottheka ni okhwa. Mene-tho, wannatthuneya mutthu mmoha oomalela ni oowiiwelela weera anivuluxe.

 4. Mwaha wa heeni Yehova ahaakhulenlaaweru paahi weera atthu ooreera murima a osuulu wa Adamu ekhaleno ekumi yoohimala?

⁴ Neereke Yesu annatthuneya okhwa weera anoopole? Yehova khaarowa paahi olakela weera atthu ale ooreera murima a osuulu wa Adamu ekhaleno ekumi yoohimala? Wa atthu oohimalela, eyo yaarowa okhala ntoko etthu yooreera ni yookhweya opaka. Mene eyo khenhela mpuwa exariya yoomalela ya Yehova. Mwaha wooweera Yehova paahi ti axariya, owo khaarowa othanla ohipwatthela ohiiwelela wa Adamu.

 5. Mwaha wa heeni nintthuneyaahu ororomelaka weera Yehova ikwaha sootheene ompaka itthu mwa xariya?

⁵ Ankhanto waakhanle weera Yehova khavanhe yoowoopola ni onahiya exariya awe okhwipi aakhulelaka weera anamwane oohimalela a Adamu ekhaleno ekumi yoohimala? Apaale atthu yaamurowa wiikohaka wakhala weera Muluku aamurowa ohipwatthela exariya mwa nyaha sikina-tho. Mwa ntakihero, neereke owo aamuhiya okwanihera soolaihera sawe sikina? Khanintthuneya oxupeya ni eyo. Mwaha wa Yehova opaka etthu ya xariya, nnaamweera opaka eyo waari wooxupa wa yoowo ori onvaha Mwanawe oosiveleya, onnaaroromeliha weera owo ikwaha sootheene onoorowa opaka itthu mwa xariya.

 6. Mwa mukhalelo heeni yoowoopola enooniheraaya nsivelo na Yehova? (1 Yohani 4:9, 10)

⁶ Nnaamweera yoowoopola enikhaviheraka wiiwexexa weera Yehova ti axariya, eyo ennanikhavihera otepaxa wene wiiwexexa mwiixero wa nsivelo nawe. (Yoh. 3:16; mmusome 1 Yohani 4:9, 10.) Yooxuttiha ya yoowoopola, ennoonihera weera Yehova, ohiya paahi otthuna weera  nikhaleno ekumi yoohimala, mene-tho owo ontthuna weera neereleke eparte emusi awe. Muupuwele ela: Vaavo Adamu aatthenkaawe, Yehova aahimoomola mwa emusi awe emmukokhorela. Yookhumelelaaya, ootheene hiyo niyarinwe niheerelaka eparte emusi ya Yehova. Mene mwaha wa yoowoopola, atthu ootheene emmuroromela Muluku ni emmwiiwelela owo, enimweerela eparte emusi awe emmuroromela ni emmwiiwelela. Naari vano, hiyo ninnakhalano onthamwene wooreera ni Yehova ni asinnihu. Moohihovela, ninnaakhela nsivelo noohimala na Yehova. — Arom. 5:10, 11.

 7. Moota heeni ohaawa wa Yesu onnikhaviheraaya wiiwexexa moota Yehova onnisivelaawe?

⁷ Hiyo pooti wiiwexexa nnene sene moota Yehova onansivelaawe nthokororaka moota yoowoopola yaaraaya yooxupa wa owo. Satana anhima weera khaavo murumeyi a Muluku onrowa ovirelela okhala oororomeleya wa Yehova wakhala weera anooviriha maxupo. Weera avaanyihe eyo, Yehova ohaakhulela weera Yesu ahaawe ahaakunveene okhwa. (Yobi 2:1-5; 1 Ped. 2:21) Yehova annoona vaavo Yesu aavaanyihiwaawe ni ahooleli a ittiini yaawo yaari amwiittani awe, aamaniwaawe ni anakhotto ni mpaka aakhomeliwaawe vamwirini. Nave-tho Yehova aamoona Mwanawe oosiveleya akhwaaka moovoreya. (Math. 27:28-31, 39) Yehova aakhalano owera woomaliha ohaawa wa Mwanawe. Mwa ntakihero, vaavo anamavaanyiha yenraaya: “Waari weera Muluku annasiveliwa nuuwo, anvuluxe viinaano va” Yehova anwera opaka eyo. (Math. 27:42, 43) Menento waakhanle weera Muluku ampaka eyo, khiyaarowa oliveliwa yoowoopola ni khanaarowa okhalano yooweherera. Mwa yeeyo, Yehova aahaakhulela weera Mwanawe ahaawe mpaka okhwa.

 8. Neereke Yehova wannanvoreya vaavo aamoonaawe Mwanawe ahasuliwaka? Muthalihe. (Nwehe efootu.)

⁸ Okhala weera Muluku nanwera sootheene, nihuupuweleke weera owo khonanvoreya murima. Hiyo nipakinwe mwa eneneeru awe, Muluku onipanke ni mukhalelo woowoona ovoreya murima, yeeyo enoonihera weera Yehova-tho onnanvoreya murima. Biblya onnahima weera Muluku ‘onnaxupeya’ nave ‘onnamuriipa murima.’ (Nsal. 78:40, 41) Nkuupuwelani-tho yooweereya ya Abrahamu ni Isakhi. Apaale nyuwo munnuupuwelela emaara Abrahamu aavekelinwaawe onvaha mwanawe mmoha ene ntoko mukuttho. (Eph. 22:9-12; Aheb. 11:17-19) Hiyo ninnuupuwelela moota Abrahamu aaxupeñyaawe vaavo iirehereraawe weera amwiive mwanawe. Eyo ennoonihera moota Yehova aaxupeñyaawe vaavo aamoonaawe Mwanawe ahasuliwaka mpaka wiiviwa ni atthu oonanara murima. — Moone va jw.org eviidiyu eneera Mutakiheke Waamini Waya — Abrahamu, Mpantta 2.

 9. Aroma 8:32, 38, 39 onookhaviherani moota heeni wiiwexexa woohima sa wunnuwa wa nsivelo na Yehova wa nyuwo ni wa asinninyu oomunepani?

⁹ Yoowoopola ennanxuttiha weera khaavo  mutthu onnisivela vantxipale ompwaha Yehova, naari amusi ahu naari nthamwene ahu oosiveleya. (Mmusome Aroma 8:32, 38, 39.) Moohihovela Yehova onnansivela vantxipale opwaha moota nniisivelaahu asineene ahu. Nyuwo munnatthuna okhalano ekumi yoohimala? Yehova onnatthuna vantxipale opwaha moota nyuwo muntthunaanyu. Nyuwo munnatthuna weera soottheka sanyu sileveleliwe? Yehova onnatthuna vantxipale woolevelelani opwaha moota nyuwo muntthunaanyu. Etthu owo onvekaawe, ori waakhulela yoovaha awe ya mahala, okhala oororomeleya ni oowiiwelela. Mweekhaikhai yoowoopola, yoowoonihera ya nsivelo ntokweene na Muluku. Ni elapo enyowani, ninrowa oxuttera vantxipale woohima sa nsivelo nno na Yehova. — Koh. 3:11.

ETTHU YOOWOOPOLA ENNIXUUTTIHAAYA WOOHIMA SA YESU

10. (a) Eheeni yaamuriipinhe murima Yesu ahalelaka vakhaani wiiviwa? (b) Mwa mukhalelo heeni Yesu aakihenraawe nsina na Yehova? (Nwehe ekwaadru “ Ororomeleya wa Yesu wohaakihera nsina na Yehova.”)

¹⁰ Yesu onnaxupeya vantxipale ni itthu atthu enuupuwelaaya woohima sa Atiithi awe. (Yoh. 14:31) Yesu aahiriipiwa murima vantxipale mwaha woowootheriwa onveeha Muluku, waahapuxa atthu ni woothera nsina na Atiithi awe. Eyo yaamweeriha ovekela eeraka: “Tiithi, vawereya, muhiye ekoopho ela eviraka.” (Math. 26:39) Mwaha woovirelela okhala oororomeleya wa Yehova mpaka okhwa wawe, Yesu aahaakiha nsina na Atiithi awe.

11. Moota heeni Yesu oonihenraawe nsivelo nawe ntokweene wa atthu? (Yohani 13:1)

¹¹ Yoowoopola ennanxuttiha weera Yesu onnaapwattha vantxipale atthu, otepaxa wene atthareli awe. (Mir. 8:31; mmusome Yohani 13:1.) Mwa ntakihero, Yesu aasuwela weera mpuwa mwa muteko awe elapo ela ya vathi, aamukumana ni maxupo, otepaxa wene okhwa wawe woovoreya. Menento, vaavo  aakwanihenraawe yoothanleliwaawe valaponi, ohiya paahi aapanke eyo mwaha wooweera aaroovekeliwa ni Yehova, mene mwaha wa nsivelo nawe ni atthu. Ni Yesu aalaleera, aaxuttiha, ni aahaavarela muteko atthu akina ni murima awe wootheene. Naari nihiku aakelaawe wiiviwa, Yesu aahiihiyera etempu weera arapihe manaani a arummwa awe ni waalaxera ni masu oolipiha ni ooxuttiha. (Yoh. 13:12-15) Nave emaara yeeyo aaraawe vamwirini wa nihaaxero, Yesu aahiihiyera etempu weera anvahe yooweherera nakrime yoowo aahalela okhwa, ni aahoonihera waapwattha wawe ameyawe anvekelaka Yohani weera aakosoopeke. (Luka 23:42, 43; Yoh. 19:26, 27) Mwa yeeyo, nsivelo ntokweene na Yesu nohooneya, ohiya paahi moorweela mwa okhwa wawe, mene-tho ohoonihera ekumi awe yootheene emaara aaraawe elapo ya vathi.

12. Mwa mukhalelo heeni Yesu anvirelelaawe opaka itthu ikina mwa mureerelo ahu?

¹² Nnaamweera Kristu akhwiiyeene “khuluwi,” owo nlelo onnaapaka amakeya mwaha wa hiyo. (Arom. 6:10) Moota heeni? Owo onnavirelela ovara muteko weera anivaheke itthu sintxipale sooreera seiyo sinwereya paahi mwaha wa yoowoopola. Nkuupuwelani itthu owo ompakaawe viinaano va. Owo ori ntoko Mwene ahu, Namakeya mutokweene ni muhooleli a muloko. (1 Akor. 15:25; Aef. 5:23; Aheb. 2:17) Owo oothanleliwa ovara muteko woowaathukumanya asinna oothanliwa ni muloko mutokotoko wa atthu, muteko yoowo onrowa omala ehaakunveene omala maxupo matokweene. b (Math. 25:32; Mar. 13:27) Owo-tho onnaweha-weha weera arumeyi awe ootheene oororomeleya evahiweke eyootxa ya omunepani mpuwa mwa mahiku ala oomalihera. (Math. 24:45) Ni mpuwa mwa olamulelo wa iyaakha 1.000, owo onoovirelela ovara muteko weera anikhavihereke. Mweekhaikhai Yehova oonivaha Mwanawe!

MUHIHIYE OXUTTERA

13. Moota heeni ophimelela onrowaaya onikhavihera ovirelela oxuttera woohima sa nsivelo Muluku ni Kristu ennooniheraaya?

¹³ Nyuwo pooti ovirelela oxuttera woohima sa moota Yehova ni Yesu enoosivelaayani nvirelelaka ophimelela woohima sa awo. Apaale isemana sa wuupuwelela okhwa wa Yesu wa eyaakha ene yeela, nyuwo pooti osoma moomaaleleya evanjelyu emoha naari ivanjelyu sintxipale. Muheerereke osoma itthu sintxipale emaara emoharu, opwaha mwa yeeyo, musomeke vakhaani-vakhaani ni mwaasaaseke mathowa enneeriha omusivela Yehova ni Yesu. Ni mwa sootheene  iya, mwaaleeleke atthu akina etthu muxuttenraanyu.

14. Moovarihana ni Nsalmu 119:97 ni enoota, moota heeni othola-thola onrowaaya onikhavihera ovirelela oxuttera woohima sa yoowoopola ni sooxuttiha sikina? (Nwehe efootu.)

¹⁴ Wakhala weera nyuwo muri mweekhaikhaini mpuwa mwa iyaakha sintxipale, apaale nyuwo munniikoha wakhala weera ti woowereya woonelela itthu sinyowani woohima sa nyaha soosuwanyeyaxa ntoko exariya ya Yehova, nsivelo nawe ni yoowoopola. Ekhaikhai ti yooweera, oxuttera itthu sinyowani khonkota. Nto, etthu heeni nyuwo muntthuneyaanyu opaka? Muttotteleke mureerelo soohimmwa simphwanyeya mu irevista sahu. Vaavo nyuwo mumphwanyaanyu masu muhiniiwexexaanyu nnene, muthola-thole. Avinyaka mphimeleleke nihiku nootheene etthu moonelenlaanyu ni etthu enooxuttihaayani woohima sa Yehova, Mwanawe ni nsivelo naya wa nyuwo. — Musome Nsalmu 119:97 ni enoota.

15. Mwaha wa heeni nintthuneyaahu ovirelela waasa mihakhu sa mBiblyani?

¹⁵ Muhikhulumuwe wakhala weera nyuwo khamumphwanya itthu inyowani soovara murima vaavo munkilaathi anyu weera musome ni othola-thola. Mwa masu makina, naarowa weera nyuwo muri ntoko mutthu onaasa nluku na ouro. Moopixa murima, mutthu owo onnaviriha iwoora nave mahiku ahinaaye ophwanya naari nluku nikhaani na ouro. Nto, owo khonkhulumuwa onnavirelela waasa, mwaha wooweera nluku nikhaani nri poothe ti nootthuneya wa owo. Mihakhu seekhaikhai sa mBiblyani ti sootepa otthuneyaxa. (Nsal. 119:127; Mir. 8:10) Nto mukhale oopixa murima mukwanihereke eprograma anyu ya omusoma Biblya. — Nsal. 1:2.

16. Moota heeni ninrowaahu omutakiha Yehova ni Yesu?

¹⁶ Mwaasomaka, mwaasaasereke mikhalelo sinrowa wookhaviherani ovarihela muteko ele munsomaanyu. Mwa ntakihero, mutakiheke exariya ya Yehova mwaathokororaka atthu akina moohikhala nthalu. Mutakihe nsivelo na Yesu onawooniheraawe Atiithi awe ni atthu akina, mukhalaka oolikaneene ohaawa mwaha wa nsina na Yehova ni mwaha wa owaakiha asinna. Nave mmutakihe Yesu mwaalaleeraka atthu akina weera-tho awo ekhaleno eparakha yoowaakhulela yoovaha ya nsivelo ya Yehova.

17. Etthu heeni ninrowaahu othokorora mwa yoosoma enttharelana?

¹⁷ Vaavo hiyo nniiwexexaahu ni ohela mwiitti yoowoopola, ninnamusivela vantxipale Yehova ni Mwanawe. Nave-tho awo enoorowa onisivela vantxipale. (Yoh. 14:21; Yak. 4:8) Nto nivarihele muteko itthu sootheene Yehova onnivahaawe weera nivirelele oxuttera woohima sa yoowoopola. Mwa yoosoma enttharelana, nnoorowa othokorora mikhalelo sikina sinnikhavihera ottottela mureerelo ni waakhulela wahu ni oxukurela nsivelo na Yehova.