1. Adamu ni Heva etthekakaru Yehova apanke heeni? (Ephattuwelo 3:15)

 NUMALA Adamu ni Heva ottheka Yehova apaka eprofesiya yeyo yavanhe yoweherera osuulu wa Adamu, etthu Yehova ahimmawe elempwale va Ephattuwelo 3:15.—Mmusome.

2. Mwaha wa heeni eprofesiya ela eraaya yootthuneya?

² Eprofesiya ela ennaphwanyaneya eliivuru yoopatxera ya mBiblyani. Nave tho iliivuru ikina sa mBiblyani sinnavarihana ni eprofesiya ela. Ntoko hiihale mulipa olepa ompwexereraawe ipaaxina, nave tho eliivuru ya Ephattuwelo 3:15 ennapwexerera iliivuru sootheene ni mitthenka sooreera. Mitthenka seiyo sinihima woopoliwa wa atthu ni onyanyiwa wa Satana vamoha ni atthareli awe. * Awo ankela okhala mareeliho matokweene wa ale amusivelaYehova

3. Yoosoma ela ninkela wakhula makoho heeni?

³ Yoosoma ela ninkela wakhula makoho woohima sa Ephattuwelo 3:15: Eprofesiya ela enahela mpuwa taani? Eprofesiya ela ekwanenle moota heeni? Eprofesiya ela emuhela mpuwa moota heeni yoole ori mutthu?

4. “Enoowa enthonyera eheeni,” nave ninsuwela hayi eyo?

⁴ Itthu sinhela mpuwa Ephattuwelo 3:14, 15 tiiya “enoowa,” ni “Osuulu” wa enoowa, “Muthiyana,” ni “osuulu”  wa muthiyana. Biblya onnanikhavihera wiwexexa itthu iyo vano nrowe niiwe nipatxeraka wuuluma sa enoowa. * Yehova khaakela wuuluma ni enoowa mwaha wooweera mweekhaikhai khaakela wiiwa etthu enoowa yeraaya yuulume. Owo uluma ni yoopattuxiwa yoosuwela. Yoopattuxiwa heeni enhimmwa? Apokalise 12:9 onnakhula moowiwanyeya, yoolepa ela ennaahima enoowa emuhimaka Satana. Osuulu wa enoowa taani?

5. Osuulu wa enoowa taani?

⁵ Biblya etempu ekina onnavarihela muteko masu owera osuulu, otthunaka omuhima mutthu yoole ontthariha makhalelo a mutthu mukina ntoko tithaawe. Vanonto osuulu wa enoowa anthonyera malaika ohiroromeleya ni atthu ammutakiha Satana yaawo ari amwittani a Muluku vamoha ni atthu awe. Mwa ntakihero akina a yaawo ari malaika yaahamwiwelenle Muluku etempu ya Nowa, nave tho atthu arino mikhalelo ntoko sa Satana.—Eph. 6:1, 2; Yoh. 8:44; 1 Yoh. 5:19; Yuda 6.

6. Mwaha wa heeni “muthiyana” onihimmwa mprofesiyani ohikhanlaawe Heva?

⁶ Vaano ninkela omuhima taani ori “muthiyana” ni muthiyanene khahiiyono Heva. Mwaha wa heeni? Nrowe noone etthu emooha eprofesiya yaahimmaya weera osuuulu wa muthiyana “waamunyanya” muru wa enoowa. Ntoko nonnahu enoowa Satana, muthiyana ole ari Heva khawo a osuulu wa Adamu weera owere omunyanya Satana. Satana aakela onyanyiwa moota heeni?

7. Moovarihana ni Apokalise 12:1, 2, 5, 10, taani ori muthiyana onihimmwa va Ephattuwelo 3:15?

 ⁷ Eliivuru yoomalihera ya Biblya yoomuhima taani ori muthiyana owo onromooliwa Ephattuwelo 3:15. (Mmusome Apokalise 12:1, 2, 5, 10.) Anwanrene nampurutxi (coroa) a itthenyeri 12, mene owo oonnayara anamwane: movirikana ni atthu akina ni muthiyana owo ontthuneya weera akhaleke awuuwu. Muthiyana owo onthoonyera eparte ya wiirimu a mareherero a Yehova yeeyo epakinwe ni malaika ororomeleya a Muluku.—Agal. 4:26.

8. Taani ampakela eparte osuulu wa muthiyna ni eyo yeerenye salini? (Ephattuwelo 22:15-18)

⁸ Biblya onnanikhavihera wiwexexa weera Yesu ori eparte yoothuneya wa osuulu wa muthiyana. Owo ohimme weera osuulu owo waakela okhumelela nloko na Abrahamu. (Mmusome Ephattuwelo 22:15-18.) Ekwaniheriwaka eprofesiya Yesu osuulu wa mulopwana ola orormeleya eyo tiiyo Abrahamu. (Luka 3:23, 34) Mene osuulu wa muthiyana owo waatthuneya weera okhaleke woolipa opwaha osuulu wa Adamu. Mwa yeeyo Yesu okhalanakaru iyakha 30 athanliwa ni munepa wootteela emaara ene yeele owo apakela eparte osuulu wa muthiyana. (Agal. 3:16) Numala Yesu okhwa ni ovinyererihiwa Yehova anwariha “nampurutxi (Coroa) ni anvuwiha” nave-tho owo, “ovahiwa olamulela Wirimu ni elapo ya vathi ni onkela omaliha” maxupo otheene . . . “ankumiheriwa ni Satana”.—Aheb. 2:7; Math. 28:18; 1 Yoh. 3:8.

9-10. (a) Taani ampakela eparte osuulu wa muthiyana ni apatxenre salini opakela eparte osuulu owo? (b) Vanonto ninkela woona heeni?

⁹ Omuhiya Yesu paahi atthu akina-tho anipakela eparte osuulu wa muthiyana. Murummwa Paulo ahiwanyeiha eraaka ale athanliwe annipakela eparte osuulu wa muthiyana: “Vano mwarì a Kristu, muri mmiso wa Abrahamu anamukalampa nthowa na natiri.” (Agal. 3:28, 29) Emaara yeeyo mukristu onthaliwaawe ni munepa wootteela onnapakela eparte osuulu wa muthiyana. Tivawonto osuulu wa muthiyana opakinwe ni Yesu vamoha ni othanliwa eyo tiiyo 144.000. (Apok. 14:1) Ootheene ale aneerela eparte osuulu wa muthiyana aniilipihera weera ekhaleno muupuwelo ntoko wa Tithaaya Yehova Muluku.

¹⁰ Vaavo niwexenxaahu eprofesiya ya Ephattuwelo 3:15, Ninkela woona moota Yehova onkwanelihawe eprofesiya ela vakhani-vakhani. Ni moota ennikhaviheraya mahukwaano.

11. Osuulu wa muthiyana wavulalinhiwe moota heeni “vakosomwani”?

¹¹ Moovarihana ni Ephattuwelo 3:15, enoowa yaakela ovulaliha “ekosomwa” ya osuulu wa muthiyana. Eprofesiya ela yookwanela vaavo Satana awerinhaawe Ayuda ni aRoma omwiva Yesu mwana a Muluku. (Luka 23:13, 20-24) Vaavo mutthu onvulalihaawe ekosomwa ennavira etempu yintxipale ahiweraka ovara etthu, emoha-moharu Yesu aakhwa amala mahiku mararu ahipakaka etthu.—Math. 16:21.

12. Moota heeni ni salini muru wa enoowa onkelaawe onyanyiwa?

¹² Weera ekwaniheriwe eprofesiya ya Ephattuwelo 3:15 Yesu khaatthuneya ovirelela mokhwani. Mwaha wa heeni? Mwaha wooweera moovarihana ni eprofesiya  osuulu wa muthiyana waakela onyanya enoowa. Mene ti yeeyo yereñye nuumala Yesu okhwa avinyererihwa ni ovahiwa ekumi ehinkhwa. Mwa etempu yoophwanelela Yesu onomunyanya Satana. (Aheb. 2:14) Yesu vamoha ni makristu othanliwa eyo tiyo 144.000 ankela watxipiha amwittani a Muluku—Osuulu wa enoowa.—Apok. 17:14; 20:4, 10. *

13. Okwaniheriwa wa eprofesiya ela ennikhavihera hayi?

¹³ Waari weera nyuwo murumeyi a Yehova eprofesiya ela enimookhaviherani. Moota heeni? Vaavo Yesu aarwiñyaawe valaponi aatakiha mikhalelo soomalela sa Atithawe. (Yoh. 14:9) Vaavo ninvirelelahu oxuttera woohima sa Yesu ninnavirelela omusuwela ni omusivela. Opwaha mwa yeeyo sooxutthiha sa Yesu ni moota owo onkhaviheraawe miloko onnaanikhavihera. Owo onnanixuttiha moota wookhalano ekumi enimusvela Yehova. Mene okhwa wa Yesu weiwo woonihenre ovulalihiwa wa ekosomwa—onnanikhavihera. Moota heeni? Yesu avinyererakaru aavelela ephome awe ntoko makeya yoowo “oniitteliha mwa yeele eri yoottheka.”—1 Yoh. 1:7.

14. Ninsuwela hayi weera eprofesiya yaapakiwe oJardi wEdeni khiyakela okwanela etempu ene yeele? Muthalihe

¹⁴ Eprofesiya ele Yehova aapankawe oJardi wEdeni ennonihera weera masu ale khiyakela okwaniheriwa etempu ene yeele. Mwaha wooweera Satana aakela waatthukumanya atthareli awe ni igrupu iya piili khasaakela wiwananaka. Weera eyo yeereye waatthuneya oviira etempu yintxipale, wiwexexa eprofesiya ela ennanikhavihera weera hiyo “namwiittiwa” ni Satana vamoha ni elapo tiyeeyonto Yesu atxentxerinhawe atthareli awe. (Mar. 13:13; Yoh. 17:14) Moohihovela ninnoona eyo yereeyaka otepaxa weene iyaakha 100 sivinre. Moota heeni?

15. Mwaha wa heeni wiittiwa wa atthu a Muluku onatxereyaaya, nave mwaha wa heeni nihintthuneyahu omova Satana?

¹⁵ Yesu akhalakaru Mwene a Omwene wa Muluku 1914, Satana ahomooliwa wiirimu, tivawonto ori elapo ela ya vathi awehereraka onyanyiwa. (Apok. 12:9, 12) Mene khoiyono weera onimweera oweherera paahi mene ori ni isara itokotoko, owo oniwinlela ikukuttula arumeyi a Yehova. (Apok. 12:13, 17) Ti vaavonto wiittiwa wa atthu a Muluku osareñyaya mene hiyo khannano nthowa weera nimoove Satana ni atthareli awe. Nokhalano nroromelo nimoha ntoko murumwa Paulo arinawe vaavo alempawe ha: “Muluku anikhalela hiyo taani ananivirikanyihe?” (Arom. 8:31) Hiyo ninamuroromela Yehova mwaha wooweera owo onnakwaneliha eprofesiya ya Ephattuwelo 3:15.

16-18. Moota heeni eprofesiya ya Ephattuwelo 3:15 yamukhavihenraya munna Curtis, Ursula, ni Jessica?

¹⁶ Eprofesiya ya Ephattuwelo 3:15 pooti onikhavihera oviriha maxupo ninkumanahu mwekumini. Munna mmoha ooneriwa Curtis onvara muteko ntoko missionário oGuam, enre: “Mwekumini mwaka miyo kaakumanano maxupo yaawo yeerenre ororomeleya waka wa Yehova, wupuwelela eprofesiya ya Ephattuwelo 3:15 yaakikhavihera omuroromela Muluku.” Munna Curtis onnaweherera moopixa murima nihuku neenno Yehova onkelaawe omaliha maxupo ootheene.

 ¹⁷ Murokora mmoha awAlemanha oneriwa Ursula enre: wiwexexa eprafesiya ya Ephattuwelo 3:15 ennamukhvihera woona weera Biblya upuxeriwe ni Muluku ni onnona iprofesiya ikina sa mBiblyani sinvarihanaya ni eprofesiya ela. Eyo ennamuttuttha murima. Owo onnatxerera eeraka: “Miyo kattuttheya murima vaavo kasuwenlaka weera Yehova apakavo etthu weera atthu aakhaleno yooweherera.”

¹⁸ Murokora mmoha oMicronesia oneriwa Jessica, enre: “Miyo kinnupuwelela vaavo kaasuwenlaka weera koophwanya ekhaikhai eprofesiya ya Ephattuwelo 3:15 ennakwanela. Mene wupuwelela eyo ennakikhavihera weera nlelo khannano ekumi yeekhaikhai. Eprofesiya ela ennaalipiha nroromelo naka nooweera onvarela muteko Yehova mukhalelo mmoha wa okhalano ekumi yooreera vaanaano niwehereraka ekumi yooreera muhoolo.”

19. Mwaha wa heeni nintthuneyahu ororomela weera eparte yomalihera ya eprofesiya ya Ephattuwelo enookwanela?

¹⁹ Ntoko nonnahu eprofesiya ya, Ephattuwelo 3:15 ennakwanela mahikwano. Hiyo noosuwela osuulu wa enoowa ni wa muthiyana. Yesu ori muhooleli a osuulu wa muthiyana nave noovola nikhwatta avulalihiwaawe vakosomwani vano owo Mwene a ikuru ohinkhwa. Yehova pooti weera oweharu ohathanla atthu ankela olamulela vamoha ni Yesu wiirimu. Okhala weera eparte yoopatxera ya eprofesiya ela yookwanela hiyo-tho nroromelake weera eparte ya naaveli enookwanela, moohihovela muru wa enoowa onorowa onyanyiwa. Moohihovela onkela okhala woohakalaliha wa arumeyi a Yehova. Nwehereraka ophiya nihuku nno mmuroromeleke Yehova weera osuulu wa muthiyana onoruha mareeliho mantxipale wa “maloko othene.”—Eph. 22:18.