1-2. Zadoki aari taani? (1 Sowereya 12:23, 27-29 [12:22, 26-28, NM])

 MUUPUWELE yooweereya ela. Davidi akhalakaru mwene a wIsraeli wootheene, atthu oophiyeraka 340.000 yaapwexeererana nuuwo. Atthu awo yaamala mahiku mararu ereene omwaako waattamela oHebroni, atthu awo yannahakalala, yannatthekula, yannatheya, nave yanneepa itxipo sonvuwiha Yehova. (1 Sow. 12:40 [12:39, NM]) Eriyari ya atthu ale, aakhalavo mmiravo mmoha iitthaniwa Zadoki. Mene Yehova oheeriha weera hiyo nsuwele weera owo aari eriyari ele. (Mmusome 1 Sowereya 12:23, 27-29 [12:22, 26-28, NM].) Mene Zadoki aari taani?

² Zadoki aari namakeya aavara vamoha ni namakeya mutokweene Ebiyatari. Yehova aahinvaha Zadoki osuwela ni owera woowiiwexexa yootthuna awe. (2 Sam. 15:27) Emaara atthu yaahaawelaaya miruku sooreera, awo yannamukoha Zadoki. Mene-tho owo aari mulopwana oolipa murima. Mwa yoosoma ene yeela nnoorowa woona mukhalelo owo woolipa murima wa Zadoki.

3. (a) Mwaha wa heeni nintthuneyaahu okhala oolipa murima? (b) Eheeni ninkelaahu woona mwa yoosoma ene yeela?

³ Mahiku ala oomalihera, Satana onnapaka ele onweraawe weera aatuphele atthu a Yehova. (1 Ped. 5:8) Niwehereraka Yehova omunyaanya Satana ni elapo ela yoonanara, hiyo onnatthuneya okhala atthu oolipa murima. (Nsal. 31:25 [31:24, NM]) Vano nrowe noone mikhalelo miraru sa moota wootakiha mukhalelo wa olipa murima wa Zadoki.

MUKHAVIHEREKE OMWENE WA MULUKU

4. Mwaha wa heeni atthu a Yehova entthuneyaaya okhala oolipa murima weera ekhavihere Omwene awe? (Nwehe efootu.)

⁴ Ntoko atthu a Yehova, hiyo nintthuneya okhavihera Omwene wa Muluku ni murima wootheene. Ikwaha ikina hiyo onnatthuneya  okhala oolipa murima weera niwere opaka eyo. (Math. 6:33) Mwa ntakihero, elapo ela yoonanara, hiyo nintthuneya okhala oolipa murima weera nimwiiwelele Yehova ni olaleya mitthenka sooreera sa Omwene. (1 Ates. 2:2) Nave-tho ontthuneya okhala oolipa murima weera nivirelele oheerela eparte elapo ela, yeeyo eri yookawanyeya voohima sa epoliitika. (Yoh. 18:36) Arumeyi antxipale a Yehova aayeleela itthu saya sa weerutthuni, ennathokororiwa moohixariya ni mpaka ennawaleliwa mukadeya mwaha wooheerela eparte miyaha sa epoliitika ni orowa okhottoni.

5. Mwaha wa heeni Zadoki aatthuneyaawe okhala oolipa murima weera amukhavihere Davidi?

⁵ Zadoki khaakenle oHebroni weera eerele paahi eparte efesta ele yeereñye emaara yeeyo Davidi aakhanlaawe mwene, owo aakela oHebroni oolikaneene weera awane ekhotto. (1 Sow. 12:39 [12:38, NM]) Owo aari oolikaneene omukhavihera Davidi owaakiheraka ana a Israeli wa amwiittani aya. Zadoki apaale khaiyene aari nakhotto ooweraxa owana okhottoni, mene owo aari oolipa murima.

6. Mwaha wa heeni Davidi aaraawe ntakihero nooreera na olipa murima wa Zadoki? (Nsalmu 138:3)

⁶ Moota heeni Zadoki aaxuttenraawe okhala oolipa murima? Owo aahikhala vamoha ni asilopwana a ikuru ni oolipa murima. Moohihovela, owo aaxuttera ni matakihero aya. Mwa ntakihero, Davidi aari ‘muhooleli ni nakhotto’ oolipa murima, mwaha wa yeeyo ana a Israeli ootheene yaamukhavihera weera akhale mwene. (1 Sow. 11:1, 2) Davidi ikwaha sootheene annamuroromela Yehova weera awane ni amwiittani awe. (Nsal. 28:7; musome Nsalmu 138:3.) Nave-tho yaakhala matakihero makina Zadoki eeraawe atakiheke, asilopwana ntoko, Yehoyada ni mwanawe Benaya yoowo-tho aari nakhotto, nave-tho waahela mpuwa ahooleli 22 yaawo-tho yaamukhavihera mwene Davidi. (1 Sow. 11:22-25; 12:26-28) Mwaha wa ororomeleya wa alopwana ale, Davidi aahikhala mwene nave asilopwana ale yaapaka ele yaaweraaya weera emukosoope.

7. (a) Matakihero heeni olelo va ennikhavihera okhala oolipa murima? (b) Moovarihana ni eviidiyu, eheeni muxuttenraanyu ni ntakihero na munna Nsilu?

 ⁷ Nave-tho hiyo nnoowera okhala oolipa murima vaavo ninsomaahu matakihero a arumeyi akina a Yehova yaawo yaari oolipa murima ni yaakhavihenre Omwene awe moororomeleya. Mwene ahu, Yesu Kristu, aakhootta weerela eparte miyaha sa epoliitika sa elapo ela ya Satana. (Math. 4:8-11; Yoh 6:14, 15) Owo ikwaha sootheene annamuroromela Yehova weera akhaleno olipa murima ni ikuru seiyo aahaawelaawe weera apake yooreera. Nave-tho olelo va, hiyo nookhalano matakihero mantxipale a alopwana ni amiravo yaawo yaakhoottiye orowa okhottoni ni weerela eparte miyaha sa epoliitika sa anamalamulela. Munoonela hayi osoma sooweereya iyo sa amiravo va esite ahu jw.org? a

MWAAKHAVIHEREKE ASINNA

8. Mwa itthu heeni asitokweene a mmulokoni entthuneyaaya woonihera olipa murima?

⁸ Hiyo ntoko atthu a Yehova ninnasiveliwa vantxipale okhaviherana mukina ni mukhwaawe. (2 Akor. 8:4) Mene, ikwaha ikina, ontthuneya okhala oolipa murima weera niwere opaka eyo. Mwa ntakihero, mpuwa mwa ekhotto, asitokweene a mmulokoni onnatthuneya waalipiha asinna a mmulokoni, yaavahaka nikhavihero noomunepani, apaale-tho enoorowa okosoopa soohaawela saya sa weerutthuni. Asitokweene a mmulokoni ennasivela iputtiputthi sa mmulokoni, mwaha wa yeeyo awo ari oolikaneene oviriha yoowoopiha eri poothe weera yaavahe nikhavihero asinna enhaawelaaya. (Yoh. 15:12, 13) Emaara asitokweene empakaaya eyo, hiyo pooti ohima weera awo ennatthara ntakihero na olipa murima na Zadoki.

9. Moovarihana ni 2 Samuweli 15:27-29, Eheeni Davidi anvekenlaawe Zadoki opaka? (Nwehe efootu.)

⁹ Ekumi ya Davidi yaari veerisani. Mwanawe Absaloni aatthuna omwiiva ni okhala mwene. (2 Sam. 15:12, 13) Davidi wannatthuneya otthawa oYerusalemu moowaakuveya. Owo aahaaleela arumeyi awe eeraka: “Mwèmele, nitthawe, niwoko wa hiyo khanavovo ntthawelo oholo wa Absaloni.” (2 Sam. 15:14) Emaara arumeyi a  Davidi yaatthawaaya, Davidi aahoonelela weera wannatthuneya mutthu mukina ohala oYerusalemu weera asuweleke etthu heeni Absaloni aatthunaawe opaka ni omuleela. Mwaha wa yeeyo, owo aamuruma Zadoki ni anamakeya akina weera etthikele ecidade ele weera emuleeleke Davidi. (Mmusome 2 Samuweli 15:27-29.) Mene awo wannatthuneya wiikosoopa vantxipale. Etthu Davidi aarummaawe weera epake yaari yoowoopiha. Muupuwele weera Absaloni mulopwana yoowo uupuwela sootthuna sawe paahi, yoowo aari oowiisunnuwiha, ni oohiroromeleya, etthu eeraawe apake ni Zadoki ni anamakeya ale waakhanle weera aamusuwela weera yaamunwehexexa ni yaamukosoopa Davidi!

10. Moota heeni Zadoki ni atthu akina yaamukosompaaya Davidi?

¹⁰ Davidi aakhalano palanu, mene weera awereye, oyo annahawela nikhavihero na Zadoki, ni nthamwene awe mukina oororomeleya, Huxayi. (2 Sam. 15:32-37) Huxayi aakela okhalaka ntoko aatthuna omukhavihera Absaloni, naari onvaha miruku voohima sa moota woomutuphela Davidi, mene ohima ekhaikhai, etthu eyo yaamurowa onvaha Davidi etempu weera iireherere. Vaavo Absaloni aathanliyaawe otthara miruku sa Huxayi, Huxayi aamuleela Zadoki ni Ebiyatari etthu yeereñye. (2 Sam. 17:8-16) Muhoolo mwaya, awo yaawera omuleela Davidi mitthenka iye, emuleelaka etthu Absaloni aalakenlaawe opaka. (2 Sam. 17:17) Ekhaviheriwaka ni Yehova, Zadoki ni anamakeya akina yaawera okosoopa ekumi ya Davidi. — 2 Sam. 17:21, 22.

11. Moota heeni ninkelaahu otakiha olipa murima wa Zadoki emaara nnaakhaviheraahu asinna?

¹¹ Ankha wakhala weera asinna ennaviriha maxupo oowoopiha ni enhaawela nikhavihero nahu, moota heeni ninkelaahu otthara ntakihero na Zadoki ni okhala oolipa murima? (1) Mutthareke miruku. Emaara enkhumelelaaya maxupo oowoopiha, ti wootthuneya vantxipale ovirelela okhala oowiiraana. Nave-tho ti wootthuneya otthara miruku sinkhuma oBetheli. (Aheb. 13:17) Asitokweene a mmulokoni ennatthuneya owuupuxera asinna moohihiyerera otthara miruku sa mareherero a Yehova  voohima sa moota woowiireherera emaara sinkhumelelaaya irisa sa ephattu. (1 Akor. 14:33, 40) (2) Mukhale oolipa murima mene oowikosoopa. (Mir. 22:3) Mpatxereke wuupuwela muhinaaye opaka etthu. Muhihiye ekumi anyu veerisani mwa itthu soohitthuneya. (3) Mmuroromeleke Yehova. Muupuwele weera Yehova onnatthuna vantxipale weera mukhale nnene vamoha ni asinna. Yehova onimookhaviherani nyuwo waakhavihera asinna moovareleleya.

12-13. Eheeni nyuwo muxuttenraanyu ni yooweereya ya Viktor ni Vitalii? (Nwehe efootu.)

¹² Moone ntakihero na Viktor ni Vitalii, asinna yaawo yaakhavihera waakawela asinna eyootxa ni maahi asinna mpuwa mwa ekhotto ya wUcrânia. Viktor ohimme ha: “Hiyo naahaasa eyootxa nipuro nri nootheene, vakhiviru vahu nanniiwa oruma wa akapwitthi. Munna mmoha aarino emerkaadu etokweene, owo aavaha eyootxa. Eyootxa eyo yaahaakhavihera asinna antxipale okhala akumi. Emaara naateexeraahu eyootxa eyo mukaaroni mwahu, ebomba emoha yaahimora mwa imeetru 20 ni nipuro naaraahu. Nihiku nne nootheene, miyo kannanvekela Yehova weera akivahe olipa murima weera kivirelele waakhavihera asinna.”

¹³ Vitalii ohimme ha, “Wannatthuneya okhala oolipa murima. Ekwaha aka yoopatxera, yaaviriha iwoora 12. Miyo kannanvekela Yehova emaara eri yootheene.” Vitalii aahoonihera olipa murima, mene-tho oowiikosoopa. Owo ohimme ha: “Miyo kannanvekela Yehova weera akivahe miruku ni wiiyeviha. Miyo paahi keetta mphiro weemereriwa ni anamalamulela. Nroromelo naka naalipa emaara konnaaka moota asinna yaavaraaya vamoha. Awo yaahikhavihera oreherera mphiro, othukumanya ikuwo, ni eyootxa, nave-tho yaakhavihera oteexera itthu iyo mukaaroni mwahu. Nave yaanivaha eyootxa ni nipuro nookhala mpuwa wa mukwaha ole.”

NVIRELELE OKHALA OOROROMELEYA WA YEHOVA

14. Nniisoonela moota heeni vaavo mutthu nimmusivelaahu ommuhiyaawe Yehova?

¹⁴ Yooweereriwa emoha yootepa oxupa, ti vaavo mmusi ahu naari nthamwene ahu oosiveleya vantxipale ommuhiyaawe Yehova. (Nsal. 78:40; Mir. 24:10) Wakhala weera ninnamusivelaxa mutthu owo, onnatepaxa okhala wooxupa ovilela mukhalelo ola. Wakhala weera nyuwo munnaviriha maxupo ala, ntakihero na Zadoki pooti woolipihani.

15. Mwaha wa heeni Zadoki aatthuneyaawe okhala oolipa murima weera avirelele okhala oororomeleya wa Yehova? (1 Mamwene 1:5-8)

¹⁵ Zadoki aavirelela okhala oororomeleya wa Yehova nnaamweera nthamwene awe, Ebiyatari aathanlale okhala oohiroromeleya. Eyo okhwipi wa olamulelo wa Davidi. Emaara Davidi aahalelaawe okhwa, mwanawe Adoniya aaheerera okhala mwene nnaamweera Yehova aalaihenre weera Salomoni aarowa okhala mwene. (1 Sow. 22:9, 10) Ebiyatari aathanla omukhavihera Adoniya. (Mmusome 1 Mamwene 1:5-8.) Mwa mukhalelo ene yoola, Ebiyatari aari oohiroromeleya ohiya paahi wa Davidi, mene-tho wa Yehova. Neereke nyuwo munnawera wuupuwelela moota Zadoki aaxupeñyaawe? Mwa iyaakha 40, owo aavara vamoha ni Ebiyatari ntoko anamakeya. (2 Sam. 8:17) Awosa yaahiteexa vamoha “nivuku na Muluku”. (2 Sam. 15:29) Ooweeli yaahimukhavihera Davidi ntoko mwene aya, nave yaahipaka itthu sintxipale mmutekoni mwa Yehova. — 2 Sam. 19:11-14.

16. Eheeni yaamukhavihenre Zadoki ovirelela okhala oororomeleya?

¹⁶ Zadoki aavirelela okhala oororomeleya wa Yehova nnaamweera Ebiyatari aathanlale okhala oohiroromeleya wa Yehova ni omurukunuwela Davidi. Davidi annasuwela weera ikwaha sootheene, owo aamurowa omuroromelaka Zadoki. Emaara Davidi oonelenlaawe weera Adoniya aahimurukunuwela, owo aahimuthanla  Zadoki, Natani ni Benaya weera emukhalihe Salomoni ntoko mwene. (1 Mam. 1:32-34) Zadoki moohihovela aalipihiwa vantxipale ni ntakihero na Natani ni arumeyi akina a Yehova yaawo yaari oororomeleya ni yaamukhavihenre mwene Davidi. (1 Mam. 1:38, 39) Emaara Salomoni aakhanlaawe mwene, owo “àmurenttela Ebiyatari ni namakeya Zadoki.” — 1 Mam. 2:35.

17. Moota heeni nyuwo munrowaanyu omutakiha Zadoki emaara yeeyo mutthu mummusivelaanyu ommuhiyaawe Yehova?

¹⁷ Moota heeni nyuwo munrowaanyu otthara ntakihero na Zadoki emaara yeeyo mutthu mummusivelaanyu onlakelaawe omuhiya Yehova? Mmuleeleke Yehova weera nyuwo muri oolikaneene ovirelela ororomeleya wa owo. (Yeh. 24:15) Yehova onimoovahani olipa murima munhaawelaanyu weera nvirelele opaka etthu yooreera. Munvekeleke Yehova ni nvireleleke okhala nthamwene wa ale eri oororomeleya wa Muluku ahu. Yehova onnavaha mwiitti ororomeleya wanyu ni onimootthuvelani mwaha woopaka eyo. — 2 Sam. 22:26.

18. Etthu heeni nyuwo muxuttenraanyu ni yooweereya ya Marco ni Sidse?

¹⁸ Moone ele yeereñye ni Marco ni amwaarawe Sidse, anamwane aya eeli asithiyana yinnuwakaru yaahithanla omuhiya Yehova. Marco ohimme ha: “Okhuma nihiku munaayaraanyu anamwane anyu, nyuwo munnaasivela vantxipale. Nyuwo munnapaka ele munweraanyu weera mwaakosoope wa yoowoopiha eri poothe. Mwaha wa yeeyo emaara awo enthanlaaya omuhiya Yehova, onnoovoreyani murima.” Owo onnavirelela eeraka: “Mene Yehova ikwaha sootheene onnanikhavihera weera nivilele. Emaara miyo kinkhulumuwaaka, amwaaraka ennalipa, ni emaara awo enkhulumuwaaya, miyo kinnalipa.” Sidse ohimme ha: “Hiyo khanaawera oviriha maxupo ale wahaakhanle weera Yehova taanivaha ikuru. Miyo kaaxupeya vantxipale ni kuupuwela weera anamwane ahu yaahiya ekhaikhai mwaha wa nthowa naka, ni miyo kaamuleela Yehova etthu eyo moorweela mwa nivekelo. Etempu vakhaani muhoolo mwaya, murokora mmoha yoowo kahanwenhaaka mwa iyaakha sintxipale, aawa otthekula ni miyo, owo aahela matata awe mmakhatani mwaka, ni akiwehaka owiitho, aaheera: ‘Muupuweleke ela Sidse, etthu yeereñye, khaiyene mwaha wa nthowa nanyu!’ Kikhaviheriwaka ni Yehova, miyo koowera okhala oohakalala mmutekoni mwawe.”

19. Etthu heeni nyuwo mulakenlaanyu opaka?

¹⁹ Yehova ontthuna weera arumeyi awe ootheene ekhaleke oolipa murima ntoko Zadoki. (2 Tim. 1:7) Mene Yehova khontthuna weera niroromeleke ikuru sahu. Ontthuna weera hiyo nroromeleke ikuru onnivahaawe. Tivawonto, emaara nyuwo munrowaanyu okumanakano maxupo ni munrowaanyu ohaawelaka olipa murima, nvekeleke nikhavihero wa Yehova. Nyuwo muroromeleke weera owo onimookhaviherani okhala mutthu oolipa murima ntoko Zadoki! — 1 Ped. 5:10.