1. Moovarihana ni 1 Pedru 5:2, eparakha heeni asitokweene a mmulokoni ekhalannaaya?

 ASITOKWEENE a mmulokoni aathanliwa weera ekosoopeke iputthiputthi sa Yehova. Asinna awo oowiivaherera ennavaha mwiitti eparakha yoowaavarela asinna ni asirokora, ti yeeyo awo eniilipiheraaya weera ekhale ‘akukhuli ookukhula.’ (Yer. 23:4; mmusome 1 Pedru 5:2.) Hiyo ninnaxukurela vantxipale mwaha wookhalano asitokweene ala mmulokoni mwahu.

2. Maxupo heeni asitokweene a mmulokoni akina envirihaaya?

² Vaavo enkwaniheraaya soothanleliwa saya asitokweene ennaviriha maxupo mantxipale. Mwa ntakihero, asitokweene entthuneya wiilipihera vantxipale weera ekosoope muloko. Tony mutokweene mmoha a wEstados Unidos aatthuneya okhala oowiiyeviha wakhala weera aamwaakhulela miritti sintxipale, owo ohimme ha: “Epatxerakaru eretta ya koronaviru, miyo kannavara muteko mwintxipale weera kirehere mithukumano ni muteko woolaleera. Kihipwatthaka moota kiilipiheraakano miteko khasaamala. Yookhumelela aya, miyo kaahiya omusoma Biblya, opaka yoosomaaka ya Biblya ni mavekelo a meekhaaka.” Ilir mutokweene mmoha onkhala oKosovo, maxupo awe yaari oovirikana. Aaraawe nipuro naawaniwa ekhotto, owo annoona okhala wooxupa wiiwelela miruku aavahiwaawe ni mareherero a Yehova. Owo ohimme ha: “Miyo kaahoova vantxipale eBetheli ekivekelakaru weera kirowe nipuro nootepaxa woopiha weera kaakosoope asinna ni asirokora, kinnaakhulela weera nkaalinpe murima ni waakhala ntoko miruku iye khasaakela ovareleya muteko.” Wa Tim misiyonaariyu mmoha onkhala wAsia. Ohimme ha: “Etthu yaakixupa waari okwanihera miteko sa nihiku ti nihiku. Ikwaha ikina miyo kannakhulumuwa mweerutthuni ni mmuupuweloni.” Eheeni enkela waakhavihera asitokweene enviriha maxupo ntoko ala?

3. Ntakihero heeni mphuki Yedeyoni onihiyenraawe ootheene hiyo?

³ Mphuki Yedeyoni, ntakihero nooreera wa asitokweene a mmulokoni. (Aheb. 6:12; 11:32) Owo annaakosoopa ni annakukhula  muloko wa Yehova. (Aph. 2:16; 1 Sow. 17:6) Hiihaale ntoko Yedeyoni asitokweene a mmulokoni ahaakhela muritti woowaakosoopa atthu a Muluku etempu yooxupa. (Mit. 20:28; 2 Tim. 3:1) Yedeyoni ntakihero na mutthu oowiiyeviha, oowiiwelela ni mutthu oosuwela ele onweraawe ni ohinweraawe opaka. Muteko Yedeyoni aathanlelinwaawe ni Yehova aatthuneya ovilela. Ootheene hiyo nintthuneya ovahaka mwiitti muteko asitokweene a mmulokoni envaraaya nihipwatthaka waari weera hiyo asitokweene kapena hooye. Nave tho hiyo pooti waakhavihera asinna ala oowiilipihera enkosoopa muloko.—Aheb. 13:17.

4. Yedeyoni oonihenre moota heeni weera aari mutthu oowiiyeviha ni oosuwela ele aaweraawe ni ahaaweraawe opaka?

⁴ Yedeyoni aari mulopwana oowiiyeviha ni oosuwela ele ahaaweraawe opaka. b Nlaika na Yehova nimuleelakaru weera owo aathanliwa weera aavuluxe ana a Israeli, mmatatani mwa amwiittani ooweraxa oMadiyani owo aahaakhula moowiiyeviha eraaka: “Pwiy’aka, erukulu aka tiyoyevaxa ompwaha Manase ni miyo kiri mwamukhanixa mpani mwa atith’aka.” (Aph. 6:15) Owo khaisoona okhala oophwanelela weera avare muteko ole, menento Yehova oosuwela itthu sootheene ni ammukhavihera okwanihera yoothanleliwa awe.

5. Mwa emaara heeni okhanlaaya wooxupa asitokweene okhala oowiiyeviha ni oosuwela ele enweraaya ni ehinweraaya opaka?

⁵ Asitokweene a mmulokoni enniilipihera weera ekhale oowiiyeviha ni atthu oosuwela ele enweraaya ni ehinweraaya opaka. (Mik. 6:8; Mit. 20:18, 19) Awosa khemmakela ohima paahi moota enkhumelaaya nnene mwaha wa mikhalelo saya ni itthu sootheene epankaaya. Awosa tho kheniisoona okhala oohivareleya muteko mwaha woohimalela waya menento okhalano mukhalelo ola khavankhweya. Mwa ntakihero, mutokweene pooti waakhulela miritti sintxipale menento muhoolo mwaya okhalano maxupo a moota wookwanihera miritti iyo naari pooti weeraka owo oroottottopeliwa mwaha wookwanihera yoothanleliwa awe naari oroothorihiwa mwaha wa moota owo othokoronraawe mwaha. Mwa sooweereya ntoko iya, asitokweene enkela otthara moota heeni ntakihero na Yedeyoni?

6. Asitokweene enrowa otakiha moota heeni wiiyeviha wa Yedeyoni? (Nwehe efootu.)

 ⁶ Nvekeleke nikhavihero. Mutthu oowiiyeviha onnasuwela weera sookhala itthu ohinweraawe opaka, nto mwaha woosuwela eyo Yedeyoni aahaavekela nikhavihero atthu akina. (Aph. 6:27, 35; 7:24) Menento ti va miruku asitokweene opaka etthu emoha-moharu. Tony ole oromolinwe woopatxerani onnathaliha: “Mwaha wa mahuweliwaaka miyo kannaakhulela miritti sintxipale mpaka iye miyo kahaaweraaka. Nto miyo kaathanla osoma woohima sa wiiyeviha naamukokhorelaka Muluku vatthokoni. Opwaha mwa yeeyo, miyo kannaakoha amwaaraka moota itthu saakeettelaaya. Nave miyo kaatthikela woonela veeli iviidiyu sa va site Treine, Confie e Delegue como Jesus Fez.” Tony aapatxera waakawela miritti asinna akina a mmulokoni nto yookhumelela aya owo onnahima: “Muloko onnakosoopiwa nnene sene nave miyo kinnakhalano etempu yoolipiha onthamwene aka ni Yehova.”

7. Asitokweene enkela otthara hayi ntakihero na Yedeyoni vaavo enthorihiwaaya? (Yakobe 3:13)

⁷ Muhaakuveke onyoonyiwa mwaathorihiwaka. Maxupo makina asitokweene anvirihaaya ti othorihiwa. Ntakihero na Yedeyoni pooti waakhavihera tho veeli. Yedeyoni mwaha woosuwela weera toohimalela waamukhavihera okhala oomaleleya vaavo aathorihiwaawe ni alopwana a wEfraimi. (Aph. 8:1-3) Yedeyoni khaakunve onyoonyiwa. Owo aakhalano wiiyeviha mmuupuweloni, mwaha woowiiwelela moomaleleya etthu yuulumaaya asilopwana ale owo aawera omaliha mwaha ole. Nna ntakihero nooreera otthara asitokweene yaathorihiwaka vale, yiiwaka ni opaka itthu moomaleleya. (Mmusome Yakobe 3:13.) Opaka eyo enookhavihera muloko okhala wa murettele.

8. Asitokweene a mmulokoni yooneleke hayi vaavo enttottopeliwaaya? Nvahe ntakihero.

⁸ Munvahe ovuwa wootheene Yehova. Yedeyoni attottopeliwakaru mwaha woowaavuluxa atthu a Muluku mmatatani mwa aMidiyani owo anvaha ovuwa wootheene Yehova. (Aph. 8:22, 23) Asitokweene enkela otthara moota heeni ntakihero na Yedeyoni? Awosa pooti onvuwiha Yehova mwaha wa itthu sootheene enpakaaya. (1 Akor. 4:6, 7) Mwa ntakihero, wakhala weera mutokweene oottottopeliwa mwaha wa mikhalelo sawe sooxuttiha owo pooti ohima weera oowera okhumela nnene mwaha wa Biblya naari mwaha wa etreinamentu mareherero a Yehova enaavahaaya asinna. Etthu ekina asitokweene entthuneyaaya wiikosoopa ori opaka itthu ni yootthuna weera ehimmwe. Moone etthu emoha yeereñye ni mutokweene mmoha oneeriwa Timothy. Owo athanliwe viinaanoru okhala mutokweene a mmulokoni menento wannamusivela vantxipale opaka nyaha sa vanlakani. Owo ohimme ha: “Miyo kannarehera masu aka oopatxera ni mwaphwanaphwaniho owiiwanyeya, nto mwaha wa yeeyo, asinna antxipale yannawa okittottopela. Mooripiha murima miyo kaapatxera wiivuwiha ohiya onvuwiha Yehova naari Biblya.” Noovira etempu, Timothy aahoonelela weera aatthuneya opaka matxentxo a moota aaxuttihaawe weera ahiivuwiheke mwaneene awe. (Mir. 27:21) Yookhumelelaaya yaari eheeni? Owo ohimme ha: “Asinna ennawa okileela moota mwaha kipankaaka waakhaviheeraaya ovilela maxupo, weereriwa naari moota waakhavihenraaya omwaattamela Yehova. Viinaano miyo kinnahakalala vantxipale mwaha wooweera asinna enttottopela mwaha kipankaaka okihiya miyo.”

9. Mwaha wa heeni wahaakhanlaaya wookhweya Yedeyoni wiiwelela ni okhala oolipa murima? (Nwehe efootu ya vakaapani.)

⁹ Yedeyoni athanliwakaru weera okhale mphuki ana a Israeli owo aatthuneya okhala oowiiwelela  ni oolipa murima. Menento eyo khayaakhanle yookhweya. Owo aathanleliwa etthu yootepa woopiha, omunyaanya altari apapawe yoowo yaamukokhorelaaya Bayali. (Aph. 6:25, 26) Muhoolo mwaya Yehova aamuruma Yedeyoni waavukula anakhotto aathukumannyaawe. (Aph. 7:2-7) Owo tho aathanleliwa onyaanya mikottha sa amwiittani awe ohiyu.—Aph. 7:9-11.

10. Ikwaha heeni onkhalaaya wooxupa asitokweene otthara miruku enaakhelaaya?

¹⁰ Asitokweene a mmulokoni ontthuneya okhala oolikaneene weera ‘yiiwelele ikwaha sootheene.’ (Yak. 3:17) Mutokweene oowiiwelela khampisa ootthara miruku sa mBiblyani ni sa mmarehereroni mwa Yehova. Nto mwaha woopaka eyo awo ennavaha ntakihero nooreera, menento ikwaha ikina onnakhala wooxupa okhala oowiiwelela. Mwa ntakihero, mwa ikwaha ikina asitokweene ennaakhela miruku seiyo sintxentxa moowaakuveya ni awosa pooti okhala ehovelaka wakhala weera miruku iyo sinookhumela nnene. Apaale pooti wuupuwelela weera yaakhulela yoothanleliwa emoha awo pooti ohela ekumi aya veerisani. Vanonto asitokweene enkela otthara hayi ntakihero noowiiwelela na Yedeyoni mwa soothanleliwa iyo soowoopiha?

11. Eheeni enkela waakhavihera asitokweene okhala oowiiwelela?

¹¹ Mwiiweleleke moomaaleleya ni mwaakuveyeke otthara miruku. Yehova anvaha miruku Yedeyoni wa moota eeraawe amunyaanye altari atithawe ni woowiini eeraawe amuteke mukina ni mwaamunama heeni eeraawe anvahe makeya. Yedeyoni khaathorinhe miruku iye sa Yehova menento owo aahiiwelela. Olelo va, mareherero a Yehova ennarumiha ikaarta, soohimmwa ni miruku soowaaxuttiha asitokweene moota eneeraaya yaakosoopeke asinna weerutthuni ni moomunepani. Hiyo ninnaasivela vantxipale asitokweene a mmulokoni, mwaha wooweera awo ennatthara moororomeleya miruku iyo envahiwaaya nto eyo ennakhavihera muloko wootheene.—Nsal. 119:112.

12. Vaavo enaakhelaaya miruku inyowani asitokweene enrowa otthara moota heeni miruku siri va Aheberi 13:17?

¹² Mukhaleke oolikaneene weera mwiikhovelelihe. Muupuwele weera Yehova anvaha miruku Yedeyoni weera owo aatthuna waavukula anakhotto awe. (Aph. 7:8) Apaale Yedeyoni aahuupuwela ha: ‘Neereke onnatthuneya tthiri waavukula? Neereke miruku iya sinookhumela nnene?’ Nnaamweera vaari hiiho, Yedeyoni aahiiwelela miruku iye. Olelo va, asitokweene ennatthara ntakihero na Yedeyoni ettharaka matxentxo envahiwaaya mmarehereroni mwa Yehova. (Mmusome Aheberi 13:17.) Mwa ntakihero, eyaakha ya 2014 Mukuttula Woolamulela waatxentxa moota seettihiwaaya iprojeetu sooteka Impa sa Omwene ni impa sa Assembleya. (2 Akor. 8:12-14) Khalayi muloko waatthunaka oteka Empa ya Omwene naari ya Assembleya, mareherero a Yehova yannaakophiha musurukhu weera evarele muteko avinyaka asinna awo yannatthikiha musurukhu  owo. Olelo va asinna a ilapo sootheene ennavaha idonatiivu, ni idonatiivu sene ti seiyo mareherero a Yehova envarelaaya muteko weera sikhaviheriwe iprojeetu sooteka ehipwatthaka waari weera muloko wookhalano musurukhu woolivano naari hooye. José asuwelakaru matxentxo awo, owo khawaamusivenle uupuwela weera miruku iyo khasaakela ovareleya muteko. Owo uupuwenle ha: ‘Ni miruku iyo khaninkela owera oteka Empa ya Omwene naari emoha mwaha wooweera khaiyono ti hiiho sineettaayano itthu.’ Eheeni yaamukhavihenre José otthara miruku iya? Owo ohimme ha: “Masu enphwanyeya va Miruku 3:5 ni 6 yaakuupuxera weera miyo kaatthuneya omuroromela Yehova. Mwaha wootthara miruku iya sookhumelela saya saari sootikiniha, ohiya paahi owera oteka Impa sa Omwene hiyo tho ninnaxuttera ovaha idonatiivu ni mpaka asinna ale ehikhalanne itthu sintxipale ennawera okhalano Empa ya Omwene.”

13. (a) Etthu heeni Yedeyoni ahaahovenlaawe? (b) Ni asitokweene enkela otthara moota heeni ntakihero nawe? (Nwehe efootu.)

¹³ Mukhaleke oolipa murima ni mpakeke yootthuna ya Yehova. Yedeyoni aamwiiwelela Yehova nnaamweera oova ni aari veerisani. (Aph. 9:17) Yedeyoni alipihiwakaru ni Yehova owo khaahovenle weera Yehova amukosoopa muloko awe. Nna ntakihero nooreera wa asitokweene ale enkhala ilapo miteko sahu sinkhoottihiwaaya awosa toolipa murima nave ennareherera mithukumano ni ennahoolela muteko woolaleera nnaamweera esuwelaka weera pooti otthukiwa, okohakohiwa ni mapolisiya, oyeleela muteko aya naari ohasuliwa. c Mpuwa mwa maxupo matokweene, asitokweene entthuneya okhala oolipa murima weera yiiwelele miruku seiyo enkelaaya ovahiwa nnaamweera erooka okhala etthu yoowoopiha opaka eyo. Miruku iyo pooti okhala woohima sa olaleera mitthenka soothoriha naari etthu yoopaka weera evuluwe Agogi ni Amagogi aarooka waatuphela atthu a Muluku.—Ez. 38:18; Apok. 16:21.

14. Emaara heeni waakhanlaaya wooxupa Yedeyoni ovilela?

¹⁴ Weera ahoolele ntoko mphuki a wIsraeli Yedeyoni  aatthuneya okhalano ikuru sintxipale. Ohiyu atthu oMadiyani yaatthanwaaya ekhotto, Yedeyoni aahaatthimakela ovinyera nlitti no Yizireyeli mpaka mooloko Yordani, woonaru mwemmo saasara miri ni miiwa. (Aph. 7:22) Neereke Yedeyoni aaphiyaawe moloko Yordani aaheemela? Hooye! Nnaamweera aakhulumunwe owo ni anakhotto awe 300 yaalapuwa mooloko ni yaavirelela waatthimakela okhwipi waya awosa yaahaavara ni yaahaawina anakhotto oMadiyani.—Aph. 8:4-12.

15. Emaara heeni mutokweene a mmulokoni ontthuneyaawe ovilela?

¹⁵ Mutokweene a mmulokoni onnatthuneya ovilela weera awere okosoopa emusi awe ni muloko. Mwaha woowaatteliwa miritti owo pooti okhulumuwa weerutthuni ni mmuupuweloni. Sooweereya ntoko iya, asitokweene enkela otthara moota heeni ntakihero na Yedeyoni?

16-17. Eheeni yaamukhavihenre Yedeyoni ovilela, ni nroromelo heeni asitokweene entthuneyaaya okhalano? (Yesaya 40:28-31) (Nwehe efootu.)

¹⁶ Muroromeleke weera Yehova onimoolipihani. Yedeyoni annaroromela weera Yehova ammuvaha ikuru nave ti yeeyo enexa Yehova aapankaawe. (Aph. 6:14, 34) Ekwaha emoha Yedeyoni ni anakhotto awe yaahaatthimakiha mamwene meeli oMadiyani, awosa woonaru yaari vathi ni mamwene ale yaari mukameluni. (Aph. 8:12, 21) Ekhaviheriwaka ni Yehova awosa yaawera waatthimakiha, waavara ni waawina mamwene ale meeli. Asitokweene pooti omuroromela tho Yehova yoowo ‘ohinkhulumuwa ni kharwa akhulumuwa.’ Yehova onimwaavaha yaawo ikuru enhaawelaaya.—Mmusome Yesaya 40:28-31.

¹⁷ Moone etthu yeereñye ni Matthew yoowo onkhavihera eKomisau hospitalari. Eheeni yaamukhavihenre munna ola ovilela? Owo ohimme ha: “Miyo kohoona ovareleya waya muteko yoolepa ya Afilipi 4:13. Ikwaha sintxipale miyo kannakhulumuwa vantxipale, nto miyo kannanvekela Yehova, miyo kannamutxondela weera owo akivahe ikuru weera kaalipihe asinna. Ewoora ene yeele, miyo kannawera woona munepa wootteela wa Yehova okivahaka ikuru weera kiwere ovilela.” Hiihaale ntoko Yedeyoni, asitokweene a mmulokoni ennavara muteko mwintxipale weera yaakosoope atthu a Yehova nnaamweera eyo ehikhweyaka. Menento awo onnatthuneya osuwela ni ottittimiha ilimite saya soopaka itthu. Awo tho ehihoveleke weera Yehova onimwiiwa emaara yeeyo enanvekelaaya ikuru weera ewere ovilela.—Nsal. 116:1; Afil. 2:13.

18. Ntoko nonnaahu mwa yoosomeene yeela, asitokweene a mmulokoni enkela otthara hayi ntakihero na Yedeyoni?

¹⁸ Ntoko noonalaahu, asitokweene a mmulokoni pooti oxuttera itthu sintxipale ni ntakihero na Yedeyoni. Awosa entthuneya okhala oowiiyeviha vaavo enthanlaaya miritti mikavi enkelaaya waakhulela ni yaattottopeliwaka naari yaathorihiwaka. Awosa tho ontthuneya okhala oowiiwelela ni oolipa murima otepaxa wene vaavo elapo ela enaattamelaaya okhwipi. Ehipwatthaka maxupo enkhumelela, awo eroromeleke weera Yehova onimwaavaha ikuru. Ntoko Biblya onhimaawe, hiyo nintthuneya ovirelela ‘waattittimiha atthu si yaala, ni hiyo ninnavaha mwiitti itthu sootheene asinna ala empakaaya.’—Afil. 2:29.