Makoho Empakiwa Ni Ale Ensoma Irevista Sahu

Yesu ayariwakaru, mwaha heeni Yosefe ni Maria yaavirelenlaaya okhala oBethelehemu, ohiya otthikela owannyaya oNazarethi?

Biblya khanaakhula nikoho nna. Menento owo onnahima mwaha wa heeni awo yaalakenlaaya okhala oBethelehemu.

Nlaika naamweerenle Maria weera aamurupala ni aamuyara. Emaara nlaika naamuleeliyaaya mitthenka iya Maria, awosa yeera akhalaka oNazarethi elapo awe Yosefe oGalileya. (Luka 1:26-31; 2:4) Muhoolo mwaya, awosa etthikakaru wIxipitu, yaarowa oNazarethi. Tiweiwo Yesu aahuuwalañyewo ni onakhala munazarethi. (Math. 2:19-23) Nto vaavo nnuupuwelaahu nsina na oNazarethi nnamuupuwela Yesu, Maria ni Yosefe.

Maria aakhalano mmusaawe eeriwa Elizabethi aakhala oYuda. Elizabethi aathelinwe ni namakeya mmoha eeriwa Zakariya yaawo yaari ameyawe Yohani mbatiza. (Luka 1:5, 9, 13, 36) Maria aarowa omuxekura Elizabethi ni aakhalawo mpuwa mwa miyeeri miraru oYuda avinyaka owo aatthikela oNazarethi. (Luka 1:39, 40, 56) Ti yeeyo Maria aasuwenlaawe nnene oYuda.

Muhoolo mwaya, Yosefe aakhuma oNazareth aarooka oBethelehemu mwaha wooweera nlamulo na aRoma naahima weera yoole ori mutthu ‘ailepiheke’ elapo awe, moovarihana ni eprofesiya waarowa okhala oBethelehemu Yesu aarowaawe oyariwa. (Luka 2:3, 4; 1 Sam. 17:15; 20:6; Mik. 5:2) Nooyariwa Yesu, Yosefe khaatthuna weera Maria eette mukwaha mutokotoko ni mwaana mukhaanini. Awosa oBethelehemu weiwo saari ikilomu 9 wa oYerusalemu. Opwaha mwa yeeyo nlamulo nannanyeserera onvaha makeya nooyariwa mwaana, nto okhala oYerusalemu waamukhweihera.—Onam. 12:2, 6-8; Luka 2:22-24.

Woopatxerani, nlaika naamuleela Maria weera mwana awe aamukhala mwene ni ‘aamukilaathi ehitxe ya Davidi.’ Pooti weeraka Yosefe ni Maria yaahakalala mwaha wa Yesu oyariwa ecidade ya Davidi. (Luka 1:32, 33; 2:11, 17) Apaale awosa yaahoona okhala wa miruku ovirelela okhala wuuwu mpaka osuwela etthu Yehova aatthunaawe weera epake.

Hiyo khanisuwenle etempu yaavirinhaaya ekhalaka oYerusalemu mpaka awosa exekuriwa ni alipa a miruku, etthu ninsuwelaahu ti yoowera awosa yaakhalano empa ni Yesu khaakhanle mwaana eera oyariwaru. (Math. 2:11) Vanooneya weera awosa, ohiya otthikela oNazarethi awosa yaakhala oBethelehemu etempu yintxipale weera epakewo elapo aya.

Herodi aaruma “owìva anamwane othene ò Bethelehemu . . . yarino iyakha pili orowa vathi.” (Math. 2:16) Nlaika nimoha naamuleela Yosefe woohima sa palanu owo, nto owo aatthawela wIxipitu weiwo aakhanlaiyewo mpaka Herodi okhwa. Noovira etempu, Yosefe aakuxa emusi awe etthikelaka oNazarethi. Nto mwaha wa heeni awosa yahaatthikenlaaya oBethelehemu? Mwaha wooweera etempu ene yeele, aalamulela aari Arkhelau mwaana a Herodi yoowo aari tho oowuuma murima, opwaha mwa yeeyo nlaika naamuleela tho Yosefe weera khowaakela okhala wa miruku otthikela oNazarethi ni iwo waari nipuro nooreera omuhuwa Yesu ntoko murumeyi a Yehova.—Math. 2:19-22; 13:55; Luka 2:39, 52.

Woonaru Yosefe akhwiye Yesu ohinaaye ohula mphiro woorowa wiirimu. Nto Yosefe onkela ovinyererihiwa weera akhaleke elapo ela ya vathi, antxipale enookela okhalano eparakha yoomusuwela ni wiiwexexa mwaha wa heeni owo ni Maria yaavirelenlaaya okhala oBethelehemu emuyarakaru Yesu.