1. Weera nivuluwe nihiku na Yehova nintthuneya opaka eheeni?

 MASU ooweera ‘Nihiku na Yehova’, ehimmwa etempu Yehova onkelaawe waathoriha amwiittani awe ni waavuluxa atthu awe. Etthu eyo yohinta weereya khalayi. (Yes. 13:1, 6; Ez. 13:5; Sof. 1:8) Mahikwaahu ala, ‘Nihiku na Yehova’ ninkela opatxera vaavo ahooleli a epoliitika enkelaaya omutuphela Babilonia mutokweene, ni nihiku nno ninkela omala okhottoni wa Harmagedoni. Weera nivuluwe “nihiku” nno, nintthuneya wiireherera viinaano vaava. Yesu aaxuttiha weera nintthuneya okhala oolikaneene weera niwere oviriha ‘maxupo matokweene’, eyo enoonihera weera nintthuneya ‘ovirelela okhala oolikaneene.’—Math. 24:21; Luka 12:40.

2. Masu a murummwa Paulo enphwanyeya va Atesalonika, heeni eraaya ootthuneya mahikwaano?

² Ekaarta yoopatxera murummwa Paulo uupuxerinwaawe waalepela atesalonika, aavarihela muteko maphwanaphwaniho mantxipale weera aakhavihere makristu ale weera nihiku noothoriha na Yehova naaphwanye oolikaneene. Paulo aasuwela weera nihiku nno khanaarowa ophiya mahiku ene yaale. (2 Ates. 2:1-3) Nnaamweera vareene hiiho, owo aawooperera asinna weera nihiku nno naaphwanye oolikaneene. Hiyo tho pooti ovarihela muteko miruku iyo. Ninkela woona woohima sa ele murummwa Paulo aahimmaawe woohima sa: (1) nihiku na Yehova ninkela owa nto eheeni, (2) taani ohinkela ovuluwa nihiku na Yehova ni (3) ninkela wiireherera moota heeni weera nivuluwe nihiku na Yehova.

3. Moota heeni nihiku na Yehova ninkelaaya owa ntoko namwiiya ohiyu? (Nwehe efootu.)

³ “Ntoko namwiya ohiyu.” (1 Ates. 5:2) Nna niphwanaphwaniho noopatxera na maphwanaphwaniho mararu murummwa  Paulo aavarenlaawe muteko weera ahime moota nihiku na Yehova naakelaaya owa. Ikwaha sintxipale anamwiiya empakaka itthu moowaakuveya ni empakaka eyo ohiyu ewoora yeeyo atthu ehinwehereraaya weera onoophiya mutthu. Nihiku na Yehova tho, ninkela owa moowaakuveya naaphwanyaka atthu antxipale mootutuxera. Itthu sinkela weereya moowaakuveya mpaka apaale makristu eekhaikhai enookhala ootikhiniheya. Mene moohiyana ni atthu oonanara murima, hiyo khaninkela onyaanyiwa.

4. Moota heeni nihiku na Yehova ninkelaaya ophiya ntoko masoso amaye ori ni erukulu?

⁴ “Ntoko masoso àmaye ari ni erukulu.” (1 Ates. 5:3) Muthiyana orino erukulu khanhovela weera onooyara, mene owo khansuwela ewoora onkelaawe oyara. Mootutuxera, owo onnapatxera woona masoso ni masoso awo ennavirelela ovoreya. Vamoha-moharu, hiyo khanisuwenle nihiku naari ewoora nihiku na Yehova ninkelaaya opatxera, mene ninnaroromela weera nihiku nno nnoophiya. Othoriha wa Yehova onkela okhala woowaakuveya ni atthu ale oonanara murima khenkela otthawa.

5. Moota heeni mahooxo matokweene eraaya ntoko okhuma wa nsuwa?

⁵ Ntoko okhuma wa nsuwa. Niphwanaphwaniho na naararu, Paulo onnuuluma vanaaveli tho woohima sa anamwiiya aniiya ohiyu. Mene ekwaha ela khanlikanxera nihiku na Yehova ni namwiiya, mene onkhala ntoko owo onlikanxera nihiku na Yehova ni okhuma wa nsuwa. (1 Ates. 5:4) Anamwiiya pooti wiitthaala wiiya mpaka ohiwera woona weera onooxaavo. Nsuwa pooti opatxera okhuma ewoora yeeyo awo yahaawehereraaya ni awo pooti wooniwa ni atthu akina. Yapatxera mahooxo matokweene enoorowa owoonihera ale ari ntoko anamwiiya envirelela okhala mweepiphini epakaka itthu simmunanara Muluku. Moohiyana naawo, hiyo nintthuneya wiitta itthu sootheene simmunanara Yehova ni naasaaseke  opaka “exariya ni ekhaikhai.” (Aef. 5:8-12) Moottharelana Paulo onnavarihela muteko maphwanaphwaniho meeli aahimaka ale ehinkela ovuluwa.

6. Moota heeni atthu antxipale olelo va araaya ookona? (1 Atesalonika 5:6, 7)

⁶ “Yale ankona.” (Mmusome 1 Atesalonika 5:6, 7.) Paulo onnaalikanxera ale ehinkela ovuluwa nihiku na Yehova ni atthu ankona. Atthu awo khenwera woona etempu yaaviraka naari khenwera woona etthu eneereya vakhiviru vaya. Nto mwaha wa yeeyo, awo khenwera wiiwexexa etthu yootthuneya yeereyaka ni ennavirelela okona. Atthu antxipale mahikwaano enookona mmukhalelo mwa omunepani. (Arom. 11:8) Awo khenroromela weera hiyo ninkhala ‘mahiku oomalihera’ ni weera mahooxo matokweene enoophiya moohipisa. Wakhala weera yooheereya mulaponi etthu ntoko ekhotto ni iretta soowaakuva omwaramwareya, atthu awo ennahuhumuwa enatthuna wiiwa mitthenka sa Omwene. Mene ohiya ovirelela okhala oowehexexa, awosa ennatthikela okona. Atthu akina ennaroromela weera nnoophiya nihiku noothoriha na Yehova, mene awo anoona weera nihiku nno nnoopisa ophiya. (2 Ped. 3:3, 4) Mene hiyo noosuwela weera onnatthuneya okhala ootxentxera.

7. Moota heeni ale ehinkela ovuluxiwa ni Yehova enkhalaaya ntoko mutthu oohapaliwa?

⁷ “Yale anahapaliwa.” Paulo aahaalikanxera ale enkela onyaanyiwa ni Muluku ni atthu ale oohapaliwa. Mutthu oohapaliwa onnapisa osuwela etthu eneereya vakhiviru vawe ni onnapaka soothanla soonanara. Vamoha-moharu, atthu oonanara murima khenaakhulela olopola wa Yehova. Awo ennathanla weettela ekumi yeeyo enkela oweeriha onyaanyiwa. Makristu entthuneya ovirelela owehexexa ni opaka soothanla. (1 Ates. 5:6) Namatholathola mmoha a Biblya ohimme weera mutthu oowehaweha “onnavirelela okhala oomaaleleya ni khanoova, owo onnawera wuupuwela nnene ni opaka soothanla sooreera.” Vano mwaha wa heeni eyo eraaya yootepa otthuneya? Ti yootthuneya weera nihiivoleihereke nyaha sa epoliitika ni soonyakulihana sa muttetthe ahu. Vaavo nnaattamelaaya nihiku na Yehova nneereke onyesereriwa weera neereleke eparte nyaha iya, mene khanintthuneya woova. Mwaha wooweera munepa wootteela wa Yehova onoorowa onikhavihera okhala oomaaleleya ni opaka soothanla sooreera.—Luka 12:11, 12.

8. Moovarihana ni 1 Atesalonika 5:8, ninkela wiireherera hayi weera nihiku na Yehova nniphwanye oolikaneene? (Nwehe efootu.)

⁸ ‘Niwareke eyuuma . . . ni ekapasete.’ Paulo oonilikanxera ni nakhotto ori oolikaneene weera awane ekhotto. (Mmusome 1 Atesalonika 5:8.) Okhottoni nakhotto ontthuneya okhala oolikaneene weera awane ekhotto ewoora eri poothe. Enneereya etthu emoha-moharu ni hiyo. Weera nikhale oolikaneene weera nivuluwe nihiku na Yeova nintthuneya owara eyuuma ya nroromelo ni nsivelo ni ekapasete ya yooweherera. Mikhalelo iya inoorowa onikhavihera vantxipale.

9. Nroromelo nahu ninnikosoopa moota heeni?

⁹ Eyuuma yannakosoopa murima wa nakhotto. Nroromelo ni nsivelo ninnakosoopa murima ahu. Mikhalelo iya inoorowa onikhavihera ovirelela onvarela muteko Muluku ni Yesu. Nroromelo ninnaneeriha ororomela weera Yehova onoorowa waatthuvela ootheene yaale ammwaasa ni murima wootheene. (Aheb. 11:6) Nroromele tho nnoorowa oneeriha ovirelela okhala oororomeleya wa muhooleli ahu, Yesu. Nnaamweera emaara ekina oxupaka opaka eyo.  Weera nlipihe nroromelo nahu ni ovilela wahu nintthuneya oxuttera etthu ni ntakihero na asinna ale envirelela okhala oororomeleya nnaamweera esonttiwaka naari enviriha maxupo a othowa musurukhu. Hiyo pooti osepa omorela mmuraakhoni woowaasa itthu sintxipale sa weerutthuni nlikanxaka ntakihero na asinna ale enkhweihera ekumi aya weera ehele Omwene wa Muluku nipuro noopatxera mweekumini mwaya. b

10. Moota heeni nsivelo nraahuno ni Muluku ni atthu akina ninnikhaviheraaya okhala oovilela?

¹⁰ Weera nivirelele okhala ootxentxera ni oowehexexa onnatthuneya okhalano nsivelo. (Math. 22:37-39) Nsivelo na Muluku ninnanikhavihera ovilela mmutekoni woolaleera nnaamweera nivirihaka maxupo. (2 Tim. 1:7, 8) Hiyo ninnawoonihera nsivelo atthu ale ehinanvarela muteko Yehova naalaleeraka muttetthe ahu mpaka emaara ekina naalaleeraka ni telefoni ni ikaarta. Hiyo khaniñyeleela yooweherera weera nihiku nihinsina atthu awo enootxentxa ni opatxera opaka itthu sooreera.—Ez. 18:27, 28.

11. Moota heeni nsivelo nraahuno ni asinna ninnikhaviheraaya? (1 Atesalonika 5:11)

¹¹ Omutthuna mukhwiihu onhela mpuwa waasivela asinna, hiyo nnoowera opaka eyo ‘nlipihanaka ni nikhaviheranaka mukina ni mukhwaawe’. (Mmusome 1 Atesalonika 5:11.) Ntoko nakhotto ommulipihaawe nakhotto mukhwaawe okhottoni, hiyo tho ontthuneya olipihana mukina ni mukhwaawe. Ekhaikhai weera nakhotto pooti onvulaliha nakhotto mukina moohilakela emaara enwanaaya, Mene owo khampaka eyo moolakela. Emoha-moharu, hiyo tho khaninlakela wanyonyiha asinna moolakela naari nihiliveke soonanara ni soonanara. (1 Ates. 5:13, 15) Hiyo tho ninnoonihera weera nookhalano nsivelo naattittimihaka asinna anhoolela miloko. (1 Ates. 5:12) Emaara murummwa Paulo alepelaawe ekaarta atesalonika muloko ole weera opakinweene vaanaanoru, oweharu, alopwana yaathanlinwe ohoolela muloko yaari oohikumanano itthu sintxipale apaale nto mwaha wa yeeyo yannafaliyari. Mene nnaamweera vareene hiiho, wannatthuneya ottittimihiwa. Vaavo nnaattamelaahu mahooxo matokweene onnatthuneya waaroromela  asitokweene a mmulokoni ni otthara miruku saya. Pooti weera hiyo khaninrowa owera wuulumano esede mundial ni eBetheli, ti vanto oraaya wootthuneya oxuttera waasivela ni waattittimiha niinaano va asitokweene a mmulokoni. Nihipwatthaka ele enkela okhumelela, nintthuneya owehexexaka weera nihiwehexexeke ohimalela wa asinna. Nintthuneya owehexexaka weera Yehova ni Yesu ennaahoolela alopwana ala oororomeleya.

12. Moota heeni yoowehereraayu enkosoopaaya minyuupuwelo sahu?

¹² Ntoko hiihaale ekapasete yaakosoopaaya muru wa nakhotto, yoowehereraahu ya ovuluxiwa ennaakosoopa muupuwelo ahu. Yoowehereraahu yoolipa ennanikhavihera osuwela weera kheyaavo etthu elapo ela enkelaaya onivaha eri yootthuneya. (Afil. 3:8) Yoowehereraahu ennanikhavihera ovirelela okhala oomaaleleya ni oolipa. Ti yeeyo yeereñye ni Wallace ni Laurinda, envara muteko wAfrica. Mpuwa mwa isemana 3, kata mutthu a yaawo aahaayeleela apapawe naari ameyawe mookhwaani. Ni mwaha wa eretta ya koronaviru, khayaaronwe owanyaya weera yakhavihere emusaaya. Wallace ohimme ha: “Yooweherera ya ovinyererihiwa yookikhavihera vantxipale owuupuwelela awo, ohiya moota yaaraaya ehinaayeene okhwa, mene moota awo enrowaaya okhala yavinyererihiwa vale elapo enyowani. Yooweherera ela ennakikhavihera okhala oomaaleleya emaara yeeyo miyo kinriipiwaaka murima vantxipale.”

13. Nintthuneya opaka eheeni weera naakhele munepa wootteela?

¹³ “Muhitxipihe munepa.” (1 Ates. 5:19) Paulo oolikanxera munepa wootteela ni mooro ompattha mmurimani mwahu. Nakhalano munepa wa Muluku, hiyo nnookhalano ikuru weera nipake ele eri yooreera ni ovara muteko wa Yehova. (Arom. 12:11) Vano ninthuneya opaka eheeni weera naakhele munepa wootteela? Hiyo pooti ovekela munepa wootteela, omusoma Biblya ni weerela eparte mareherero a Yehova. Opaka eyo nnoorowa okhalano “sowima sa Munepa.”—Agal. 5:22, 23.

14. Nintthuneya osepa eheeni weera nivirelele waakhele munepa wootteela wa Muluku? (Nwehe efootu.)

 ¹⁴ Yehova anivaha vale munepaawe wootteela, ‘nintthuneya wiilipiha weera nihitxipihe munepa.’ Yehova onnavaha munepaawe wootteela, atthu ale arinono miyuupuwelo sootteela ni empaka itthu sooreera. Owo khanaavaha munepaawe wootteela ale ammakela wuupuwelaru itthu soonanara naari empaka itthu seiyo owo ohinaakhulelaawe. (1 Ates. 4:7, 8) Opwaha mwa yeeyo, weera nivirelele waakhela munepa wootteela wa Yehova, nintthuneya otthara miruku ‘oohiveha iprofesiya’. (1 Ates. 5:20) ‘Iprofesiya’ iyo sinhela mpuwa mitthenka Muluku onnivahaawe moorweela mwa munepaawe wootteela woohima sa nihiku na Yehova ni waakuveya waya mahiku oomalihera. Hiyo khannuupuwela weera Harmagedoni onnapisa ophiya. Mene opwaha wuupuwela hiihaawo, hiyo ninnaroromela weera Harmagedoni onoophiya. Ninnapaka eyo nivirelelaka okhalano “makhalelo òttela ni òmuttittimiha Muluku” mahiku ootheene.—2 Ped. 3:11, 12.

15. Ninkela osepa moota heeni owokiwa ni soohimmwa soowoottha sa Mademoniyu? (1 Atesalonika 5:21)

¹⁵ Muhoolo amwiittani a Muluku enoorowa ohima: “Murettele ni witthala!” (1 Ates. 5:3) Ni Mademoniyu enoorowa omisa-misa soohimmwa iya soowootha elapo yootheene ni atthu antxipale enoowokiwa. (Apok. 16:13, 14) Ankha hiyo? Hiyo khaninrowa owokiwa wakhala weera ‘ninnawehexexa soothesene’. (Mmusome 1 Atesalonika 5:21.) Masu etaphulelinwe ooweera “nwehexexe” ennavariheliwa tho muteko owehexexa maluku ootthuneya. Tivanto hiyo, nintthuneyaahu owehexexa itthu sootheene nniiwaahu naari ninsomaahu weera noone waari weera ti seekhaikhai. Eyo yaari yootthuneya wa atesalonika nave ti yootthuneya wa hiyo tho olelo va, otepaxawene maxupo matokweene enaattamelaya. Ohiya okhala masikiini naakhulelaka itthu sootheene atthu enhimaaya, ontthuneya weera nivariheleke muteko muupuwelo ahu weera noone waari weera ele ninsomaahu ekhaikhai. Ninrowa opaka eyo nimusomaka Biblya nave niwehaka soohimmwa sa mareherero ni niwehaka ele mareherero a Yehova enhimaaya. Wakhala weera hiyo nnoopaka eyo, khaninrowa owokiwa ni Mademoniyu.—Mir. 14:15; 1 Tim. 4:1.

16. Ninroromela eheeni weera enimweereya muhoolo, ni etthu heeni nintthuneyaahu opaka?

¹⁶ Hiyo noosuwela weera egrupu ya arumeyi a Muluku, enoorowa ovuluwa mmahooxoni matokweene. Mene khanisuwenle enrowa omweerela mutthu ti mutthu a hiyo. (Yak. 4:14) Nihipwatthaka waari weera maxupo matokweene enrowa oniphwanya nikhwiiye naari nreene akumi, navirelela okhala oororomeleya wa Yehova owo onoorowa onivaha ekumi yoohimala. Asinna oothanliwa enrowa okhala ni Yesu Kristu wiirimu, ni atthu a nikhola nikina enrowa okhalaka mparadiso elapo yela ya vathi. Ti vanto, nintthuneyaahu owehexexaka yoowehereraahu yooreera ni okhala oolikaneene weera nihiku na Yehova nniphwanye oolikaneene.