1-2. Moovarihana ni Nsalmu 25:14, etthu heeni nintthuneyaahu opaka weera nikhaleno onthamwene woolipa ni Yehova?

 WA MOONELO anyu mukhalelo heeni wootepa otthuneya asinthamwene entthuneyaaya okhalano? Moohihovela nyuwo mwaarowa weera asinthamwene oosivelana ontthuneya okhaviherana mukina ni mukhwaawe. Waarowa okhala wooxupa nyuwo weera mukhalelo wootepa otthuneya variyari wa asinthamwene woovana. Mene ntoko enooniheraaya yoolepa ya mwaha ola onthokororiwa, ale entthuna okhalano onthamwene woolipa ni Yehova ‘ontthuneya omoova.’—Musome Nsalmu 25:14.

² Nihipwatthaka iyaakha ikavi nivirihaahu nimukokhorelaka Yehova, hiyo nintthuneya omoova owo wa moota wooreerela. Menento omoova Muluku ontaphulela eheeni? Ninrowa oxuttera moota heeni omoova Yehova? Eheeni nikhanlaahu ooxuttera woohima sa omoova Yehova ni ntakihero na musatoro Obadiya, namakeya mutokweene Yoyada ni mwene Yowasi?

3. Muthalihe moota heeni woova okhanlaaya woonikosoopa?

³ Ikwaha sintxipale ninnoova opaka etthu mwaha wooweera noosuwela weera napaka etthu eyo pooti okhumelela maxupo. Woova ntoko iwo pooti onikhavihera opaka soothanla sooreera. Mwa ntakihero, woova omorela munlittini moowiixera pooti oneeriha oheetta muxerexere mwa nlitti. Woova wahu wiivoreya onnaneeriha osepa opaka etthu yeera enivoreye.  Woova omunyoonyiha nthamwene ahu nimmusivelaahu pooti onikhavihera osepa opaka etthu yaakela omunyoonyiha.

4. Satana ontthuna weera hiyo nuupuweleke eheeni?

⁴ Satana ontthuna weera hiyo nimooveke Yehova wa moota woonanara. Owo ontthuna weera hiyo nuupuweleke ntoko hiihaale Elifazi uupuwelaawe, weera Yehova toonyoonyiwa ikwaha sootheene, toowinlela ikukuttula ni khavanwereya omuhakalaliha. (Yobi 4:18, 19) Satana ontthuna weera hiyo nimoovekexa Yehova ni ohiya onvarela owo. Weera nsepe muraakho owo hiyo nintthuneya wunnuwihera mukhalelo ahu woomoova Yehova mooreerela.

5. Omoova Muluku ontaphulela eheeni?

⁵ Omoova Yehova ontaphulela omusivela ni ohipaka etthu eri poothe enkela onanariha onthamwene ahu nuuwo. Mwa ntakihero, Yesu tho ‘annamoova Muluku.’ (Aheb. 5:7) Menento owo khaamoova Yehova moohireerela. (Yes. 11:2, 3) Mweekhaikhai, owo annamusivela vantxipale Yehova ni annamwiiwelela. (Yoh. 14:21, 31) Hiihaale ntoko Yesu, hiyo ninnamuttittimiha vantxipale Yehova, mwaha noosuwela weera Yehova taxariya, toosuwela, tansivelo ni toowera. Opwaha mwa yeeyo, hiyo noosuwela weera Yehova onnanisivela vantxipale ni itthu hiyo ninpakaahu pooti omusivela naari omunyoonyiha.—Nsal. 78:41; Mir. 27:11.

6. Itthu heeni nikhanlaahu oweha weera nixuttere omoova Yehova? (Nsalmu 34:12. [34:11, NM])

⁶ Hiyo khaniyarinwe ni mukhalelo woomoova Yehova, menento nintthuneya oxuttera weera nikhaleno mukhalelo owo. (Musome Nsalmu 34:12. [34:11, NM]) Moota woopaka eyo ori owehexexa ‘itthu Yehova opattunxaawe’ emaara ninwehexexaahu ‘itthu opattunxawe,’ ninnawera woona osuwela wawe, owera wawe ni nsivelo oraaweno ni hiyo. Nto eyo ennantxeerera omusivela ni omuttittimiha wahu. (Arom. 1:20) Murokora mmoha oneeriwa Adrienne ohimme ha: “Emaara miyo kinwehexexaaka itthu Yehova opattunxaawe kinnawera woona osuwela wawe ni eyo ennakeeriha miyo woona weera owo oosuwela etthu yooreera wa miyo. Okhala weera Yehova Mpattuxaaka, mwaha wa heeni keeraaka kipake etthu yeera enanarihe onthamwene aka nuuwo? Miyo nkintthuna opaka etthu nkela onanariha onthamwene aka ni Yehova.” Nyuwo munoonela hayi wiihiyera etempu esemana ela weera muupuwelele itthu Yehova opattunxaawe? Opaka eyo enimookhaviherani waatxeererera nttittimiho ni nsivelo muraanyuno ni Yehova.—Nsal. 111:2, 3.

7. Mavekelo enrowa onikhavihera moota heeni omoova Yehova?

⁷ Moota mukina woowoonihera weera ninnamoova Yehova ori ovekela veeli-veeli. Ovekela veeli-veeli, onoonikhavihera omoona Yehova okhala eekhaikhai, ni emaara nnanvekelaahu ikuru weera nivilele maxupo ahu, hiyo ninnoona nikhavihero nawe ni owera wawe. Ni emaara nimmuxukurelaahu mwaha wa mukuttho wa mwana awe hiyo ninnuupuwelela moota owo onnisivelaawe. Ni emaara ninvirihaahu maxupo ni nnanvekela nikhavihero Yehova weera nivirihe maxupo awo, hiyo ninnoona usuwela wawe. Mavekelo ntoko ala ennanikhavihera wantxeerera ntthuno noolakela onvarela ni ohipaka etthu yeera enanarihe onthamwene nraahuno nuuwo.

8. Eheeni enrowa onikhavihera ohiyelela omoova wahu Yehova?

⁸ Weera nihiyelele omoova wahu Yehova, nintthuneya omusoma Biblya ni yootthuna oxuttera ni matakihero ooreera naari  oonanara. Vano nrowe noone matakihero arummwa eeli a Yehova, Obadiya yoowo aari musatoro a empa ya Akhabi ni namakeya mutokweene Yehoyada. Avinyaka, nnoorowa osoma woohima sa mwene mmoha eeriwa Yowasi yoowo anvarenle Yehova ni onahiya.

9. Omoova Yehova waamukhavihenre moota heeni Obadiya? (1 Mamwene 18:3, 12)

⁹ Ekwaha yoopatxera Biblya ommuromolaawe Obadiya b, onhima ha: “Obadiya ànamòva Muluku vantxipale.” (Mmusome 1 Mamwene 18:3, 12.) Woova iwo waamukhavihenre moota heeni Obadiya? Noosuwela weera owo aari mulopwana oororomeleya nto mwaha wa yeeyo aathanliwa weera akhale musatoro a empa ya Akhabi. (Munwehe Nehemiya 7:2.) Woova iwo tho wanvaha Obadiya olipa murima ni moohihovela wannatthuneya owo okhalano mukhalelo owo. Mwaha wa heeni? Mwaha wooweera etempu ele aalamulela aari mwene Akhabi ni owo “àhèra yeyo yari yonanara vamaithoni va Yahvéh, votepa onanara wàpwaha makholo awe othene.” (1 Mam. 16:30) Opwaha mwa yeeyo, amwaariye yaamukokhorela Bayali. Owo aaheerera omaliha okokhorela weekhaikhai wIsraeli ni owo aatthuna owiiva anamakeya ootheene a Yehova. (1 Mam. 18:4) Moohihovela Obadiya aamukokhorela Yehova etempu yooxupa.

10. Olipa murima wa Obadiya waamweerinhe opaka eheeni?

¹⁰ Olipa murima wa Obadiya waamweerinhe opaka eheeni? Emaara Yezabeli aattharattharaawe maprofeti a Muluku ni owiiva, Obadiya aawiipithiha maprofeti a Yehova oophiya 100 ni ‘awiipithihaka egrupu ya 50 ni annaatxiha ni maahi ni ephaawu.’ (1 Mam. 18:13, 14) Waari weera Yezabeli aahoonelela etthu ele, moohihovela Obadiya aamwiiviwa. Pooti weeraka Obadiya annoova vantxipale mwaha wooweera owo khaatthuna okhwa. Mene nsivelo aaraaweno ni Yehova ni atthu yaamukokhorela naamweeriha owo opaka etthu yaahela ekumi awe veerisani.

11. Mahikwaano arumeyi a Yehova emmulikanxa moota heeni Obadiya? (Nwehe efootu.)

 ¹¹ Hiihaale ntoko Obadiya, olelo va asinna antxipale enkhala ilapo muteko ahu onkhoottihiwaaya. Asinna awo oosiveleya ennavirelela waattittimiha anamalamulela, menento awo ennanvaha Yehova ele omphwanelaawe ori omukokhorela yooworu! (Math. 22:21) Awosa ennoonihera weera ennamoova Muluku emaara emmwiiwelelaya owo ohiya atthu. (Mit. 5:29) Ni ennavirelela ovara muteko woolaleera ni woonela mithukumano moowiipitheya. (Math. 10:16, 28) Opwaha mwa yeeyo, asinna awo ennapaka ele enweraaya weera yaavahe asinna eyootxa yoomunepani. Nwehe ntakihero na Henri, yoowo onkhala wAfrica weiwo miteko sahu saakhoottihiwaaya khalayi, Henri aahiivelela weera aavaherere asinna iliivuru sahu. Owo ohimme ha: “Miyo mutthu oolosowa, nto mwaha wa yeeyo etthu yaakikhavihenre waakhulela waari nttittimiho ni omoova waka Yehova.” Neereke nyuwo munoowera okhala oolipa murima ntoko Henri? Moohihovela aani, wakhala weera munnamoova Yehova mooreerela.

12. Moota heeni Yehoyada ni amwaariye yoonihenraaya weera yaari oororomeleya wa Yehova?

¹² Namakeya mutokweene Yehoyada annamoova vantxipale Yehova. Nto eyo yaamukhavihera okhala oororomeleya ni okosoopa okokhorela weekhaikhai. Eyo yaahooneya vaavo mwaana a Yezabeli Athaliya, aapatxenraawe olamulela oYuda ahikhalanneene edireitu. Atthu aiwe yannamoova vantxipale Athaliya mwaha wooweera aari oonanara murima ni oowiitthuna ni annatthuna vantxipale okhala pwiyamwene. Nto mwaha wa yeeyo, aawiiva asisulwaawe ootheene weera akwanihere yootthuna awe! (2 Sow. 22:10, 11) Menento musulwaawe mmoha, Yowasi aavuluwa, mwaha wooweera amwaariye Yehoyada , Yohoxeba aamusunka. Nto tihiiha Yehoyada ni Yohoxeba yaakhavihenraaya okosoopa osuulu waarwa wa mwene Davidi. nnaamweera vareene hiiho, Yehoyada aavirelela okhala oororomeleya wa Yehova ni khaahiñye woova omweerihaka opaka etthu yoonanara.—Mir. 29:25.

13. Yowasi akhalanakaru iyaakha 7, Yehoyada oonihenre moota heeni okhala oororomeleya wa Yehova?

¹³ Emaara Yowasi aakhalannaawe iyaakha 7, Yehoyada aahoonihera tho wa naaveeli okhala oororomeleya wa Yehova, owo aakhalano miruku sa moota Yowasi aarowaawe okhala mwene yoowo aari osuulu wa Davidi. Waari weera itthu khasaakhumenle nnene Yehoyada aamwiiviwa. Mene akhaviheriwaka ni Yehova itthu saakhumela nnene. Yehoyada, alevi ni asitokweene akina yaamweeriha Yowasi okhala mwene ni Athaliya aahiiviwa. (2 Sow. 23:1-5, 11, 12, 15; 24:1) Ni Yehoyada “ànpankana onthamwene Yahvéh, mwene ni muloko w’atthu, wera ekhale muloko wa Yahvéh.” (2 Mam. 11:17) Owo tho “Àwàsa tho anamasunka a milako sa Epewe, wera ahivolowe ni mwikho mutthu ori othene.”—2 Sow. 23:19.

14. Mwaha woomuttittimiha Yehova, Yehoyada aatthuvelinwe moota heeni?

¹⁴ Yehova enre ha: ‘Kini kattittimihe ale enkittittimiha.’ Ni yaari ti yeeyo yaakhumelenle ni Yehoyada. (1 Sam. 2:30) Mwa ntakihero, owo aaheeriha weera ilepiwe sooweereya sa Yehoyada mBiblyani weera hiyo nixuttere ni sooweereya iyo. (Arom. 15:4) Ni Yehoyada akhwaakaru, owo aakhalano eparakha yoovithiwa “mmuttettheni mwa Davidi vamosá ni mamwene, niwoko àmwèrela sorera Israeli, Muluku ni Epewe awe.”—2 Sow. 24:15, 16.

15. Eheeni ninxutteraahu ni yooweereya ya Yehoyada? (Nwehe efootu.)

 ¹⁵ Asitokweene a mmulokoni pooti omutakiha Yehoyada ikwaha sootheene enaasaaseraaya moota wookosoopa muloko. (Mit. 20:28) Asinna oowunnuwa pooti oxuttera etthu ni ntakihero na Yehoyada emoovaka Yehova ni evirelelaka okhala oororomeleya. Yehova pooti waavarela muteko awo weera opake yootthunaawe ni owo khanrowa oninyanyala. Opwaha mwa yeeyo, amiravo tho pooti oxuttera ni ntakihero na Yehova yaattittimihaka atthu oowunnuwa otepaxa wene ale emmukokhorela Yehova ovinyera khalayi ntoko hiihaale Yehova aapankaawe ni Yehoyada. (Mir. 16:31) Ootheene hiyo pooti oxuttera etthu ni ntakihero na alevi ni asitokweene yaamukhavihenre Yehoyada. Hiyo pooti waakhavihera moororomeleya ale ‘enhoolela miloko’ niwiiwelelaka.—Aheb. 13:17.

16. Yowasi oonihenre moota heeni weera khaamoova Yehova?

¹⁶ Yehoyada aamukhavihera mwene Yowasi okhala ooreera murima. (2 Mam. 12:3 [12:2, NM]) Nto mwaha wa yeeyo, emaara aaraawe mmiravo Yowasi annamuhakalaliha Yehova, menento Yehoyada akhwaakaru Yowasi annatthara miruku sa atthu yahamwiiwelela Yehova. Yookhumelela aya yaari yooweera awo “yànalapela mikuryo sottela sa Axera ni ittuxittuxi.” (2 Sow. 24:4, 17, 18) Mwaha wa yeeyo, Yehova aariipiwa murima vantxipale. Nnaamweera vareene hiiho, owo “àhàrumihela yawo maprofeti wera ni masu aya ehokolowele  wa yowo . . . , nto khayìweleliwe.” Awosa mpaka khiyaamwiiwelenle Zakariya mwaana a Yehoyada yoowo aari mmusi a Yowasi, mprofeti ni namakeya a Yehova. Yahaari emusi ya Zakariya, Yowasi saano akhwiiyeene, menento Yowasi khuupuwenle eyo mwaha wooweera aari oohixukurela ni aaruma weera Zakariya iiviwe.—2 Sow. 22:11; 24:19-22.

17. Mwaha woohimoova Yehova etthu heeni yaamukhumelenle Yowasi?

¹⁷ Yowasi khaamova Yehova moorerela, nto mwaha wa yeeyo itthu soonanara saamukhumelela. Yehova aahimme ha: “Vahera yawo enekinyokhe, eneyevihiwe.” (1 Sam. 2:30) Nnaamweera Yowasi ‘aakhanleno anakhotto antxipale’ owo aawiniwa ni anakhotto vakhaaneene wAsiria ni ‘yanvulaliha vantxipale’. Emaara anakhotto a wAsiria yaapwanhaaya, Yowasi aahiiviwa ni arumeyi awe mwaha woomwiiva Zakariya. Owo annooniwa okhala oonanaraxa murima mpaka khaavithinwe “mmahiyeni mwa mwene.”—2 Sow. 24:23-25; Nwehe “filho de Baraquias”, na nota de estudo em Mateus 23:35.

18. Moovarina ni Yeremiya 17:7, 8, nintthuneya opaka eheeni weera nihimutakihe Yowasi?

¹⁸ Ntakihero na Yowasi ninnixuttiha eheeni? Mwiri okhalanne mikakaari soohilipa ontthuneya olipiheriwa ni mwiri mukina weera ovirelele weemela. Ntakihero nna ninnanixuttiha weera khanitthuneya omukokhorela Yehova mwaha wooweera emusi ahu ni asinna ennapaka eyo. Naatthunaka okhalano onthamwene woolipa ni Yehova hiyo nintthuneya olipiha omusivela wahu ni omoova wahu wooreerela, nimusomaka Biblya, ophimelela ni ovekela.—Mmusome Yeremiya 17:7, 8; Koh. 2:6, 7.

19. Yehova onnivekela eheeni?

¹⁹ Mweekhaikhai etthu Yehova onnivekelaawe opaka khehiyene ti yooxupa. Etthu owo onnivekelaawe opaka ninphwanya va Koheleti 12:13, oneera: “Omòve Muluku ni okhapelele malamulo awe, okhala wera mutthu ti sothene seiya.” Naamoovaka Yehova wooreerela, hiyo nnoowera oviriha weereriwa ori wootheene ni maxupo enrowa okhumelela muhoolo, ntoko hiihaale Obadiya ni Yehoyada. Kaavo mutthu naari etthu enrowa oniyeleeliha onthamwene nraahuno ni Yehova.