1-2. Hiihaale ntoko Lothi, maxupo heeni makristu envirihaaya mahikwaano?

 VAAVO hiyo nnoonaahu weera atthu a mahikwaano kheneettela malamulo a Muluku, ninniisoona ntoko hiihaale iisoonelaawe Lothi. Owo annariipiwa murima “ni mukhalelo wohisumaliha wa atakhali,” woona weera owo aasuwela weera Tiithi awe a wiirimu onniitta mikhalelo iyo sa atakhali. (2 Ped. 2:7, 8) Nsivelo aaraaweno Lothi ni Muluku ni omoova wawe Muluku wooreerela, waamukhavihera ohitthara mikhalelo sa atthu ale yahaatthara malamulo a Muluku. Hiyo tho, nrukurerinwe ni atthu ahintthara malamulo a Yehova. Nnaamweera vareene hiiho, hiyo pooti ovirelela okhala ootteela va maithoni va Yehova wakhala weera nnoovirelela omusivela Muluku ni oxuttera omoova Muluku wooreera.—Mir. 14:2.

² Weera niwere opaka eyo, hiyo ninnakhaviheriwa ni Yehova. Owo onnavarela muteko eliivuru ya Miruku weera anooperere. Makristu ootheene hiyo, anamwane, alopwana ni athiyana, amiravo ni atthu owunnuwa pooti oxuttera etthu esomaka eliivuru ela.

3. Moovarihana ni Miruku 17:3, nthowa heeni nootthuneya nineeriha okosoopa murima ahu? (Nwehe efootu.)

³ Nthowa nootthuneya ninneeriha okosoopa murima ahu, mwaha wooweera Yehova onnawehexexa murima ahu. Eyo entaphulela weera moohiyana ni atthu akina enwera oweha itthu siri omokoni paahi Yehova onnawera oweha etthu eri mpuwa wa murima ahu. (Musome Miruku 17:3.) Wakhala weera nnoosariha mmurimani mwahu miruku sooreera sa Yehova, owo aneereke onisivela ni onoonivaha ekumi yoohimala. (Yoh. 4:14) Napaka eyo mikhalelo soonanara sa atthu ni soowootha sa Satana khasinrowa onivoleela mwaha wooweera khaninrowa oxikhaka itthu iyo. (1 Yoh. 5:18, 19) Vaavo nimmwaattamelaahu Yehova, omuttittimiha wahu ni omusivela wahu onimwaatxeereya. Hiyo ninnamusivela vantxipale Yehova mpaka nsivelo nno ninnaneeriha osepa opaka yoottheka. Wakhala weera ninnakumanano yooweerera yeera eneerihe opaka yoottheka, hiyo ninnuupuwela ha: ‘Khaiyene ti wooreera  omunyoonyiha mutthu okoonihenre ikwaha sintxipale weera onnakisivela?’—1 Yoh. 4:9, 10.

4. Moota heeni omoova Yehova waamukhavihenraaya murokora Marta?

⁴ Marta murokora mmoha onkhala oCroácia yoowo eererinwe opaka yoottheka ya okonihana woohireerela, ohimme ha: “Wa miyo, waakixupa wuupuwela nnene ni ohiya wuupuwela yootthuna ya opaka yoottheka. Mene omoova waka Yehova waakikosoopa.” b Omoova Yehova waamukhavihenre hayi Marta? Marta annaphimelela maxupo yeera ekhumelele wakhala weera anpaka yoottheka eyo. Hiyo nintthuneya wuupuwelela etthu emoha-moharu. Hiyo nintthuneya wuupuwelela weera etthu yootepa onanara oriipiha murima wa Yehova ni oyeleela eparakha yoomukokhorela mahiku ootheene.—Eph. 6:5, 6.

5. Yooweereya ya Léo ennixuttiha eheeni?

⁵ Hiyo naamoovaka Yehova, ninniikosoopa ni khannaasaasera mathowa weera nikhaleno mikhalelo soonanara. Léo onkhala oCongo, ooxuttera etthu. Sivirakaru iyaakha 4 abatizinweene, owo aapatxera otthekula ni asinthamwene ehimmukokhorela Yehova. Owo uupuwela weera, wakhala weera khampaka itthu soonanara khawaari woonanara okhalano asinthamwene ehimmukokhorela Yehova, uupuwela weera khaakela omutthekela Yehova. Mene evinreene etempu vakhaaneene asinthamwene ale oohireera yaamweeriha Léo opatxera ohapaliwa ni okonihana woohireerela. Nto aapatxera wuupuwela ele aaxuttenraawe ni asipapawe ni moota aahakalalaawe emaara anvarelaawe muteko Yehova. etthu heeni yaakhumelenle? Aattharuwa ni aahiya opaka itthu soonanara. Akhaviheriwaka ni asitokweene a mmulokoni ni aatthikela onvarela muteko Yehova. Mahikwaano owo toohakalala ni onvara ntoko piyoneru oothanleya ni mutokweene a mmulokoni.

6. Athiyana a moota heeni Miruku ekapiitulu 9 onwuulumaawe?

⁶ Vano nrowe nthokorore ekapiitulu 9 ya Miruku, vaavo nimphwanyaahu yoohima woohima sa athiyana eeli. Muthiyana mmoha onthoonyera  ololo ni muthiyana mukina onthoonyera miruku seekhaikhai. (Munwehe tho Aroma 5:14; Agalata 4:24.) Naathokororaka ekapiitulu ela, muupuweleke weera elapo ya mahikwaano khayaanoono moonelo wooreera woohima sa okonihana ni pornografia. (Aef. 4:19) Ti vanto, oraaya wooreera omoova Muluku wooreerela ni osepa itthu sootheene soonanara. (Mir. 16:6) Ti vanto, ootheene hiyo, alopwana ni athiyana nnoowera ottottela mureerelo ekapitulu ela. Athiyana ooweeli ala enromoliwa va Miruku, ennaawopa ale ‘ehirino miruku.’ Onkhala ntoko wiitthana aneera ha: ‘Nkarwani, owaani mutxeke mukatthe aka.’ (Mir. 9:1, 5, 6, 13, 16, 17) Yoole ori nwopelo munkelaanyu waakhulela yookhomelelaaya enkela okhala yoovirikana.

7. Moovarihana ni Miruku 9:13-18, eheeni enkela okhumelela wakhala weera nnimwaakhulela nwopelo wa muthiyana oololo? (Nwehe efootu.)

⁷ Woopatxerani ninkela woona nwopelo wa “muthiyana òlolo” onpakaawe. (Musome Miruku 9:13-18.) Owo khanoona wuuliha muru waawopa atthu ehikhanleno miruku, aweerelaka: ‘Murwe wa miyo’ enkhumelelaka eheeni? ‘Mpaani mwa muthiyana ole ankhalamu alipa a wokhwani.’ Apaale nyuwo munuupuwelela weera eliivuru ya Miruku ninnaphwanya maphwanaphwaniho ntoko ala. Hiyo ninnoopereriwa omusepa “muthiyana mmalapo” ni “muthiyana namararuwa”. Ni ninnalopoliwa weera neereliwaka weera ‘empa ya namararuwa ennakhuruwela wokhwani.’ (Mir. 2:11-19) Miruku 5:3-10 onnantxentxeriha tho woohima sa “muthiyana mmalapo” ni onhima weera “mavalo awe ennaroiha munlittini.”

8. Yoothanla heeni nintthuneyaahu opaka?

⁸ Ale ammwiiwelela “muthiyana òlolo” entthuneya othanla waari weera animwaakhulela nwopelo wa muthiyana owo kapena hooye. Apaale hiyo tho pooti weera nintthuneya opaka yoothanla emoha-moharu. Mwa ntakihero, eheeni ninkelaahu opaka wakhala weera mutthu onneerera oneeriha opaka yoottheka ya okonihana woohireerela naari wakhala weera nookumanano efootu ya pornográfia?

9-10. Mathowa heeni nraahuno anneeriha osepa okonihana woohireerela?

⁹ Hiyo nookhalano mathowa enneeriha osepa okonihana woohireerela. “Muthiyana òlolo” oneera: “Mahi òwiyiwa ti makithi.” Maahi heeni owiiyiwa makithi enhimmwa va? Biblya onnalikanxera okonihana wa ale ethelanne ni maahi makithi. (Mir. 5:15-18) Mulopwana ni muthiyana ethelanne moovarihana ni nlamulo, pooti ottottela mureerelo yoovaha empakiwa ni ale ethelanne paahi. Mene “Mahi òwiyiwa” toovirikana. Maahi awo oowiiyiwa pooti ohimmwa okonihana woohireerela naari wookhoottihiwa.  Atthu enkonihana woohireerela empaka eyo yiipithihaka ntoko hiihaale namwiiya oneereraawe wiiya ahooniwaka ni mutthu. Ni awo enuupuwela weera atthu akina khenkela woonelela ele empankaaya, nave enoonasa weera “Mahi òwiyiwa” enoovirelela okhala oosiva. Ti woowoopiha wuupuwela hiiha! Mwaha wooweera Yehova onnoona itthu sootheene. Khayaavo tho etthu yooreera va maahi “makithi.” Moohihovela oyeleela onthamwene ni Yehova etthu yoovoreya. (1 Akor. 6:9, 10) Mene khaiyene ti yeeyoru yoovoreya.

¹⁰ Okonihana woohireerela pooti oweerihani nyuwo woona wuuliha muru, ni ohiisoona okhala oovareleya muteko. Ohiya yeeyo paahi, pooti orupala naari onanariha ohiiwanana wa veemusini vanyu. Moohihovela, etthu yooreera opaka ori ohaakhulela nwopelo wa muthiyana oololo. Ohiya paahi oyeleela onthamwene ni Yehova, ale enkonihana woohireerela pooti ovala eretta naari okhwa. (Mir. 7:23, 26) Miruku 9:18 ommaliha ekapitulu ela ni masu ala: “Òwopiwa awe annakhuruwela mowixani mo Jehena.” Noonaka weera nwopelo ola wa muthiyana oololo onkeliha wookhwaani, mwaha wa heeni atthu antxipale enaakhulelaaya?—Mir. 9:13-18.

11. Mwaha wa heeni omoonela pornográfia oraaya woowoopiha?

¹¹ Etthu emwaramwareñye mahikwaano, nintthuneyaahu osepa, pornografia. Akina enuupuwela weera omoonela pornografia khaiyene ti woonanara. Mene ekhaikhai ti yooweera pornografia onnakumihera maxupo mantxipale, omoonela pornográfia ennamweeriha mutthu ohittittimiha ni ohaattittimiha atthu akina ni eviisiyu yooxupa ohiya. Mutthu amoona pornografia vale, onnakhala wooxupa okumiha mmuupuweloni etthu ele mutthu wonnaawe. Opwaha mwa yeeyo, pornografia khammaliha yootthuna ya okonihana mene onimweera waatxeerera. (Akol. 3:5; Yak. 1:14, 15) Nto mwaha wa yeeyo, atthu antxipale emmoonela pornográfia ennapaka yoottheka ya okonihana woohireerela.

12. Ninkela wiikosoopa moota heeni ni ifootu seera sineerihe okhalano muupuwelo wootthuna okonihana?

¹² Etthu heeni mukristu ontthuneyaawe opaka wakhala weera yookhumelela efootu ya pornográfia mutelefoonini naari mucomputadoreni mwawe? Ontthuneya ohiya oweha moowaakuveya. Onkela okhala wookweya opaka eyo wakhala weera hiyo ninnuupuwelela weera etthu eri yootepa otthuneya mweekumini mwahu onthamwene ahu ni Yehova. Ifootu sikina pooti ohikhala pornográfia, mene ti saatthu oohiwara nnene. Mene ifootu iyo pooti onuupuweleliha yootthuna ya okonihana. Mwaha wa heeni nintthuneyaahu osepaka ifootu ntoko iyo? Mwaha wooweera khanintthuna wuupuwela etthu naari opaka etthu yeera eneerihe opaka yoottheka ya okonihana woohireerela. (Math. 5:28, 29) Mutokweene mmoha a mmulokoni onkhala oTailândia, oneeriwa David, ohimme ha: “Miyo kinuupuwela ha: ‘Nnaamweera ifootu iya sihikhanleene sa pornográfia, neereke Yehova aamuhakalala okoona kiwehaka ifootu sene seiya?’ Wuupuwela moota ola onnakikhavihera opaka soothanla sooreera.”

13. Etthu eheeni enikhavihera opaka soothanla sooreera?

¹³ Woova wahu opaka etthu eri poothe yeera emunyoonyihe Yehova onnaneeriha opaka soothanla sooreera. “Erimarima ya miruku ti omoova Yahvéh,” naari neere, omoova Yehova miruku soopatxera. (Mir. 9:10) Eyo ennooneya woopatxerani wa ekapiitulu 9, ya Miruku vaavo ninsomaahu woohima sa ‘miruku seekhaikhi’, seiyo sinthoonyera muthiyana mukina.

14. Nwopelo heeni ninphwanyaahu va Miruku 9:1-6?

¹⁴ Musome Miruku 9:1-6. Va ninnoona nwopelo wa Yehova yoowo ori Mpattuxa ahu ni owo naapwiipwi a osuwela. (Mir. 2:6; Arom. 16:27) Iversikulu iya sinuuluma woohima sa empa etokotoko erinono a marimpu 7. Empa ela  etokotoko ennanikhavihera wiiwexexa weera Yehova toovaha ni onnawaakhela atthu ootheene entthuna oxuttera woohima sa owo ni okhala a miruku.

15. Yehova ontthuna weera nipakeke eheeni?

¹⁵ Yooweereya ya Miruku ennamuuluma muthiyana oovaha onreherera yootxa yintxipale, evinyu ni onnahela va mesa. Muthiyana ola onthoonyera ‘miruku seekhaikhai’ ntakihero na muthiyana ola nri va Miruku ekapiitulu 9 ninnanoonihera moota Yehova oraawe oovaha. (Mir. 9:2) Ohiya eyo paahi, moovarihana ni iversikulu 4 ni 5: ‘owo onnaweerela ale ehikhanleno miruku ha: ‘Nkarwani mutxe mukatthe aka’ mwaha wa heeni nintthuneyaahu waakhulela nwopelo ola? Mwaha wooweera Yehova ontthuna weera anamwane awe ekhaleke a miruku. Owo ontthuna onikosoopa. Khantthuna weera nxuttereke etthu epatxenreene oneereela etthu yoonanara. Napaka eyo nnookela osepa oriipiwa murima ni ottharuwa. Ti vanto owo “onàsunkera anaxariya iseru.” (Mir. 2:7) Wakhala weera nnoomoova Yehova wooreerela nneereke otthuna omuhakalaliha. Hiyo nneereke ohakalala mweekumini mwahu mwaha woowiiwelela miruku sawe sootheene ninsommaahu.—Yak. 1:25.

16. Omoova Yehova waamukhavihenre moota heeni Alain opaka yoothanla ya miruku ni etthu heeni yaakhumelenle mwaha woopaka eyo?

¹⁶ Moone moota omoova Muluku waamukhavihenraaya Alain opaka yoothanla yooreera. Alain yoowo ori mutokweene a mmulokoni ni onvara muteko weeprusoore ohimme ha: “Makoleegaaka yuupuwela weera iviidiyu sa pornográfia sannaxuttiha vantxipale woohima sa okonihana.” Mene Alain aasuwela weera eyo khaiyene yaari ekhaikhai. Owo ohimme ha: “Woona weera miyo kinnamusivela ni kinnamuttittimiha Yehova, miyo nkaakhulenle woonela iviidiyu iye. Ni kaahaaleela makoleegaaka mwaha wa heeni kahoonelaka iviidiyu iye. Alain aavarela muteko ‘miruku sekhaikhai’, sa ‘weettela iphiro sooloka’. (Mir. 9:6) Maprusoore makina waahaasivela moota munna ole aakhunlaawe ni akina ayaawo aapatxera omusoma Biblya ni woonela mithukumano.

17-18. Mareeliho heeni enkhalaayano ale enaakhulela nwopelo wa “miruku sekhaikhai”, ni atthu awo enweherera eheeni muhoolo? (Nwehe efootu.)

¹⁷ Yehova onnavarihela muteko matakihero meeli aasithiyana ale, weera anoonihere moota wookhalano yooweherera yoohakalaliha. Ale enaakhulela nwopelo wa “muthiyana òlolo” enaasaasa soosivela sa erutthu ‘soosiva’ simpakiwa moowiipittiha ntoko okonihana woohireerela. Awo enkhala yeeraka siivaavaru khenuupuwela itthu sineera saakhumelele muhoolo mwaha wa soopaka saya iyo. Etthu enkhumelela ti yooweera ekumi moota eyo “emalela mowixani mo Jehena.”—Mir. 9:13, 17, 18.

 ¹⁸ Mene ale enaakhulela nwopelo a muthiyana a miruku naari neere, ‘miruku seekhaikhai’ etthu enkela waakhumelela ti yoovirikana! Muthiyana owo onnareherera yootxa yintxipale ni itthu sootheene atthu entthunaaya weera evirelele omwaattamela Yehova. (Yes. 65:13) Moorweela mwa mprofeti Yesaya, Yehova ohimme ha: “Mwìwemo vano, anyi, mukiwiriyaneke, wera mutxeke sosiva ni munep’anyu ovone sonuna.” (Yes. 55:1, 2) Naapakaka eyo ninoonihera weera ninnasivela ele Yehova onsivelaawe ni wiitta ele owo oniittaawe. (Nsal. 97:10) Ninnahakalala waawopa atthu akina oxuttera tho ‘miruku sekhaikhai’. Onkhala ntoko hiyo ninkhuwela vathokani vorakama va muttetthe neeraka ha: ‘Ohirino miruku arwe wa miyo!’ Mareeliho hiyo nimphwanyaahu ni atthu anaakhulela nwopelo owo khemmala ni ta mahiku ootheene ni ennanikhavihera otthara ephiro yeekhaikhai.—Mir. 9:3, 4, 6.

19. Moovarihana ni Koheleti 12:13, 14, yoolakelaahu ekhaleke tiivi? (Nwehe equaadru “ Itthu sooreera sinkhumelela mwaha woomoova Muluku.”)

¹⁹ Mmusome Koheleti 12:13, 14. Omoova wahu Yehova onoonikhavihera ovirelela otthara malamulo a Muluku ni okhala oolipa moomunepani mahiku ala oomalihera. Nrowe naawope atthu antxipale weera exuttere ‘miruku seekhaikhai.’ Hiyo nimpaka eyo mwaha wooweera ninnamoova Yehova wooreerela ni mwaha wooweera ninnamusivela ni murima ahu wootheene.