1. Eheeni yaakhavihenre arumeyi a Yehova ovirelela omukokhorela yoowo nnaamweera yaaviriha maxupo mantxipale?

 BIBLYA onhima weera mahiku ala ninkhalaahu, “ehuhu yowopopiha.” (2 Tim. 3:1) Ohiya paahi maxupo ninvirihaahu elapo ela, arumeyi a Yehova ennaviriha maxupo a otthara-tthariwa. Vanonto, eheeni enrowa onikhavihera ovirelela omukokhorela Yehova nnaamweera nikumanakano maxupo mantxipale? Nthowa nimoha, mwaha wooweera hiyo noosuwela weera Yehova “Muluku mukumi.” — Yer. 10:10; 2 Tim. 1:12.

2. Etthu heeni nisuwenlaahu woohima sa Yehova ennilipiha vantxipale?

² Yehova mutthu a ekhaikhai, owo onnanikhavihera emaara yeeyo ninvirihaahu maxupo ni ikwaha sootheene owo onnasuwela moota woonikhavihera. (2 Sow. 16:9; Nsal. 23:4) Emaara yeeyo nnuupuwelelaahu weera Muluku ahu onnaxupeya vantxipale ni hiyo ni weera ikwaha sootheene ontthuna onikhavihera, hiyo ninnakhalano ikuru weera niwere oviriha maxupo eri poothe enkhumelela. Vano nrowe noone moota eyo yaaraaya yeekhaikhai wa mwene Davidi ni arumeyi akina a Yehova.

3. Eheeni Davidi aatthunaawe ohima vaavo eeraawe “Yahvéh akhalé”?

³ Davidi aamusuwela vantxipale Yehova ni annamuroromela yoowo. Emaara aatthara-tthariwaawe ni amwiittani awe omuhela mpuwa mwene Sawuli, Davidi aahinvekela Yehova nikhavihero. (Nsal. 18:7 [18:6, NM]) Vaavo Yehova aakhunlaawe nivekelo nawe ni aamukhavihenraawe, Davidi aaheera: “Yahvéh akhalé!” (Nsal. 18:47 [18:46, NM]) Etthu heeni Davidi aatthunaawe ohima ni masu ala? Ereferensiya emoha ehimme weera, Davidi uuluma moota aaroromelaawe weera Yehova “Muluku mmoha paahi a ekhaikhai ni ikwaha sootheene onnaakhavihera arumeyi awe.” Mwaha wa sookumanano sawe, Davidi annasuwela weera Yehova annamukosoopa ikwaha sootheene ni annaweha itthu aavirihaawe ni aari oolikaneene omukhavihera, tiyeeyo yaamukhavihenre Davidi ovirelela omukokhorela ni onvuwiha Yehova. — Nsal. 18:29, 30, 50 [18:28, 29, 49, NM].

4. Mwaha wa heeni oraaya wootthuneya okhalano nroromelo weera Yehova Muluku mukumi?

 ⁴ Ororomela weera Yehova Muluku mukumi, etthu enrowa onikhavihera ovirelela onvarela mwa nthiti. Nave-tho enoorowa onivaha ikuru weera nivirihe yooweerera eri poothe, ni ovirelela opaka ele ninweraahu mmutekoni mwa Yehova ni ovirelela omwaattamela.

MULUKU MUKUMI ONOOROWA WOOLIPIHANI NYUWO

5. Eheeni enrowa waatxeerera nroromelo nahu vaavo ninvirihaahu maxupo? (Afilipi 4:13)

⁵ Hiyo pooti oviriha maxupo eri poothe, pooti okhala matokweene naari makhaanini, wakhala weera ninnuupuwelela weera Yehova Muluku mukumi ni weera ikwaha sootheene ori oolikaneene weera anikhavihere. Ekhaikhai ti yooweera, wa Yehova khiyaavo maxupo eri matokweene, mwaha wooweera owo Muluku oowera sootheene ni pooti onivaha ikuru ninhaawelaahu. (Mmusome Afilipi 4:13.) Tivawonto, ootheene hiyo pooti oviriha maxupo eri poothe ni nroromelo. Vaavo nnoonaahu weera Yehova onnanikhavihera mpaka mwa maxupo makhaanini, nroromelo nahu ninnalipa weera owo onoorowa onikhavihera mwa itthu sooxupa.

6. Eheeni yeereñye ni Davidi emaara aaraawe mmiravo yeeyo yaamweerinhe owo olipiha nroromelo nawe wa Yehova?

⁶ Moone ikwaha piili Davidi aalipinhaawe nroromelo nawe wa Yehova. Emaara Davidi aaraawe mmiravo atxihaka iputtiputthi sa apapawe, kusupa ni kharamu yaavara eputtiputthi. Mwa ikwaha iya piili, Davidi aatthimakela inama iye ni aahaakiha eputtiputthi ele. Menento Davidi khuupuwela weera aawera opaka etthu ele mwaha wa ikuru sawe, mene owo aasuwela weera Yehova tanvanhe ikuru ni olipa murima weera apake etthu ele. (1 Sam. 17:34-37) Davidi khaattuwanle ikwaha iya piili. Emaara uupuwelelaawe etthu yeereñye, nroromelo nawe wa Yehova nannalipa weera Muluku mukumi aamurowa omukhavihera ikwaha sootheene eeraawe ahaaweleke nikhavihero muhoolo.

7. Eheeni Davidi aawehexexaawe, ni moota heeni eyo yaamukhavihenraaya onwina Goliyathi?

⁷ Noovira etempu, apaale vaavo Davidi aaraawe mmiravo, owo aarowa nipuro nenno yaaraayawo anakhotto a Israeli. Aphiyakaru aahoona weera anakhotto ale yannoova mwaha wooweera nakhotto mutokweene nfilisti eeriwa Goliyathi ‘annaatannya anakhotto a Israeli.’ (1 Sam. 17:10, 11) Anakhotto ale yannoova mwaha wooweera yaaweha wunnuwa wa Goliyathi ni moota aawoopopihaawe. (1 Sam. 17:24, 25) Mene Davidi annanweha mwa mukhalelo woovirikana. Davidi annasuwela weera Goliyathi ohiya paahi waatannya anakhotto a Israeli, owo-tho aatannya “anakhotto a Muluku mukumi.” (1 Sam. 17:26) Davidi annamuroromela Yehova. Owo annasuwela weera Muluku yoowo aamukhavihenre emaara aaraawe mukukhuli, aamurowa-tho omukhavihera mwa etthu ele. Davidi annaroromela weera aamukhaviheriwa ni Yehova, mwaha wa yeeyo Davidi aawera owana ni Goliyathi ni ntoko nisuwenlaahu, owo aawina! — 1 Sam. 17:45-51.

8. Eheeni enrowa onikhavihera olipiha nroromelo nahu weera Yehova ikwaha sootheene onoorowa onikhavihera vaavo ninvirihaahu maxupo? (Nwehe efootu.)

⁸ Hiyo-tho pooti oviriha maxupo eri poothe wakhala weera ninnuupuwelela weera Muluku mukumi ikwaha sootheene ori oolikaneene weera anikhavihere. (Nsal. 118:6) Emaara nnuupuwelelaahu etthu apankaawe khalayi, ninnawera olipiha nroromelo nahu nuuwo. Tivawonto, musomeke sooweereya sa mBiblyani sinoonihera moota Yehova aakhavihenraawe arumeyi awe. (Yes. 37:17, 33-37) Opwaha mwa yeeyo, nyuwo pooti osoma sooweereya sa asinna ni asirokora va site jw.org. Sooweereya iya sinnoonihera moota Yehova onaakhaviheraawe arumeyi awe olelo. Nave-tho nyuwo  pooti wuupuwelela etempu yeeyo Yehova ookhavihenraaweni. Ikwaha ikina apaale khaiyene saari itthu sootikiniha ntoko owana ni kusupa naari kharamu. Menento ekhaikhai tiyooweera, Yehova ikwaha sootheene aari ni nyuwo mweekumini mwanyu! Nave tiyoowo oothanliyeni weera mukhale nthamwene awe. (Yoh. 6:44) Nave nyuwo munnawera okhala oororomeleya wa yoowo mwaha wa nikhavihero nawe. Munoonela hayi onvekela Yehova weera ookhavihereni wuupuwelela ikwaha aakhunlaawe mavekelo anyu, ookhavihenraaweni mwa etempu yooreerela ni aaraawe vakhiviru vanyu vaavo mwaavirihaanyu maxupo? Wuupuwelela itthu iya onoorowa wookhaviherani nyuwo ororomela weera ikwaha sootheene pooti omuroromela Yehova.

9. Eheeni nintthuneyaahu wuupuwelela emaara ninvirihaahu maxupo? (Miruku 27:11)

⁹ Omoona Yehova ntoko Muluku mukumi onoonikhavihera-tho woonaka maxupo ahu mooreerela. Moota heeni? Vaavo ninvirihaahu maxupo nintthuneya wuupuwelelaka itthu sootthuneya. Satana onhima weera vaavo ninvirihaahu maxupo, nnoorowa omuhiya Yehova. Moota nnoonelaahu maxupo onnanvoleela Yehova. (Yobi 1:10, 11; musome Miruku 27:11.) Vaavo ninvirelelaahu okhala oororomeleya wa Yehova nnaamweera nivirihaka maxupo, ninnoonihera nsivelo nahu wa Yehova ni ninnoonihera weera Satana namootha. Nankha woohima sa nyuwo? Neereke nyuwo munviriha maxupo ootthara-tthariwa ni anamalamulela, othoiwa musurukhu, ohaakheliwa nnene mmutekoni moolaleera naari maxupo makina? Wakhala weera eyo enneereya, muupuweleleke weera maxupo munvirihaanyu ennoovahani eparakha yoomuhakalaliha Yehova. Menento muhittuwale, Yehova khonrowa woohiyani oviriha maxupo yaawo muhinweraanyu ovilela. (1 Akor. 10:13) Ikwaha sootheene owo onimoovahani ikuru weera nwere owina.

MULUKU MUKUMI ONIMOOTTHUVELANI NYUWO

10. Eheeni Muluku olaihenraawe wa ale eri oororomeleya wa yoowo?

¹⁰ Ikwaha sootheene, Yehova onnamutthuvela mutthu oororomeleya. (Aheb. 11:6) Owo  onnanivaha murettele ni omaaleleya viinaano va ni onoorowa onivaha ekumi yoohima muhoolo. Hiyo ninnamuroromela Yehova nihihovelaka etthu, mwaha wooweera noosuwela weera owo onoonitthuvela ni ookhalano owera woopaka eyo. Nto mwaha wa yeeyo, hiyo ninnapaka ele ninweraahu weera nimukokhorele, ntoko arumeyi akhalayi yaapankaaya. Tiyeeyo Timotheyo aapankaawe. — Aheb. 6:10-12.

11. Mwaha wa heeni Timotheyo aapankaawe ele aaweraawe mmulokoni? (1 Timotheyo 4:10)

¹¹ Mmusome 1 Timotheyo 4:10. Timotheyo aakhalano nroromelo wa Muluku mukumi. Nto owo aapaka ele aaweraawe weera anvarele Yehova ni asinna. Owo aapanke moota heeni eyo? Murummwa Paulo aamooperera okhala mutthu ooxuttiha nnene mmulokoni ni mmutekoni moolaleera. Nave-tho Paulo aamweerela Timotheyo weera avaheke ntakihero nooreera wa asinna amiravo naari oowuuluvala. Nave Timotheyo aahaakhela soothanleliwa sooxupa, seiyo saahela mpuwa ovaha miruku mooluluwanya mene mwa nsivelo wa asinna ale yaahaawela. (1 Tim. 4:11-16; 2 Tim. 4:1-5) Ikwaha ikina, atthu khiyaarowa wiiwexexaka muteko wootheene Timotheyo aapakaawe, mwaha wa yeeyo awo khiyaarowa wooniheraka oxukurela, menento owo annasuwela weera mutthu ootepa otthuneyaxa annasuwela muteko ole Timotheyo aapakaawe, ni aamurowa omutthuvela. — Arom. 2:6, 7.

12. Mwaha wa heeni asitokweene a mmulokoni empakaaya ele enweraaya mmulokoni? (Nwehe efootu.)

¹² Nave-tho asitokweene a mmulokoni olelo va, onnatthuneya ororomelaka weera Yehova onnoona itthu sootheene awo empakaaya ni onnavaha mwiitti. Ohiya paahi ohoolela, oxuttiha ni olaleera, asitokweene akina ennakhavihera muteko wooteka ni waakhavihera atthu enhaawela nikhavihero. Asitokweene akina ennavara egrupu yoowaaxekura aretta naari ennakhavihera ekomisau enkhavihera ospitaale. Asitokweene enkhala oolikaneene weera evare miteko iya, ennasuwela weera muloko ti wa Yehova ohiya wa atthu. Mwaha wa yeeyo awo ennapaka ele enweraaya ni ennaroromela  weera Yehova onoorowa waatthuvela mwaha wa itthu iyo empakaaya. — Akol. 3:23, 24.

13. Moota heeni Yehova onoonelaawe vaavo onnoonaawe niilipiheraka weera ninvarele?

¹³ Khonwereya asinna ootheene ovaraka ntoko asitokweene a mmulokoni. Mene nnaamweera vareene hiiho, ootheene hiyo nnoowera onvaha etthu Yehova. Muluku ahu onnahakalala vantxipale vaavo nimpaka ahu ele ninweraahu weera nimukokhorele. Owo onnaweha soovaha sahu weera nikhavihere muteko wa Omwene wa elapo yootheene nnaamweera sikhalaka sooyeva. Owo-tho onnahakalala vantxipale vaavo onwehaawe wiilipihera wahu weera niwine woova ovenxa moono weera nivahe ekomentaariyu mmithukumanoni. Murima awe onnahakalala vantxipale vaavo onoonaawe weera ninnawera ottuwala etthu yoonanara nipakelinwaahu ni omulevelela munnihu. Nnaamweera nyuwo moonaka weera khamunwera opaka itthu sootheene mwaatthunaanyu ompakela Yehova, muroromeleke weera owo onnavaha mwiitti itthu sootheene mumpakaanyu. Owo onnoosivelani vantxipale, nto mwaha wa yeeyo, owo onimootthuvelani nyuwo. — Luka 21:1-4.

NVIRELELE OKHALA VAKHIVIRU VA MULUKU MUKUMI

14. Moota heeni onthamwene woolipa ni Yehova onnikhaviheraaya ovirelela okhala oororomeleya? (Nwehe efootu.)

¹⁴ Onoorowa okhala wookhweya ovirelela okhala oororomeleya wa Yehova wakhala weera ninnamoona okhala ntoko mutthu. Tiyeeyo yeereñye ni Yosefe. Owo aakhootta okonihana woohireerela mwaha wooweera aasuwela weera eyo yaamurowa omunanara vantxipale Yehova. (Eph. 39:9) Naatthunaka omoona Yehova ntoko mutthu, nintthuneya wiihiyera etempu weera nivaaneleke nuuwo ni osoma masu awe. Napaka eyo onthamwene ahu nuuwo oneereke wunnuwa nihiku nri poothe. Nave hiihaale ntoko Yosefe, nakhalano onthamwene woolipa ni Yehova, khaninrowa opaka etthu eri poothe enrowa ovoreiha murima awe. — Yak. 4:8.

15. Eheeni ninxutteraahu ni ele yeereñye ni ana a israeli weeheweheweni? (Aheberi 3:12)

¹⁵ Ale enttuwala weera Yehova ori ntoko  mutthu, vakhaani-vakhaani awo pooti omuhiya Yehova. Moone ele yeereñye ni ana Israeli emaara yaaraaya weeheweheweni. Awo yaasuwela wera Yehova ookhala, mene yaapatxera ohovela wakhala weera owo aamurowa waakosoopa. Awo yaakoha yeeraka: “Yahvéh òkhala variyari vahu nari hoye?” (Ott. 17:2, 7) Yookhumelela aya tiyooweera, awo yaamurukunuwela Muluku. Menento hiyo khontthuneya okhala ntoko awo nihimwiiwelelaka Yehova. — Mmusome Aheberi 3:12.

16. Moota heeni nroromelo nahu ninrowaaya weereriwa?

¹⁶ Elapo ela ninkhalaahu khonkhweya ovirelela omwaattamela Yehova. Atthu antxipale enhima weera Muluku khakhanle. Nave onkhala ntoko weera atthu yaale ehimmukokhorela Muluku aakhalano ekumi yooreera. Emaara nnoonaahu eyo yeereyaka nroromelo nahu pooti weereriwa. Ekhaikhai weera khaninkela waakhulela weera Muluku khakhanle, mene hiyo pooti ohovela wakhala weera owo onoonikhavihera. Namalepa a Nsalmu 73 aaviriha etthu eyo. Owo aarukurerinwe ni atthu yahaapwattha malamulo a Muluku ni yaapaka itthu saasivela. Mwaha wa yeeyo, owo aapatxera ohovela wakhala weera waari wooreera ovirelela onvarela Yehova. — Nsal. 73:11-13.

17. Eheeni enrowa onikhavihera omwaattamela Yehova?

¹⁷ Eheeni yaamukhavihenre nasalmu otxentxa moonelo awe? Owo aaphimelela etthu yaarowa okhumelela ni ale emmuttuwala Yehova. (Nsal. 73:18, 19, 27) Nave-tho owo annuupuwela mareeliho mootheene aaphwanyaawe mwaha wonvarela Yehova. (Nsal. 73:24) Nave-tho hiyo pooti wuupuwelela mareeliho mootheene Yehova onivanhaawe. Mweerere wuupuwelela moota ekumi anyu yaarowaaya okhala mwahanvarela Yehova. Wuupuwelela itthu iya onoorowa onikhavihera ovirelela okhala oororomeleya wa Yehova nave hiihaale ntoko nasalmu, hiyo nnoorowa ohima ha: “Nto wa miyo, ti orera okhala vakhiviru va Muluku.” — Nsal. 73:28.

18. Mwaha wa heeni nihintthuneyaahu woova etthu enrowa weereya muhoolo?

¹⁸ Hiyo pooti oviriha maxupo eri poothe enrowa okhumelela mweekumini mwahu mahiku ala oomalihera mwaha wooweera hiyo na ‘arumeyi a Muluku mukumi ni a ekhaikhai.’ (1 Ates. 1:9) Yehova mutthu okhanle ni ikwaha sootheene onoorowa onikhavihera. Owo ikwaha sootheene khalayi, aahaakhavihera arumeyi awe, nave onoorowa opaka etthu emoharu olelo va. Moohipisa va, hiyo nnoorowa oviriha maxupo matokweene, mene khaninrowa okhala meekhaahu, Yehova onoorowa okhala vakhiviru ni hiyo. (Yes. 41:10) Tivawonto, ootheene hiyo pooti ‘osareya nroromelo ni weera: ‘Apwiya ti ekhavihero aka, nkinòva etthu.’’ — Aheb. 13:5, 6.