1. Moovarihana ni Nsalmu 18:47 [18:46, NM], mwene Davidi omulikanxenre Yehova ni eheeni?

 HIYO ninkhala elapo ela maxupo entxentxaaya ekumi ahu moowaakuveya. Mene hiyo ninnamuxukurela vantxipale Yehova mwaha woonikhavihera. Yoosoma evinre hiyo nohuupuxeriwa weera Yehova Muluku mukumi nave weera owo ikwaha sootheene ari oolikaneene weera anikhavihere. Vaavo Yehova ompakaawe eyo hiyo ninnoonelela weera ‘Yehova ookhala.’ (Musome Nsalmu 18:47 [18:46, Tradução do Novo Mundo].) Mene mwene Davidi alepakaru eyo, owo oomwiitthana Yehova ‘Mwala aka.’ Mwaha wa heeni ahimakaru weera Yehova ookhala, owo amulikanxenraawe ni etthu ehikhanle ni ekumi ntoko mwala?

2. Eheeni ninrowaahu oxuttera mwa yoosoma ene yeela?

² Mwa yoosoma ene yeela, nnoorowa woona mwaha wa heeni Yehova oniitthaniwaawe okhala mwala, ni eheeni ennixuttihaaya voohima sa Yehova. Nave-tho nnoorowa woona mwaha wa heeni nintthuneyaahu omuroromelaka Yehova ni omwiitthana owo okhala Mwala ahu. Okhwipi waya, nnimoona mikhalelo mikina sa moota wootakiha mikhalelo sa Yehova.

MWAHA WA HEENI YEHOVA ONLIKANXERIWAAWE NI MWALA

3. Mwa mikhalelo heeni Biblya ikwaha sintxipale onvarihelaawe muteko masu oweera “mwala”? (Nwehe efootu .)

³ Biblya onnamulikanxera Yehova ni ‘mwala’ weera anikhavihere osuwela nnene sene mikhalelo sawe. Imaara sintxipale, vaavo arumeyi a Yehova enanvuwihaaya mwaha wa mikhalelo sawe sootikiniha, awo ennamulikanxera Yehova ni mwala. Mbiblyani, emaara yoopatxera Yehova oniitthaniwaawe ‘Mwala’ ti va Olaleya 32:4. Emaara aapakaawe nivekelo, Hana aaheera ‘khaavo ori mwala sawasawa Muluku ahu.’ (1 Sam. 2:2) Habakuki aamwiitthana Yehova “Mwala aka.” (Hab. 1:12) Namalepa a Nsalmu 73 aamwiitthana Yehova “mwala wa murim’aka.” (Nsal. 73:26) Yehova mwaneene ohiilikanxera ni mwala. (Yes. 44:8) Vano, ninkela woona mikhalelo miraru sinoonihera weera Yehova ori ntoko mwala, nave ninkela  oxuttera mwaha wa heeni nintthuneyaahu onwehaka Yehova ntoko ‘Mwala ahu.’ — Ola. 32:31.

4. Mwa mukhalelo heeni Yehova oraawe ntthawelo? (Nsalmu 94:22)

⁴ Yehova ti ntthawelo nahu. Mpuwa mwa epheyo etokweene, hiyo ninnaphwanya okosoopeya munikhukuni. Vamoha-moharu, vaavo ninvirihaahu maxupo mweekumini, Yehova onnanikosoopa. (Musome Nsalmu 94:22.) Yehova onoorowa onikhavihera okosoopa onthamwene ahu nuuwo. Owo onnanroromeliha weera khiyaavo maxupo ninvirihaahu viinaano enrowa okhala wa mahiku ootheene. Mene Yehova oolaihera weera onoorowa opaka itthu ikina: Muhoolo owo onoorowa omaliha etthu eri yootheene enneeriha okhala ooxupeya ni ohaawa. — Ez. 34:25, 26.

5. Moota heeni Yehova onrowaawe okhala mwala wa ntthawelo nahu?

⁵ Mukhalelo mmoha woophwanya ntthawelo na Yehova, ori moorweela mwa nivekelo. Vaavo hiyo ninvekelaahu, Yehova onnanivaha “murettele wa Muluku” yoowo onkosoopa murima ahu ni muupuwelo ahu. (Afil. 4:6, 7) Moone ele yeereñye ni munna mmoha oneeriwa Artem, yoowo aatthukinwe mwaha wa nroromelo nawe. Mulipa ookoha-koha annamukoha-koha ikwaha sintxipale ni owo annamuthokorora moohixariya ni annamoopopiha. Artem ohimme ha, “Ikwaha sootheene owo aakikohaawe, miyo kannanyoonyiheya. . . . Ikwaha sootheene miyo kannanvekela Yehova kivekaka murettele vamurimani vaka ni miruku. Itthu sootheene ole aakikoha-koha aapakaawe, khasaakhumenle nnene ni miyo. . . . Kikhaviheriwaka ni Yehova, waakhala ntoko miyo kaakosoopiwa ni exiri.”

6. Mwaha wa heeni ikwaha sootheene ontthuneyaaya omuroromela Yehova? (Yesaya 26:3, 4)

⁶ Yehova toororomeleya. Hihaale ntoko mwaako naari mwala mutokweene ohinkhumaaya nipuro naya, Yehova tho khonrowa otxentxa, owo ikwaha sootheene ori oolikaneene weera onikhavihere. Nave-tho hiyo pooti omuroromela Yehova mwaha wooweera owo ‘Mwala wa mahiku ootheene.’ (Mmusome Yesaya 26:3, 4.) Yehova ikwaha sootheene owo mukumi. Nave ori oolikaneene okwanihera soolaihera sawe, wiiwa mavekelo ahu ni onikhavihera mwa itthu sootheene ninhaawelaahu. Hiyo pooti omuroromela Yehova mwaha wooweera owo toororomeleya wa ale enanvarela. (2 Sam. 22:26) Owo khonrowa ottuwala itthu sootheene nimpakenlaahu, ni mwaha wa yeeyo onoorowa ontthuvela. — Aheb. 6:10; 11:6.

7. Eheeni enrowa weereya waakhala weera ninnamuroromela Yehova? (Nwehe efootu.)

⁷ Hiyo ninnampaka Yehova okhala Mwala ahu vaavo nimmuroromelaahu. Hiyo ninnaroromela nihihovelaka etthu weera emaara nimmwiiwelelaahu nnaamweera nivirihaka maxupo, eyo enoonikumihera mureerelo. (Yes. 48:17, 18) Emaara nnoonelelaahu weera Yehova onnanikhavihera, nroromelo nahu ni yowo ninnatxerereya. Ni ninnaroromela weera Yehova paahi tonwera onikhavihera emaara ninvirihaahu maxupo eri poothe nihipwatthaka yaareene ooxupa. Imaara sintxipale naavirihaka maxupo nihinweraahu oreherera, ninnoonelela otthuneya waya omuroromela Yehova. Ti yeeyo munna Vladimir oonelenlaawe, owo enre, “Emaara kaaraaka mukadeya ti emaara onthamwene aka ni Yehova waavirelenlaaya olipa. Miyo kooxuttera ovirelela omuroromela Yehova mwaha wooweera kaari meekhaaka ni nkaawera oreherera maxupo awo.”

8. (a) Mwaha wa heeni ninhimaahu weera Yehova khantxentxa? (b) Mwaha wa heeni oraaya wooreera okhala ni Yehova ntoko mwala ahu? (Nsalmu 62:7, 8 [62:6, 7, NM])

 ⁸ Yehova khontxentxa. Hiihaale ntoko mwala mutokotoko, omutthu ni yootthuna ya Yehova khentxentxa. (Mal. 3:6) Vaavo Adamu ni Heva yaamurukunuwenlaaya Yehova, owo khaatxentxale yootthuna awe wa atthu. Murummwa Paulo aahima weera Muluku “khanawerya wiruna mekhaiye.” (2 Tim. 2:13) Eyo entaphulela weera nihipwatthaka etthu enkela weereya naari etthu ekina yeeyo atthu enkelaaya opaka, Yehova khonrowa otxentxa moota ompakaawe itthu, yootthuna awe ni malamulo awe. Hiyo pooti ororomela weera Muluku ahu khontxentxa ni ororomela weera owo onoorowa onikhavihera mwa etempu yooxupa ni okwanihera soolaihera sawe sootheene muhoolo. — Musome Nsalmu 62:7, 8 [62:6, 7, NM].

9. Eheeni nyuwo muxuttenraanyu ni ele yeereñye ni Tatyana?

⁹ Emaara nimphimelelaahu mikhalelo sa Yehova ni yootthuna awe wa atthu elapo ela ya vathi, eyo ennanikhavihera okhala oomaaleleya ni ovirelela okhala oororomeleya emaara ninvirihaahu maxupo. (Nsal. 16:8) Tiyeeyo yeereñre ni murokora oneeriwa Tatyana, yowo aatthukinwe mwaha wa nroromelo nawe. Owo ohimme ha, “Miyo kaari meekhaaka, woopatxerani yaari maxupo. Miyo kaakhulumuwa vantxipale.” Mene muhoolo mwaya vaavo aapatxenraawe ophimelela woohima sa Yehova ni yootthuna awe wa atthu, owo aahoonelela otthuneya waya ovilela sooweerera iye aavirihaawe. Eyo yaamukhavihera okhala oomaaleleya ni okhalano ikuru weera avilele. Owo ohimme ha: “Osuwela mwaha wa heeni saakikhumelelaaya itthu iye, waakikhavihera wuupuwelela weera kaari nipuro nne mwaha wa Yehova. Eyo yaakikhavihera ohiya wiisuupuwela yoomi meekhaaka.”

10. Moota heeni ovinyera viinaano vaava ninrowaahu okhalano Yehova ntoko Mwala ahu?

¹⁰ Hiyo voohipisa va nnoorowa oviriha ehuhu yootepa oxupa, nave nneereke otthuneya omuroromela Yehova opwaha khalayi. Mwaha wa yeeyo ti vootepa otthuneya olipiha nroromelo nahu ni Yehova weera owo onoonivaha nikhavihero nenno ninhaawelaahu weera nivirelele okhala oororomeleya. Ninrowa opaka moota heeni eyo? Nisomaka sooweereya sa mBiblyani sa arumeyi akhalayi a Yehova, nave-tho sooweereya sa mahiku ahu ala sa asinna ni asirokora yaawo yaakhaviherinwe ni Yehova weera evirelele ovilela. Emaara ninsomaahu sooweereya iyo, muupuwele moota Yehova aakhavihenraawe arumeyi awe. Mwiihiyereke etempu weera mphimelele sooweereya iyo, wakhala weera munoopaka eyo, nyuwo munimoona nnene sene weera Yehova ti Mwala anyu.

MUTAKIHEKE MIKHALELO SA YEHOVA

11. Mwaha wa heeni nintthunaahu otakiha mikhalelo sa Yehova? (Nwehe ekwaadru “Sooluluwanya asinna amiravo entthuneyaaya okhalano.”)

¹¹ Mpaka va, nooweha mikhalelo mikina sa Yehova seiyo sinnikhavihera woona mwaha wa heeni Yehova olikanxerinwaawe ni mwala. Vano ninkela woona moota heeni nneeraahu ntakihe mikhalelo iyo. Napaka ele ninweraahu weera nimutakihe Yehova, hiyo nnoorowa waalipiha asinna. Mwa ntakihero, Yesu anvaha Simoni nsina na Kefa (nsina nno nintaphulela “Pedru”), nsina  nno nintaphulela ‘Epedaço ya mwala.’ (Yoh. 1:42) Mwa mukhalelo ola Yesu aahiiwanyeiha weera Pedru aamwaamaaliha asinna a mmulokoni ni olipiha nroromelo naya. Asitokweene a mmulokoni ennalikanxeriwa ni “muttuxi wa mwala worakama.” Eyo entaphulela weera asitokweene a mmulokoni ennaakosoopa asinna mmulokoni. (Yes. 32:2) Ekhaikhai weera, otheene ahu ohiya paahi asitokweene a mmulokoni, ninnatthuneya otakiha mikhalelo sa Yehova ni waalipiha asinna a mmulokoni. — Aef. 5:1.

12. Moota heeni ninrowaahu okhala ntthawelo na asinna?

¹² Mukhale ntthawelo na asinna. Vaavo asinnihu envirihaaya maxupo a erisa naari ekhotto, apaale hiyo nnaatthuneyeke okhala ntthawelo wa asinna awo. Makhalelo a “mahiku òmalihera” eneera enanaraka, moohihovela hiyo nintthuneya okhaviherana. (2 Tim. 3:1) Mene ohiya paahi okhavihera mwa itthu sa weerutthuni, hiyo-tho pooti waavaha nimaaliho ni nsivelo enhaawelaaya. Mukhalelo mmoha woopaka eyo, ori otthekula ni awo omithukumanoni empa ya Omwene ni waavaha nimaaliho enhaawelaaya. Hiyo nintthuna weera muloko ahu okhale wa murettele, mapuro yaawo asinnihu emphwanyaaya olipihiwa ni nsivelo. Hiyo ninkhala elapo yooxupa, yooriira ni yeeyo erino itthu sinniriipiha murima. Nto mwaha wa yeeyo, vaavo asinnihu enrowaaya omithukumanoni hiyo nintthuneya opaka ele ninweraahu weera awo yiisooneke okhala oosiveliwa, oolipihiwa ni oovareleleya.

13. Moota heeni asitokweene a mmulokoni enrowaaya okhala ntthawelo wa atthu akina? (Nwehe efootu.)

¹³ Asitokweene a mmulokoni awo pooti okhala ntthawelo wa asinna ale enviriha maxupo oovirikana. Mpuwa mwa erisa ya ephattu naari eretta, asitokweene moowaakuveya ennapaka mareherero weera yaakhavihere asinna awo. Nave-tho ennanvarihela muteko Biblya weera yaavahe miruku ni waalipiha asinna. Ni asinna awo ennakhala ootaphuwa waavekela nikhavihero asitokweene yaawo enaasuwelaaya okhala ansivelo, oowiiwelela ni eniilipihera weera ewiiwexexeke asinna awo moota eniisoonelaaya.  Asitokweene enoonihera mikhalelo iya, enoorowa oweeriha asinna wiisoona okhala oosiveleya. Mwa mukhalelo ene yoola, onoorowa okhala wookhweya asinna otthara miruku sa asitokweene seiyo sinkhuma mBiblyani. — 1 Ates. 2:7, 8, 11.

14. Moota heeni ninrowaahu woonihera weera hiyo toororomeleya?

¹⁴ Muroromeleyeke. Hiyo nintthuna weera atthu akina ekhaleke ootaphuwa onivekela nikhavihero vaavo envirihaaya maxupo. (Mir. 17:17) Mene eheeni nintthuneyaahu opaka weera asinna awo esuwele weera hiyo atthu oororomeleya? Hiyo pooti opaka ele ninweraahu weera nimutakihe Yehova nihiku ti nihiku. Mwa ntakihero, nikwanihereke ele nlaihenraahu nave nikhaleke oowiisaakuviha. (Math. 5:37) Mene-tho hiyo pooti opaka ele ninweraahu weera nimukhavihere mutthu owo onhaawela nikhavihero, opwaha mwa yeeyo nintthuna okwanihera soothanleliwa sahu mmulokoni moovarihana ni miruku nnaakhelaahu.

15. Mwaha wa heeni asitokweene a mmulokoni oororomeleya eraaya mareeliho a mmulokoni?

¹⁵ Asitokweene a mmulokoni yoovaha ya mmulokoni. Mwa mukhalelo heeni? Emaara asinna enoonelelaaya weera pooti owiitthana asitokweene a mmulokoni emaara entthunaaya nikhavihero, awo ennakhala oomaaleleya. Asinna enniisoona  okhala oosiveleya vaavo enoonelelaaya weera asitokweene a mmulokoni eri oolikaneene waavaha nikhavihero nenno enhaawelaaya. Ni asinna enoovirelela waaroromela asitokweene a mmulokoni emaara enoonelelaya weera asitokweene awo ennanvarela muteko Biblya ni irevista sahu, ohiya ovaha moonelo aya emaara envahaaya miruku. Opwaha mwa yeeyo, asinna ennaaroromela asitokweene a mmulokoni yaale ehinaaleela atthu akina isiiri saya ni enkwanihera seiye enlaiheraaya.

16. Mwaha wa heeni oraaya wootthuneya ikwaha sootheene otthara miruku sa Yehova?

¹⁶ Ikwaha sootheene ntthareke miruku sa Yehova. Wakhala weera ninnamwiiwelela Yehova mwa itthu sootheene nave ninnapaka soothanla moovarihana ni miruku sa mBiblyani, nnookhala ntakihero nooreera wa atthu akina. Vaavo nimmusomaahu Biblya ni olipiha nroromelo nahu wa Yehova, hiyo nnoorowa okhala oororomeleya wa Yehova ni malamulo awe. Hiyo khaninrowa ovoleeliwa ni sooxuttiha sa ethiru naari ni miyuupuwelo sihinvarihana ni ele Yehova onnixuttihaawe moorweela mBiblyani. (Aef. 4:14; Yak. 1:6-8) Vaavo nnaakhelaahu soohimmwa soonanara hiyo ninnakhala oomaaleleya mwaha wooweera ninnaroromela soolaihera sa Yehova. (Nsal. 112:7, 8) Ninnaakhavihera tho atthu akina yaawo enviriha maxupo ni sooweereriwa. — 1 Ates. 3:2, 3.

17. Moota heeni asitokweene a mmulokoni enrowaaya waakhavihera asinna ovirelela okhalano nroromelo noolipa?

¹⁷ Asitokweene a mmulokoni entthuneya ekhalekeno mikhalelo sooreera, a miruku, oorehereya ni oowiiyeviha. Asitokweene tho ennaakhavihera atthu akina okhala oomaaleleya ni okhalano nroromelo noolipa ni Yehova. Nave-tho awo ennalipiha muloko mwaha ‘woovarexexa nsu noororomeleya.’ (Tito 1:9; 1 Tim. 3:1-3) Mwaha wa ntakihero naya, ni mwaha wa oxekura waya, asitokweene ennaakhavihera anamalaleera a mmulokoni woonelaka mithukumano voohihiyerereya, orowela muteko woolaleera ni opaka yoosoma aya ya omeekha. Emaara yeeyo asinna envirihaaya maxupo naari okhulumuwa, asitokweene ennawuupuxera otthuneya waya omuroromela Yehova ni owehexexa soolaihera sawe.

18. Mwaha wa heeni hiyo nintthunaahu onvuwiha Yehova, ni ikwaha sootheene ovirelela omwaattamela yoowo? (Nwehe ekwaadru: “Mukhalelo mmoha woomwaattamela vantxipale Yehova.”)

¹⁸ Vaavo ninsomaahu mikhalelo mikina sa Yehova, hiyo pooti wuuluma ntoko mwene Davidi olempaawe eeraka: “Attottopeliwe Yahvéh, mwala aka.” (Nsal. 144:1) Ikwaha sootheene hiyo pooti omuroromela Yehova ekumi ahu yootheene. Nnaamweera nuuluvanleene, hiyo onnatthuneya ororomela weera Yehova onoorowa onikhavihera weera nimwaattameleke owo. Nave mutthu ori poothe a hiyo pooti ohima weera Yehova ti “mwala aka.” — Nsal. 92:15, 16 [92:14, 15, NM].