Miyo kiyarinwe 22 a Dezembro a 1929, muttetthe mukhaanini wa oNoville yoowo waarinono imatta 9 waattamela oBastogne, muttetthe wa Ardenes oBelgica. Miyo kookhalano itthu sooreera kinuupuwelaaka kireene mwaana ni asitiithi aka omatta. Miyo ni munnaka mwaamukhaani Raymond, nannatxiha imombe mahiku ootheene, nave nannakhavihera muteko woohepha omatta. Muttetthe ahu atthu ootheene nannavara vamoha weera nikhaviherane mukina ni mukhwaawe.

Asitiithi aka, Emile ni Alice, yaari makatoolika. Awosa yannarowa okerexa idomingo sootheene. Mene eyaakha ya 1939, mapioneiru a wInglatera yaaphiya muttetthe ahu ni yaahaavaha apapa erevista emoha, Consolação (olelo esuwelinwe okhala Despertai!). Apapa yaahoonelela weera itthu erevista ele yaahimaaya, saari seekhaikhai ni eyo yaaweeriha otthuna opatxera omusoma Biblya. Emaara yaahiñyaaya okela okerexa, atthu naattamannaahuno yaawo yaari asinthamwene khalayi, yaapatxera waatthara-tthara vantxipale apapa. Awo yaapaka ele yaaweraaya weera eweerihe apapa otthikela okatoolika, mwaha wa yeeyo yannavaanyihana vantxipale woohima sa mwaha owo.

Miyo kannaxupeya vantxipale woona moota apapa yaahaawaaya ni moota yaathokororiwaaya ni atthu naattamannaahuno. Mwaha wa yeeyo, miyo kaapaka nivekelo ni murima aka wootheene nivekelo nenno miyo kihimmaaka woopatxerani wa mwaha ola. Mene moovira etempu otthara-tthariwa iwe waavukuwa, miyo kaahakalala vantxipale ni kannaroromela weera Yehova mweekhaikhai ‘onniiwa mavekelo.’

Egoverno ya oNazista wAlemanha yaahituphela oBelgica nihiku na 10 a Maio a 1940, mwaha wa yeeyo atthu antxipale yaatthawa elapo ele. Emusi ahu yaatthawela osul wa oFrança. Imaara ikina hiyo nannatthuneya ovira mapuro oowoopiha yaawo anakhotto a wAlemanha ni anakhotto a oFrança yaawanaaya ekhotto.

 Emaara naatthikenlaahu omatta wahu naahoonelela weera itthu sootheene saahiiyiwa aahanle paahi mwalapwaahu, Bobie, yoowo aanaakhelenle. Itthu sootheene iye seereñye saakeeriha wiikoha ha, ‘Mwaha wa heeni sinkhumelelaaya ikhotto ni ohaawa vantxipale?’

Etempu ele hiyo naahilipihiwa vantxipale vaavo naaxekurinwaahu ni munna Emile Schrantz, a yoowo aari mutokweene a mmulokoni ni pioneiro. Anvarihelaka muteko Biblya, owo aahiiwanyeiha mwaha wa heeni enkhumelelaaya maxupo, ni aahaakhula makoho aka mootheene woohima sa ekumi. Miyo kaapatxera okhalano onthamwene woolipa ni Yehova ni kannaroromela weera Yehova Muluku a nsivelo.

Nnaamweera ekhotto yahaamanle, amusi ahu yaavirelela ovaanela voohihiyerereya ni asinna. Agosto a 1943, munna José-Nicolas Minet, aahinxekura omatta wahu weera apake mwaha. Owo aanikoha, “Taani ontthuna obatiziwa?” Apapa ni miyo, naaheemexa ntata. Hiyo naahibatiziwa mooloko mukhaanini waattamenle omatta iwe.

Dezembro a 1944, anakhotto a wAlemanha yaahiwana ekhotto aya yoomalihera va ekhotto yanaaveeli ya elapo yootheene, eparte onneela nsuwa ya wEuropa yeeyo yaasuwelinwe okhala ekhotto ya Bolsão. Hiyo naakhala vakhiviru yaawaniwaaya ekhotto ele, ni naaviriha mweeri mmoha nreene nikhuku naari mpaani. Nihiku nimoha miyo kaakhuma weera kaavahe asinama yootxa, mene kikhumakaru, ebomba emoha yaamora emorelaka vanipathoni nipuro nenno naahelaahuvo yootxa ni yaahinyaanya. Nakhotto mmoha a wAmerica yoowo aari vakhiviru vaka, vaavo naahiyaahuvo asinama, aakikhuwelela eeraka, “Mwiivonyere vathi!” Miyo kaatthimaka ni kaahiivonyera vathi vakhiviru vawe, ni aakiwariha ekapasete awe weera akikosoope.

Emalakaru ekhotto, hiyo nannawera ovaanela voohihiyerereya ni asinna a muloko wa ecidade ya oLiège, yeeyo yaakhala mwa ikilometru 90 okhopela wa ematta ahu. Hiyo naapatxera okhalano egrupu ekhaanini ya anamasoma oBastogne. Iyo kaapatxera ovara muteko wEscritorio ya contabilidade ni eyo yaakivaha eparakha yompaka faculdade a idireito, miyo kaapatxera ovara muteko nipuro nenno saakhalaayawo idokumentu. Eyaakha ya 1951 naahimpaka assembleya a esirkwiitu oBastogne. Atthu yaamoonenle assembleya ole yaaphiya 100, ni mpuwa mwa  atthu ale aakhalamo pioneira mmoha yoowo aarvaara moowiilipihera, Elly Reuter owo aaheetta ikilometru soophiyeraka 50 weera amoonele assembleya ole. Khiwaapinsevo, hiyo naasivelana ni naalakela othelana. Elly aahaakhela nwopelo woorowela Exikola ya oGileyadi, wEstados Unidos. Mene owo aahilepa ekarta alepelaka esede mundial ahimaka weera khaarowa waakhulela nwopelo ole. Munna Knorr, yoowo aawehaweha muteko etempu ele, aamwaakhula mooreera murima ahimaka weera apaale nihiku nikina aamurowela Exikola ele vamoha ni aiyawe. Hiyo naathelana mweeri wa Fevereiro a 1953.

Eyaakha ene yeele, miyo ni Elly naamoonela Assembleya a Sociedade do Novo Mundo wEstádio Yankee oNova York. Nreene weiwo, miyo kaamusuwela munna mmoha yoowo aakivanhe muteko wootepa oreera ni aakiwopa weera nrowe wEstados Unidos. Mene emaara kaapankaaka nivekelo woohima sa mwaha ole, miyo ni Elly naathanla ohaakhulela muteko ole ni otthikela oBelgica weera nakhavihere egrupu ekhaanini ya anamalaleera 10 yaawo yaakhala oBastogne. Eyaakha yoottharelana hiyo naareelihiwa nikhalakano mwaana ooxiveleyaxa, Serge. Mooriipiha murima, sivirakaru iyaakha 7, Serge aavoreiwa ni aayeleela ekumi. Ni namuhulela murima ahu Yehova moorweela mwa nivekelo, ni Yehova aahinilipiha moorweela mwa yooweherera ya ovinyererihiwa wa alipa ookhwa.

Outubro a 1961, kaaphwanya muteko yoowo kaavaraaka paahi iwoora vakhaani ni waakeemerera okhala pioneiro. Mene nihiku noottharelana, kaahaakhela examada ya mulipa aaweha-weha eSede Mundial ya oBelgica. Owo aakikoha wakhala weera miyo kanwera okhala murumeyi a esirkwiitu (olelo onsuweliwa okhala mutokweene a esirkwiitu). Miyo kaahaakhula, “Neereke khonwereya miyo ovara mwa etempu vakhaani ntoko pioneiro kihinaaye waakhulela yoothanleliwa eyo?” Munna owo aahaakhulela. Nivarakaru miyeeri 8 ntoko mapioneiru, mweeri wa Setembro a 1962 hiyo naapatxera ovara osirkwiitu.

Sivirakaru iyaakha piili nivaraka osirkwiitu, hiyo naawompwa weera navareke oBetheli ya oBruxelas. Hiyo naapatxenre ovara Outubro a 1964. Yoothanleliwa ahu yoopatxera, hiyo naahaakhela mareeliho mantxipale. Ehivinre etempu yintxipale nixekurinweene ni oBetheli ni munna Knorr eyaakha ya 1965, miyo kaatikhiniheya vantxipale vaavo kaathanlinwaaka weera kikhavihereke Efiliyaale. Avinyaka, miyo ni Elly naawompwa orowela Exikola ya oGileyadi eturma 41. Etthu uulummaawe munna Knorr mwa iyaakha 13 sa muttuli, yaari yeekhaikhai! Nirowelakaru exikola ele, hiyo naatthikela eBetheli ya oBelgica.

Miyo kaakhalano eparakha yonvarihela muteko faculdade kampankaaka a idireitu weera kaakihere idireitu sa atthu a Yehova weera emukokhoreleke mootaphuwa wEuropa ni ilapo ikina. (Afil. 1:7) Mwaha wa yeeyo, miyo wannatthuneya wuuluma ni anamalamulela a ilapo sookwanaka 55 weiwo muteko ahu waakhoottihiwaayawo. Ohiya waaleela anamalamulela awo idireitu saka, miyo kanniisoonihera wa anamalamulela awo ntoko “mutthu a Muluku.” Ikwaha sootheene kannanvekela Yehova mwaha wooweera kannasuwela weera “murima wa mwene mukhulakú wa mahi Yahvéh onèttihawe vothevene vantthunaiye’vo.” — Mir. 21:1.

 Ekwaha emoha yaaheereya etthu miyo kinuupuwelaaka mwa etempu yintxipale, miyo kaahuuluma ni mulopwana mmoha aari mutokweene a eParlamento ya wEuropa. Ikwaha sintxipale miyo kaahinvekela weera nikumane weera nivaanele, menento ekwaha ela miyo kaawera. Owo aakeerenle ha, “Kinoovahani iminuutu 5 paahi, nkinaatxeerera naari emoha.” Emaara ene yeele miyo kaahuuramela vathi kimpatxera ovekela. Nto mulopwana ole aakikoha etthu kaapakaaka. Kinwehaka, kaahaakhula, “Kaamuxukurela Muluku mwaha wooweera nyuwo murumeyi awe.” Owo aakikoha, “Muntthuna ohima eheeni?” Miyo kaamoonihera yoolepa ya Aroma 13:4. Okhala weera mulopwana ole ettiini awe Protestante ni oomusuwela nnene sene Biblya, yoolepa ele yanvara vantxipale murima, teevi yaari yookhumelela aya? Miyo kaawera wuuluma ni mulopwana ole mpaka ohala omala ewoora, ni ovaanela iwe waakhumela nnene. Mpaka owo aahima weera annattittimiha muteko ahu.

Sivinreene iyaakha sintxipale, atthu a Yehova aawera waakihera idireitu saya wEuropa woohima sa oheerela eparte epoliitika, waahuwa anamwane, misonkho ni itthu ikina. Miyo kaakhalano eparakha yooweerela eparte miyaha iyo ni woona moota Yehova aavahaawe miruku weera nikhumele nnene mwa nyaha iyo otribunaale. Mpaka olelo, Anamoona a Yehova aawera okhumela nne mwa nyaha soophiyeraka 140 wEuropa woohima sa idireitu!

Mpuwa mwa eyaakha ya 1990, miyo kaavara vamoha ni munna Philip Brumley, osede mundial, ni munna Valter Farneti a wItália, weera ephwanye otaphuwa wookokhorela asinna a oCuba emaara yeeyo muteko ahu waakhoottihiwaaya. Miyo kaalepela ekaarta wembaixada ya oCuba oBelgica avinyaka naakhalano muthukumano yoowo waareherera mwaha ahu. Mpuwa mwa muthukumano ahu woopatxera, khiwaawereñye wiiwanyeiha itthu sootheene sahiiwexexinwe nnene seiyo saamweeriha governu a oCuba okhoottiha muteko ahu.

Nipakakaru nivekelo wa Yehova nivekaka miruku, hiyo naavekela weera naakhuleliwe waarumihela aBiblya 5000 oCuba, ni governu aahaakhulela yoovekela ahu. ABiblya awo yaaphiya nnene ni yaakaweliwa asinna, hiyo naahoona weera Yehova annanreeliha mwaha wa wiilipihera wahu. Avinyaka naapaka-tho yoovekela ekina, waarumiha aBiblya oophiyeraka 27.500. Ekwaha-tho ela aahaakhulela. Miyo kaahakalala vantxipale waakhavihera asinna ni asirokora a oCuba okhalano Biblya aya.

Miyo kaaxekura vantxipale oCuba weera kaakhavihere asinna oreherera miyaha woohima sa muteko ahu elapo ele. Emaara kaapakaaka eyo, kaawera opaka onthamwene ni atthu antxipale yanvarela governu.

Eyaakha ya 1994, atthu oopwahaka 1.000.000, yaahihooxiwa mpuwa mwa otthara-tthariwa wa egrupu emoha ya tutsis oRuanda. Nave-tho asinna ni asirokora akina yaahiiviwa-tho mwa mukhalelo ene yoowo woowoopiha. Moowaakuveya yaapakiwa egrupu emoha ya asinna weera yakhavihereke elapo ele.

Vaavo miyo ni asinna akina naaphiñyaahu ekapitaale ya oKigal, naahoonelela weera escritorio yootaphulela ni yaakumihera iliivuru, yaathoroliwa ni ibaala. Hiyo naahiiwa soohimmwa soowoopiha sa asinna ni asirokora yaawo yiivinwe sivariheliwaka muteko ikatana. Nave-tho hiyo naahiiwa soohimmwa sa asinna ni asirokora yaawo yaakhaviherana mukina ni mukhwaawe ni yooniherana nsivelo mwa mukhalelo wootikiniha. Mwa ntakihero, hiyo noomusuwela munna Tutsi yoowo iipinthe munikhukuni mahiku 28 akosoopiwaka ni emusi emoha ya Anamoona a Yehova. Mpuwa mwa muthukumano naaraahuno oKigal, hiyo naawera waamaaliha asinna ni asirokora oophiyeraka 900.

Muhoolo mwaya, hiyo naavira ofronteira ni naaphiya oZaire (Olelo osuwelinwe okhala República Democrática do Congo) hiyo naasa egrupu emoha ya Anamoona a Yehova a oRuanda yaawo yaatthanwe elapo aya ni yaari nipuro nenno yaakheliwaayawo atthu ootthawa waattamela ecidade ya oGoma. Hiyo khinaawenre waaphwanya, nto naapaka nivekelo wa Yehova ninvekelaka miruku. Muhoolo mwaya, naamoona mulopwana mmoha eettaka mphironi, ni naamukoha wakhala weera annasuwela nipuro eraayawo Anamoona a Yehova. Owo aahaakhula, “Aani, koosuwela, miyo-tho Namoona a Yehova, ni noohakalala kinimookuxani mpaka nipuro nenno eraayawo ekomisawu enaakhavihera atthu.” Omalakaru muthukumano woolipiha wa ekomisawu yoowaakhavihera atthu, hiyo naapaka muthukumano ni asinna yaatthanwe oophiyeraka 1.600 weera naamaalihe ni naalipihe. Nave-tho asinna ale yaahakalala vantxipale emaara naasommaahu ekaarta ya Mukuttula Woolamulela, yeeyo yaahima ha: “Ikwaha sootheene nyuwo muri mmavekeloni mwahu. Hiyo noosuwela weera Yehova khonrowa woohiyani.” Masu ala a Mukuttula Woolamulela moohihovela aakwanela. Olelo, oRuanda aakhalawo asinna asirokora oophiyeraka 30.000 enanvarela Yehova moohakalala!

Sivirakaru iyaakha 58 nthelanneene, mwaaraka oosiveleya Elly, aahikhwa eyaakha ya 2011. Miyo kanvekela Yehova ni kaamuleela moota kaariipinwaaka murima, ni kaahoona moota Yehova aakimaalinhaawe. Etthu ekina yaakimaalinhe, waari waalaleera atthu akina woohima sa Omwene wa Muluku.

Nnaamweera kireeneno iyaakha simpwahaka 90, miyo kinnalaleera isemana sootheene. Nave-tho kinnahakalala mwaha wookhavihera eDepartamento Jurídico ya oBetheli ya oBélgica ni mwaha woowaaleela atthu akina sooweereya sa mweekumini mwaka ni waalipiha amiravo eneerela eparte emusi ya oBetheli.

Soovira iyaakha 84 kipakakaru nivekelo naka noopatxera wa Yehova. Iwo waari opatxera wa ekumi aka yoohakalaliha, ekumi yeeyo kiniisoonaaka omwaattamela vantxipale Yehova nihiku nri poothe. Miyo kinnamuxukurela vantxipale Yehova mwaha woowaakhula mavekelo aka. — Nsal. 66:19. b