MWAHA ONTHOKORORIWA 23
ETXIPO 28 Ti Pani Ophwanenle Okhala Mpatthani a Yehova?
Yehova onnaniwopa weera nikhale aletto awe
“[Ehema aka] eni yèmexiwe variyari vaya: miyo kini kikhale Muluku aya.” — EZ. 37:27.
ELE NINKELA AHU OXUTTERA
Ninrowa woona moota woowaatxeerera oxukurela wahu nwopelo wa Yehova wookhala aletto mu ehema awe, ni onikosoopa onnooniheraawe mwaha wookhala mulipa oowaakhela aletto.
1-2. Nwopelo heeni Yehova onaapakelaawe arumeyi awe oororomeleya?
WAKHALA weera mutthu ohookohani weera Yehova taani, mwaakela waakhula hayi? Apaale nyuwo mwammwaakhula weera, ‘Tiithi aka, Muluku aka ni Nthamwene aka.’ Nave-tho aakhala masina makina a nttittimiho a Yehova. Neereke nyuwo mootoko wuupuwela weera Yehova onnawaakhelani?
2 Uulumaka woohima sa onthamwene ni Yehova, Davidi aamulikanxera Yehova ni mulipa oowaakhela aletto, ni arumeyi awe ntoko aletto. Davidi aakoha eeraka: “Yahvéh, ophwanenle tani ohaya mmukotthani mwanyu? Ophwanenle tani olekela vamwako vanyu vottela?” (Nsal. 15:1) Moorweela mwa eversu ela hiyo ninniiwexexa weera pooti okhala aletto mu ehema ya Yehova, naari neere, pooti okhala asinthamwene awe. Nyuwo khamunoona weera ola nwopelo wootepa oreera Yehova onnipakelaawe?
YEHOVA ONTTHUNA WEERA NIKHALE ALETTO AWE
3. Taani aapatxenre okhala muletto a Yehova, ni moota heeni waaraaya onthamwene aya?
3 Ahinaaye opattuxa itthu, Yehova aari meekhaawe. Mene moottharelana, owo aahimpattuxa Mwanawe oopatxera, waakhala ntoko, Yehova ntoko mulipa oowaakhela aletto aahinwopa muletto awe oopatxera mu ehema awe, ni aahakalala vantxipale mwaha woopaka eyo. Biblya onhima weera Mwana a Yehova ‘aari ohakalala wawe’ nave-tho Mwanawe ‘annahakalala woohihiyerereya.’ — Mir. 8:30.
4. Mutthu heeni mukina aakhanle muletto a Yehova?
4 Avinyaka Yehova aapattuxa malaika yaawo-tho eri aletto awe. Malaika enniitthaniwa okhala “anamwane a Muluku” ni Biblya onnaahima awo okhala oohakalala vantxipale mwaha wookhala vamoha ni Yehova. (Yobi 38:7; Dan. 7:10) Mwa iyaakha sintxipale, aletto a Yehova yaari paahi ale yaakhala ni yoowo wiirimu, mene noovira etempu, Yehova ohaatxeerera ehema awe weera aahele mpuwa atthu ale enkhala elapo ya vathi ntoko aletto awe. Akina a yaawo aari Henoki, Nowa, Abrahamu ni Yobi. Biblya onhima weera atthu ala yaari asinthamwene a Muluku mwaha wooweera yannamwiiwelela ni yanneetta “ni Muluku.” — Eph. 5:24; 6:9; Yobi 29:4; Yes. 41:8.
5. Eheeni ninxutteraahu ni eprofesiya ya Ezekiyeli 37:26, 27?
5 Mwa iyaakha sintxipale, Yehova onnavirelela waawopa asinthamwene awe weera ekhale aletto awe. (Mmusome Ezekiyeli 37:26, 27.) Mwa ntakihero, eprofesiya ya Ezekiyeli hiyo ninnaxuttera weera Yehova ontthuna weera akhaleno onthamwene woolipa ni ale emmukokhorela. Owo oolaihera opaka ni yaawo “onthamwene wa murettele.” Eprofesiya ela ennuuluma woohima sa etempu ale oothanliwa weera yakhaleke wiirimu ni ale erino yooweherera yookhala elapo ela ya vathi, enrowaaya okhalaka mu ehema awe ntoko ‘nikhola nimoha.’ (Yoh. 10:16) Eprofesiya ela ennakwanela olelo va!
YEHOVA ONNANIKOSOOPA NIPURO NRI POOTHE NRAAHU
6. Moota heeni mutthu onkhalaawe muletto mu ehema ya Yehova, ni ehema eyo eri woowi?
6 Khalayi ehema naari nipuro nenno mutthu iitthuuwaawemo ni aakhalaawe ookosoopeya ni itthu sa vaate. Muletto yoowo aakhala mu ehema aari oomaaleleya asuwelaka weera aamukosoopiwa nnene. Vaavo nniivahereraahu wa Yehova hiyo ninnakhala aletto awe mu ehema awe. (Nsal. 61:5 [61:4, Tradução do Novo Mundo]) Mu ehema eyo hiyo nookhalano yootxa yintxipale ya omunepani yeeyo ninhaawelaahu weera nivirelele okhala asinthamwene a Yehova ni ninnakhala vamoha ni ale-tho eri aletto a Yehova. Nihipwatthaka mapuro ninkhalaahu, ootheene hiyo pooti okhala aletto mu ehema ya Yehova. Apaale nyuwo mootoko weetta mukwaha murowaka elapo ekina, mwa ntakihero, orowa okonkreesu oothanleya, ni waasuwela-tho atthu akina yaawo enhakalala mwaha wookhala mu ehema ya Yehova. Ehema ya Yehova eri mapuro eri poothe weiwo ori arumeyi awe. — Apok. 21:3.
7. Mwaha wa heeni ninhimaahu weera arumeyi a Yehova ekhwiiye nlelo aletto mu ehema awe? (Nwehe efootu.)
7 Ankha arumeyi a Yehova ale ekhwiiye? Neereke onnatthuneya hiyo ohima weera awo aletto mu ehema ya Yehova? Aani! Mwaha wa heeni ninhimaahu eyo? Mwaha wooweera, wa Yehova atthu ale ekhwiiye akumi mmuupuweloni mwawe. Yesu aahiiwanyeiha eyo eeraka: “Vanonto wi alipa òkhwa enevinyererihiwe, Mose wothe t’athonyenre vaniputhini novarela, vavale èraiye: ‘Apwiya, Muluku a Abrahamu a Isakhi ni Muluku a Yakobe’. Vano Muluku kahiyene Muluku àlipa òkhwa, mene àkumi, niwoko othene annamukhalela yowo n’okumi.” — Luka 20:37, 38.
Mpakana arumeyi oororomeleya a Yehova ekhwiiye, pooti ohimaka weera awo aletto mu ehema ya Yehova (Nwehe eparagrafu 7)
NOOKHALANO MAREELIHO NI MIRITTI
8. Mareeliho heeni enaakhelaaya aletto a Yehova?
8 Ntoko ehema nisuwenlaahu nraaya nipuro noowiitthuuwa ni nooviriha etempu, ehema ya Yehova tho ennaakosoopa aletto mwa soowoopiha siri poothe sa omunepani, ennanivaha-tho yooweherera ya muhoolo. Emaara nimmwaattamelaahu Yehova, Satana khonwera opaka etthu ennihooxa mahiku ootheene. (Nsal. 31:24 [31:23, NM]; 1 Yoh. 3:8) Mu elapo enyowani, Yehova onaavirelele waakosoopa asinthamwene awe oororomeleya ohiya paahi mwa soowoopiha soomunepani mene mookhwaani. — Apok. 21:4.
9. Yehova onweherera weera aletto awe ekhaleno mukhalelo heeni?
9 Ekhaikhai weera eparakha etokweene okhala aletto mu ehema ya Yehova ni okhalano onthamwene woolipa ni owo, yoowo onrowa okhala wa mahiku ootheene. Mene wakhala weera hiyo aletto a Yehova, nintthuneya nikhaleke moota heeni? Wakhala weera mutthu ohoowopani owannyawe, nyuwo mwaamurowa otthunaka osuwela itthu mutthu owo onwehereraawe wa nyuwo weera mpake. Mwa ntakihero, mwaneene vaate pooti otthuna weera nyuwo murule isapatu muhinaaye ovolowa mpaani, ni nyuwo mwaamurowa opaka eyo. Moolikana ni eyo, hiyo-tho onnatthuneya osuwela itthu Yehova ontthunaawe weera aletto awe epakeke mu ehema awe. Nsivelo nahu ni Yehova ninnaneeriha opaka sootheene ninweraahu weera ‘nimuhakalalihe.’ (Akol. 1:10) Yehova ori ntoko nthamwene ahu, mene onnatthuneya wuupuwela weera owo Muluku ahu ni Tiithi ahu, ni mwaha wa yeeyo owo onnaphwanela nttittimiho nahu. (Nsal. 25:14) Nuupuwelaka eyo, hiyo nintthuneya omutikhinaka Yehova ikwaha sootheene ni ohittuwalaka omutthu awe. Wuupuwela eyo onoonikhavihera osepa opaka etthu eri poothe ehimmusivela Yehova. Moohihovela, hiyo nintthuna “wetta mowiyeviha” ni Muluku ahu. — Mik. 6:8.
YEHOVA KHOONIHENRE NTHALU NI ANA A ISRAELI
10-11. Mwa mukhalelo moota Yehova aakosoopaawe ana a Israeli weeheweheweni omwaako Sinayi, moota heeni enooniheraaya weera wa Yehova atthu ootheene enoolikana?
10 Yehova khanoonihera nthalu emaara onaathokororaawe aletto awe. (Arom. 2:11) Hiyo pooti wiiwexexa nnene ohithanla wa Yehova niwehaka moota aathokoronraawe ana a Israeli oSinayi.
11 Aavenxakaru atthu awe wookaporoni wExipitu, Yehova aahaathanla anamakeya weera evareke mu ehema. Malevi yaahithanliwa weera evareke miteko mikina saavarihana ni nipuro nne nootteela. Neereke atthu ale yaavara mpuwa mwa ehema, ni ale yaakhala waattamela ehema, yannakosoopiwa mooreerela waapwaha atthu akina? Hooye! Yehova khaanoono nthalu.
12. Emaara aakosoopaawe ana a Israeli, moota heeni Yehova oonihenraawe weera atthu ootheene enoolikana? (Ottimula 40:38) (Nwehe efootu.)
12 Yehova khaapwattha wakhala weera atthu yaakhala vakhiviru naari ottayi ni ehema. Mwa ntakihero, Yehova aaheeriha weera muloko wootheene owereke woona nihutte ni eyuupuru ya mooro yaakhala vasulu va ehema. (Mmusome Ottimula 40:38.) Emaara yeeyo nihutte naapatxeraaya weetta nrowaka nipuro nikina, atthu ale yaakhala ottayi ni ehema yanwera woona, mwaha wa yeeyo, imusi sanwera otthukumanya itthu saya ni oreherera mixaxa saya weera seette vamoha ni muloko. (Nam. 9:15-23) Opwaha mwa yeeyo, atthu ootheene yaaweereke owera wiiwa oruma wa nipenka na epratha nenno naasuwanyeiha muloko wootheene weera weemele. (Nam. 10:2) Naari neere, okhala vakhiviru ni ehema khiwaataphulela weera mutthu owo aakhalano onthamwene wootepa olipa ni Yehova waapwaha ale yaakhala ottayi. Moovirikana ni eyo, atthu ootheene a muloko ole yiivaherenre wa Yehova, yanwera okhala aletto a Yehova ni waakhela miruku sawe ni okosoopiwa. Vamoha-moharu olelo va, nihipwatthaka nipuro ninkhalaahu, ootheene hiyo pooti woona nsivelo na Yehova ni onikosoopa wawe.
Ehema yaakhala variyari va muloko, yaari yoowoonihera weera Yehova khaanono nthalu (Nwehe eparagrafu 12)
MATAKIHERO A OHIKHALANO NTHALU WA YEHOVA MAHIKU AHU ALA
13. Mwa mukhalelo heeni olelo va Yehova onooniheraawe weera khaanono nthalu?
13 Arumeyi akina a Muluku mahiku ahu ala enkhala waattamela oSede Mundial naari waattamela eBetheli. Akina a yaawo enkhala mapuro ala, nto mwaha wa yeeyo antxipale a yaawo pooti ovara miteko sintxipale sineereya mapuro ala ni okhala vamoha ni ale enhoolela mareherero a Yehova. Nave-tho akina envara ntoko asitokweene a esirkwiitu naari akina envara miteko sikina sa ehuhu yootheene. Wakhala weera nyuwo khamunvara miteko iyo, muroromeleke weera mulipa onwaakhela aletto ootheene, Yehova, onnaasivela aletto awe ootheene woohelani mpuwa nyuwo. Nave onimoovahani sootheene nyuwo munhaawelaanyu. (1 Ped. 5:7) Ootheene empakela eparte mareherero a Yehova ennaakhela yootxa yoomunepani, miruku ni okosoopiwa enhaawelaaya.
14. Ntakihero heeni nikina nraahuno nnoonihera ohithanla wa Yehova olelo va?
14 Ntakihero nikina na ohikhalano nthalu wa Yehova ntoko mulipa oowaakhala aletto nnene, mwaha wooweera owo oheeriha weera Biblya aphwanyeyeke wa atthu ootheene a valaponi. Biblya aalepinwe ni muulumo mararu: Eheberi, Aramaiko ni Ekereku. Neereke ale enwera osoma muulumo oopatxera a Biblya, aakhalano onthamwene woolipa ni waapwaha ale ehinwera osoma? Hooye. — Math. 11:25.
15. Itthu heeni nraahuno sinoonihera weera Yehova khaanono nthalu? (Nwehe efootu.)
15 Weera nikhale asinthamwene a Yehova khontthuneya osomaxa naari osuwela wuuluma muulumo mantxipale. Yehova onnaavaha onthamwene awe ni osuwela wawe atthu ootheene a mulaponi ohiya paahi ale esomme vantxipale. Masu oowuupuxeriwa a Yehova ari Biblya, aataphuleliwa mwa muulumo oovirikana. Mwa mukhalelo ene yoola, atthu a elapo yootheene enoorowa woona moota onreeraaya wiiwelela ele Yehova onxuttihaawe ni okhala asinthamwene awe. — 2 Tim. 3:16, 17.
Mwaha wa Biblya otaphuleliwa mwa muulumo mantxipale, mwaha wa heeni onooniheraaya weera wa Yehova atthu ootheene enoolikana? (Nwehe eparagrafu 15)
NVIRELELE OKHALA “ALETTO” A YEHOVA
16. Moovarihana ni Miteko 10:34, 35, eheeni nintthuneyaahu opaka weera nivirelele okhala aletto a Yehova?
16 Eparakha etokweene owompwa ni Yehova weera nikhale aletto mu ehema awe. Yehova mutthu ooreera onwaakhela aletto mwa nsivelo, ni onnawaakhela aletto opwaha hiyo nnuupuwelaahu. Opwaha mwa yeeyo, wa Yehova atthu ootheene enoolikana, owo onnaawopa atthu ootheene ahipwatthaka woowi enkhalaayawo, moota ehuuwalaaya, masomelo aya, erutthu aya, nloko naya, wunnuwa waya naari waari weera mulopwana naari muthiyana. Menento pahiru ale envirelela omwiiwelela Yehova, enrowa waakhuleliwa ntoko aletto a Yehova. — Musome Miteko 10:34, 35.
17. Woowi nneeraahu niphwanye soohimmwa ikina woohima sa okhala aletto mu ehema ya Yehova?
17 Ntoko elempwalaaya va Nsalmu 15:1, Davidi onnapaka makoho ala: “Yahvéh, ophwanenle tani ohaya mmukotthani mwanyu? Ophwanenle tani olekela vamwako vanyu vottela?” Yehova aahinvarihela muteko Davidi yoowo weera aakhule makoho ala. Yoosoma enttharelana nnoorowa woona etthu nintthuneyaahu opaka weera nivirelele okhala aletto mu ehema ya Yehova.
ETXIPO 32 Rwaani wa Yehova!
