1. Biblya onhima nsivelo okhala etthu ya moota heeni?

 BIBLYA onnahima nsivelo neekhaikhai okhala etthu yootepaxa oreera. Owo oneera: “Ittetthere saya siri ittetthere sa moro, nlumi na moro wa Yahvéh. Mirupi soxiha sinnòtxela otxipiha otthuna myoloko tho sinnòtxela oneliha otthuna khuluwi.” b (Etx. 8:6, 7) Masu ala, ennaaroromeliha ale ethelanne weera awo pooti owera wooniherana nsivelo neekhaikhai mukina ni mukhwaawe.

2. Etthu heeni ale ethelanne entthuneyaaya opaka weera nsivelo anooniheranaaya mukina ni mukhwaawe nihivukuwe?

² Nsivelo neekhaikhai ni namahiku ootheene nri variyari va mulopwana ni muthiyana ninlipa mwaha woowiilipihera wayasa. Mwa ntakihero, mooro pooti ovirelela opatta mahiku ootheene, nto weera yeereye eyo, ontthuneya weera nyuwo muhelekevo ikhuuni. Wakhala weera khamunhelavo ikhuuni, mooro owo pooti otxipha. Vamoha-moharu, nsivelo mulopwana ni muthiyana anooniheranaaya mukina ni mukhwaawe pooti okhala noolipa ni okhala na mahiku ootheene. Mene eyo enkela owereya wakhala weera awo ennakosoopa ntheli naya. Ikwaha ikina ale ethelanne pooti woona weera nsivelo naya noopatxera ovukuwa, otepaxawene wakhala weera awo enviriha maxupo a othoiwa musurukhu, eretta naari maxupo oowaahuwa anamwane aya. Vano, waari weera nyuwo moothela naari mootheliwa, munkela ovireleliha moota heeni “nlumi na moro wa Yahvéh” ni varelaka va nthelini vanyu? Yoosoma ela nnoorowa woona itthu tthaaru seiyo nyuwo mukhanlaanyu oopaka weera nvirelelihe ntheli nanyu okhala noolipa ni noohakalala. c

3. Moota heeni okhalano onthamwene woolipa ni Yehova onkelaaya waatxeerera osivelana wa ale ethelanne? (Koheleti 4:12) (Nwehe efootu.)

³ Ale athelanne weera evirelelihe “nlumi na moro wa Yahvéh” ni varelaka, entthuneya wiilipihera weera ekhaleno onthamwene woolipa ni Yehova. Mwaha wa heeni opaka eyo eraaya etthu yooreera wa ale ethelanne? Mwaha wooweera, mulopwana ni muthiyana yaahelaka mwiitti onthamwene aya ni Yehova, awo enniilipihera ovarela muteko miruku sa mBiblyani ni eyo ennaakhavihera osepa ni owera oviriha maxupo yaawo yeera yeerihe nsivelo naya opatxera ovukuwa. (Mmusome Koheleti 4:12.) Mutthu orinono mikhalelo sooreera sa omunepani, onnapaka ele onweraawe weera alikanxe mikhalelo sa Yehova, ntoko: oreera murima, opixa murima ni olevelela. (Aef. 4:32–5:1) Ale ethelanne, yooniheraka mikhalelo iya, nsivelo anooniheranaaya mukina ni mukhwaawe nnimunnuwa. Murokora mmoha oneeriwa Lena, yoowo ori ootheliwa mwa iyaakha soopwahaka 25, ohimme ha: “Ti wookhweya omusivela ni omuttittimiha mutthu orinono mikhalelo sooreera sa omunepani.”

4. Mwaha wa heeni Yehova aamuthanliyaawe Yosefe ni Maria weera ekhale asitiithi a Mesiya aalaiherinwe?

⁴ Nrowe noone ntakihero na mBiblyani. Vaavo Yehova aatthunaawe waathanla taani yeera ekhale asipapawe Mesiya, aakhalano atthu antxipale eeraawe aathanle variyari va osuulu wa Davidi, mene owo, aamuthanliye Yosefe ni Maria. Mwaha wa heeni? Mwaha wooweera Maria ni Yosefe yaakhalano onthamwene woolipa ni Yehova, ni Yehova aasuwela weera awo yaaheereke omuhela owo nipuro noopatxera va nthelini vaya. Ale athelanne, etthu eheeni ekhanlaaya ooxuttera ni ntakihero na Yosefe ni Maria?

5. Ntakihero na Yosefe nnaaxuttiha eheeni alopwana oothela?

⁵ Yosefe khaapisa otthara miruku aavahiwaawe ni Yehova, nto etthu eyo, yaamweeriha okhala mulopwana ooreera murima. Mwa ikwaha tthaaru owo aahaakhela miruku sa Muluku woohima sa emusi awe. Mwa ikwaha sootthaaru iya, owo aahiiwelela moohipisa, nnaamweera eyo yaahela mpuwa opaka matxentxo matokweene. (Math. 1:20, 24; 2:13-15, 19-21) Mwaha woowaakhulela miruku sa Muluku, Yosefe aamukosoopa ni aamukhavihera Maria. Moohihovela, eyo yaaheeriha weera omusivela ni omuttittimiha Maria aamweeraawe Yosefe waatxeerereye vantxipale. Nyuwo alopwana muthenle, pooti omulikanxa Yosefe mwaasaasaka miruku sa mBiblyani emaara munkosoopaanyu emusi anyu. d Nnaamweera eyo ehelaka mpuwa opaka matxentxo. Mwaattharaka miruku sa mBiblyani, munnoonihera weera munnaasivela amwaarinyu ni eyo ennalipiha ntheli nanyu. Murokora mmoha onkhala oVanuatu, yoowo ori ootheliwa mwa iyaakha soopwahaka 20, ohimme ha: “Aiyaka yaasaasaka ni yaattharaka miruku sa Yehova, waattittimiha waka onnaatxeerereya. Miyo kinniisoona okhala oovareleleya ni kinnaroromela soothanla saya.”

6. Ntakihero na Maria nnaaxuttiha eheeni athiyana ootheliwa?

 ⁶ Maria aakhalano onthamwene ni Yehova. Eyo enoonihera weera nroromelo nawe khanaalipa mwaha wa Yosefe iyawe. Maria aasuwela nnene soolepa. (Veja a nota de estudo em Lucas 1:46.) Nave owo anniihiyera etempu weera aphimeleleke. (Luka 2:19, 51) Moohihovela, mwaha wookhalano mikhalelo sa omunepani, waamweeriha Maria okhala muthiyana a mikhalelo sooreera. Mahikwaano asithiyana antxipale ootheliwa, enniilipihera weera ekhale ntoko Maria. Mwa ntakihero, murokora mmoha oneeriwa Emiko, ohimme ha: “Emaara miyo kaaraaka muttiye ti miyo kaakosoopa mukhalelo aka wa omunepani. Mene kitheliwakaru aiyaka yaanivekelela hiyo ni yaahoolela yoosomaahu ya veemusini. Nto miyo, kaahoonelela weera kaaweherera aiyaka weera ekipakeleke itthu saka sa omunepani, mene vahoolo vaya, kaahoonelela weera miyo kaarino muritti woolipiha onthamwene aka ni Yehova. Nto mahikwaano kinniihiyera etempu weera kikhale meekhaaka ni Yehova kivekelaka, kimusomaka Biblya ni kiphimelelaka ele kinsomaaka.” (Agal. 6:5) Nyuwo athiyana ootheliwa, nvirelele olipiha onthamwene anyu ni Yehova, wakhala weera munoopaka eyo asiiyanyu enoorowa okhalano mathowa a woottottopelani ni woosivelani nyuwo.—Mir. 31:30.

7. Etthu heeni ale ethelanne ekhanlaaya ooxuttera ni ntakihero na Yosefe ni Maria woohima sa omukokhorela Yehova vamoha?

⁷ Yosefe ni Maria yavireleliha onthamwene aya okhala woolipa ni Yehova vamoha. Awo yaasuwela weera ti wootthuneya omukokhorela Yehova vamoha veemusini. (Luka 2:22-24, 41; 4:16) Pooti weera waari wooxupa opaka eyo otepaxawene emaara yaayanraaya anamwane akina, mene nnaamweera vaareene hiiho, awo yannawera omukokhorela Yehova vamoha. Nna ntakihero nooreera ale ethelanne mahikwaano entthuneyaaya otthara! Waari weera nyuwo mookhalano anamwane ntoko hiihaale Yosefe ni Maria, pooti weera ti wooxupa orowela mithukumano naari ophwanya etempu weera mmukokhorele Yehova veemusini vanyu. Apaale tho pooti okhala wooxupa wiihiyera etempu weera mmusome Biblya ni ovekela vamoha nyuwo ni amwaarinyu naari naiyanyu. Mene muhittiwale weera omukokhorela wanyu Yehova vamoha onooweerihani omwaattamela Yehova ni nyuwosa tho. Tivanto muheleke nipuro noopatxera itthu sa omunepani mweekumini mwanyu.

8. Etthu eheeni ekhanle yoowaakhavihera anamathelana enviriha maxupo weera ewereke opaka yookokhorela ya veemusini vamoha?

⁸ Etthu heeni nyuwo mukhanlaanyu oopaka wakhala weera munnaviriha maxupo vanthelini vanyu? Apaale nyuwo pooti ohikhalano yootthuna ya opaka yookokhorela ya veemusini vamoha. Wakhala weera eyo enimweereya, apaale waamukhala wooreera opatxera opaka etthu yookhweya naari osoma etthu enoosivelani nyuwo naamwaarinyu naari aiyanyu. Opaka eyo, enoolipiha nsivelo muraanyuno mukina ni mukhwaawe ni enimwaatxeerera yootthuna ya opaka itthu soomunepani vamoha.

9. Mwaha wa heeni anamathelana entthuneyaaya oviriha etempu ereene vamoha?

⁹ Nyuwo muthelanne pooti ovireleliha nsivelo nanyu okhala noolipa nvirihaka etempu mureene vamoha. Opaka eyo enimookhaviherani nyuwo ohoonana ntoko atthu oohisuwelana mene muneereke osuwelana nnene sene minyuupuwelo ni minyoonelo sa mukina ni mukhwaawe. (Eph. 2:24) Moone ele Lilia ni Ruslan yoonelenlaaya ivirakaru iyaakha 15 ethelanneene. Lilia ohimme ha: “Hiyo noona weera naaheereke oviriha etempu yintxipale nreene vamoha, mene khaiyene yaari yeeyo yeereñye. Etempu yootheene hiyo naakhalano itthu soopaka: ovara muteko, itthu sa vaate ni vahoolo vaya waakosoopa anamwane. Nto naahoonelela weera waatthuneya wiivaha etempu weera nikhaleke vamoha, waari  weera hiyo khanaapaka eyo, naaheereke orakamelana mukina ni mukhwaawe.”

10. Ale athelanne enkela ovarihela moota heeni muteko ele onhimaawe Aefeso 5:15, 16?

¹⁰ Etthu heeni ekhanlaaya oopaka ale ethelanne weera evirihe etempu ereene vamoha? Apaale oneereke otthuneya wiihiyera etempu weera mutthekule ni ole muthelannaanyuno. (Mmusome Aefeso 5:15, 16.) Munna mmoha onkhala oNigéria, oneeriwa Uzondo, ohimme ha: “Emaara miyo kimpakaaka eprograma ya miteko saka, kinniihiyera etempu weera kikhale vamoha ni amwaaraka ni kinnahela eyo nipuro noopatxera.” (Afil. 1:10) Nwehe ntakihero na Anastácia, onkhala oMoldávia. Owo mwaara a mutokweene a esirkwiitu ni oophwanya moota woovarihela nnene muteko etempu awe. Owo enre ha: “Miyo kinnapaka miteko saka emaara yeeyo aiyaka enkhalaaya oowaatteliwa ekosoopaka miritti saya, nto kata mutthu amaliha ele ompakaawe ninnakhalano etempu yookhala vamoha.” Ankhanto wakhala weera nyuwo toowaatteliwa vantxipale ni onnooxupani ophwanya etempu weera mukhale vamoha ni ole muthelannaanyuno?

11. Miteko heeni Akila ni Prisila yaapakaaya vamoha?

¹¹ Nyuwo muthenle naari nyuwo muthelinwe, pooti oxuttera vantxipale ni ntakihero na Akila ni Prisila, ntheli nenno naari noosiveleyaxa wa akristu oopatxera. (Arom. 16:3, 4) Biblya khanuuluma vantxipale woohima sa ntheli na Akila ni Prisila, maxi onnoonihera weera awo yaavara muteko vamoha, yaalaleera ni yaakhavihera atthu akina vamoha. Itthu sootheene iya yaapaka ereene vamoha. (Mit. 18:2, 3, 24-26) Ni ikwaha sootheene Biblya ommuulumaawe Akila, Prisila tho ori vaavo.

12. Eheeni mulopwana ni muthiyana entthuneyaaya opaka weera evirihe etempu ereene vamoha? (Nwehe efootu.)

¹² Ale athelanne enkela omulikanxa moota heeni Akila ni Prisila? Nkuupuwelani miteko sintxipale nyuwosa muraanyuno weera nvaresa. Neereke wanwereya ovara vamoha miteko imoha-imoha sa seiya mureene vamoha? Neereke nyuwo munnampaka palanu a orowa muteko woolaleera vamoha veeli-veeli? Akila ni Prisila yaavara vamoha muteko owo. Pooti weera nyuwosa munvara miteko soovirikana. Vanonto neereke vanwereya nyuwo ovara miteko mikina vamoha ntoko okwesa ni oreherera vaate? (Koh. 4:9) Mwaakhaviheranaka miteko mukina ni mukhwaawe nyuwo muneereke wiisoona weera muri ekiipa emoha ni muneereke okhalano eparakha ya otthekula mukina ni mukhwaawe. Robert ni Linda eri ethelanneene mwa iyaakha soopwahaka 50. Robert ohimme ha: “Hiyo khanaanoono etempu yintxipale weera nikhale vamoha ntthekulaka, mene emaara yeeyo kintxapaaka iparatho amwaaraka ennawa enattuuxa naari kaarehereka ejardim awo ennawa enakikhaviha, nto eyo ennakihakalaliha miyo. Ovara miteko vamoha onnaneeriha okhala oowiiraana ni nsivelo nahu ninnavirelela wunnuwa.”

13. Etthu heeni ale ethelanne entthuneyaaya opaka weera ekhale oowiiraana mweekhaikhai?

¹³ Mene muupuweleke weera okhala vamoha khontaphulela weera nyuwo toowiiraana. Muthiyana mmoha ootheliwa onkhala oBrasil, ohimme ha:“Mahikwaano waatta itthu sikhanle  soonimorihela va muraakhoni woowuupuwela weera okhala vamoha ontaphulela okhala vaate vamoha. Miyo khooxuttera weera okhala vamoha etthu ekina, mene ontthuneya weera miyo kaaxikheke aiyaka.” Nwehe ele Bruno ni amwaariye Tays empakaaya weera exikhaneke mukina ni mukhwaawe. Owo ohimme ha: “Naavirihaka etempu vamoha hiyo ninnaahiya a telefooni ahu sivalevale, opaka eyo ennaneeriha ottottela mureerelo etempu eyo ninkhalaahu vamoha.”

14. Wakhala weera anamathelana khensiveliwa oviriha etempu ereene vamoha, etthu heeni entthuneyaaya opaka?

¹⁴ Ankhanto wakhala weera nyuwo khonoosivelani oviriha etempu mureene vamoha ni amwaarinyu naari aiyanyu? Apaale etthu emmusivela mukina, mukina khemmusivela, apaale mwakhala vamoha khamunpisa onyoonyihana. Vanonto waari weera eyo enaweereelani nyuwo, etthu heeni mukhanlaanyu oopaka? Muupuwele veeli ntakihero na mooro. Mooro khonkorokana oriki opattihiwaru. Weera okorokane ontthueya ohelavo toko ixerevere ni vahoolo vaya pooti ohelavo ihiphi. Muttharaka ele eneereya ni mooro, munoonela hayi opatxera oviriha etempu vakhaaneene mahiku ootheene mureene vamoha? Mweerereke opaka itthu sinoosivelani nyuwosa ni musepeke opaka itthu seera siweeriheni onyoonyihana. (Yak. 3:18) Vakhaani-vakhaani nyuwo pooti okorokaniha nsivelo nanyu.

15. Mwaha wa heeni nttittimiho nraaya nootthuneya weera ale ethelanne evirelele osivelana?

¹⁵ Ottittimihana ti wootthuneya vanthelini. Nttittimiho pooti olikanxeriwa ni epheyo. Mooro waahoopeliwaka epheyo pooti otxipha moowaakuveya. Vamoha-moharu, naahikhala nttittimiho, nsivelo nri variyari va anamathelana pooti ovukuwa moowaakuveya. Mene mulopwana ni muthiyana yiilipiheraka ottittimihana mukina ni mukhwaawe nsivelo naya ninnavirelela okhala noolipa. Nyuwo apaale pooti woona weera munnaattittimiha amwaarinyu naari aiyanyu, vanonto neereke aiyanyu awo naari amwaarinyu enoonela hiiho weera munnaattittimiha? Penny ni aiyawe Aret eri ethelanneene mwa iyaakha soopwahaka 25. Penny ohimme ha: “Ottittimihana nneeraahu mukina ni mukhwaawe onneeriha etthoko ahu okhala yooreera. Ninnataphuwa otthekula mukina ni mukhwaawe mwaha wooweera noosuwela weera ele onuupuwelaawe mukina ti yootthuneya wa mukina.” Vanonto etthu heeni nyuwo mukhanlaanyu oopaka weera aiyanyu naari amwaarinyu yooneke weeera nyuwo munnaattittimiha? Nwehe ntakihero na Abrahamu ni Sara.

16. Alopwana oothela etthu heeni enxutteraaya ni ntakihero na Abrahamu? (1 Pedru 3:7) (Nwehe efootu.)

¹⁶ Abrahamu annamuttittimiha Sara. Aapaka eyo moorweela mwa wiiwelela miruku sawe ni ottittimiha minyuupuwelo sawe. Ekwaha tiiyo, Sara aanyoonyiwa ni ahuuluma ni Abrahamu itthu sootheene saamunyoonya, mpaka owo aaphiyera ohima weera Abrahamu aakhalano nthowa mwaha wa itthu sootheene iye seereya. Neereke Abrahamu aamunyoonyeriwa Sara? Hooye. Owo aasuwela weera Sara aari muthiyana oowiiwelela ni aakhavihera miruku sawe. Abrahamu anwiriyana Sara ni aahaasaasa moota eeraawe  areherere maxupo ale. (Eph. 16:5, 6) Etthu heeni ninxutteraahu? Nyuwo alopwana oothela, ekhaikhai weera nyuwo mookhalano owera woopaka soothanla sa veemusini. (1 Akor. 11:3) Nnaamweera vareene hiiho, waamukhala va miruku wiiwa miruku sa amwaarinyu muhinaayeene opaka yoothanla, otepaxawene wakhala weera yoothanla eyo muntthunaayu opaka ennaatapha amwaarinyu. (1 Akor. 11:4, 5) Ikwaha ikina pooti weera amwaarinyu eri oonyoonyiwa ni enatthuna wuuluma mwaha wa heeni enyoonyinwaaya. Neereke nyuwo munnattittimiha minyuupuwelo saya ni munnaawiriyana moomaaleleya? (Mmusome 1 Pedru 3:7.) Angela ni Dmitry eri ethelanneene iyaakha sinaattamela 30. Angela onnahima eheeni aiyawe enampakalaaya weera ooneke weera onnattittimihiwa. Owo ohimme ha: “Dmitry ori oolikaneene weera akiwiriyane emaara yeeyo kinkhalaaka oonyoonyiwa naari emaara kintthunaaka otthekula pahi. Owo onnakipixera murima miyo nnaamweera kinyoonyinweene.”

17. Athiyana ootheliwa etthu heeni enxutteraaya ni ntakihero na Sara? (1 Pedru 3:5, 6)

¹⁷ Sara annamuttittimiha Abrahamu. Aapaka eyo moorweele mwa okhavihera soothanla sa aiyawe. (Eph. 12:5) Nihiku tinno, yaahoowa aletto owannyawe Abrahamu moohilaiha ni Abrahamu ahaawopa awo otxa yootxa. Ni owo anvekela Sara weera ahiye muteko aavaraawe weera aapeye yootxa yintxipale. (Eph. 18:6) Sara aakhavihera miruku iye sa Abrahamu ni ewooreene yeele owo aahiya ovara etthu aapakaawe anarowa ovara ele Abrahamu anvekenlaawe opaka. Nyuwo athiyana ootheliwa, pooti omulikanxa Sara mukhaviheraka soothanla sa asiiyanyu. Opaka eyo, enoolipiha ntheli nanyu. (Mmusome 1 Pedru 3:5, 6.) Dmitry ohimmwale eparagrafu 16, onnahima etthu amwaariye empakaaya weera ooneke weera onnattittimihiwa. Owo ohimme ha: “Miyo onnakisivela vantxipale kaamoonaka moota Angela onkhaviheraawe soothanla saka nnaamweera emaara ekina nreeneno soothanla soovirikana. Ni wakhala weera ele miyo kithanliyaaka opaka khekhumenle nnene, owo khankithoriha.” Nto va, ninnoona weera ti wookhweya omusivela mutthu ole onnittittimiha!

18. Etthu heeni enkela weereya wakhala weera anamathelana enniilipihera ovireleliha nlumi na mooro wa nsivelo nivarelaka?

¹⁸ Mahikwaano Satana onnapaka ele onweraawe weera amalihe nsivelo nri va ntheli. Owo oosuwela weera wakhala weera mutthu mmoha-mmoha a va nthelini onoohiya omusivela mukhwaawe aapaale eyo enimweeriha ntheli nno oyeleela nsivelo araayano ni Yehova. Mene nsivelo neekhaikhai khanimmala. Mpakeke ele munweraanyu weera nsivelo na va nthelini vanyu nikhaleke ntoko nsivelo nne nihimmwale va Etxipo ya Itxipo. Mmuheleke Yehova nipuro noopatxera va nthelini vanyu, nviriheke etempu mureene vamoha, muttittimiheke minyuupuwelo ni sootthuna sa mukina ni mukhwaawe. Opaka eyo enimoonihera weera nyuwosa munnamuttittimiha Yehova yoowo ori mwaneene a nsivelo neekhaikhai. Ntoko hiihaale mooro okorokanne onvarelaaya nnene, nsivelo munooniheranaanyu mukina ni mukhwaawe nnookhala noolipa wa mahiku ootheene.