1. Miyuupuwelo heeni soohireera apaale arumeyi a Yehova envirihaaya?

 TI WOOMAALIHA vantxipale osuwela ele Biblya onhimaawe eeraka: “Yahvéh onnasiveliwa ni muloko awe”. (Nsal. 149:4) Mene ikwaha ikina, atthu akina ennakhulumuwa ni ennuupuwela ha, ‘Keereke miyo kinnavareleya muteko vamaithoni va Yehova?’ Arumeyi antxipale a Yehova a khalayi, yannawanano miyuupuwelo ntoko iya. — 1 Sam. 1:6-10; Yobi 29:2, 4; Nsal. 51:13 [51:11, NM].

2. Taani anrowa waakhuleliwa ni Yehova?

² Biblya onnaiwanyeiha weera atthu oohimalela pooti omuhakalaliha Yehova, ni waakhuleliwa ni yoowo. Mwa mukhalelo heeni? Nintthuneya woonihera ororomeleya wahu wa Yesu Kristu ni obatiziwa. (Yoh. 3:16) Mwa yeeyo, ninnoonihera wa atthu ootheene weera noottharuwa soottheka sahu nave tho ninnamulaihera weera nnoorowa opaka yootthunaawe. (Mit. 2:38; 3:19) Yehova onnahakalala vaavo nniilipiheraahu omwaattamela owo. Vaavo nimpakaahu ele ninweraahu weera nikwanihere yoolaihera ahu, Yehova onoorowa onaakhulela ni nnookhala asinthamwene awe a vanikuthani. — Nsal. 25:14.

3. Eheeni ninrowaahu woona mwa yoosoma ene yeela?

³ Mwaha wa heeni atthu akina enuupuwelaaya weera khenaakhuleliwa ni Yehova? Eheeni Yehova ompakaawe weera onoonihere weera onnanaakhulela? Ni moota heeni nneeraahu niroromeleke weera Yehova onnahakalala ni hiyo?

MWAHA WA HEENI AKINA ENUUPUWELAAYA WEERA KHENAAKHULELIWA NI YEHOVA

4-5. Nnaamweera nyuwo mwiisoonaka ohivareleya muteko, etthu heeni nyuwo muntthuneyaanyu ororomela?

⁴ Antxipale a hiyo nookhalano miyuupuwelo soohireera okhumela enamwane. (Nsal. 88:16 [88:15, NM]) Munna mmoha oneeriwa Adrián ohimme ha: “Miyo kuupuwela weera nkaavareleya muteko. Miyo kinnuupuwela weera kannavekela weera  amusi aka ephiye elapo enyowani, mene miyo kiisoone okhala mutthu oohiphwanelela ophiya elapo enyowani.” Tony munna yoowo ohihuuwale mweekhaikhaini ohimme ha: “Asitiithi aka khiyantale okileela weera yannakisivela naari okittottopela, awo yaakileela paahi weera miyo kanwera opaka etthu yootthuneya.”

⁵ Wakhala weera nyuwo ikwaha ikina munniisoona ohivareleya muteko, muupuweleke weera Yehova ohoothanlani nyuwo weera munvareleke, ohiya mutthu. (Yoh. 6:44) Yehova onnoona etthu yooreera ya mutthu ori poothe a hiyo, nave owo oosuwela mirima sahu. Ni moota onnoonelaawe ti woovirikana ni moota hiyo nniisoonelaahu. (1 Sam. 16:7; 2 Sow. 6:30) Nto muroromeleke weera ekhaikhai Yehova aahimaka weera nyuwo ti ootthuneya vamaithoni vawe. — 1 Yoh. 3:19, 20.

6. Paulo iisoonela hayi vaavo uupuwelelaawe soottheka sawe sa khalayi?

⁶ Nihinaayeene oxuttera ekhaikhai, pooti weeraka akina a hiyo naapaka itthu seiyo mpaka olelo va ninniivaha mathowa. (1 Ped. 4:3) Nave pooti weeraka atthu akina epatxenre khalayi onvarela Yehova ennawanano itthu ikina sinaakhulumula. Ankha nyuwo neereke munuupuwela weera Yehova khoolevelenleni? Nto, muupuweleke weera arumeyi akina oororomeleya a Yehova aawanano mukhalelo ene yoowo. Mwa ntakihero, murummwa Paulo emaara uupuwelelaawe ohimalela wawe, owo annaxupeya vantxipale. (Arom. 7:24) Ekhaikhai weera murummwa Paulo aattharuwa soottheka sawe, ni aabatiziwa. Nnaamweera vareene hiiho, owo anniisoona okhala ‘mwaamukhaanixa’ variyari va arummwa nave anniisoona okhala ‘namatthekaxa.’ — 1 Akor. 15:9; 1 Tim. 1:15.

7. Eheeni nintthuneyaahu wuupuwelela?

⁷ Yehova onnanroromeliha weera nattharuwa vale onoorowa onlevelela. (Nsal. 86:5) Tivawonto, wakhala weera nnoottharuwa soottheka nipankaahu, niroromeleke weera Yehova onhima ekhaikhai owo onoonlevelela. — Akol. 2:13.

8-9. Moota heeni ninrowaahu owina miyuupuwelo sooweera khaninwera ompakela itthu sintxipale Yehova?

⁸ Ootheene hiyo nintthuneya opaka ele ninweraahu weera nimukokhorele Yehova. Mene ikwaha ikina, hiyo pooti wiisoonaka weera khaninrowa owera opaka itthu sintxipale weera naakhuleliwe ni Yehova. Murokora mmoha oneeriwa Amanda ohimme ha: “Wa viinaano va, miyo kinuupuwela weera, weera kinvarele Yehova onnatthuneya wiilipihera vantxipale. Nto eyo ennakeeriha opaka itthu opwaha iye kinweraaka opaka, emaara miyo ‘kihinweraaka’ opaka itthu iyo, kinnaxupeya mwaneene aka nave kinuupuwela weera Yehova tho onnaxupeya.”

⁹ Ninrowa owina moota heeni miyuupuwelo sooweera khannampakela itthu sintxipale Yehova? Muupuweleke weera Yehova khonnikhanyerera nave khaiyene mutthu ooxupa. Owo khonnivekela opaka etthu hiyo nihinweraahu opaka, owo onnavaha mwiitti ele ninweraahu opaka wakhala weera ninniilipihera opaka ele ninweraahu. Opwaha mwa yeeyo, nyuwo pooti wuupuwelela matakihero a mBiblyani ni aatthu akina yanvarenle Yehova ni murima aya wootheene. Mwa ntakihero, mmuupuwele murummwa Paulo, owo aahivara moowiilipihera mpuwa mwa iyaakha sintxipale, owo anneetta ikwaha soorakama nave aahikhavihera opakiwa miloko. Mene vaavo makhalelo a ekumi awe yaatxentxalaaya, owo khaawera olaleera ntoko aaweraawe khalayi. Neereke Yehova khaavaha mwiitti etthu owo aaweraawe opaka? Hooye. Paulo aahivirelela opaka ele aaweraawe nave Yehova aahimureeliha. (Mit. 28:30, 31) Emoha-moharu, itthu  nnampakelaahu Yehova pooti orowa otxentxeya muhoolo. Mene etthu yootepa otthuneya, ti ntthuno nraahuno nompakela itthu Yehova. Vano nrowe noone moota Yehova onanroromelihaawe weera onnanaakhulela.

YEHOVA ONNOONIHERA MOOTA HEENI WEERA ONNANAAKHULELA?

10. Moota heeni ninrowaahu wiiwa nsu na Yehova nnaakhulelaka? (Yohani 16:27)

¹⁰ Moorweela mwa Biblya. Yehova onnaasaasera weera awoonihere arumeyi awe weera onnaasivela nave onnahakalala ni ele empakaaya. Biblya onnuuluma sa ikwaha piili seiyo Yehova aamulenlaawe Mwanawe Yesu Kristu weera annamusivela ni annamwaakhulela. (Math. 3:17; 17:5) Neereke nyuwo waamoosivelani omwiiwa Yehova awuulumelakani masu ala? Olelo va Yehova khanuuluma ni atthu ethoni ni ethoni, mene onnanvarihela muteko Biblya. Hiyo pooti wiiwa nsu na Yehova nnaakhulelaka vaavo ninsomaahu masu a Yesu eri mu evanjelyu. (Mmusome Yohani 16:27.) Yesu aatakiha moomalela mikhalelo sa Atiithi awe. Nto vaavo ninsomaahu moomaaleleya masu a Yesu vaavo uulumaawe ni atthu oohimalela, hiyo pooti wuupuwelela Yehova mwaneene uulumaka masu awo wa hiyo. — Yoh. 15:9, 15.

11. Mwaha wa heeni maxupo ehintaphulelaaya weera khannaakhuleliwa ni Yehova? (Yakobe 1:12)

¹¹ Moorweela mwa itthu owo ompakaawe. Yehova ori oolikaneene weera onikhavihere, mwa ntakihero, onivahaka itthu hiyo ninhaawelaahu sa weerutthuni. Ikwaha ikina Yehova pooti weemerera weera nivirihe maxupo, nto ti yeeyo yeereñye ni Yobi. (Yobi 1:8-11) Mene oviriha maxupo khontaphulela weera khannaakhuleliwa ni Yehova. Opwaha mwa yeeyo, emaara ene ti yeeyo hiyo nintthuneyaahu woonihera nsivelo nraahuno ni Yehova ni weera ninnamuroromela. (Mmusome Yakobe 1:12.) Nave hiyo pooti woona nsivelo na Yehova emaara yeeyo onnivahaawe nikhavihero hiyo ninhaawelaahu weera nivilele.

12. Eheeni ninxutteraahu ni ntakihero na Dmitrii?

¹² Moone ele yeereñye ni munna mmoha onkhala wAsia oneeriwa Dmitrii. Oowo aahiyeleela muteko aavaraawe ni aaviriha miyeeri sintxipale ahiphwannyeene muteko mukina. Nto owo aahilakela waatxeerera muteko awe woolaleera, mwa mukhalelo ene yoowo aahoonihera weera annamuroromela Yehova. Miyeeri sannavira ni nlelo khaaphwanya muteko. Ni muhoolo mwaya owo aahiphwanya eretta yeeyo yaamweerinhe waabaxari hospitaale, ntoko mulopwana oothela ni tiithi, owo aapatxera  wiisoona ohivareleya muteko, ni owo anniikoha wakhala weera annaakhuleliwa ni Yehova. Ohiyu omoha, mwanawe mwaamuthiyana aahirowa ekaama akonnaawe akunxeene epaphelo yeeyo yaarivo yoolepa ya Yesaya 30:15 yeeyo eneera: “Mwìtthuwá ni mwìwelelá munolipa.” Nto mwaana ole aahima ha: “Papa, emaara yeeyo munxupeyaanyu muupuweleke yoolepa ela.” Dmitrii aahoonelela weera akhaviheriwaka ni Yehova emusi awe yaahikhalano yootxa yookwanela, ikuwo soowara ni nipuro nookhala. Owo ohimme ha: “Etthu miyo kaatthuneyaaka opaka, waari okhala oomaaleleya ni omuroromela Muluku aka.” Wakhala weera nyuwo munviriha maxupo ntoko ala, muroromeleke weera Yehova onoorowa wookosoopani nyuwo ni wookhaviherani ovilela.

13. Yehova onaavarihela taani weera anoonihere weera annanaakhulela?

¹³ Moorweela mwa asinna ni asirokora. Yehova pooti waavarihela asinna ni asirokora weera anoonihere weera onnanaakhulela. Mwa ntakihero, owo pooti onvarela mutthu weera anleele masu ooreera ni mwa etempu yooreerela. Ti yeeyo yeereñye ni murokora mmoha onkhala wAsia vaavo aavirihaawe ehuhu yootepa oxupa. Owo aayeleela muteko awe ni aavoreiwa vantxipale. Ni muhoolo mwaya, aiyawe yaapaka yoottheka ni yaahiya okhala mutokweene a mmulokoni. Owo ohimme ha: “Miyo nkaasuwela mwaha wa heeni itthu sootheene iya saakikhumelelaaya, miyo kuupuwela weera kaapaka etthu yoonanara ni Yehova aanyoonyiwa ni miyo.” Murokora ola aahinvekela Yehova weera amoonihere wakhala weera nlelo annamusivela. Eheeni Yehova aapankaawe? Owo onhima ha: “Asitokweene a mmulokoni yaatthekula ni miyo ni yaakiroromeliha weera Yehova onnakisivela.” Ekwaha yanaaveeli tho murokora ola aahinvekela nikhavihero Yehova. Owo ohimme ha,  “Nihiku nenne kanvekenlaaka Yehova, miyo kaahaakhela ekaarta ya asinna a mmulokoni, vaavo kaasomaka ekaarta ele yoomaaliha kaahoona weera Yehova annakiiwa.” Mweekhaikhai, ikwaha sintxipale Yehova onnanoonihera weera onnanaakhulela moorweela mwa masu ooreera atthu akina ennileelaaya. — Nsal. 10:17.

14. Wa mukhalelo heeni mukina Yehova onooniheraawe weera annanaakhulela?

¹⁴ Yehova tho onnanoonihera weera onnanaakhulela vaavo onaavarihelaawe muteko asinna weera enivaha miruku seiyo ninhaawelaahu. Mwa ntakihero, Yehova aahinvarela muteko murummwa Paulo weera alepele miloko ikaarta soophiyeraka 14, mwa ikaarta sene seiya Paulo aahihelamo miruku sa nsivelo. Mwaha wa heeni Yehova aamurummaawe Paulo olepa miruku iya? Mwaha wooweera Yehova Muluku ansivelo nave owo ‘onnamulaka yoole onamusivelaiye.’ (Mir. 3:11, 12) Nto vaavo nnaakhelaahu miruku sinrweela mBiblyani, nihuupuweleke weera khannaakhuleliwa ni Yehova, eyo enoonihera weera Yehova onnansivela. (Aheb. 12:6) Mikhalelo heeni sikina Yehova onooniheraawe weera onnanaakhulela?

MIKHALELO MIKINA SINOONIHERA WEERA YEHOVA ONNANAAKHULELA

15. Yehova onaavaha taani munepa awe wootteela, ni eyo enanroromeliha eheeni?

¹⁵ Yehova onnaavaha munepa awe wootteela yaale onwaakhulelaawe. (Math. 12:18) Nto niikoheke ha, ‘Neereke kinnawera woonihera mikhalelo sa soowiima sa munepa mweekumini mwaka?’ Neereke nyuwo mohoonelela weera viinaano va nyuwo toopixa murima opwaha muhaakunveene okhala Namoona a Yehova? Vaavo nyuwo mununnuwiheraanyu mikhalelo sa soowiima sa munepa wa Yehova, muneereke ororomela ni murima anyu wootheene weera Yehova onnawaakhulelani! — Munwehe kwaadru “ Yoowiima ya munepa ti . . . ”

16. Yehova onaavarela taani muteko weera elaleye mitthenka sooreera, ni nyuwo munisoonela hayi osuwela eyo? (1 Atesalonika 2:4)

¹⁶ Weera akwanihere muteko woolaleya mitthenka sooreera Yehova onaaroromela paahi ale onwaakhulelaawe. (Mmusome 1 Atesalonika 2:4.) Moone moota murokora mmoha oneeriwa Jocelyn aakhaviherinwaawe mmutekoni moolaleera. Nihiku nimoha, Jocelyn aavinya akhulumunweene. Ni owo ohimme ha: “Miyo kiisoona okhala ookhulumuwa ni oohivareleya muteko, mene miyo kaari pioneira ni  nihuku nne naari nihiku naka nookhuma muteko woolaleera, nto kaapaka nivekelo ni kaarowa muteko woolaleera.” Wooxixelo ene yoole, Jocelyn aamusuwela Mary, muthiyana yoowo aari ansivelo ni aahaakhulela ekhaikhai. Miyeeri saattharelana, Mary aahihima weera aahinvekela Yehova avekelaka nikhavihero emaara yeeyo Jocelyn aamannaawe mulako awe. Jocelyn aaxuttenre eheeni ni yooweereya ela, owo ohimme ha: “Waakhala ntoko Yehova aakileela weera, ‘Miyo kinnawaakhulelani nyuwo.’” Ekhaikhai weera khaiyene atthu ootheene enrowa waakhulela mitthenka ninlaleyaahu, menento nroromeleke weera Yehova onnahakalala vantxipale vaavo nniilipiheraahu weera naaleele atthu akina mitthenka sooreera.

17. Eheeni nyuwo munxutteraanyu ni etthu Vicky ohimme awe woohima sa mukuttho? (Nsalmu 5:13 [5:12, NM])

¹⁷ Yehova oonivaha mukuttho weera aakhavihere ale onwaakhulelaawe. (1 Tim. 2:5, 6) Vanonto ankha nyuwo murima anyu waahiroromelaka weera Yehova onnawaakhulelani, nnaamweera muroromelaka mukuttho ni mbatizinwene? Muupuweleke ela, hiyo khanintthuneya ikwaha sootheene ororomelaka miyuupuwelo sahu mene onnatthuneya omuroromelaka Yehova. Ale enroromela mukuttho Yehova onnawoona okhala anaxariya ni onnaalaihera weera onoorowa waareeliha. (Musome Nsalmu 5:13 [5:12, NM]; Arom. 3:26) Murokora mmoha oneeriwa Vicky aahoonelela oreera waya ophimelela nnene sene mukuttho. Owo ohimme ha: “Miyo kohoonelela weera Yehova ookipixera murima mwa etempu yintxipale. . . . Mene miyo kanneera: ‘Nsivelo nanyu khaiyene ntokweene wa miyo. Mukuttho wa mwaninyu Yesu Kristu khomphiyera otxipiha soottheka saka.’” Mene emaara yeeyo Vicky aaphimelelaawe woohima sa mukuttho, owo aahoonelela weera Yehova annamusivela, nave tho hiyo pooti woona nsivelo na Yehova ni weera owo onnanaakhulela emaara yeeyo nimphimelelaahu sa mukuttho.

18. Navirelela omusivela Tiithi ahu a wiirimu, nroromeleke heeni?

¹⁸ Ekhaikhai weera nnaamweera niilipiheraka opaka itthu sootheene nonnaahu mwa yoosoma ene yeela, pooti weeraka ikwaha ikina nyuwo muneereke okhulumuwa, nave pooti ohovelaka wakhala weera Yehova onnawaakhulelani. Wakhala weera eyo enimweereya muupuweleke weera Yehova onnawaakhulela ‘ale envirelela omusivela.’ (Yak. 1:12) Nto nvireleleke omwaattamela vantxipale Yehova nave mweerereke wuupuwelela itthu sootheene owo onvarihelaawe muteko weera owoonihereni weera onnawaakhulelani. Nave muhittiwale weera Yehova ‘ori vakhiviru wa mutthu ori poothe a hiyo.’ — Mit. 17:27.