1-2. (a) Maxupo heeni Paulo aavirihaawe emaara aalepelaawe ikaarta asinna a wEfeso? (b) Makoho heeni ninrowaahu othokorora?

 NNAAMWEERA murummwa Paulo aatthukelinwe ekateya ya oRoma, owo aahipaka ele aaweraawe weera aalipihe asinna. Okhala weera owo khaawera waaxekura, aahaalepela ikaarta. Ni ikina sa seiyo, yaahilepeliwa asinna a wEfeso eyaakha ya 60 ni 61 Kristu awiiyeene. — Aef. 1:1; 4:1.

² Iyaakha 10 sa muttuli, Paulo aahiviriha etempu yintxipale ni asinna a wEfeso, alaleyaka ni axuttihaka mitthenka sooreera. (Mit. 19:1, 8-10; 20:20, 21) Owo annaasivela asinna awo ni annatthuna waakhavihera weera evirelele ororomeleya wa Yehova. Vanonto, mwaha wa heeni Paulo aalepenlaawe awo uulumaka sa epiphi ni waara? Ni itthu heeni ootheene hiyo ninrowaahu oxuttera ni miruku owo avanhaawe? Vano nrowe noone waakhuliwa wa makoho ala.

VEEPIPHINI WOOKHALA WAARA

3. Masu heeni Paulo aavarihenlaawe muteko aalepelaka akristu a wEfeso?

³ Paulo aahaalepela akristu a wEfeso eeraka: “Mwàri khalai epiphi, nto vanano vava muri warya.” (Aef. 5:8) Paulo aavarihela muteko masu ooweera epiphi ni waara, weera oonihere moota akristu a wEfeso yaapankaaya matxentxo. Nrowe noone mwaha wa heeni Paulo enraawe akristu a wEfeso ‘khalai yaari epiphi.’

4. Moota heeni akristu a wEfeso yaaraaya mweepiphini mwa mukhalelo woomunepani?

⁴ Ittiini soowootha. Akristu a wEfeso ehinaaye oxuttera ekhaikhai, awo yaakhalano mikhalelo sootepa onanara. Ecidade ya wEfeso yaakhalawo etemplu ya muluku mwaamuthiyana Artemide, yoowo atthu yaamoonaaya okhala muluku ooweraxa  a miluku 7 sa mulaponi. Atthu yannarowa otemplu iwo weera yaakokhorele amiluku aya. Opakiwa ni otumihiwa wa muluku Artemide, yaari etthu yaaphwanyiha musurukhu muntxipale. (Mit. 19:23-27) Opwaha mwa yeeyo, ecidade ele yaasuweliwa okhala ecidade ya maxitta. — Mit. 19:19.

5. Moota heeni akristu a wEfeso yaaraaya mweepiphini mwa mukhalelo wookonihana?

⁵ Oraruwa. Atthu a wEfeso yaari atthu waasivela okonihana moohireerela ni khayoona wuuliha muru opaka eyo. Otthekula woohima sa okonihana yaari etthu yaakhovelenlaaya opaka, ohiya paahi emaara yaatthekulaaya mene tho mu ittiini saya. (Aef. 5:3) Atthu antxipale a wEfeso ‘yaahiiveleela yaaworu moohureyani,’ masu enoonihera weera awo ‘khayoona ovoreya opaka itthu iya.’ (Aef. 4:17-19) Ehinaaye oxuttera woohima sa Yehova ni osuwela yoonanara ni yooreera, yoowuupuxera aya ya murima khiyaaxupa vaavo yaapakaaya itthu soonanara, awo-tho khiyaaxikha wakhala weera itthu yaapakaaya sannamunanara Yehova. Tivawo Paulo aahimmaawe eeraka awo ‘aariipihiwa mwa miruku saya ni aananarihiwa mwa ekumi ya Muluku.’

6. Mwaha wa heeni Paulo aahimmaawe weera akristu a wEfeso ‘vano yaari waara’?

⁶ Mene moohakalaliha, atthu akina a wEfeso, yaahiya epiphi. Tivawo Paulo aahimmaawe weera ‘vano awo yaari waara wa Apwiya.’ (Aef. 5:8) Awo yaahithanla okhala moovarihana ni malamulo a Yehova, yaawo yaari muthuko waamwaleela. (Nsal. 119:105) Aefeso awo yaahihiya itthu sootheene saavarihana ni ittiini soowootha. Awo yaahikhala atthu “òmutakiha Muluku” ni yaahipaka ele yaaweraaya weera emukokhoreleke Yehova ni murima aya wootheene ni omuhakalaliha. — Aef. 5:1.

7. Moota heeni maxupo ahu enlikanaaya ni maxupo yaavirihaaya akristu a wEfeso?

⁷ Moolikana ni eyo, nihaakunveene oxuttera ekhaikhai, hiyo naari mweepiphini mwa mukhalelo wookonihana ni wa ittiini. Akina a hiyo nanneerela eparte ifeesta sa ittiini soowootha, nave akina wannaasivela okonihana  woohireerela. Nto vaavo nixuttenraahu malamulo a Yehova woohima sa ele eri yooreera ni yoonanara, hiyo noopaka matxentxo. Nave noopatxera okhala mwa mukhalelo ommusivela Yehova. Nto etthu eyo, ennaniphwanyiha itthu sooreera. (Yes. 48:17) Nto vano hiyo nnoorowa oviriha maxupo makina. Onnatthuneya opaka ele ninweraahu weera nihiye epiphi ottuli, ni ovirelela weetta “ntoko anamwane a warya.” Ninrowa opaka hayi eyo?

MUTTHAWE EPIPHI

8. Moovarihana ni Aefeso 5:3-5, itthu heeni akristu ale yaatthuneyaaya osepa?

⁸ Mmusome Aefeso 5:3-5. Weera ekhale ottayi ni epiphi ni okonihana woohireerela, akristu a wEfeso yannatthuneya okhootta etthu eri poothe yaamunanara Yehova. Ohiya paahi okonihana woohireerela, eyo-tho yaahela mpuwa otthekula woohima sa mwaha owo. Paulo aahaaleela akristu a wEfeso weera esepeke itthu iya wakhala weera yaatthuna okhalano “mukalampa wa omwene wa Kristu ni wa Muluku.”

9. Mwaha wa heeni nintthuneyaahu osepa etthu eri poothe envarihana ni okonihana?

⁹ Nave-tho hiyo onnatthuneya wiikosoopa weera ‘nihiivoleihere ni mikhalelo sa epiphi sihiniima etthu.’ (Aef. 5:11) Ekhaikhai ti yooweera, emaara yeeyo mutthu onwehaawe, wiiwelela ni onuulumaawe woohima sa okonihana, ti wookhweya opaka etthu yoonanara. (Eph. 3:6; Yak. 1:14, 15) Elapo emoha, asinna aapaka egrupu ya rede social weera etthekuleke ntoko “asinthamwene.” Woopatxerani matthekulelo aya yaari sa itthu soomunepani. Mene muhoolo mwaya matthekulelo awo yaapatxera ovoleela itthu sa okonihana. Moovira etempu, asinna awo yaahima weera yaari matthekulelo ene yaawo oohireerela yaaweerinhe opaka itthu sa okonihana woohireerela.

10. Moota heeni Satana oneereraawe oniwoka? (Aefeso 5:6)

¹⁰ Elapo ela ya Satana ennapaka ele enweraaya weera eniwoke, eniwiiheraka muupuwelo wooweera itthu Yehova onhimaawe weera ti soonanara, khaiyene ti soonanara. (2 Ped. 2:19) Ni eyo khaiyene ti yoohovela! itthu Satana aavarihenlaawe muteko khalayi, ti oweeriha atthu ohisuwela etthu eri yooreera naari yoonanara. (Yes. 5:20; 2 Akor. 4:4) Nto mwaha wa yeeyo, ifilme sintxipale, itelevisau ni isite sintxipale, khasinvarihana ni malamulo a Yehova! Satana ontthuna nuupuweleke weera okonihana ni itthu simpakiwa olelo va, sinnaakhuleliwa ni khasinkumihera maxupo. — Mmusome Aefeso 5:6.

11. Moota heeni yooweereya ya Angela enooniheraaya weera onnatthuneya ovarihela muteko miruku sa Aefeso 5:7? (Nwehe efootu.)

¹¹ Satana ontthuna weera asinthamwene ahu ekhaleke yaale ehinnikhavihera onvarela Yehova. Tivawonto Paulo aalenlaawe akristu a wEfeso ariki: “Muhikawane etthu ni yawo” eyo tiiyo, ni ale empaka itthu sihimmusivela Muluku. (Aef. 5:7) Nave-tho olelo va, hiyo onnatthuneya wiikosoopa vantxipale waapwaha asinna a wEfeso, mwaha wooweera olelo va ti wookhweya oviriha etempu yintxipale ni atthu akina, ohiya paahi ethoni ni ethoni, mene-tho mu redes sociais. Angela, a onkhala wÁsia, ohoonelela weera redes sociais pooti okhala etthu yootepa woopiha. Owo ohimme ha: “Onkhala ntoko muraakho nyuwo muhinsuwelaanyu weera munoomora. Miyo kaahiya oligari ni okhalano asinthamwene ehinttittimiha malamulo a mBiblyani. Mene muhoolo mwaya, miyo kuupuwela weera khaiyene woonanara okhalano ekumi ehimmusivela Yehova.” Moohakalaliha, asitokweene a mmulokoni yaari a nsivelo ni yaamukhavihera  Angela opaka matxentxo. Owo onnahima eeraka: “Vano miyo kinnasariha mmuupuweloni mwaka itthu soomunepani, ohiya ni itthu sa redes sociais.”

12. Eheeni enrowa onikhavihera otthara malamulo a Yehova woohima sa ele eri yooreera ni yoonanara?

¹² Khontthuneya ohiya nyuupuwelo sa elapo sinivoleelaka weera okonihana khaiyene ti woonanara. Hiyo noosuwela weera eyo ethiru. (Aef. 4:19, 20) Mwaha wa yeeyo, waamureera wiipakela makoho ntoko ala: ‘Miyo kinniikosoopa weera kihiiraane moohireerela ni asinthamwene aka oxikola, omutekoni naari ale ehinttittimiha malamulo a Yehova? Miyo kinnalipa murima weera kaakihe malamulo a Yehova, nnaamweera atthu akina ehaakhulelaka ni ereene oovaanyiha?’ Ntoko enooniheraaya yoolepa ya 2 Timotheyo 2:20-22, hiyo-tho onnatthuneya wiikosoopa vaavo nnaapakaahu asinthamwene mpuwa mwa muloko. Onnatthuneya wuupuwelela weera asinthamwene akina a mmulokoni pooti ohinikhavihera ovirelela okhala oororomeleya wa Yehova.

NVIRELELE WEETTA “NTOKO ANAMWANE A WARYA”

13. Entaphulela eheeni ovirelela weetta “ntoko anamwane a warya”? (Aefeso 5:7-9)

¹³ Paulo aawooperera akristu a wEfeso ohiya paahi osepa epiphi, mene-tho ‘ovirelela weetta ntoko anamwane a warya.’ (Mmusome Aefeso 5:7-9.) Mene eyo entaphulela eheeni? Mwa mukhalelo woowiiwanyeya, ontaphulela okhalano mukhalelo wa ekristu etempu yootheene. Mukhalelo mmoha woopaka eyo, ori omusoma Biblya nikhaviheriwaka ni irevista sahu. Opwaha mwa yeeyo, ti wootthuneya owehexexa ntakihero ni sooxuttiha sa Yesu, “warya wa elapo.” — Yoh. 8:12; Mir. 6:23.

14. Munepa wootteela onnikhavihera moota heeni?

¹⁴ Naatthunaka ovirelela weetta “ntoko anamwane a warya,” hiyo nnoorowa ohaawela nikhavihero na munepa wootteela. Mwaha wa heeni? Mwaha wooweera ti wooxupa okhalano mukhalelo wooreera woohima sa okonihana elapo ela. (1 Ates. 4:3-5, 7, 8) Munepa wootteela onoorowa onikhavihera owanano  nyuupuwelo sa elapo ntoko iyo, seiyo sinhela mpuwa filosofia, ni nyuupuwelo sihinvarihana ni yootthuna ya Yehova. Nave-tho munepa wootteela onoorowa onikhavihera opaka sootheene ‘mooreera murima ni exariya ni ekhaikhai.’ — Aef. 5:9.

15. Mwa mukhalelo heeni ninrowaahu waakhela munepa wootteela? (Aefeso 5:19, 20)

¹⁵ Mukhalelo mukina woowaakhela munepa wootteela, ti moorweela mwa nivekelo. Yesu enre weera Yehova ‘aamwaavaha munepa wootteela yaale ananvekela.’ (Luka 11:13) Nave opwaha mwa yeeyo, vaavo nnanvuwihaahu Yehova mmithukumanoni, ninnaakhela-tho munenpa wootteela. (Mmusome Aefeso 5:19, 20.) Wakhala weera nnookhalano munepa wootteela wa Yehova, onoorowa onikhavihera okhala moovarihana ni yootthunaawe.

16. Eheeni enrowa onikhavihera opaka soothanla sooreera? (Aefeso 5:10, 17)

¹⁶ Vaavo nimpakaahu yoothanla yootthuneya, onnatthuneya osuwela “yeyo enàsivela Apwiya” ni opaka itthu moovarihana ni yootthuna eyo. (Mmusome Aefeso 5:10, 17.) Naaphwanyaka eversu ya mBiblyani woohima sa mukhalelo ahu, onkhala ntoko niphwannye etthu Yehova onuupuwelaawe woohimna sa mwaha owo. Nto vaavo ninvarihelaahu muteko miruku sa Yehova, ninnapaka soothanla sooreera.

17. Moota heeni ninrowaahu ovarihela nnene etempu ahu? (Aefeso 5:15, 16) (Nwehe efootu.)

¹⁷ Nave-tho Paulo aahiwooperera asinna a wEfeso ovarihela nnene etempu aya. (Mmusome Aefeso 5:15, 16.) ‘Mutakhali,’ naari neere, mwiittani ahu, Satana, ontthuna weera naatteliweke ni itthu sa elapo ela, ni ohikhalano etempu yonvarela muteko Yehova. (1 Yoh. 5:19) Wakhala weera khaninwehexexa nnene, mukristu pooti opatxera osiveliwaxa ni musurukhu, osoma ni muteko, ohiya ottottela mureerelo iparakha iyo weera anvarele Yehova. Wakhala weera eyo enimweereya, onoorowa wooneya weera noopatxera wuupuwela ntoko atthu a mulaponi. Ekhaikhai weera musurukhu,  osoma ni itthu sa weerutthuni khaiyene ti soonanara. Mene iyo khasintthuneya weera sikhaleke nipuro noopatxera mweekumini mwahu. Naatthunaka ovirelela weetta “ntoko anamwane a warya,” onnatthuneya ‘ovarihela nnene etempu ahu,’ niwehexexaka paahi ele eri yootthuneya.

18. Eheeni Donald aapankaawe weera avarihele nnene etempu awe?

¹⁸ Nwehexexeke eparakha muraanyuno yonvarela Yehova. Tiyeeyo Donald, yoowo onkhala wÁfrica do Sul, aapankaawe. Owo ohimme ha: “Miyo kaaheemela weera kuupuwele moota kaavarelaaka ekumi aka avinyaka kaahinvekela Yehova ni murima aka wootheene weera akikhavihere waatxeerera muteko aka woolaleera. Miyo-tho kaahinvekela weera kiphwanye muteko yoowo kaarowaaka okhalakano etempu weera kivare muteko woolaleera. Nto kikhaviheriwaka ni Yehova, eyo yaaheereya. Avinyaka, miyo ni mwaaraka naapatxera ovara muteko wa ehuhu yootheene.”

19. Moota heeni nneeraahu nivireleleke weetta ntoko “anamwane a warya”?

¹⁹ Ikaarta Paulo aalepenlaawe akristu a wEfeso saahaakhavihera okhala oororomeleya wa Yehova. Nave ekaarta eyo pooti onikhavihera-tho. Ntoko nonnaahu, pooti onikhavihera waathanla nnene asinthamwene ahu ni matthekulelo ahu. Ekaarta eyo ennanooperera weera nimusomeke Biblya weera waara weekhaikhai onimwaleeleke. Nave ennuuluma otthuneya waya munepa wootteela, yoowo onnikhavihera okhalano mikhalelo sooreera. Ovarela muteko ele Paulo alempaawe, onoorowa onikhavihera opaka soothanla sooreera. Soothanla seiyo sinvarihana ni yootthuna ya Yehova. Opaka itthu iya onoorowa onikhavihera otthawa epiphi ya elapo ela ni ovirelela okhala moowaarani!