1-2. Eheeni mutthu ontthuneyaawe opaka ahinaaye obatiziwa?

 MPUWA mwa iyaakha 5 sivinre, atthu ookwana 1 miliyawu aabatiziwa ntoko Anamoona a Yehova. Antxipale a yaawo eri ntoko Timotheyo, yoowo aaxuttenre ekhaikhai ‘areene mwaana.’ (2 Tim. 3:14, 15) Akina exuttenre ekhaikhai ereene oowunnuwela ni akina yuuluvanleene. Murokora mmoha aamusoma Biblya ni Anamoona a Yehova abatizinwe areeneno iyaakha 97!

² Wakhala weera nyuwo mwa namasoma a Biblya naari muhuuwale mweekhaikhaini, neereke nyuwo munnuupuwela obatiziwa? Eyo eri yoothanla yooreera! Muhinaaye obatiziwa onnatthuneya wiivaherera wa Yehova. Yoosoma ela enoohima etthu entaphulelaaya wiivaherera. Nave-tho nnimoona mwaha wa heeni muhintthuneyaanyu woova wiivaherera wa Yehova ni oBatiziwa, mwakhala oolikaneene.

WIIVAHERERA TI HEENI?

3. Nvahe matakihero a atthu enromoliwa mBiblyani yiivaherenre wa Yehova.

³ MBiblyani, wiivaherera ontaphulela othanliwa ni Yehova weera nimukokhoreleke mooreerela. Ana a Israeli yaari atthu yiivaherenre wa Yehova. Menento atthu akina yanniivaherera wa Yehova mwa mukhalelo woothanleya. Mwa ntakihero, Aharoni annawara “nluku norikaxa” ntxemo na etxikukhu, vahoolo etxirempa vamuru vawe. Ntxemo na etxikukhu noonihera othanliwa wawe ni Yehova weera amukokhoreleke moothanleya, ntoko namakeya a ana Israeli. (Onam. 8:9) Nave-tho Manaziri yanniivaherera wa Yehova mwa mukhalelo woothanleya. Masu ooweera “Munaziri,” enweela mwa nuulumo na eHeberi nazir, yaawo entaphulela ‘oothanliwa’ naari ‘yiivaherenre.’  Manaziri yannatthuneya otthara itthu ikina saari munlamulo na Mose. — Nam. 6:2-8.

4. (a) Eheeni enhela mpuwa wiivaherera wa Yehova? (b) Entaphulela eheeni ‘wiikhootta’ mutthu mwaneene? (Nwehe efootu.)

⁴ Vaavo muniivahereraanyu wa Yehova, nyuwo munnakhala mutthareli a Yesu, ni mwa etempu ene yeeyo, opaka yootthuna ya Yehova ti etthu yootepa otthuneya mweekumini mwanyu. Menento eheeni enhela mpuwa wiivaherera iwo? Yesu enre: “Yowo ontthuna orwa ottuli waka, aìkhotte.” (Math. 16:24) Masu a eKereku entaphulela “wiikhootta” entaphulela “wiikhoota mutthu mwaneene awe.” Vaavo muniivahereraanyu wa Yehova, onnatthuneya weera hooye etthu eri poothe emmunanara Yehova. (2 Akor. 5:14, 15) Eyo enhela mpuwa okhootta “miteko sa erutthu” ntoko okonihana woohireerela. (Agal. 5:19-21; 1 Akor. 6:18) Neereke omwiiwelela Yehova onooxupiha ekumi anyu? Wakhala weera nyuwo munoomuroromela Yehova ni weera miruku sawe sinimookosoopani, nyuwo khamunrowa oxupeya. (Nsal. 119:97; Yes. 48:17, 18) Munna mmoha oneeriwa Nicholas ohimme ha, “Nyuwo pooti woona malamulo a Yehova ntoko egarade ya ekadeya weiwo nyuwo muhinweraanyu opaka etthu, naari ntoko egarade enwaleliwaayamo akharamu yeeyo enookosoopani mwa itthu soowoopiha.”

5. (a) Moota heeni mutthu oniivahereraawe wa Yehova? (b) Ovirikana heeni okhanle eriyari ya wiivaherera ni obatiziwa? (Nwehe efootu.)

⁵ Nyuwo munnapaka nivekelo wa Yehova mmuleelaka weera munrowa onvarelaka yoowo paahi, ni weera opaka yootthuna awe enrowa okhala etthu yootthuneya mweekumini mwanyu. Nyuwo moomulaihera Yehova weera munoorowa omusivela ni ‘murima anyu wootheene, ni munepa anyu wootheene, ni muupuwelo anyu wootheene, ni ikuru sanyu sootheene.’ (Mar. 12:30) Wiivaherera iwo, ompakiwa paahi nyuwo ni Yehova.  Nto obatiziwa ti wa vanlakani ni munnawoonihera atthu ootheene weera mohiivaherera. Wiivaherera wanyu etthu yootepa otthuneya, tivawo muntthuneyaanyu opaka ele munweraanyu weera mukwanihere yoolaihera anyu. — Koh. 5:4, 5.

MWAHA WA HEENI NINTTHUNEYAAHU WIIVAHERERA WA YEHOVA?

6. Eheeni emmweeriha mutthu otthuna wiivaherera wa Yehova?

⁶ Etthu enweerihani wiivaherera wa Yehova nsivelo nanyu muraanyuno nuuwo. Nsivelo nno khaiyene etthu envira. Mene envarihana ni “osuwela wa osivela” ni “osuwela wa munepa” naari neere itthu muxuttenraanyu woohima sa Yehova ni yootthuna awe, seiyo sinweerihani otthuna ovirelela omusivela Yehova mahiku ootheene. (Akol. 1:9) Yoosoma ya Biblya yooweerihani ororomela weera (1) Yehova mutthu okhanle, (2) Biblya masu awe uupuxenraawe, ni (3) Yehova onnavarela muteko mareherero awe weera apake yootthuna awe.

7. Eheeni nintthuneyaahu opaka nihinaaye wiivaherera wa Yehova?

⁷ Ale eniivaherera wa Yehova, entthuneya osuwela vantxipale woohima sa Biblya nave enkhaleke moovarihana ni malamulo a Yehova. Awo ennapaka ele enweraaya weera yuulume ni atthu akina woohima sa ele exuttenraaya mBiblyani. (Math. 28:19, 20) Nsivelo naya wa Yehova nohaatxeerereya, ni awo entthuna onvarela ni murima aya wootheene. Neereke nyuwo muniisoonela hiiho? Nyuwo mwakhalano nsivelo ntoko nno ni Yehova, khamunrowa wiivaherera naari obatiziwa mwaha wooweera muntthuna waahakalaliha ale enoosomihani Biblya naari asipapinyu;  nave nyuwo khamunrowa opaka eyo mwaha wooweera asinthamwene anyu aabatiziwa.

8. Eheeni eneera yookhavihereni nyuwo otthuna wiivaherera wa Yehova? (Nsalmu 116:12-14)

⁸ Muupuwelelaka itthu sootheene Yehova oopakenlaaweni, nyuwo munnamuxukurela ni otthuna onvaherera ekumi anyu. (Musome Nsalmu 116:12-14.) Biblya onhima weera Yehova tonnivaha “eparakha eri yothene ni yovaha eri yothene.” (Yak. 1:17) Yoovaha eri yootepa otthuneya wa atthu ootheene, ti mukuttho wa Yesu Kristu. Muupuwele ha! Mukuttho wa Yesu wooweerihani nyuwo okhalano onthamwene woolipa ni Yehova. Opwaha mwa yeeyo, Yehova oovaha eparakha ya okhala mahiku ootheene. (1 Yoh. 4:9, 10, 19) Wiivaherera wa Yehova mukhalelo mmoha onoonihera omusivela wanyu Yehova ohiya paahi mwaha wa mukuttho, mene mwaha wa mareeliho ootheene anoovahaaweni. (Ola. 16:17; 2 Akor. 5:15) Ti yeeyo ninxutteraahu va yoosoma 46, epontu 4, ya eliivuru Mukhaleno ekumi yoohimala! ehelaka mpuwa eviidiyu ya iminuutu 3, yeeyo eneera Eheeni hiyo nneeraahu nimutthikihere Muluku?

NYUWO MURI OOLIKANEENE WEERA MWIIVAHERERE NI MBATIZIWE?

9. Mwaha wa heeni mutthu ohintthuneyaawe okhanyereriwa wiivaherera wa Yehova?

⁹ Pooti weeraka nyuwo munuupuwela weera nlelo khamwiireherenre weera mwiivaherere ni obatiziwa. Apaale nyuwo muntthuneya opaka matxentxo mweekumini mwanyu weera mukhaleke moovarihana ni malamulo a Yehova, naari apaale munnatthuneya etempu vakhaaniini weera mulipihe nroromelo nanyu ni Yehova. (Akol. 2:6, 7) Anamasoma a Biblya ennakela vahoolo moovirikana, nave awo khembatiziwa eyaakha emoharu. Onnatthuneya oweha matxentxo nyuwo muntthuneyaanyu opaka mweekumini mwanyu, ni opaka ele munweraanyu muhiilikanxeraka ni atthu akina. — Agal. 6:4, 5.

10. Eheeni nyuwo muntthuneyaanyu opaka wakhala weera mohoonelela weera khamwiireherenre weera mwiivaherere wa Yehova ni obatiziwa? (Nwehe tho ekwaadru “ Nyuwo muhuuwale mweekhaikhaini.”)

¹⁰ Nnaamweera nyuwo musuwelaka weera khamwiireherenre weera mwiivaherere wa Yehova, nvireleleke okhalano yooluluwanya eyo. Nave munvekeleke Yehova nikhavihero wa matxentxo muntthuneyaanyu opaka. (Afil. 2:13; 3:16) Muroromeleke weera Yehova onimwiiwa mavekelo anyu ni onimwaakhula. — 1 Yoh. 5:14.

MWAHA WA HEENI ATTHU AKINA EHINIIVAHERERAAYA

11. Yehova onrowa onikhavihera moota heeni weera nivirelele okhala oororomeleya wa yoowo?

¹¹ Atthu akina eri oolikaneene weera yiivaherenre ni obatiziwa, ennahovela waari weera onnatthuneya opaka eyo naari hooye. Apaale awo pooti wiikoha ha, ‘Nankha kabatiziwa ni muhoolo mwaya kipaka yoottheka etokweene ni okumihiwa mmulokoni?’ Eyo yaareene etthu nyuwo munoovaanyu, muroromeleke weera Yehova onimoovahani itthu sootheene nyuwo munhaawelaanyu weera “mwètteleke ephiro yowàphwanelela Apwiya.” (Akol. 1:10) Nave owo onoorowa woovahani ikuru munhaawelaanyu weera mpakeke itthu sooreera. Nave-tho owo ohaakhavihera atthu antxipale weera ekhaleke oororomeleya wa yoowo. (1 Akor. 10:13) Tivawonto enkhalaaya atthu vakhaani paahi enkumihiwa mmulokoni. Yehova onnanivaha itthu sootheene hiyo ninhaawelaahu weera nivirelele ororomeleya wa yoowo.

12. Eheeni nyuwo muntthuneyaanyu opaka weera muhipake yoottheka etokweene?

¹² Ootheene hiyo ninneereriwa opaka itthu soonanara. (Yak. 1:14) Mene nyuwo pooti  othanla etthu yoopaka wakhala weera munimweereriwa. Ekhaikhai ti yooweera nyuwo munnasuwela etthu yoopaka mweekumini mwanyu. Atthu akina enhima weera khonwereya osuwela moota nniisoonelaahu ni etthu nimpakaahu, mene eyo ethiru. Nyuwo pooti owehexexa sootthuna sanyu soonanara. Mwaha wa yeeyo, ikwaha sootheene nyuwo muneereriwaanyu, pooti othanla ohipaka etthu yoonanara, mwaha wa yeeyo, itthu ikina sinimookhaviherani. Mwa ntakihero, munvekeleke Yehova mahiku ootheene, mukhalekeno yookhovelela ya omusoma Biblya, ni mooneleke mithukumano sootheene. Muttotteleke mureerelo eparakha eri poothe munkhalaanyuno weera muulume ni atthu akina woohima sa nroromelo nanyu. Wakhala weera nyuwo munoopaka eyo, munoorowa okhalano ikuru weera munvareleke Yehova. Muhittiwale weera Yehova onimookhaviherani opaka eyo. — Agal. 5:16.

13. Ntakihero heeni nootepa oreera Yosefe anihiyenraawe?

¹³ Onoorowa okhala wookhweya nyuwo ovirelela ororomeleya wa Yehova, wakhala weera muhinaaye weereriwa mwaathanla etthu yoopaka. Biblya onnawuuluma atthu antxipale yaapanke eyo, nave atthu awo yaari oohimalela hiiha ntoko hiyo. Mwa ntakihero, ikwaha sootheene amwaarawe Potifari yaamweereraaya Yosefe, owo khaahovela etthu yoopaka. Biblya oneera “Yosefe àkhotta” nave Yosefe mwaneene aahihima eeraka: “Vano ni miruku xeni kinrwaka opanka yotakhala etokotoko si yela ni siso omutthekela Muluku?” (Eph. 39:8-10) Onnooneya weera, Yosefe aasuwela etthu yoopaka ahinaaye weereriwa ni mwaariye Potifari. Mwaha wa yeeyo owo aahiwera opaka etthu yooreera emaara eererinwaawe.

14. Moota heeni nneeraahu nisepeke weereriwa?

¹⁴ Ninrowa okhalano hayi mikhalelo imoha-moharu Yosefe aaraaweno? Nyuwo pooti othanla viinaano va etthu munrowaanyu opaka mwaavirihaka weereriwa. Muhipiseke weera hooye itthu simmunanara Yehova, ni muhuupuweleleke itthu iyo. (Nsal. 97:10; 119:165) Wakhala weera nyuwo munoopaka eyo, munoowina weereriwa. Nave nyuwo munoosuwela etthu yoopaka.

15. Moota heeni mutthu onooniheraawe weera ‘onnamwaasa’ Yehova ni murima awe wootheene? (Aheberi 11:6)

¹⁵ Pooti weeraka nyuwo munnaroromela weera moophwanya ekhaikhai ni weera muntthuna  onvarela Yehova ni murima anyu wootheene, nave nyuwo pooti wuupuwelaka weera khamwiireherenre weera nvaherere ekumi anyu wa Yehova ni obatiziwa. Nto nyuwo pooti opaka etthu emoha-moharu aapankaawe mwene Davidi. Owo aahinvekela Yehova eeraka: “Muluku mukiwehexexe ni mutokose murim’aka: mukiyese ni mutokose sowupuwela saka. Ni mòne, karí kèttelaka ephiro yohawa ni mukèttihe mphironi mohimala.” (Nsal. 139:23, 24) Yehova onnaareeliha “yale anamwàsa.” Wiilipihera wanyu weera mwiivaherere ni mbatiziwe, munnoonihera weera munnapaka eyo. — Mmusome Aheberi 11:6.

NVIRELELE OMWAATTAMELA YEHOVA

16-17. Moota heeni ale enhuuwa mweekhaikhaini enrowaaya omwaattamela Yehova? (Yohani 6:44)

¹⁶ Yesu aahihima weera atthareli awe yaathanlinwe ni Yehova. (Mmusome Yohani 6:44.) Muupuwele moota eyo eraaya yoohakalaliha ni moota enootaphaayani nyuwo. Yehova onnaweha etthu eri yooreera wa mutthu ori poothe onampurulelaawe mweekhaikhaini. Owo onnamoona mutthu ori poothe ntoko ‘mutthu othanlinwe,’ naari ‘ootthuneya.’ (Ola. 7:6; enoota) Nave ti hiiho Yehova onwoonelaaweni.

¹⁷ Pooti weeraka nyuwo mmiravo muhuuwale ni asitiithi anyu mweekhaikhaini. Apaale nyuwo pooti wuupuwelaka weera munanvarela Yehova mwaha wooweera asitiithi anyu ennapaka eyo, ohiya weera Yehova orimoothanlani. Menento Biblya onnahima eeraka: “Mmwàttameleke Muluku, ni yowo anawàttameleni nyuwo.” (Yak. 4:8; 1 Sow. 28:9) Vaavo nyuwo mumpatxerihaanyu omwaattamela Yehova, owo-tho annawaattamelani. Naari variyari va egrupu, Yehova annawoonani nyuwo ntoko mutthu ootthuneya. Yehova onnamwaattamela mutthu ti mutthu, waahela mpuwa ale enhuuwa mweekhaikhaini. Vaavo mutthu ompatxerihaawe omwaattamela Yehova, Yehova tho annapaka ele elempwale va Yakobe 4:8. — Munwehe-tho 2 Atesalonika 2:13.

18. Eheeni ninrowaahu woona mwa yoosoma enttharelana? (Nsalmu 40:9 [40:8, NM])

¹⁸ Vaavo muniivahereraanyu wa Yehova ni obatiziwa, nyuwo munnamutakiha Yesu. Mootaphuwa, Yesu aari oolikaneene weera apake etthu eri poothe Atiithi awe yanvekelaaya. (Musome Nsalmu 40:9 [40:8, NM]; Aheb. 10:7) Yoosoma enttharelana, ninrowa woona etthu enrowa wookhaviherani ovirelela onvarela Yehova mwabatiziwa vale.