1. Mwaha wa heeni oraaya wooreera opakela eparte mareherero a Yehova?

 MAHIKU ala oomalihera, ti wooreera opakela eparte mareherero a Yehova. Vaavo elapo ela envirelelaaya onanara, Yehova onnanivaha emusi ya omunepani yoowiiraana ya asinna ni asirokora. (Nsal. 133:1) Yehova tho onnanikhavihera anivahaka emusi yoolipa ni yoohakalala. (Aef. 5:33–6:1) Owo-tho onnanivaha miruku seiyo ninhaawelaahu weera niwere oviriha oxupeya ni weera nikhaleke oohakalala.

2. Eheeni nintthuneyaahu opaka ni mwaha wa heeni?

² Nintthuneya wiilipihera weera nivirelele omukokhorela Yehova moororomeleya. Mwaha wa heeni? Mwaha wooweera ikwaha ikina hiyo pooti oveeheya mwaha wa itthu atthu akina ampakaaya naari anuulumaaya. Nave pooti okhala wooxupa woona ohimalela wahu. Otepaxa wene vaavo nimpakaahu yoottheka emoha mwa ikwaha sintxipale. Mwa yoosoma ene yeela, ninkela othokorora itthu tthaaru seiyo nintthuneyaahu ovilela (1) vaavo munna onoonyoonyihaaweni, (2) vaavo aiyinyu naari amwaarinyu anoonyoonyihaayani, ni (3) vaavo ninkhalaahu ooxupeya ni soottheka sahu. Mwa yoosoma ene yeela, ninrowa othokorora iparte tthaaru iya. Nave-tho ninrowa woona etthu ninrowaahu oxuttera ni atthu araru anuulummwa mBiblyani yaawo yaavirelenle okhala oororomeleya wa Yehova ni yaavirinhe maxupo ntoko ala.

NVILELEKE VAAVO MUNNA ONOONYOONYIHAAWENI

3. Maxupo heeni ootheene hiyo ninvirihaahu?

³ Maxupo. Asinna akina pooti okhalano mikhalelo sinninyoonyiha, akina pooti opaka etthu ennihiya ooxupeya, nave akina pooti ohinthokokorora mwa mukhalelo wooreerela. Asitokweene a mmulokoni ennapaka soottheka, itthu ntoko iya sinnaweeriha akina ohovela wakhala weera ala mareherero a Yehova. Ohiya  ovirelela onvarela Yehova moowiiraana ni asinna, apaale awo annahiya wuuluma ni atthu awo yaanyoonyinhe, nave enneemexera woonela mithukumano. (Sof. 3:9) Neereke ti wa miruku opaka eyo? Nrowe noone etthu ninxutteraahu ni mutthu mmoha onromoliwa mBiblyani yoowo aavirinhe maxupo ntoko awo.

4. Maxupo heeni Paulo aavirinhaawe?

⁴ Ntakihero nimoha na mBiblyani. Murummwa Paulo aasuwela weera asinna yaari oohimalela. Mwa ntakihero, asinna akina a muloko wa oYerusalemu khiyaakhulela weera owo aari murummwa. (Mit. 9:26) Moovira etempu, atthu akina yannamuuluma moohireerela Paulo etthunaka onanariha mikhalelo sawe. (2 Akor. 10:10) Ekwaha emoha, Paulo aamoona mutokweene a mmulokoni apakaka yoothanla yoohireera, yeeyo yaarowa waakwattuliha atthu akina. (Agal. 2:11, 12) Nave nthamwene mmoha a Paulo a vanikuthani, Marko, aahimunyoonyiha vantxipale. (Mit. 15:37, 38) Paulo anwera ohiya itthu iya simmwalanyihaka ni atthu yanveeha, mene owo khaapanke eyo. Owo aakhalano moonelo wooreera wa asinnawe nave aavirelela okhala oolipa mmutekoni anvarelaawe Yehova. Etthu heeni yamukhavihenre Paulo ovilela?

5. Eheeni yamukhavihenre Paulo ohaahiya asinnawe? (Akolosi 3:13, 14) (Nwehe efootu.)

⁵ Paulo annaasivela asinnawe. Ni nsivelo nno owo aaraaweno naawo, naamukhavihera owehexexa mikhalelo saya sooreera ohiya owehexexa ohimalela waya. Nsivelo nno-tho naamukhavihera Paulo ovarihela muteko ele olempaawe va Akolosi 3:13, 14. (Mmusome.) Moone moota Paulo aapankaawe eyo vaavo amulevelenlaawe nthamwene awe Marko. Nnaamweera Marko aamuhiñye Paulo mpuwa mwa ekwaha awe yoopatxera ya omisiyonaariyu, Paulo khamminre supi. Noovira etempu, vaavo Paulo aalepenlaawe ekaarta akristu a wAkolosi weera aalipihe, owo aamuttottopela Marko mwaha wookhala ‘naapwiipwi a nimaaliho wa Paulo.’ (Akol. 4:10, 11) Ni vaavo aaraawe mukateya oRoma, Paulo anvekela nikhavihero Marko. (2 Tim. 4:11) Onnooneya weera Paulo khaahiñye asinnawe. Ninxuttera eheeni ni Paulo?

6-7. Eheeni enrowa onikhavihera ovirerela owoonihera nsivelo asinna nnaamweera ereene oohimalela? (1 Yohani 4:7)

⁶ Ele ninxutteraahu. Yehova ontthuna weera nivireleleke owoonihera nsivelo asinnihu. (Mmusome 1 Yohani 4:7.) Vaavo munna onnithokororaawe mwa mukhalelo yoowo mukristu ahaarowaawe opaka, hiyo nroromeleke weera owo khaatthuna oninyoonyiha moolakela. Ni owo onnapaka ele onweraawe weera apakeke itthu moovarihana ni moonelo wa Yehova. (Mir. 12:18) Yehova onnaasivela arumeyi awe oororomeleya nnaamweera epakaka  soottheka. (Nsal. 103:9) Hiyo ninnaxukurela vantxipale mwaha wooweera Yehova onnanilevelela ni mwaha wa yeeyo, hiyo nintthuna omutakiha naalevelelaka atthu akina. — Aef. 4:32–5:1.

⁷ Ti wootepa otthuneya wuupuwela weera ninkhala okhwipi wa emalihero, mwaha wa yeeyo, ninnatthuneya okhala vakhiviru ni asinna. Onooneya weera otthara-tthariwa onoorowa otepa, nave hiyo pooti otthukiwa mwaha wa nroromelo nahu. Wakhala weera eyo enimweereya, nnoorowa waahaawelaka vantxipale asinna. (Mir. 17:17) Moone ele yeereñye ni Josep a mutokweene mmoha a mmulokoni a wEspanha. Owo ni asinna akina yaatthukiwa mwaha wooheerela eparte epoliitika. Josep ohimme ha: “Okhala weera okateya ootheene naakhala nipuro nimoha, waari wookhweya onyoonyihana mukina ni mukhwaawe. Hiyo wannatthuneya ovilelana mukina ni mukhwaawe, ni olevelelana. Eyo yaanikhavihera okhala oowiiraana ni okosoopana mukina ni mukwaawe. Hiyo naakhala eriyari ya maperesu makina yaawo yahaamukokhorela Yehova. Ekwaha emoha miyo kaahiivoreya nto waatthuneya oheliwa exesu moono aka. Mwaha wa yeeyo, miyo nkaawera opaka itthu ikina meekhaaka. Munna mmoha aakitxapela ikuwo saka, nave aakipakela itthu sintxipale. Miyo kaahoona nsivelo neekhaikhai ehuhu ele yooxupa.” Moohihovela, nookhalano mathowa mantxipale anneeriha oreherera moohipisa maxupo nraahuno ni asinna.

NVILELEKE VAAVO AMWAARINYU NAARI AIYINYU ANOONYOONYIHAAYANI

8. Maxupo heeni matheli anvirihaaya?

⁸ Maxupo. Ntheli nri nootheene ninnaviriha maxupo. Biblya onnaiwanyeiha weera, anamathelana ‘annaviriha masooso mwekumini mwaya.’ (1 Akor. 7:28) Mwaha wa heeni? Mwaha wooweera ntheli nnaawiiraaniha atthu eeli oohimalela. Mwaha woowera mutthu ti mutthu wa atthu ala eeli, ookhalano mikhalelo sawe, itthu simmusivela, ni moonelo awe. Apaale mutthu ti mutthu vanthelini, ookhalano sookhovelela soovirikana naari ohuuwale mwa mukhalelo woovirikana. Ti vawonto noovira etempu, muthiyana naari mulopwana onnoonelela etthu ahoonalaawe ehinaakuve othelana. Itthu ikina mwa seiyo, pooti oruuhela maxupo. Matheli makina ohiya omaliha maxupo aya, awo annavahana mathowa mukina ni mukhwaawe nnaamweera ikwaha sintxipale ooweeli ekhalakano mathowa. Akina anuupuwela weera, weera emalihe maxupo awo, waamureera wiitthuuwelana naari omwalana. Neereke tiyeeyo entthuneya opaka? b Hooye! Ninrowa wuuluma sa mutthu mmoha a mBiblyani yoowo aavilenle nnamweera aarino ntheli nootepa oxupa.

9. Maxupo heeni Abigayili aavirinhaawe?

⁹ Ntakihero nimoha na mBiblyani. Abigayili aari mwaariye Nabali, ni Biblya onnamwiitthana Nabali okhala mulopwana oowuuma murima ni oohileeleya. (1 Sam. 25:3) Waamurowa okhala wooxupa wa Abigayili okhala ni mulopwana ntoko ola. Abigayili anwera waasaasera etthu weera amuhiye mulopwana ole. Nto yaakhumelela eparakha emaara yeeyo Davidi yoowo aarowa okhala mwene a wIsraeli aatthunaawe omwiiva Nabali mwaha wooweera Nabali aamuruwana Davidi vamoha ni alopwana awe. (1 Sam. 25:9-13) Waamurowa okhala wookhweya Abigayili otthawa ni omuhiya Davidi amwiivaka Nabali, mene owo khaapanke eyo. Opwaha mwa yeeyo, Abigayili anvekela Davidi weera ahimwiive Nabali. (1 Sam. 25:23-27) Mwaha wa heeni Abigayili aapankaawe eyo?

10. Eheeni apaale yaamweerinhe Abigayili ovirelela ovilela nnaamweera aarino ntheli nooxupa?

 ¹⁰ Mwaha wa nsivelo aaraaweno ni Yehova, Abigayili annattittimiha ntheli hiiha ntoko Yehova onttittimihaawe. Onnooneya weera Abigayili aahisuwela ele Yehova aamulenlaawe Adamu ni Heva vaavo aapankaawe ntheli noopatxera. (Eph. 2:24) Abigayili annasuwela weera ntheli ti nootteela vamaithoni va Yehova. Owo aatthuna omuhakalaliha Yehova, nave pooti weera yaari etthu ene yeeyo yanvanhe ikuru weera aavuluxe ale yaakhala owannyawe vamoha ni aiyawe. Mwaha wa yeeyo Abigayili aapaka itthu moowaakuveya weera amuhiihe Davidi omwiiva Nabali. Nave owo aari oolikaneene ovekela nlevelelo wa etthu ahaapankaawe. Moohihovela, Yehova annamusivela vantxipale muthiyana ola oolipa murima. Alopwana oothela ni athiyana otheliwa enxuttera eheeni ni ntakihero na Abigayili?

11. (a) Yehova onweherera eheeni wa ale athelanne? (Aefeso 5:33) (b) Eheeni nyuwo munxutteraanyu ni wiilipihera Carmen aapankaawe weera alipihe ntheli nawe? (Nwehe efootu.)

¹¹ Ele ninxutteraahu. Yehova onweherera weera mulopwana ni muthiyana evireleleke okhala vamoha nnaamweera mmoha a yaawo akumiheraka maxupo vanthelini vaya. Nave Yehova onnahakalala vantxipale vaavo onwoonaawe awo yiilipiheraka vantxipale weera ereherere maxupo a vanthelini vaya yooniheranaka nttittimiho. (Mmusome Aefeso 5:33.) Moone ntakihero na Carmen. Sivirakaru iyaakha 6 athelinweene, owo aapatxera omusoma Biblya ni Anamoona a Yehova ni aabatiziwa, nto Carmen annatthuneya ovilela vantxipale. Mpuwa mwa iyaakha 50, owo aahiilipihera vantxipale weera avirelelihe ntheli nawe okhala noolipa, ni annoonihera nsivelo ni nttittimiho. Owo onhima ha: “Aiyaka khawaasivenle miyo okhala namoona a Yehova. Awo khayaasiveliwa ni Yehova ni mpaka yannakiveeha ni yannakoopopiha okihiya. Moovira etempu, miyo kannawera wiiwexexa nnene sene moota aiyaka yaisoonelaaya. Ni kanneerera wuuluma naawo mwa mukhalelo wooreera. Osuwela weera ntheli ti nootteela vamaithoni va Yehova, yaari etthu yaakivanhe ikuru weera kilipihe ntheli naka. Miyo nkinakhulumuwe ni ntheli naka mwaha wooweera kinnamusivela Yehova.” c Wakhala weera nyuwo munviriha maxupo vanthelini vanyu, muroromeleke weera Yehova onoorowa wookhaviherani ovilela.

NVILELEKE NNAAMWEERA MUXUPEYAKA MWAHA WA OHIMALELA WANYU

12. Maxupo heeni apaale munrowaanyu oviriha wakhala weera moopaka yoottheka etokweene?

¹² Maxupo. Mwapaka yoottheka etokweene, apaale nyuwo pooti otthuna weemexera opaka itthu sootheene. Biblya oosuwela weera soottheka sahu pooti oneeriha ‘okhala hiyo  ooxupeya.’ (Nsal. 51:19 [51:17, NM]) Munna mmoha oniitthaniwa Robert aahiilipihera mwa iyaakha sintxipale weera akhale Murumeyi ookhavihera. Mene owo aapaka yoottheka etokweene ni aahoonelela weera aamunyoonyiha Yehova. Robert onnathaliha eeraka: “Yoowuupuxera ya murima aka, yannakilemela vantxipale ni kanniisoona okhala mulittini. Miyo kanninla ni ovekela wa Yehova, mene miyo kuupuwela weera Yehova khaarowa-tho okiiwa veeli. Mwaha wa heeni owo aarowaawe okiiwa kimunyoonyinheene?” Napaka yoottheka etokweene, murima ahu pooti okhala wooxupeya ni opatxera wuupuwelela weera Yehova oonihiya ni weera khanaano mathowa oomukokhorela owo. (Nsal. 38:5 [38:4, NM]) Wakhala weera nyuwo muniisoona hiiho, muupuwele ntakihero na mutthu onuulummwa mBiblyani yoowo aavilenle nnaamweera aatthenke.

13. Soottheka heeni Pedru aapankaawe, ni teevi yaari etokweenexa?

¹³ Ntakihero nimoha na mBiblyani. Ohiyu Yesu ahinaaye wiiviwa, Pedru aahipaka soottheka moottharelana, yeeyo yaamweerinhe opaka yoottheka etokweene. Woopatxerani, Pedru anniiroromela mwaneene awe ni aahima weera anvirelela okhala oororomeleya nnaamweera atthareli akina a Yesu yaarowa omuhiya. (Mar. 14:27-29) Avinyaka, vaavo yaaraaya ojardim ya oJethesemani, Pedru ikwaha sintxipale khaawera okhala ooweha-weha. (Mar. 14:32, 37-41) Avinyaka, vaavo muloko wa atthu waaphiñyaaya weera onvare Yesu, Pedru aatthawa. (Mar. 14:50) Ni weera akwanihere, Pedru aamukhootta Yesu ikwaha iraru ni aaphiyera olipela mweekumini mwawe weera khaamusuwenle. (Mar. 14:66-71) Pedru iisoonenle hayi oonelelakaru weera aapaka yoottheka etokweene? Owo aahixupeya ni aahinla vantxipale. Onnooneya weera aahixupeya mwaha wa olemela wa yoottheka. (Mar. 14:72) Ni moone moota owo aatempaawe oxupeya vaavo mwa iwoora vakhaani, iivinwaawe Yesu yoowo aari nthamwene awe. Pooti weeraka Pedru anniisoona ohivareleya muteko.

14. Eheeni yamukhavihenre Pedru ovilela ni ovirelela onvarela Yehova? (Nwehe efootu ya vakaapani.)

¹⁴ Itthu sintxipale saahimukhavihera Pedru ovilela ni ovirelela onvarela Yehova. Woopatxerani, owo khaakhala meekhaawe, annakhala vamoha ni asinna ni annaakhela nikhavihero aavahiwaawe. (Luka 24:33) Opwaha mwa yeeyo, Yesu avinyererihiwakaru, aahikumana ni Pedru ni onnooneya weera aamulipiha. (Luka 24:34; 1 Akor. 15:5) Mene muhoolo mwaya, ohiya waakhulana ni Pedru mwaha wa soottheka sawe, Yesu ammaliha amuleelaka nthamwene awe owo weera aamurowa waakhela miritti mikina. (Yoh. 21:15-17) Pedru aasuwela weera aapaka yoottheka etokweene mene owo khaakhulumunwe  opaka ele yaari yooreera. Mwaha wa heeni? Mwaha wooweera annaroromela weera muhusiha awe Yesu khaamuhiñye. Nave oohusera akina yannavirelela omukhavihera Pedru. Eheeni ninxutteraahu ni ntakihero na Pedru?

15. Yehova ontthuna weera nroromeleke eheeni? (Nsalmu 86:5; Aroma 8:38, 39) (Nwehe efootu.)

¹⁵ Ele ninxutteraahu. Yehova ontthuna weera nroromeleke weera owo onnansivela, nave onnalevelela. (Musome Nsalmu 86:5; Aroma 8:38, 39.) Ekhaikhai weera emaara hiyo nimpakaahu yoottheka, ninniivaha mathowa nave eyo enneereya ni ennanikhavihera. Mene hiyo khanintthuneya wuupuwelaka weera khanimphwanela nsivelo ni nlevelelo na Yehova. Opwaha mwa yeeyo, onnatthuneya moohipisa waasa nikhavihero. Robert yoowo ohimmwale, onnahima mwaha wa heeni waaraaya wooreera ovekela nikhavihero, owo ohimme ha: “Miyo kaapaka yoottheka mwaha wooweera kiisoona okhala mutthu oolipa, nave kuupuwela weera kanwina weereriwa. Okhuma emaara khaavekenlaaka nikhavihero asitokweene a mmulokoni, miyo kaahoona weera Yehova annakisivela, ni weera annaavarela muteko asinna ale weera akoonihere nsivelo nno. Asitokweene a mmulokoni khayaakihiñye, awo yaakikhavihera ororomela weera Yehova khaakihiñye-tho. Mene-tho hiyo pooti ororomelaka weera Yehova onnansivela vantxipale nave onnanlevelela vaavo ninttharuwaahu soottheka sahu, nnaasaahu nikhavihero, ni vaavo nimpakaahu ele ninweraahu weera nihitthikele yoottheka emoharu. (1 Yoh. 1:8, 9) Wakhala weera ninnaroromela weera Yehova onnansivela ni onnanlevelela, nto owo onnanlevelela. Hiyo khaninhiya onvarela mwaha wooweera noopaka yoottheka.

16. Mwaha wa heeni nyuwo mulakenlaanyu ovilela ni omukokhorela Yehova?

¹⁶ Yehova onnahela mwiitti sootheene hiyo nimpakaahu weera ninvarele owo mahiku ala oomalihera yaawo ari ooxupa. Nnikhavihero na Yehova hiyo pooti aani ovilela nnaamweera nivirihaka maxupo. Nave hiyo pooti ovirelela waasivela asinna ni asirokora ni waalevelela nnaamweera ennyoonyihaka. Nave nnoowera woonihera nsivelo wa Muluku ni ottittimiha ntheli vaavo nimpakaahu ele ninweraahu weera nimalihe maxupo yaawo nraahuno ni aiyihu naari amwaarihu. Wakhala weera hiyo noopaka yoottheka etokweene, hiyo pooti waasa nikhavihero wa Yehova, ni waakhulela nsivelo nawe ni nlevelelo nawe ni ovirelela onvarela owo. Hiyo pooti ororomela weera, nnoophwanya mareeliho wakhala weera ‘khanikhulumunwe opanka sooreera.’ — Agal. 6:9.