1. Murummwa Paulo aawoonela hayi arumeyi ookhavihera?

 ARUMEYI ookhavihera ennavara miteko sintxipale mmulokoni. Murummwa Paulo moohihovela annaahela mwiitti alopwana ala oororomeleya. Mwa ntakihero, vaavo aalepelaawe akristu Afilipi, owo aahaavaha isalaamu otepaxa wene arumeyi ookhavihera ni asitokweene a mmulokoni. — Afil. 1:1.

2. Moota heeni munna mmoha oneeriwa Luis oniisoonelaawe woohima sa yoothanleliwa awe ntoko murumeyi ookhavihera?

² Asinna atxipale oopatisiwa nnaamweera ereene amiravo naari oowuuluvala, ennaphwanya ohakalala evaraka ntoko arumeyi ookhavihera. Mwa ntakihero, Devan aathanliwa weera akhale murumeyi ookhavihera areeneno iyaakha 18. Moovirikana ni eyo, munna mmoha oneeriwa Luis aathanliwa areene ni iyaakha 50. Owo onnuuluma mookwasa moota iisoonenlaawe, “Eparakha wa miyo ovara ntoko murumeyi ookhavihera, otepaxa wene vaavo kinuupuwelaaka nsivelo nootheene asinna enkooniheraaya!”

3. Makoho heeni ninrowaahu othokorora?

³ Wakhala weera nyuwo mwa munna oopatisiwa ni nlelo muhinvara ntoko murumeyi ookhavihera, munoonela hayi okhala yoolakela anyu? Etthu heeni enrowa oweerihani opaka eyo? Ni mikhalelo heeni sa mBiblyani muntthuneyaanyu wunnuwihera? Mpuwa mwa yoosoma ene yeela, nnoothokorora waakhuliwa wa makoho ala. Mene nihinaaye, ninkela woona muritthi wa murumeyi ookhavihera.

 MURITTI HEENI WA MURUMEYI OOKHAVIHERA?

4. Muritti heeni wa murumeyi ookhavihera? (Nwehe efootu.)

⁴ Murumeyi ookhavihera munna oopatisiwa yoowo onthanliwa ni munepa woottela weera aakhavihereke asitokweene a mmulokoni okosoopa nyaha ikina sa mmulokoni. Arumeyi ookhavihera akina ennaakhavihera anamalaleera okhalano muttetthe woolaleera ni irevista sookwanela weera evare muteko woolaleera. Akina ennakhavihera olimpari ni oreherera Empa ya Omwene. Arumeyi ookhavihera akina ennavara ntoko anamaweha-weha ni ennakhavihera ni ikaruma sa áudio ni vídeo mpuwa mwa mithukumano. Muteko muntxipale arumeyi ookhavihera envaraaya ti wootthuneya. Mwa yeeyo, arumeyi ookhavira alopwana oolipa moomunepani, awo ennamusivela Yehova ni ennakhala moovarihana ni malamulo awe. Nave ennaasivela vantxipale asinna ni asirokora. (Math. 22:37-39) Moota heeni munna oopatisiwa onrowaawe wiilipihera weera avare ntoko murumeyi ookhavihera?

5. Etthu heeni munna ontthuneyaawe opaka weera avare ntoko murumeyi ookhavihera?

⁵ Biblya onnahima mikhalelo entthuneyaaya wunnuwihera ale entthuna ovara ntoko arumeyi ookhavihera. (1 Tim. 3:8-10, 12, 13) Nyuwo pooti waakhela eparakha ela musomaka mikhalelo sa mBiblyani ni mwiilipiheraka ovarela muteko. Mene muhinaaye, muntthuneya osuwela etthu enweerihani wiivaherera ovara ntoko murumeyi ookhavihera.

ETTHU HEENI ENWEERIHANI WIIVAHERERA?

6. Eheeni entthuna oweerihakani waakhavihera asinna ni asirokora? (Matheyo 20:28; nwehe ya vakaapani.)

⁶ Ntakihero nahu ntokweene, Yesu Kristu, eettihiwa ni nsivelo, waasivela wawe Atiithi awe ni waasivela wawe atthu. Nsivelo nno naamweeriha ovara vantxipale ni waapakela akina miteko sintthuneya wiiyeviha. (Mmusome Matheyo 20:28; Yoh. 13:5, 14, 15) Wakhala weera nyuwo munimweettihiwa ni nsivelo, Yehova onoorowa wooreelihani ni onoorowa wookhaviherani okwanihera yoolakelaayu yookhala oolikaneene weera nvare ntoko murumeyi ookhavihera. — 1 Akor. 16:14; 1 Ped. 5:5.

7. Mwaha wa heeni munna ontthuneyaawe osepa wiisunnuwiha?

⁷ Mulaponi, atthu ookhalano miritti ennatikhiniwa vantxipale. Mene mmarehereroni mwa Yehova khaiyene ti hiiho. Munna oneettihiwa ni nsivelo ntoko Yesu, khantthuna waahoolelaka  asinna naari wiisoonihera weera owo tootthuneyaxa waapwaha asinna. Wakhala weera mutthu oowiisunnuwiha aamuthanliwa mmulokoni, moohihovela owo khaarowa opakaka miteko mikina sintthuneya wiiyeviha seiyo siri sootthuneya weera sikosoopiwe iputtiputthi sa Yehova. Owo aamurowaka wuupuwelaka weera tootthuneyaxa ohimphwanelaawe ovara miteko mikina. (Yoh. 10:12) Yehova khonreeliha wiilipihera wa mutthu oowiisunuwiha naari oniisoona okhala ootthuneyaxa. — 1 Akor. 10:24, 33; 13:4, 5.

8. Miruku heeni Yesu aavanhaawe arummwa awe?

⁸ Imaara ikina, mpaka asinthamwene awe Yesu yaawo yeetta ni yoowo, yannatthuna waakhela iparakha mwa mukhalelo woohireerela. Moone ele yeereñye ni arummwa eeli a Yesu, Yakobe ni Yohani. Awo yaahinvekela Yesu nipuro nootepa otthuneya Moomweneni mwawe. Yesu khaattottopenle mwaha wa ele yaatthunaaya. Ohiya opaka eyo owo aahiwiiwanyeiha arummwa ale 12 weera: “Yowo ontthuna okhala mutokwene variyari va nyuwo, akhale murumeyi anyu ni yowo ontthuna okhala òpatxera, akhale kaporo àtthu othene.” (Mar. 10:35-37, 43, 44) Asinna eniivaherera ni mukhalelo wooreerela, naari neere, waavarela atthu akina, enrowa okhala mareeliho a mmulokoni. — 1 Ates. 2:8.

ETTHU HEENI ENROWA OLIPIHA YOOLAKELA ANYU YOOWIIVAHERERA?

9. Moota heeni nyuwo munrowaanyu olipiha yootthuna anyu yoowiivaherera?

⁹ Moohihovela nyuwo munnamusivela Yehova ni munnatthuna waakhavihera atthu akina. Nnaamweera vareene hiiho, nyuwo pooti ohikhala ni ntthuno noopaka itthu envaraaya arumeyi ookhavihera. Moota heeni nyuwo munrowaanyu olipiha yootthuna anyu yoovara muteko owo? Muupuweleke ohakalala onkhumelela mwaha woowaavarela asinna ni asirokora. Yesu enre: “Ovaha ti etthu yorera opwaha wakhela.” (Mit. 20:35) Owo annavarihela muteko miruku iya. Owo aaphwanya ohakalala weekhaikhai mwaha woowaavarela atthu akina, nave-tho nyuwo munoophwanya.

10. Moota heeni Yesu oonihenraawe weera annahakalala mwaha woowaavarela atthu akina? (Marko 6:31-34)

¹⁰ Moone ntakihero nimoha na moota Yesu oonihenraawe weera annahakalala waavarela atthu akina. (Mmusome Marko 6:31-34.) Ekwaha emoha, Yesu ni arummwa awe yaakhulumuwa vantxipale. Awo yeera erowoka nipuro noohikhaliwa weera yiitthuuwe. Mene muloko mutokotoko wa atthu waaphiya ohoolo waya, etthunaka oxuttihiwa ni Yesu. Yesu anwera okhootta. Mwaha wooweera owo ni arummwa awe “khayarino ehuhu yotxa.” Naari Yesu anwera waamwara atthu ale aaxuttinheene ekhaikhai emoha naari piili. Mene mwaha wooweettihiwa ni nsivelo owo “àpatxera wàhusiha yawo sintxipale.” Ni aavirelela waaxuttiha mpaka ‘oxekuwa.’ (Mar. 6:35) Aapaka eyo ohiya mwaha wooweera wannatthuneya, mene mwaha wooweera ‘annaamorela ikharari.’ Owo aatthuna waaxuttiha mwaha wooweera annaasivela. Waavarela atthu akina waamuhakalaliha vantxipale Yesu.

11. Moota heeni Yesu aakhavihenraawe atthu akina? (Nwehe efootu.)

¹¹ Vaavo Yesu aalaleeraawe atthu, aapaka-tho etthu ekina ohiya waaxuttiha paahi. Owo-tho annakosoopa soohaawela saya sa weerutthuni. Mwa miiriira, Yesu aahaavaha yootxa ni aahaaruma arummwa awe waakawela atthu ale. (Mar. 6:41) Vaavo aapankaawe eyo, owo aahaaxuttiha arummwa awe weera yaavareleke akina. Owo-tho ohoonihera weera miteko ntoko arummwa ookhavihera envaraaya ti sootthuneya. Nkuupuwelani moota arummwa a Yesu yaahakalanlaaya ovara vamoha ni Yesu vaavo yaakawelaaya yootxa atthu, yeeyo yaakumiherinwe mwa miiriira mpaka “othene aya yàhotxa, ni evona”! (Mar. 6:42) Ni ela khaiyene ekwaha emoha paahi Yesu aahenlaawe sootthuna sa atthu  akina nipuro noopatxera. Emaara aaraawe elapo ya vathi Yesu aavarihela ekumi awe yoothene weera aakhavihere atthu akina. (Math. 4:23; 8:16) Yesu aahakalala ni woona oreera mwaha woowaaxuttiha atthu akina ni mwaha wookosoopa soohaawela saya moowiiyeviha. Moohihovela, nyuwo-tho munoohakalala vaavo munrowaanyu wiivaherera ntoko murumeyi ookhavihera.

12. Mwaha wa heeni mutthu ori poothe a hiyo ohintthuneyaawe wuupuwelaka weera khanwera okhavihera muloko?

¹² Wakhala weera nyuwo munuupuwela weera khiyaavo etthu munweraanyu opaka, muhikhulumuwe. Moohihovela, sookhala itthu munweraanyu opaka seiyo sinrowa okhavihera muloko. Muupuwele ele Paulo olempaawe va 1 Akorinto 12:12-30, ni avinyaka munvekele Yehova weera ookhavihereni woona moota eyo envareleyaaya muteko wa nyuwo. Masu a Paulo ennoonihera nnene sene weera nyuwo, ntoko murumeyi ootheene a Yehova, ookhalano muritti wootthuneya mmulokoni. Wakhala weera nyuwo khamunnuwihenre mikhalelo sootthuneya weera nvare ntoko murumeyi ookhavihera, muhikhulumuwe. Opwaha mwa yeeyo, mpakeke ele munweraanyu weera mukhale oovareleya muteko wa Yehova ni wa asinna. Muroromeleke weera asitokweene a mmulokoni ennoona mikhalelo sanyu moovarihana ni miritti siri poothe enoovahaayani. — Arom. 12:4-8.

13. Nthowa heeni ninrowa oweerihani weera mukhale murumeyi ookhavihera?

¹³ Moone nthowa nikina ninrowa oweerihani nyuwo otthuna okwanihera itthu sootheene sinhaaweleya weera mukhale murumeyi ookhavihera. Mikhalelo sootheene sinhaaweleya sinnavareleya muteko wa akristu ootheene. Tivawonto, akristu ootheene entthuneya omwaattamelaka Yehova weera ephwanye ohakalala onkhumelela mwaha wa ovaha ni weera evahe ntakihero nooreera ntoko mukristu. Itthu heeni munna ontthuneyaawe opaka weera akhale murumeyi ookhavihera?

MOOTA WOOKHALA MURUMEYI OOKHAVIHERA

14. Entaphulela eheeni ohikhala ‘amatheela’? (1 Timotheyo 3:8-10, 12)

¹⁴ Vaano, nrowe noone mikhalelo mikina sinhimmwa va 1 Timotheyo 3:8-10, 12. (Mmusome.) Murumeyi ookhavihera ontthuneya ahikhaleke ‘amatheela.’ Masu ala pooti otaphulelaka ntoko “ophwanela ottittimihiwa,” “ophwanela” naari “ottittimihiwa.” Eyo khentaphulela weera nyuwo khamunrowa otheyaka naari otthekula. (Koh. 3:1, 4) Menento, nyuwo  khontthuneya okuxera matheela miritti sanyu. Wakhala weera nyuwo munookhalano mukhalelo woororomeleya, nyuwo munoorowa ottittimihiwaka ni atthu a mmulokoni.

15. Entaphulela eheeni ‘okhala oohootha’, ni ‘ohaasa muhakhu ni makhwankwa’?

¹⁵ ‘Khaiyene oowootha,’ entaphulela weera nyuwo mwa mutthu eekhaikhai, oohootha, ni oororomeleya. Nyuwo munnakwanihera masu anyu, ni khamunaawoka atthu akina. (Mir. 3:32) “Ehàse muhakhu ni makhwankwa” entaphulela weera nyuwo mwa mutthu oororomeleya ni anakoso anyu ni vaavo munvarihelaanyu musurukhu. Nyuwo khamunvarihela muteko onthamwene anyu ni asinna ni yoolakela weera mphwanye musurukhu.

16. (a) Entaphulela eheeni ‘ohisiveliwa ni eviinyu yintxipale’? (b) Entaphulela eheeni ‘okhalano yoowuupuxera ya murima yooreera’?

¹⁶ “Ehàsivele evinyu yintxipale” entaphulela weera nyuwo khamunwura evinyu yintxipale, ni khamusuweliwe ntoko mutthu oowuraxa. ‘Okhalano yoowuupuxera ya murima yooreera’ entaphulela weera nyuwo munnatthara malamulo a Yehova. Nnaamweera mureene oohimalela, nyuwo munnaphwanya murettele mwaha wookhalano onthamwene wooreera ni Muluku.

17. Moota heeni munna onrowaawe woonihera weera toororomeleya weera ‘awehiwe murima awe’? (1 Timotheyo 3:10; nwehe efootu.)

¹⁷ “Owehiwa murim’aya” entaphulela weera nyuwo moohoonihera weera pooti ororomeliwa ni miritti. Mwa yeeyo, emaara asitokweene a mmulokoni enoovahaayani yoothanleliwa, onnatthuneya otthara nnene sene miruku saya ni miruku sinvahiwa ni mareherero. Mwaasaaseke otthuna osuwela etthu enhela mpuwa yoothanleliwa eyo ni entthuneya opakiwa mpaka liini. Emaara munkwaniheraanyu yoothanleliwa anyu nnene sene, atthu a mmulokoni enoorowa woona ni enoorowa osiveliwa ni orowa wanyu vahoolo. Asitokweene a mmulokoni, nwehexexeke weera mwaatxentxerihe asinna oopatisiwa. (Mmusome 1 Timotheyo 3:10.) Neereke muloko anyu aakhalamo asinna oopatisiwa amiravo? Neereke awo ennavaha ntakihero nooreera voohima sa yoosoma aya ya omeekha? Neereke awo ennavaha ikomentaariyu mmithukumanoni ni ennarowela muteko woolaleera? Wakhala weera tihiiho, mwaavaheke soothanleliwa moovarihana ni wunnuwa waya ni mikhalelo saya. Mwa mukhalelo ene yoola, asinna awo amiravo pooti “owehiwa murim’aya.” Nto vaavo enrowaaya wunnuwaka, awo enoorowa okhala oolikaneene  weera evare ntoko arumeyi ookhavihera.

18. Entaphulela eheeni ‘ohiphwanyiwano mulattu’?

¹⁸ ‘Oohiphwanyiwano mulattu’ entaphulela weera khiwaavo mulattu mumphwanyiwaanyuno. Ekhaikhai weera akristu ootheene ennootheeriwa. Yesu aahootheriwa, ni aahima weera atthareli awe yaahala wootheriwa-tho. (Yoh. 15:20) Menento, waakhala weera munookhalano mukhalelo wooreera, ntoko Yesu aapankaawe, nyuwo munoottittimihiwaka mmulokoni. — Math. 11:19.

19. Entaphulela eheeni “mulopwana a muthiyana mmosaru”?

¹⁹ “Mulopwana a muthiyana mmosaru.” Waakhala weera nyuwo moothela, nyuwo onnatthuneya otthara miruku sa Yehova voohima sa ntheli, mulopwana mmoha ni muthiyana mmoha. (Math. 19:3-9) Mulopwana mukristu ahaararuweleke amwaarawe. (Aheb. 13:4) Mene yookhala etthu ekina enhela mpuwa. Nyuwo onnatthuneya ororomeleya wa amwaarinyu, muhaawehexexeke moohireerela asithiyana akina. — Yobi 31:1.

20. Moota heeni mulopwana onrowaawe ohoolela emusi awe ‘nnene sene’?

²⁰ “Ewèttihaka phama sene anamwane a itthoko saya.” Wakhala weera nyuwo muhooleli a emusi, nyuwo muhikuxereke matheela muritti anyu owo. Mpakeke yookokhorela ya veemusini voohihiyerereya. Muroweke ikwaha sintxipale mmutekoni moolaleera ni mutthu ori poothe a veemusini vanyu. Mwaakhavihereke anamwane anyu wunnuwihera onthamwene aya ni Yehova. (Aef. 6:4) Mulopwana onkosoopa nnene sene emusi awe, onnoonihera weera pooti okosoopa muloko. — Munwehe-tho 1 Timotheyo 3:5.

21. Wakhala weera nyuwo nlelo khamunvara ntoko murumeyi ookhavihera, etthu heeni muntthuneyaanyu opaka?

²¹ Asinna, wakhala weera nlelo khamunvara ntoko murumeyi ookhavihera, txontte nvekele munepa woottela vaavo munrowaanyu othokororaka mwaha ola. Musome mikhalelo entthuneyaaya okhalano arumeyi ookhavihera ni mwiilipihere ovarela muteko mikhalelo iyo. Muupuwele moota mummusivelaanyu Yehova ni asinna ni asirokora. Munnuwihere ntthuno nanyu noowaavarela. (1 Ped. 4:8, 10) Moone ohakalala onkhumelela mwaha wookhavihera emusi yoomunepani. Yehova ooreeliheni mwaha wa wiilipihera wanyu weera mwiivaherere ovara ntoko murumeyi ookhavihera! — Afil. 2:13.