MWAHA ONTHOKORORIWA 47
ETXIPO 103 Axitokweene: Yoovaha ya Yehova
Asinna — neereke nyuwo muri oolikaneene ovara ntoko mutokweene a mmulokoni?
“Akhalá mutthu anìnlela okhala [mutokweene a mmulokoni], onnìnlela muteko worera.” — 1 TIM. 3:1.
ELE NINKELA AHU OXUTTERA
Ninrowa woona mikhalelo sa mBiblyani seiyo munna ontthuneyaawe okwanihera weera avare ntoko mutokweene a mmulokoni.
1-2. Eheeni enhela mpuwa “muteko worera” wa mutokweene a mmulokoni?
WAKHALA weera nyuwo moovara mwa etempu vakhaani ntoko murumeyi ookhavihera, pooti weeraka nyuwo muri ephiro yooreera weera mukhale oolikaneene ovara ntoko mutokweene a mmulokoni. Neereke nyuwo pooti wiivaherera wa muteko owo “worera”? — 1 Tim. 3:1.
2 Muteko wa mutokweene a mmulokoni onhela mpuwa eheeni? Owo onnahoolela muteko woolaleera, onnavara moowiilipihera weera aaxekure asinna ni waaxuttiha, nave annalipiha muloko moorweela mwa masu awe ni ntakihero nawe. Biblya ookhalano nthowa nooreera vaavo onwiitthanaawe asitokweene a mmuloko envara muteko okhala ‘soovaha sa atthu.’ — Aef. 4:8.
3. Moota heeni munna onkelaawe okhala oolikaneene weera avare ntoko mutokweene a mmulokoni? (1 Timotheyo 3:1-7; Tito 1:5-9)
3 Moota heeni nyuwo munrowaanyu okhala oolikaneene weera nvare ntoko mutokweene a mmulokoni? Weera mukhale oolikaneene weera nvare ntoko mutokweene a mmulokoni khonlikana ni muteko wa mulaponi. Imaara sintxipale muteko wa mulaponi wakhala weera nyuwo munnawera opaka etthu yeeyo entthuneya weera nvare, nyuwo pooti ophwanya muteko. Moovirikana ni eyo, weera mukhale mutokweene a mmulokoni nyuwo muntthuneya okhalano mikhalelo sikina ohiya paahi olaleera ni osuwela oxuttiha. Nyuwo muntthuneya woonihera mikhalelo sa Biblyani seiyo asitokweene a mmulokoni entthuneyaaya woonihera sihimmwale va 1 Timotheyo 3:1-7 ni Tito 1:5-9. (Mmusome.) Mwa yoosoma ene yeela, ninkela woona mikhalelo miraru sootthuneya seiyo asitokweene a mmulokoni enoopereriwaaya okhalano, okhalano mukhalelo wooreera mmulokoni naari vaate va muloko, ovaha ntakihero nooreera ntoko muhooleli a emusi, ni okhala oolikaneene okhavihera muloko.
OKHALANO MUKHALELO WOOREERA
4. Ontaphulela eheeni ‘ohikhalano mulattu’?
4 Weera nyuwo mukhale oolikaneene ovara ntoko mutokweene a mmulokoni, muntthuneya ‘muhikhaleno mulattu,’ naari neere, okhalano mukhalelo wooreera mmulokoni yoowo onrowa oweerihaka asinna owoonakani okhala mutthu a mukhalelo wooreera. Opwaha mwa yeeyo, nyuwo muntthuneya “okhaleliwa onamona worera ni atthu òmokoni.” Ale ehinanvarela Yehova pooti wuulumaka moohireerela soororomela sanyu, mene awo khontthuneya okhalano nthowa nooreera ninweeriha wuuluma moohireerela ororomeleya wanyu naari mukhalelo anyu. (Dan. 6:4, 5) Mwiikoheke ha, ‘Keereke miyo kookhalano mukhalelo wooreera mmulokoni naari vaate va muloko?’
5. Moota heeni nyuwo munkelaanyu woonihera weera ‘munnatthuna itthu sooreera’?
5 Wakhala weera nyuwo ‘munnatthuna sooreera,’ nyuwo munnaasa itthu sooreera wa atthu akina ni munnaattottopela mwaha wa mikhalelo saya sooreera. Nyuwo-tho munnahakalala mwaha woowaapakela itthu sooreera atthu akina, nnaamweera ehoovekelakani. (1 Ates. 2:8; nwehe enoota ya yoosoma “otthuna itthu sooreera” va Tito 1:8.) Mwaha wa heeni mukhalelo ola oraaya wootthuneya vantxipale wa asitokweene a mmulokoni? Mwaha wooweera awo ennavarihela nnene sene etempu aya weera ehoolele muloko ni okwanihera soothanleliwa saya. (1 Ped. 5:1-3) Nnaamweera yaatteliwaka, awo ennahakalala mwaha woowaakhavihera atthu akina. — Mit. 20:35.
6. Mikhalelo heeni soowoonihera ‘owaakhela nnene aletto’? (Aheberi 13:2, 16; nwehe efootu.)
6 Nyuwo munnoonihera weera ‘munnawaakhela aletto’ vaavo munaapakelaanyu itthu sooreera atthu akina, waahela mpuwa ale muhaasuwenlaanyu. (1 Ped. 4:9) Ereferensiya emoha emuulumaka mutthu oowaakhela aletto, yenre ha: “Mulako wa empaawe ni wa murima awe ontthuneya okhaleke woohuleya wa atthu ohaasuwenlaawe.” Mwiikoheke ha, ‘Kinsuweliwa ni mukhalelo heeni woohima sa owaakhela aletto?’ (Mmusome Aheberi 13:2, 16.) Mutthu oowaakhela aletto onnakawana itthu sawe ni aletto awo, waahela mpuwa ale ehikhanle ni itthu sintxipale naari ale envara ntoko asitokweene a esirkwiitu naari asinna a muloko mukina enwompwa opaka mwaha. — Eph. 18:2-8; Mir. 3:27; Luka 14:13, 14; Mit. 16:15; Arom. 12:13.
Ntheli nimoha noowaakhela aletto nimwaakhelaka mutokweene a esirkwiitu ni mwaariye (Nwehe eparagrafu 6)
7. Moota heeni mutokweene a mmulokoni onkelaawe woonihera weera ‘khansiveliwa ni muhakhu’?
7 “Òhimusivela muhakhu.” Eyo entaphulela weera nyuwo khamunsiveliwaxa ni itthu sa weerutthuni. Naari mureene oophwanya naari oohaawa, nyuwo munnahela sootthuna sa Omwene nipuro noopatxera wa mikhalelo soothesene sa ekumi anyu. (Math. 6:33) Nyuwo munnavarihela etempu anyu, ikuru sanyu, ni itthu ikina weera mmukokhorele Yehova, mukosoope emusi anyu ni okhavihera muloko. (Math. 6:24; 1 Yoh. 2:15-17) Mwiikoheke ha: ‘Kinoonela hayi musurukhu? Kinnahakalala ni itthu kiraakano? Naari kinnaasaasa musurukhu mwintxipale ni waatxeerera mihakhu?’ — 1 Tim. 6:6, 17-19.
8. Mwa mikhalelo heeni nyuwo munrowaanyu woonihera weera nyuwo ti mutthu “òwiphima” ni “òwisumaliha”?
8 Wakhala weera nyuwo ‘toowiiphima’ ni “òwisumaliha,” nyuwo munnakhala eriyari-neeriyari wa mikhalelo sootheene sa mweekumini mwanyu. Eyo enhela mpuwa osepa otxaxa, owuraxa, othanlela ikuwo soowara, wiirehera, ni matthekulelo. Nyuwo khaiyene kaporo a sootthuna sa elapo. (Luka 21:34; Yak. 4:4) Nyuwo munnakhala eriyari-neeriyari, naari neere, munnakhala oomaaleleya nnaamweera mutannyiwaka. Nyuwo khaiyene ‘namuhapaliwa’, naari khamusuwelinwe ntoko mutthu oowuraxa. Mwiikoheke ha, ‘Moota miyo kinkhalaaka kinnoonihera weera kamutthu oowiiphima ni oowiisuumaaliha?’
9. Etthu heeni enhela mpuwa okhala “amiruku” ni “òttittimiheya”?
9 Nyuwo mwa mutthu “amiruku,” wakhala weera munnathokorora nyaha moomaaleleya moovarihana ni miruku sa mBiblyani. Nyuwo munnaphimelela moowiixera miruku iyo, ni eyo ennookhaviherani wiiwexexa ni osuwela. Nyuwo khamumpaka soothanla moowaakuveya. Ohiya opaka eyo, nyuwo munnawehexexa itthu sootheene sootthuneya. (Mir. 18:13) Yookhumelelaaya, nyuwo munnapaka soothanla sooreera sinvarihana ni muupuwelo wa Yehova. Wakhala weera nyuwo ti mutthu “òttittimiheya” nyuwo toorehereya ni oowiisaakuviha. Nyuwo moosuweliwa ntoko mutthu oororomeleya ni ootthara miruku. Mikhalelo iya sinimookhaviherani osuweliwa ni mukhalelo wooreera. Vano ninkela woona moota wookwanihera mikhalelo sa mBiblyani weera nvahe ntakihero nooreera ntoko muhooleli a emusi.
OVAHA NTAKIHERO NOOREERA NTOKO MUHOOLELI A EMUSI
10. Moota heeni munna onrowaawe ‘weetiha oratteene etthoko awe’?
10 Wakhala weera nyuwo moothela ni muntthuna okhala oolikaneene ovara ntoko mutokweene a mmulokoni, mikhalelo sa emusi anyu pooti ovoleela yoothanleliwaanyu yookhala mutokweene a mmulokoni. Tivawonto muntthuneyaanyu ‘weettiha oratteene etthoko anyu’. Nyuwo muntthuneya okhalano mukhalelo wookhala muhooleli a emusi a nsivelo ni opaka soothanla sooreera. Eyo enhela mpuwa ohoolela mikhalelo sootheene sa okokhorela wahu. Mwaha wa heeni eyo eraaya yootthuneya? Murummwa Paulo aaphimelela eeraka: “Vekhaikhai ahisuwelá mutthu wettiha phama sene etthoko awe, anakhapelele sai [muloko wa] Muluku?” — 1 Tim. 3:5.
11-12. Moota heeni mukhalelo wa anamwane a munna onrowaaya onvoleela munna owo? (Nwehe efootu.)
11 Wakhala weera nyuwo tiithi, muntthuneya okhalano ‘anamwane ooleeleya moowiisuumaalihani mootheene.’ Nyuwo muntthuneya waaxuttiha ni waatxentxeriha mwa nsivelo. Ekhaikhai weera, ntoko anamwane ootheene, owo eneereke ottheela ni otthekula. Mene mwaha wa waaxuttiha wanyu nnene, awo enrowa okhala oowiiwelela, anttittimiho, ni oowiisuumaaliha. Opwaha mwa yeeyo, nyuwo muntthuneya opaka ele munweraanyu weera mwaakhavihere anamwane anyu wunnuwihera onthamwene wooreera ni Yehova, ni okhala moovarihana ni miruku sa mBiblyani, ni okela vahoolo weera epatisiwe.
12 “Orino anamwane òwiwelela ni òhisomeliwa okhala òhureya ni òhileleya.” Wakhala weera mwaana a veemusini onnakhalano nthowa mwaha woopaka yoottheka etokweene, moota heeni eyo enanvoleelaaya tiithi? Wakhala weera tiithi khailipihera omutxentxeriha ni omuxuttiha, pooti weeraka tiithi owo khonrowa okhala oolikaneene ovara ntoko mutokweene a mmulokoni. — Munwehe A Sentinela a 15 a Outubro a 1996, epaax. 21 eparag. 6-7.
Tiithi mukristu ontthuneya waatxentxeriha anamwane awe ompakela itthu sintxipale Yehova ni muloko (Nwehe eparagrafu 11)
OKHAVIHERA MULOKO
13. Moota heeni nyuwo munkelaanyu woonihera weera mwa mutthu ‘oopixa murima’ ni ‘oohiiteexa’?
13 Asinna erino mikhalelo sooreera sa ekristu tootthuneya mmulokoni. Munna ‘oopixa murima’ onniilipihera okumihera murettele. Wakhala weera nyuwo muntthuna osuweliwa ntoko mutthu oopixa murima, nwiiweke ni mwiiweleleke miyoolenelo sa atthu akina. Va muthukumanoni va asitokweene a mmulokoni, mukhaleke oolikaneene okhavihera yoothanla ya asinna antxipale, wakhala weera ennavarihana ni miruku sa mBiblyani. Nyuwo-tho muhikhaleke ‘oowiitexa’ naari neere, muhinyeserereke opaka itthu mwa moonelo anyu. Nyuwo muntthuneya ovahaka mwiitti miyoonelo ni miruku sa atthu akina. (Eph. 13:8, 9; Mir. 15:22) Nyuwo muhisiveleke ‘owana’ naari ‘muhaakuveke onyoonyiwa.’ Ohiya okhala ooxupa ni imaara sootheene waavaanya atthu akina, nyuwo mukhaleke ooreera murima ni oowuuluma nnene. Wakhala weera nyuwo munookhala mutthu ‘a murettele,’ nyuwo muneereke opatxeriha okumihera murettele mpaka mwa itthu sooxupa. (Yak. 3:17, 18) Wakhala weera nyuwo munookhala mutthu ooreera murima vaavo munrowaanyu wuulumaka ni atthu waahela mpuwa ale ehikhanle asinna, nyuwo munimwaakhavihera awo okhala oomaaleleya ni ovukula onyoonyiwa waya. — Aph. 8:1-3; Mir. 20:3; 25:15; Math. 5:23, 24.
14. Ontaphulela eheeni ‘ohikhala oopatisiwa a naanaano’ ni ‘ootteela’?
14 Weera akwanihere itthu sinhaaweleya ni okhala mutokweene a mmulokoni, munna khontthuneya okhala ‘oopatisiwa a naanaano.’ Khontthuneya oviriha iyaakha sintxipale apatisinweene, mene ontthuneya oviriha etempu enhaaweleya weera akhale mukristu oolipa moomunepani. Muhaakunveene othanliwa ntoko mutokweene a mmulokoni muntthuneya woonihera weera, hiihaale ntoko Yesu, nyuwo toowiiyeviha ni oopixa murima nwehereraka etempu yooreerela Yehova woovahani soothanleliwa ikina mmulokoni. (Math. 20:23; Afil. 2:5-8) Nyuwo pooti woonihera weera ‘tootteela’ mmwiiwelelaka Yehova ni miruku sawe ohiya paahi otthara miruku sinvahiwa ni mareherero awe. — 1 Tim. 4:15.
15. Neereke mutokweene a mmulokoni ontthuneya okhumelaka nnene vaavo ompakaawe nyaha? Muthalihe.
15 Biblya onnoonihera nnene sene weera asitokweene a mmulokoni entthuneya “òsuwela ohusiha.” Neereke eyo entaphulela weera asitokweene a mmulokoni ootheene entthuneya okhumelaka nnene vaavo empakaaya nyaha? Hooye. Asitokweene a mmulokoni antxipale, nnaamweera ehikhumelaka nnene vaavo empakaaya nyaha, toosuwela oxuttiha mmutekoni moolaleera ni vaavo enaaxekuraaya asinna. (Nwehe enoota “òsuwela ohusiha” va 1 Timotheyo 3:2; munwehe-tho 1 Akorinto 12:28, 29 ni Aefeso 4:11.) Nnaamweera nyuwo ohitthuneyaka okhumela nnene vaavo mumpakaanyu nyaha, nyuwo muntthuneya wiilipihera opaka ele nyuwo munweraanyu weera musuweleke oxuttiha. Moota heeni nyuwo munkelaanyu opaka eyo?
16. Moota heeni nyuwo munrowaanyu okhala mutthu ooxuttiha nnene? (Nwehe efootu.)
16 “Òroromeleya mwa nihusiho na nsu nowiwelela.” Weera mukhale mutthu ooxuttiha nnene, ikwaha sootheene munvariheleke muteko Biblya emaara munxuttihaanyu ni munvahaanyu miruku. Mukhaleke namasoma ooreera a Biblya ni a irevista sahu. (Mir. 15:28; 16:23; nwehe enoota “òroromeleya mwa nihusiho na nsu nowiwelela” va Tito 1:9.) Emaara munsomaanyu, nwehexexeke nnene sene wakhala weera munnaxuttiha ni munnavarihela muteko iversu sa mBiblyani wa mukhalelo wooreera. Ni emaara munxuttihaanyu, mpakeke ele munweraanyu weera nvareke mirima sa atthu ale enwiiwelelani. Mene-tho nyuwo pooti oreherera moota munxuttihaanyu nvekaka ni nvarihelaka muteko miruku sa asitokweene akina a mmulokoni ookhumela nnene. (1 Tim. 5:17) Asitokweene a mmulokoni ontthuneya oweraka ‘waalipiha’ asinna ni asirokora; mene-tho awo, entthuneya ikwaha ikina ovahaka miruku naari ‘ottaruxa’. Mwa etthu eri poothe, awo ikwaha sootheene entthuneya okhala a nsivelo. Wakhala weera nyuwo munookhala ooreera murima ni a nsivelo ni ikwaha sootheene ovarihela masu a Muluku emaara munxuttihaanyu, nyuwo munookhala mutthu ooxuttiha nnene mwaha wooweera munrowa omutakihaka Yesu, yoowo ori muxuttihaahu mutokweene. — Math. 11:28-30; 2 Tim. 2:24.
Murumeyi ookhavihera mmoha attottelaka mureerelo eparakha yooxuttera moota mutokweene a mmulokoni ookhumela nnene ananvarihelaawe muteko Biblya weera axuttihe. Nave-tho murumeyi ookhavihera owo annareherera mwahaawe ohoolo wa espeliyu (Nwehe eparagrafu 16)
NVIRELELE OPAKA ELE MUNWERAANYU
17. (a) Etthu heeni enkela omukhavihera murumeyi ookhavihera ovirelela wiilipihera? (b) Etthu heeni asitokweene a mmulokoni entthuneyaaya wuupuwelela vaavo enanvahaaya munna yoothanleliwa? (Nwehe ekwaadru “ Muhiweherereke weera asinna ekhale oomalela.”)
17 Vaavo nthokoronraahu itthu sintthuneya weera nvare ntoko mutokweene a mmulokoni, arumeyi akina ookhavihera pooti wuupuwelaka weera khenkela owera okwanihera itthu iya. Mene muupuweleke weera, Yehova ni mareherero awe khenweherera weera asinna yoonihereke mikhalelo iya moomalela. (1 Ped. 2:21) Ni munepa wootteela wa Yehova onkela wookhaviherani wunnuwihera mikhalelo iyo. (Afil. 2:13) Neereke wookhala mukhalelo nyuwo muntthuneyaanyu oreherera? Munvekele Yehova woohima sa mukhalelo owo. Mutholathole woohima sa mukhalelo owo ni munvekele miruku mutokweene a mmulokoni woohima sa moota wooreherera mukhalelo owo.
18. Etthu heeni arumeyi ookhavihera ootheene entthuneyaaya opaka?
18 Ootheene hiyo, waahela mpuwa ale eri asitokweene a mmulokoni, nintthuneya ovirelela wiilipihera weera noonihere mikhalelo nthokoronraahu mwa yoosoma ene yeela. (Afil. 3:16) Neereke nyuwo murumeyi ookhavihera? Muheemelele vaavo! Munvekeleke Yehova weera ootxentxeriheni ni ookhavihereni okhala oovareleya muteko mmulokoni. (Yes. 64:8) Moohihovela Yehova onoorowa oreeliha wiilipihera wanyu weera mukhale mutokweene a mmulokoni.
ETXIPO 101 Nimurumeeleke Yehova Mowiiwanana
