1-2. Moota heeni ohixariya onrowaaya onivoleela ootheene hiyo mwa mikhalelo soovirikana?

 YESU aahima ntakihero na naamukhweli mmoha, yoowo anvekela mphuki weera amweerele exariya. Moohihovela, yooweereya ela yaahaavara murima atthareli antxipale a Yesu, mwaha wooweera etempu ele atthu antxipale yannathokororiwa moohixariya. (Luka 18:1-5) Yooweereya ela ennavareleya muteko mahiku ahu ala mwaha wooweera mahiku ahu ala ninnathokororiwa moohixariya.

² Olelo-va, mulaponi woosareya nthalu, ovirikana mikhalelo, ni ohaaxiwa, tivawonto nihintikhinaahu wakhala weera ninnathokororiwa moohixariya. (Koh. 5:8) Etthu nihinwehereraahu, othokororiwa moohixariya ni munna naari murokora, menento eyo pooti weereya. Ekhaikhai weera asinna ni asirokora khaiyene anamavaanyiha a ekhaikhai. Mene mwaha wooweera awo toohimalela. Nto, ninnaxuttera itthu sintxipale ni moota Yesu oonelaawe ohixariya wa anamavaanyiha. Wakhala weera ninnaapixera murima anamavaanyiha yaawo ennithokorora moohixariya, tivootthuneya vantxipale waapixera murima asinna! Yehova onoonela hayi vaavo ninthokororiwaahu moohixariya ni atthu akina, naari ni asinna? Owo onnapwattha?

3. Neereke Yehova onnaxupeya vaavo arumeyi awe enthokororiwaaya moohixariya, ni mwaha wa heeni?

³ Yehova onnaxupeya vantxipale ni moota ninthokororiwaahu. ‘Yehova ennamusivela exariya.’ (Nsal. 37:28) Yesu oororomeliha weera Yehova “anàthorihele yawo vohilekela” yaphiya  emaara yooreerela. (Luka 18:7, 8) Ni owo onoomaliha maxupo ni ohixariya wootheene ninvirihaahu. — Nsal. 72:1, 2.

4. Nikhavihero heeni Yehova onnivahaawe olelo?

⁴ Niwehereraka emaara enrowaaya okhala exariya, Yehova onnanikhavihera oviriha ohixariya. (2 Ped. 3:13) Owo onnanixuttiha moota woosepa opaka itthu nihuupuwenleene emaara yeeyo ninthokororiwaahu moohixariya. Moorweela mwa Mwanawe, Yehova oonivaha ntakihero noomalela na moota wooviriha ohixariya. Nave owo onnanivaha miruku seiyo nintthuneyaahu ovarelaka muteko emaara yeeyo ninthokororiwaahu moohixariya.

MWIIKOSOOPEKE NI MOOTA MUNOONELAANYU OHIXARIYA

5. Mwaha wa heeni nintthuneyaahu wiikosoopa ni moota nnoonelaahu ohixariya?

⁵ Hiyo pooti okhala ooxupeyaxa ni ooriipiwa murima emaara yeeyo ninvirihaahu ohixariya. (Koh. 7:7) Arumeyi oororomeleya ntoko Yobi ni Habakuki, yanniisoonela hiiho. (Yobi 6:2, 3; Hab. 1:1-3) Nnaamweera ohikhanle woonanara wiisoonela hiiho, ninntthuneya wiikosoopa ni moota nnoonelaahu ohixariya weera nihipake etthu yoonanara.

6. Ntakihero na Absaloni ninnixuttiha eheeni? (Nwehe efootu.)

⁶ Vaavo ninthokororiwaahu moohixariya apaale hiyo pooti opakavo etthu wa moota nnuupuwelaahu. Menento opaka eyo, waamurowa waatxeerera maxupo. Moone ntakihero na mwaana a mwene Davidi, Absaloni. Owo aanyoonyiwa vantxipale vaavo murokorawe Tamari aakonihinwaawe moohireerela ni murokorawe Amnoni. Moovarihana ni nlamulo na Mose, Amnoni annaphwanela wiiviwa mwaha wa eetthu ele aapankaawe. (Onam. 20:17) Nnaamweera onyoonyiwa wa Absaloni waari woowooneya, owo khaarinono muritti woopakavo etthu woohima sa mwaha owo. — 2 Sam. 13:20-23, 28, 29.

7. Moota heeni ohixariya wanvolenlaaya nasalmu?

⁷ Vaavo atthu ale ampaka itthu moohixariya enkhalaaya ntoko khenviriha maxupo, hiyo pooti wiikoha waakhala weera ti wooreera opaka itthu sooreera. Mmuupuwele nasalmu yoowo aaweha atthu oonanara murima yaawo yaakhala ntoko toopuha waapwaha atthu axariya. Owo enre, “atakhali ti ala vohihiyerereya òwitthala.” (Nsal. 73:12) Owo-tho aaxupeya vantxipale ni ohixariya oonaawe mpaka ohalela oyeleela nroromelo nawe wa mareeliho enkhumelela mwaha wonvarela  Yehova, eeraka: “Kànatthokelela wera kìwe’mo yeyo, nto yòkikela mmaithoni.” (Nsal. 73:14, 16) Nave-tho owo enre: “Vano wa miyo manani aka ahanle vakhani otherekuwa ni ehanle ethiru mavalo aka okwattuliwa.” (Nsal. 73:2) Etthu ntoko eyo yoheereya ni munna mmoha oneeriwa Alberto.

8. Etthu heeni yaakhumelenle mwaha wa munna mmoha othokororiwa moohixariya?

⁸ Alberto aathokororiwa moohixariya vaavo ootherinwaawe wiiya musurukhu wa mmulokoni. Yookhumelela aya, owo aayeleela iparakha sawe ni asinna antxipale a mmulokoni yaasuwenle mwaha owo yaahiya omuttittimiha. Owo ohimme ha: “Kaaxupeya, kaanyoonyiwa, ni kaakhulumuwa.” Owo aahiya weera miyuupuwelo soonyoonyiwa sivoleele mikhalelo sawe soomunepani, ni aahiviriha iyaakha 5 ahoonelaka mithukumano. Yooweereya ela ennoonihera etthu ekhanle ookhumelela wakhala weera khaninwehexexa onyoonyiwa wahu vaavo ninthokororiwaahu moohixariya.

MUTAKIHE MOOTA YESU AAVIRINHAAWE OHIXARIYA

9. Ohixariya heeni Yesu avirinhaawe? (Nwehe efootu.)

⁹ Yesu oonihiyera ntakihero nootepa oreera na moota wooviriha ohixariya. Moone moota aathokororinwaawe moohixariya ni amusi awe vamoha ni atthu akina. Amusi awe oohiroromela  yannahima weera Yesu aathatuwa anepa, anamahoolela a ittiini yannahima weera Yesu eettihiwa ni mademoniyu, ni anakhotto a oRoma yannanveeha, yannamuhasula mpaka yaahimwiiva mooriipiha murima. (Mar. 3:21, 22; 14:55; 15:16-20, 35-37) Menento, Yesu aavilela ohixariya wootheene, opwaha mwa yeeyo, owo khaatthikihera isukula. Etthu heeni ninxutteraahu ni ntakihero na Yesu?

10. Moota heeni Yesu avirinhaawe ohixariya? (1 Pedru 2:21-23)

¹⁰ Mmusome 1 Pedru 2:21-23. a Yesu oonihiyera ntakihero noomalela weera ntthareke emaara yeeyo ninvirihaahu ohixariya. Owo annasuwela emaara yoomaala ni emaara yoowuuluma. (Math. 26:62-64) Owo khaakhula itthu sootheene ootheriwaawe. (Math. 11:19) Emaara uulumaawe, owo khaaveeha atthu yaamutthara-tthara naari khaawoopopiha. Yesu anniiwehexexa mwaha wooweera “ívelenle mmatatani mwa yole onathoriha ni exariya.” Yesu annasuwela weera Yehova annoona weera owo annaviriha ohixariya. Owo annaroromela weera owo anwera omaliha ohixariya iwe etempu yooreerela.

11. Mikhalelo heeni soowehexexa wuuluma wahu? (Nwehe efootu.)

¹¹ Hiyo pooti omutakiha Yesu niwehexexaka itthu nnuulumaahu emaara yeeyo ninthokororiwaahu moohixariya. Itthu ikina soohixariya, sinkhala ikhaanini, nto hiyo pooti othanla ohipwattha. Naari hiyo pooti ohuuluma etthu weera nsepe wuuluma etthu enrowa otepiha maxupo. (Koh. 3:7; Yak. 1:19, 20) Ikwaha ikina, hiyo nnootthuneyaka wuuluma vaavo nnoonaahu ohixariya naatthunaka waakihera  ekhaikhai. (Mit. 6:1, 2) Vaavo nnuulumaahu, nintthuneya nipakeke ele ninweraahu weera nuulume moomaaleleya ni mwa nttittimiho. — 1 Ped. 3:15. b

12. Moota heeni nimmuroromelaahu “yole onathoriha ni exariya”?

¹² Hiyo-tho pooti omutakiha Yesu nimuroromelaka “yole onathoriha ni exariya.” Vaavo atthu akina ennithokororaaya moohixariya naari onihooxa, ninnaroromela weera Yehova oosuwela ekhaikhai. Nroromelo nno ninnaneeriha ovilela othokororiwa moohixariya mwaha wooweera noosuwela weera woomaliherani Yehova onooreherera itthu iyo. Vaavo ninhiyaahu itthu soothesene mmatatani mwa Yehova, ninnasepa onyoonyiwa ni miyuupuwelo saarowa oneeriha woona ovoreya murima. Miyuupuwelo iyo pooti oneeriha opaka itthu moohireerela ni pooti oneeriha oyeleela ohakalala wahu, ni-tho pooti onanariha onthamwene ahu ni Yehova. — Nsal. 37:8.

13. Eheeni enrowa onikhavihera ovirelela ovilela ohixariya?

¹³ Ekhaikhai weera, khaninwera otthara moomalela ntakihero na Yesu. Ikwaha ikina hiyo pooti opaka ni wuuluma itthu seiyo muhoolo mwaya ninrowaahu ottharuwa. (Yak. 3:2) Ni ohixariya okina pooti oneeriha okhala ookhulumuwa mmuupuweloni ni weerutthuni ni pooti okhala wooxupa ovilela. Wakhala weera eyo ekhaikhai wa nyuwo, muroromeleke weera Yehova oosuwela itthu munvirihaanyu. Ni Yesu, yoowo-tho ovirinhe ohixariya, onnasuwela moota muniisoonelaanyu. (Aheb. 4:15, 16) Ohiya paahi onivaha ntakihero noomalela na Yesu, Yehova onnanivaha miruku soovareleya muteko seiyo sinrowa onikhavihera oviriha ohixariya. Harowe noone iversu piili sa eliivuru ya Aroma seiyo sinrowa onikhavihera.

“MUNVAHE MULUKU EHUHU YA OWALI”

14. Ontaphulela eheeni ‘onvaha Muluku ehuhu ya owali’? (Aroma 12:19)

¹⁴ Mmusome Aroma 12:19. Murummwa Paulo aahiwooperera maKristu ‘onvaha Muluku ehuhu ya owali,’ ninanvaha Muluku ehuhu ya owali vaavo nimmuhiyaahu owo opaka exariya mwa etempu awe ni mwa moota owo ontthunaawe. Munna ommoha yoowo aathokororinwe moohixariya ohimme ha: “Miyo kannawanano ni muupuwelo wootthuna oreherera itthu mwa mukhalelo aka mene yoolepa ya Aroma 12:19 yookikhavihera onweherera Yehova.”

15. Mwaha wa heeni oraaya wootthuneya onweherera Yehova weera areherere mwaha ahu?

¹⁵ Ninnattottela mureerelo vaavo nnanwehereraahu Yehova oreherera mulattu. Wakhala weera nnoopaka eyo, nnoosepa wiivaha muritti ni onyoonyiwa mwaha wooweerera oreherera itthu meekhaahu. Yehova onniivaherera weera anikhavihere. Onkhala ntoko owo onhima ha, ‘Mukihiyere miyo ohixariya, kinooreherera itthu iyo.’ Wakhala weera hiyo nnimwaakhulela yoolaihera ya Yehova yeeyo ohimmaawe weera ‘miyo kinootthikiha isikula,’ nnoohiya mwaha owo, nroromelaka weera Yehova onooreherera nnene sene mwaha owo. Ti yeeyo yaamukhavihenre Jonh, nimuhimmaahu muttuli, owo ohimme ha, “Wakhala weera miyo kinonweherera Yehova, owo onooreherera mwaha owo okipwaha miyo.”

“OWERYE SONANARA OPANKAKA SORERA”

16-17. Moota heeni nivekelo ninrowaaya onikhavihera ‘owera soonanara nipakaka sooreera’? (Aroma 12:21)

¹⁶ Mmusome Aroma 12:21. Paulo-tho aawooperera akristu weera ‘eweryeke soonanara  epakaka sooreera.’ Mwaha Yesu aapankaawe vamwaako, owo enre: “Mwàtthune amwittan’anyu ni mwàvekelele yawo anottharattharani.” (Math. 5:44) Yaari yeeyo ene xa owo aapankaawe. Apale hiyo ninnuupuwelela ohaawa Yesu aavirinhaawe emaara yeeyo anakhotto a oRoma yaamukhomenlaaya vamwirini. Nave hiyo pooti wuupuwelela moota owo oonaawe ovoreya ohela mpuwa ohittittimihiwa ni ohaawa ohixariya.

¹⁷ Yesu khaawerinwe ni ohixariya aavirihaawe. Ohiya owuulumela anakhotto ale, owo aavekela eeraka: “Tithi, mwàlevelele, niwoko khansuwela yeyo anèraya.” (Luka 23:34) Emaara nnaavekelelaahu ale ennithokorora moohixariya, eyo pooti oneeriha ohuupuwelela itthu nipakelinwaahu naari onyoonyiwa, naari eyo pooti otxentxa moota ninwoonelaahu atthu ale enitthekenle.

18. Moota heeni nivekelo nimukhavihenraaya Alberto ni Jonh oviriha ohixariya?

¹⁸ Nivekelo nohaakhavihera asinna eeli ehimmwale woopatxerani wa yoosoma ela oviriha ohixariya. Alberto ohimme ha: “Kannaavekelela asinna yaakithokorora moohixariya, ni ikwaha sintxipale kannanvekela Yehova weera akikhavihere ottiwala ohixariya iwe.” Moohakalaliha, Alberto ootthikela onvarela Yehova moororomeleya. John ohimme ha: “Ikwaha sintxipale, kannanvekelela munna aakinyoonyinhe. Mavekelo ntoko ala, aakikhavihera omoona mwa mukhalelo wooreerela kihimuthorihaka. Nave-tho mavekelo ala aakivaha murettele woomunepani.”

19. Etthu heeni nintthuneyaahu opaka niwehereraka omala elapo ela? (1 Pedru 3:8, 9)

¹⁹ Niwehereraka omala elapo ela, khaninsuwela ohixariya heeni ninrowaahu oviriha. Mene nihipwatthaka ohixariya ninrowaahu okumanano, nihihiye onvekela nikhavihero Yehova. Opwaha mwa yeeyo, nimutakiheke Yesu moota oonelaawe ohixariya ni nivireleleke otthara miruku sa mBiblyani. Wakhala weera nnoopaka eyo nroromeleke weera nnimwaakhela mareeliho a Yehova. — Mmusome 1 Pedru 3:8, 9.