1. Mwaha wa heeni nintthuneyaahu oxuttera ni asinna oowuuluvala?

 OOTHEENE hiyo ninnahaawela miruku weera nipake soothanla sootthuneya sa mweekumini. Hiyo pooti waakhela miruku iyo ni asitokweene a mmulokoni naari ni akristu akina oolipa moomunepani. Wakhala weera awo toowuuluvala onipwaha hiyo, hiyo khontthuneya okhootta miruku saya nuupuwelaka weera ti sakhalayi. Yehova ontthuna weera nixuttereke ni asinna awo oowuuluvala. Awo aaviriha etempu yintxipale onipwaha hiyo, ni aakhalano sookumanano sintxipale, toowiiwexexa ni amiruku. — Yobi 12:12.

2. Eheeni ninrowaahu othokorora mwa yoosoma ene yeela?

² Khalayi, Yehova aahaavarihela muteko alopwana oowuuluvala oororomeleya weera yaalipihe ni oweettiha atthu awe. Moone ntakihero na Mose, Davidi ni murummwa Yohani. Awo yaakhala etempu yoovirikana ni mikhalelo sootepa ovirikana. Vaavo yaahalelaaya vakhaani okhwa, yannaavaha amiravo miruku soovareleya muteko. Alopwana ala oowuuluvala oororomeleya, ahiiwanyeiha otthuneya waya omwiiwelela Muluku. Yehova oheeriha weera masu aya amiruku elempwe mBiblyani weera nttottele mureerelo olelo va. Nihipwatthaka naareene amiravo naari oowuuluvala, hiyo pooti ottottela mureerelo nsomaka miruku saya. (Arom. 15:4; 2 Tim. 3:16) Mwa yoosoma ela, ninrowa othokorora masu oolaxera a alopwana ala araru oowuuluvala ni itthu ninxutteraahu ni ele yuulummaaya.

‘NYUWO MUNOOKHALA MWA ETEMPU YINTXIPALE’

3. Mose aavanre itthu heeni?

³ Ekumi awe yootheene, Mose anniilipihera onvarela Yehova. Owo aavara ntoko mprofeeta, mphuki, muhooleli ni namathola-thola.  Mose aakhalano sookumanano sintxipale mweekumini! Owo aahaahoolela ni waakumiha ana a Israeli wookaporoni wExipitu ni aahoona ni maitho awe miiriira sintxipale sa Yehova. Yehova aahinvarihela weera alepe iliivuru 5 soopatxera sa mBiblyani, onnooneya-tho weera Nsalmu 90 ni 91. Pooti-tho weera ti yoowo olempe eliivuru ya Yobi.

4. Mose aalipinhe taani, ni mwaha wa heeni?

⁴ Ahalelaka okhwa, vaavo aaraaweno iyaakha 120, Mose aahaawopa ana a Israeli ootheene weera awuupuxere itthu yonnaaya ni yaavirinhaaya. Ahaakunveene wuuluvala, atthu akina yaamwiiwelela, yaahoona miiriira sintxipale seiyo Yehova aapankaawe, ohela mpuwa othorihiwa wa Exipitu. (Ott. 7:3, 4) Awo yaavira mooloko wooxeera yoowo waakawanyinwe maahi, nave yaahoona onyaanyiwa wa anakhotto a Farawo. (Ott. 14:29-31) Weeheweheweni, awo yaahoona moota Yehova aakhaviheraawe. (Ola. 8:3, 4) Vano, vaavo ana a Israeli yaaraaya oolikaneene weera evolowe elapo yoolaiheriwa, Mose aattottela mureerelo eparakha ela yoomalihera weera alipihe muloko ole. a

5. Masu oolaxera a Mose emphwanyeya va Olaleya 30:19, 20, yaaroromelinhe eheeni ana a Israeli?

⁵ Eheeni Mose aahimmaawe? (Mmusome Olaleya 30:19, 20.) Muloko wa ana a Israeli waakhalano yooweherera yooreera. Ereelihiwaka ni Yehova, ana a Israeli yaakhala mwa etempu yintxipale elapo yaalaiherinwaaya. Yaari elapo yooreera ni yoowaattano soowiima! Mose aahaaleela weera: “Mittetthe sitokwene ni sorera weyo ohitenkawe, impa sosareya sorera sothene weyo ohisarihalawe, ihime sihithimpwe ni weyo, imatta sa ivinya ni sa olivera weyo ohiphatteñyawe.” — Ola. 6:10, 11.

6. Mwaha wa heeni Muluku aakhulenlaawe weera maloko makina yaatuphele ana a Israeli?

⁶ Mose aahaavaha miruku ana a Israeli seiyo seera saakhavihere ovirelela okhala mwa elapo ele yoolaiheriwa. Awo wannatthuneya wiiwelela malamulo a Yehova. Nave-tho Mose aawooperera weera ‘ethanle ekumi’ emwiiwelelaka Yehova ni ‘yiiphiteerihaka wa yooworu.’ Nto ana a Israeli yaamukhootta Yehova. Moovira etempu, Yehova aahaakhulela weera Asiria ni maBabiloniya yaakuxere omuthaamiheriwoni. — 2 Mam. 17:6-8, 13, 14; 2 Sow. 36:15-17, 20.

7. Etthu heeni ninxutteraahu ni masu a Mose? (Nwehe efootu.)

⁷ Etthu heeni ninxutteraahu? Wiiwelela onnaphwanyiha ekumi. Hiihaale ntoko ana a Israeli yaahalelaaya ovolowa elapo yoolaiheriwa, hiyo nihanle vakhaani ovolowa elapo enyowani Muluku olaihenraawe, weiwo ninrowaahu woonaka elapo ela ekhalaka eparayiisu. (Yes. 35:1; Luka 23:43) Weiwo Satana ni mademooniyu awe ehinrowaaya okhala. (Apok. 20:2, 3) Weiwo ettiini yoowootha ehinrowaaya waarakameliha atthu ni Yehova. (Apok. 17:16) Weiwo anamalamulela a atthu ehinrowaaya waahasulaka atthu enaalamulelaaya. (Apok. 19:19, 20) Oparayiisu iwo, khaninrowa okhala nipuro na atthu oonanara murima. (Nsal. 37:10, 11) Atthu a elapo yootheene enoorowa wiiwelelaka malamulo a Yehova yaawo enkumihera wiiraana ni murettele. Mwa mukhalelo ene yoola, awo eneereke osivelanaka ni ororomelanaka mukina ni mukhwaawe. (Yes. 11:9) Tthiri ela yooweherera yootepa oreera! Opwaha mwa yeeyo, wakhala weera hiyo noomwiiwelela Yehova, nnoorowa okhala mparayiisu elapo ela ya vathi, ohiya paahi iyaakha vakhaani, mene mahiku ootheene. — Nsal. 37:29; Yoh. 3:16.

8. Moota heeni yoolaihera ya ekumi yoohimala emukhavihenraaya misiyonaariyu mmoha ovanre mwa etempu yintxipale? (Yuda 20, 21)

 ⁸ Wakhala weera nnoovirelela wuupuwelela yoolaihera ya Muluku ya ekumi yoohimala, nneereke otthuna omwiiwelela nihipwatthaka sooweerera ninkumanaahuno. (Mmusome Yuda 20, 21.) Nave-tho yoolaihera ela pooti onikhavihera owanano ni sookhulumula sahu. Misiyonaariyu mmoha aavanre mwa etempu yintxipale wÁfrica yoowo aawanano yookhulumula awe, ohimme ha: “Vaavo koonelenlaaka weera yooweherera aka ya okhalano ekumi yoohimala yannavukuwa, kaalakela wiilipihera owanano yookhulumula aka kinvekelaka vantxipale Yehova. Nnikhavihero nawe, koowera owina.”

‘NYUWO MUNOOKHUMELA NNENE’

9. Sooweerera heeni Davidi aavirinhaawe mweekumini mwawe?

⁹ Davidi aari mwene mutokweene. Nave-tho owo aari mulipa ooweepa, oolepa ipoesia, nakhotto ni profeta. Owo aaviriha sooweerera sintxipale. Mpuwa mwa iyaakha sintxipale, owo annamutthawa-tthawa mwene Sawuli yoowo aamukhalela nrima. Akhalakaru mwene, Davidi wannatthuneya otthawa weera akosoope ekumi awe mwaha wa mwanawe eeriwa Absaloni yoowo eerera omwiiyera omwene awe. Nnaamweera aaviriha maxupo ala ni opaka soottheka, Davidi aavirelela okhala oororomeleya wa Muluku ekumi awe yootheene. Yehova onnamuhima okhala “mulopwana a vamurimani [vawe].” Tthiri ti wooreera otthara miruku sa Davidi! — Mit. 13:22; 1 Mam. 15:5.

10. Mwaha wa heeni Davidi anvanhaawe miruku mwanawe yoowo aarowa omuranttela, Salomoni?

¹⁰ Mwa ntakihero, moone miruku Davidi anvanhaawe mwanawe yoowo aarowa omuranttela, Salomoni. Mmiravo ola aathanlinwe ni Yehova weera avirelele oreherera okokhorela weekhaikhai ni opaka etemplu weera akokhoreliwekemo Muluku. (1 Sow. 22:5) Salomoni aamurowa oviriha maxupo. Etthu heeni Davidi aamulenlaawe? Nrowe noone.

11. Moovarihana ni 1 Mamwene 2:2, 3, etthu heeni Davidi aamuroromelinhaawe Salomoni, ni moota heeni masu ala yaaraaya eekhaikhai? (Nwehe efootu.)

¹¹ Eheeni Davidi aahimmaawe? (Mmusome 1 Mamwene 2:2, 3.) Davidi aamuleela mwanawe weera, wakhala weera ammwiiwelela Yehova, aamukhumela nnene mweekumini mwawe. Ni mwa iyaakha sintxipale, Salomoni aakhumela nnene. (1 Sow. 29:23-25) Owo aapaka etemplu etokweene ni oolepa iliivuru sineerela eparte mBiblyani. Owo aari oovuwa mwaha wa osuwela wawe ni mihakhu. (1 Mam. 4:34) Mene ntoko Davidi aahimmaawe, Salomoni aarowa okhumela nnene wakhala weera ammwiiwelela Yehova Muluku. Mooriipiha murima, muhoolo mwaya, Salomoni aahaakokhorela amiluku akina. Yehova aahiya omwaakhulela, ni Salomoni aayeleela miruku sa olamulela nnene ni mwa exariya. — 1 Mam. 11:9, 10; 12:4.

12. Etthu heeni ninxutteraahu ni masu a Davidi?

 ¹² Etthu heeni ninxutteraahu? Wiiwelela onnaniphwanyiha mareeliho. (Nsal. 1:1-3) Ekhaikhai weera Yehova khanilaihenre onivaha mihakhu naari ovuwa ntoko anvanhaawe Salomoni. Mene vaavo nimmwiiwelelaahu Muluku ahu, owo onnanivaha osuwela weiwo onrowa onikhavihera opaka soothanla sooreera. (Mir. 2:6, 7; Yak. 1:5) Miruku sawe sinoonikhavihera opaka soothanla sooreera woohima sa muteko, osoma, matthekulelo ni musurukhu. Ovarihela muteko miruku iyo, sinoonikosoopa mwa maxupo enviriha etempu yintxipale. (Mir. 2:10, 11) Nnimunnuwiheraka onthamwene woolipa, nave nneereke okhalano miruku seiyo sinrowa onikhavihera okhalano emusi yoohakalala.

13. Eheeni emukhavihenre Carmen opaka yoothanla yooreera?

¹³ Carmen, yoowo onkhala oMoçambique, uupuwela weera aatthuneya osoma wuniversidade weera akhumeleke nnene mweekumini mwawe. Owo aahiilepiha weera amusomeke arquitetura. Owo enre: “Yannakisivela ele kaaxutteraaka, mene eyo yannakiiyera etempu aka ni ikuru saka. Miyo kaakhala oxikola ovinyera 7:30 mpaka 18:00. Waari wooxupa woonela mithukumano ni kaayeleela mukhalelo aka wa omunepani. Va murimani vaka kaapatxera woonelela weera kaavarela mamwene meeli.” (Math. 6:24) Owo aavekela ni aathola-thola woohima sa mwaha owo murevistani mwahu. Owo onnaatxeerera eeraka: “Vaavo asitokweene a mmulokoni ni ameyaka yaakivanhaaya miruku, kaalakela ohiya osoma wuniversidade weera kinvareleke Yehova mwa etempu yootheene. Awo yaakikhavihera opaka soothanla sooreera mweekumini mwaka, ni nkinthanana mwaha woopaka yoothanla eyo.”

14. Masu heeni ootepa otthuneya Mose ni Davidi yuulummaaya?

¹⁴ Mose ni Davidi yannamusivela Yehova ni yannoona otthuneya waya omwiiwelela. Mpuwa mwa masu aya oolaxera, awo yaahaalipiha ale yaawiiwa weera etthareke ntakihero naya evirelelaka omwiiwelela Yehova Muluku aya. Awo-tho yaahaaleela weera atthu ale enhiya omwiiwelela Yehova, ennayeleela waakhuleliwa ni owo ni-tho ennayeleela mareeliho elaiherinwaaya. Miruku saya sinnavareleya muteko olelo. Sivirakaru iyaakha sintxipale, murumeyi mukina a Yehova, aahoonihera otthuneya waya omwiiwelela Muluku.

 “KHAWA’VO OHAKALALA OTOKOTOKO [OPWAHA OLA]”

15. Itthu heeni murummwa Yohani onnaawe mpuwa mwa ekumi awe?

¹⁵ Yohani aari murummwa oosiveleya a Yesu Kristu. (Math. 10:2; Yoh. 19:26) Yohani aamuhoola Yesu mpuwa mwa muteko awe wootheene woolaleera. Owo aahoona miiriira aapakaawe ni aakhala nuuwo mwa etempu yooxupa. Yohani aamoona Yesu ahasuliwaka ni vaavo aavinyererihinwaawe. Owo-tho aahoona waatxeerereya wa ettiini ya ekristu ya eseekulu yoopatxera yeeyo yaapatxenre ni ekhurupu ekhaanini ya atthu oororomeleya mpaka “[olaleeriwa] yopattuxiwa yothene eri vathi va erimu.” — Akol. 1:23.

16. Taani enlipihiwa ni ikaarta sa Yohani?

¹⁶ Vaavo uuluvanlaawe, Yohani aakhalano eparakha yoomulepa liivuru oohakalaliha a Apokalise yoowo ori “apokalise a Yesu Kristu.” (Apok. 1:1) Nave-tho Yohani oolepa evanjelyu erino nsina nawe. Owo-tho oolepa ikaarta tthaaru soowuupuxeriwa. Ekaarta awe ya naararu, owo aamulepela mukristu mmoha oororomeleya iitthaniwa Gaio, yoowo Yohani aamoonaawe ntoko mwaana oosiveleya oomunepani. (3 Yoh. 1) Onnooneya weera yaakhala atthu antxipale Yohani aawoonaawe ntoko anamwane awe oomunepani. Etthu mulopwana ola oowuuluvala ni oororomeleya aalempaawe, yohaalipiha atthareli ootheene a Yesu mpaka olelo.

17. Moovarihana ni 3 Yohani 4, etthu heeni enkumihera ohakalala?

¹⁷ Etthu heeni Yohani olempaawe? (Mmusome 3 Yohani 4.) Yohani oolepa ohakalala onkhumelela mwaha woomwiiwelela Muluku. Vaavo Yohani aalempaawe ekaarta awe ya naararu, atthu akina yannamwara-mwara sooxuttiha soowootha seiyo saakumihera okawanyeya. Menento akristu akina yaavirelela ‘weetta mweekhaikhaini.’ Awo yannamwiiwelela Yehova ni ‘yanneetta mwa mukhalelo onamusiveliha Muluku.’ (2 Yoh. 4, 6) Akristu ala oororomeleya, ohiya paahi yaamuhakalalinhe Yohani, nave-tho yaamuhakalaliha Yehova. — Mir. 27:11.

18. Etthu heeni ninxutteraahu ni masu a Yohani?

¹⁸ Etthu heeni ninxutteraahu? Wiiwelela onnakumihera ohakalala. (1 Yoh. 5:3) Mwa ntakihero, ninnahakalala vaavo ninsuwelaahu weera ninnamuhakalaliha Yehova. Owo onnahakala vaavo onnoonaawe niwinaka sooweerera sa elapo ela ni naakhulelaka ekhaikhai. (Mir. 23:15) Nave-tho malaika wiirimu ennahakalala. (Luka 15:10) Hiyo-tho ninnahakalala  vaavo nnaawehaahu asinna akina evirelelaka okhala oororomeleya, otepaxa wene vaavo envirihaaya maxupo ni weereriwa. (2 Ates. 1:4) Vaavo elapo ela enrowaaya omala, nnoohakalala osuwela weera nohoonihera ororomeleya wahu wa Yehova nnaamweera naareene elapo yeeyo yaalamuleliwa ni Satana.

19. Etthu heeni murokora mmoha oneeriwa Rachel ohimmaawe woohima sa waaxuttiha atthu akina ekhaikhai? (Nwehe efootu.)

¹⁹ Hiyo ninnahakalala vantxipale vaavo nnaaleelaahu atthu akina ekhaikhai. Rachel yoowo onkhala oRepública Dominicana onnoona weera eparakha etokweene omuxuttiha mutthu woohima sa Muluku ootikiniha nimmukokhorelaahu. Uupuwelaka moota aakhavihenraawe atthu oxuttera ekhaikhai, owo enre: “Miyo nkinwera ohima moota kihakalanlaaka mwaha woowoona atthu ale kaaxuttihaaka erowelaka vahoolo weera emusiveleke Yehova ni emuroromeleke ni otxentxa ekumi aya weera emuhakalaliheke. Ohakalala iwo otokweene opwaha wiilipihera waka ni itthu kipankaaka weera kaaxuttihe.”

MUTTOTTELE MUREERELO MASU OOLAXERA A ALOPWANA OOROROMELEYA

20. Etthu heeni ninlikanaahu ni Mose, Davidi ni Yohani?

²⁰ Mose, Davidi ni Yohani, yaakhala etempu ni makhalelo oovirikana ni mahiku ahu ala. Mene yookhala etthu ninlikanaahu naawo. Awo yanvarela Muluku eekhaikhai, nave-tho hiyo nimpaka yeeyo. Hiihaale ntoko awo, ninnanvekela Yehova, ninnamuroromela nave ninnanvekela miruku. Ntoko alopwana ala a khalayi, ninnaroromela weera Yehova onnaareeliha vantxipale ale emmwiiwelela.

21. Mareeliho heeni enrowaaya waakhela ale eniiwelela miruku sa alopwana oororomeleya ntoko Mose, Davidi ni Yohani?

²¹ Vano, nikhale oolikaneene wiiwelela masu oolaxera a alopwana ala oowuuluvala niiwelelaka malamulo a Yehova. Napaka eyo nnookhumelaka nnene mwa itthu sootheene nimpakaahu. Nave-tho nnookhalano eparakha ‘yookhala mwa etempu yintxipale,’ aani, ekumi yoohima! (Ola. 30:20) Nave nnoohakalala mwaha woomusiveliha Tiithi ahu a wiirimu a nsivelo, yoowo onkwanihera soolaihera sawe mwa mukhalelo nihinweraahu wuupuwelela. — Aef. 3:20.