NEEREKE nyuwo munniilipihera weera mpakeke yoosomaanyu ya omeekha mahiku ootheene ni ekhaleke yooreera? Moohihovela ootheene hiyo ninnapaka eyo. Mene muupuwele itthu nimpakaahu mahiku ootheene, ntoko orapa. Otxapa onnatthuneya etempu ni wiilipihera, mene napaka eyo ninnahakalala. Nave-tho yoosoma ya Biblya pooti okhala yooreera ntoko “mahi òkattha ni masu.” (Aef. 5:26) Moone miruku vakhaani sinrowa wookhaviherani:

• Mpake etthu enkela owuupuxerakani. Yoosoma ya omeekha enneerela eparte ‘itthu sootepa otthuneya’ seiyo mukristu ontthuneyaawe opaka. (Afil. 1:10) Weera mukhavihereye otthara eprogramaanyu, muntthuneya olepa etthu yeeyo munkelanyu opareya nipuro noowooneya ntoko va ekwaadru ya apalanu anyu, naari va geleirani. Naari nyuwo pooti omwaativar alarme mutelefooni mwanyu yoowo onkela owuupuxerakani ehalaka etempu vakhaani weera musome.

• Mwiikhoveleliheke ni makhalelo anyu. Neereke onnookhweelani wuupuwelela mwa etempu yintxipale naari mwa etempu vakhaani? Nyuwo moosuwela nnene sene makhalelo anyu. Mukhoveleliheke yoosoma anyu moovarihana ni makhalelo anyu. Wakhala weera nyuwo munnaxupeya vaavo emphiyaaya ewooraanyu yoosoma, munoonela hayi othanla osoma paahi mpuwa mwa iminutu 10? Emaara munsomaanyu etempu eyo vakhaaniini, nyuwo munoorowa oxuttera itthu sintxipale seiyo mwaharowaanyu oxuttera mwahaapanke yoosoma. Ni vaavo mumpakaanyu eyo, nyuwo oneereke woosivelani ni munoorowa okhalano ntthuno noovirelela opaka yoosoma. — Afil. 2:13.

• Muthanle vahinaaye mwaha munrowaanyu osoma. Wakhala weera nyuwo munniikoha etthu munrowaanyu osoma ephiñyeene emaara yoosoma, pooti weera nyuwo ‘khamunvarihela nnene etempu anyu.’ (Aef. 5:16) Munoonela hayi opaka elista ya nyaha munrowaanyu osoma seiyo sinoosivelani? Emaara yootheene munrowaanyu okhalakano nikoho, mulepeke. Ni vaavo mummalihaanyu yoosomaanyu, nyuwo pooti olepa itthu ikina seiyo muntthunaanyu osoma.

• Mukhweihereke. Mweerereke ohela itthu sookhweya va eprograma anyu, ntoko etempu munkelaanyu oviriha musomaka naari itthu nyuwo munthanlaanyu osoma. Etthu eri yootthuneya khaiyene etempu munvirihaanyu musomaka, naari etthu munsomaanyu, mene moota munsomaanyu moohihiyerereya.

Ninnattottela mureerelo vaavo ninsomaahu mahiku ootheene. Ninnamwaattamela Yehova, ninnaxuttera opaka itthu mwa miruku, nave ninnakhala oolipa. — Yeh. 1:8.