Paul: Hiyo naahakalala vantxipale! Waari mweeri wa Novembro wa 1985, ni neera neettaka nrowaka wa yoothanleliwa ahu yoopatxera ntoko mamisiyonaariyu, oLibéria wÁfrica Ocidental. Aviyawu nanwenlaahu aaheemela oSenegal. Anne aaheera: “Enhala ewoora emoha paahi ni nnoorowa ophiya oLibéria!” Avinyaka yaawiihiwa yoohimmwa yeera: “Ale enrowa oLibéria ontthuneya ekhuruwe mwaaviyawuni, mwaha wa ekhotto enwaniwa weiwo, khonrowa owereya weemela.” Mahiku 10 yaattharelana, naakhala ni mamisiyonaariyu oSenegal. Soohimmwa saakhuma oLibéria, sannuuluma woohima sa ikaaro soosareya mirutthu sa atthu ookhwa, nave-tho sannahima weera, wakhala weera mutthu khaarowa wiiwelela aamurowa woopeliwa.

Anne: Hiyo ti atthu oowiikosoopa ni itthu soowoopiha. Mweekhaikhai, okhumela kireene mwaana, kisuwelinwe Anne ooxupeya. Kinnanyoonyiwa naari kaatthunaka otupha musewe! Mene naari oolikaneene orowa okwanihera yoothanleliwa ahu.

Paul: Miyo ni Anne, niyarinwe muttetthe mmoha yoowo orakamelanne ikolometru 8 ni oeste wInglaterra. Anne ni miyo, naavara ntoko mapioneiru nimalihakaru osoma. Miyo ni owo nannoopereriwa nave nannakhaviheriwa. Miyo kannakhaviheriwa ni asitiithi aka, Anne annakhaviheriwa ni ameyawe. Yootthuna ahu waari orowela muteko wa etempu yootheene. Ni asitiithi ahu yaanikhavihera moomalela. Kireeneno iyaakha 19, kaakhalano eparakha yoorowa oBetheli, ni Anne aarowa oBetheli vaavo naathelannaahu eyaakha ya 1982.

Anne: Wannanisivela ovara oBetheli, mene emaara yootheene nannatthuna orowa ovara mapuro oothowa anamalaleera. Nave okhala weera oBetheli naakhalano eparakha yoovara vamoha ni asinna yaari mamisiyonaariyu, ntthuno nahu naahaatxeerereya. Nannavekela woohima sa mwaha owo ohiyu wootheene mpuwa mwa iyaakha iraru, ni naahakalala vaavo eyaakha ya 1985 naakhenlaahu nwopelo woorowela eturma 79 ya oGileyadi! Naathanleliwa orowa oLibéria, wÁfrica Ocidental.

Paul: Naahinwela aviyawu oopatxera yoowo aakhuleliwa otthikela oLibéria. Atthu yannoova vantxipale,  mpaka yannatuthuwa vaavo yiiwaaya onyakula wa ekaaro! Weera nikhale oomaaleleya, hiyo nannasoma Masalmu ookhuveya ohiyu wootheene. Mene hiyo yannanisivela vantxipale yoothanleliwa ahu. Anne aavara omuttettheni ntoko misiyonaariya, ni miyo kaavara oBetheli vamoha ni munna John Charuk. a Yooweereya ya munna ola ni wiiwexexa wawe itthu yaavirihaaya asinna, yaakikhavihera vantxipale miyo.

Anne: Mwaha wa heeni waanisivenlaaya oLibéria mpuwa mwa etempu vakhaani? Mwaha wa asinna. Awo yaari a nsivelo, oohakalala ni oororomeleya vantxipale. Naahiiraana naawo ni awo yaakhala amusi ahu. Miruku saya sanlipiha moomunepani. Nave muteko woolaleera waari woohakalaliha. Atthu naalaleeraahu khawaasivelavo wakhala weera nannaakuveya opwaha, waari woohakalaliha! Atthu yannatthekula woohima sa Biblya ereene mmuseweni. Waari paahi ophiya ni ovoleela mwaha. Naakhalano soosoma sa Biblya sintxipale mpaka onanxupa osomiha sootheene. Awo yaari maxupo yaanisivela vantxipale!

Paul: Sivirakaru iyaakha 4 okhanleene murettele, eyaakha ya 1989 yaakhumelela matxentxo ootutuxera, vaavo yaakhumelenlaaya ekhotto. Nihiku na 2 a Julho a 1990, atoropa yaatuphela muttetthe waattamela oBetheli. Mpuwa mwa miyeeri miraru, khanaawera wuuluma ni atthu a vaate waahela mpuwa amusi ahu ni eSede Mundial. Waakhumelela ovaanyihana ni anapoliitika, othowa yootxa ni okonihana mookhanyererana. Maxupo awo yaavirelela mpaka iyaakha 14, ni yaavoleela elapo yootheene.

Anne: Atthu a maloko makina yannawana ni owiiva atthu a maloko makina. Atoropa yaawo yeetta yaakunxeene akapwitthi aya ni ewanreene ikuwo soowoopiha, yanneetteetta mphironi ekuxaka etthu eri poothe yaaphwanyaaya. Ntoko akina a yaawo yaahimaaya, owiiva atthu waakhala ntoko “owiiva alakhu.” Nannoona mirutthu sa atthu sithataanyerinweene, mirutthu mikina waattamela ofiliyaale. Arumeyi oororomeleya a Yehova yaahiiviwa, waahela mpuwa mamisiyonaariyu meeli oosiveleyaxa.

Asinna akina ehelaka ikumi saya veerisani, yannawiipithiha atthu a maloko makina yaawo yaatthara-tthariwa weera yiiviwe. Mamisiyonaariyu ni asinna yaavara oBetheli, yannapaka etthu emoha-moharu. OBetheli, asinna akina naawiipithihaahu, yaakona ikwaartu sa vathi sa epreediyu, ni akina yaakhala vamoha ni hiyo osulu. Hiyo nannakona okwaartu wahu ni emusi emoha ya atthu 7.

Paul: Mahiku ootheene, atoropa yanneerera ovolowa oBetheli weera yoone wakhala weera nannawiipithiha atthu. Hiyo naakhalano asinna 4 yaawo yaari ntoko anamaweha-weha, eeli yaaweha vaxanelani  ni eeli akina yeemele vamulako. Wakhala weera eeli ale yeemele vamulako yannahela matata aya ohoolo, eyo yoonihera weera itthu saari nnene. Mene wakhala weera yaahela matata aya ottuli, eyo yoonihera weera atoropa aanyoonyiwa. Ni ale yaaweha vaxanelani wannatthuneya otthimaka weera yawiipithihe asinna.

Anne: Sivirakaru isemana sintxipale, ekhurupu emoha ya atoropa oowali yaawera ovolowa oBetheli. Miyo ni murokora mmoha, naahiipitha ocasa de banho, weiwo naaraayawo nipuro nikhaanini mwaarmaariyuni. Murokora ole aahiipitha mootheene. Yaakunxeene akapwitthi aya, atoropa ale yaakitthara mpaka andaare oosulu. Awo yaapatxera omana nsele. Paul aaweerela, “Amwaaraka envarihela muteko ecasa de banho.” Weera kinvarihele muteko armaariyu, wannatthuneya otxentxa itthu ikina saari mwaarmaariyuni mmo, ohiya paahi onyakula, eyo yannapisa vantxipale, yeeyo yaaweeriha ohovela, miyo kaapatxera othukumela erutthu yootheene. Moota heeni kaarowaaka owera ohula nsele? Kaapaka nivekelo wa Yehova kinvekelaka nikhavihero nawe. Avinyaka kaahula nsele, ni mootikiniha, miyo kaakhala oomaaleleya. Mmoha a yaawo aakikakha ni aarowa omuhula armaariyu, apitikuxaka itthu saari mwaarmaariyuni mmo, mene khaaphwannye etthu. Avinyaka, owo ni ekhurupu awe yaapatxera owaasaasa ikwaartu ikina, mpaka ekwaartu yoomalihera osulu ya epreediyu, mene-tho khayaaphwannye etthu.

Paul: Naaviriha miyeeri sintxipale nihikhanleno yootxa. Emaara ya adoração matinal oBetheli, “matabicho” ahu yaari yootxa yoomunepani, woohikhala etthu ekina. Mene yootxa eyo yaanikhavihera.

Hiyo naasuwela weera, naahikhalano yootxa ni maahi, naaheereke otthuneya okhuma ofiliyaale. Vanonto, yaarowa okhala hayi asinna ale naawiipithihaahu? Pooti weeraka yaamwiiviwa. Mene onkhala ntoko, emaara yooreerela Yehova aapaka mwiiriira, owo annanivaha etthu yeeyo naahaawelaahu. Yehova aakosoopa soohaawela sahu ni aanikhavihera oviriha maxupo.

Vaavo elapo yaatepaaya oxupa, ekhaikhai yannatepa waara. ikwaha sootheene asinna yannatthuneya otthawa weera ekosoope ekumi, mene awo yaavirelela okhala oororomeleya ni oomaaleleya. Akina yaahima weera, itthu iye yaavirihaaya, waari “otxentxerihiwa wa maxupo matokweene.” Amiravo ni asitokweene a mmulokoni oolipa murima, yannapaka ele yaaweraaya weera yaakhavihere asinna. Emaara yaakhumaaya mmuttettheni mwaya, asinna yannakhala oowiiraana ni yannalaleya muttetthe munyowani ni yannapaka mithukumano Empa ya Omwene yeeyo waari muxaxa otuphini. Mithukumano sannaalipiha wa maxupo ale yaavirihaaya, nave olaleera waahaakhavihera asinna oviriha maxupo ale. Emaara naakhaviheraahu atthu, naatikhiniheya vantxipale owoona asinna evekelaka ipasta sa muteko woolaleera ohiya ikuwo! Atthu yaawo yaaxupeñye vantxipale ni yaahaaxiwa, yanniiwa mitthenka sooreera.  Awo yaatikhiniheya vantxipale woona moota Anamoona a Yehova yaaraaya oohakalala ni oowiilipiha. Awo yannaara eriyari ya epiphi ele. (Math. 5:14-16) Wiilipihera wa asinna, waaweeriha mpaka atoropa akina oowali oxuttera ekhaikhai.

Paul: Imaara ikina nannatthuneya ovinya elapo ele imaara iraru soottharelana ni imaara piili vayaakhani. Murokora mmoha misiyonaariya, aahuuluma ni masu vakhaani moonelo ahu: “OGileyadi hiyo nooxuttera ohela murima ahu va yoothanleliwaahu ni ti yeeyo naapankaahu. Mwa yeeyo waahiya asinna ni makhalelo ale, waanixupa vantxipale!” Mene naahakalala mwaha wooweera, nnaamweera naari ilapo soowaattamela, nanwera waakhavihera asinna oLibéria.

Anne: Maio a 1996, naavinya asinna 4 mukaaroni nikunxeene idocumentu sootthuneya sa efiliyaale. Yoolakelaahu waari weettiha mpuwa mwa ikiloomeetru 16 weera niphiye nipuro nikina na ecidade nenno naari noovareleleya. Menento emaara ene yeeyo, muttetthe ahu waatupheliwa. Atoropa oowali yaahoopela musulu ni yaaneemexa, yaanikumiha asinna araru mukaaroni mmwe, ni yaavirelela weettiha Paul areene mwemmo. Naaxupeya vantxipale. Moowaakuveya, naamoona Paul eettaka awaaka nipuro naaraahu ephome eyeeheyaka vayuutxi. Woopatxerani, nuupuwela weera aarimoopeliwa, mene naahoona weera waakhanle weera ti hiiho, owo khaarowa oweraka weetta! Toropa mmoha aarommana emaara aamukumihaawe mukaaroni. Naahakalala osuwela weera naari nikhwatta paahi.

Waattamela vale, yaakhala ekaaro ya atoropa yeeyo yaasareñye atthu yoova. Hiyo naakhurumpela ekaaro eyo mukhwipi, mene khanaawenre ovara nnene sene. Motorista aaheettiha vantxipale mpaka hiyo ohalela vakhaani omora. Hiyo naamukhuwelela weera eemele, mene okhala weera aamoova, khaatthuna weemela. Okhwipi waya, naawera ovara nnene sene. Mene naaphiñye ookhulumuwa ene, ni misempha sahu saamuthukumela mwaha wa ikuru naavarihelaahu weera nihimore.

Paul: Nsareñyeene ntthupi ni ikuwo sahu sipereñyeene, naawehana mukina ni mukhwaawe nnakohana moota heeni nlelo naaraahu akumi. Naakona vatuphini waattamela nipuro aaraawevo helicóptero yoowo aathorolinwe mapuro mantxipale ni ibaala, ni nihiku naattharelana aarowa okhala yoowo aarowa onikuxera oSerra Leoa. Naaxukurela mwaha wookhala akumi, mene naaxupeya mwaha wa asinna ahu.

Anne: Emaara naaphiñyaahu oBetheli ecidade ya oFreetown, oSerra Leoa, nanniisoona okhala oovareleleya ni nannakosoopiwa nnene. Mene emaara eri poothe kannuupuwelela itthu iye soonanara seereñye. Nihiku nootheene, kannoova ni kaakhala ooweha-weha kihiweraka wuupuwela nnene. Nkiisoona okhala oovareleleya, ohiyu kannahuhumuwa kiriirinweene ni kithukumelaka kuupuwelaka weera yookhala etthu yoonanara yaakela weereya. Nkaamumula nnene. Paul annakikhupaarela ni annavekela ni miyo. Nanniipa itxipo sa Omwene mpaka miyo ohiya othukumela. Kuupuwela weera kampatxera anepa ni nkaarowa owera otthikela okhala misiyonaariya.

Nkinrowa ottiwala etthu ele yeereñye. Esemana ene yeele, naahaakhela irevista piili. Emoha aari Despertai! a 8 a Junho a 1996. Owo aakhalano muru weera “Como lidar com a síndrome do pânico.” Miyo kaahiiwexexa etthu yeereya ni miyo. Erevista ya naaveeli aari A Sentinela a 15 a Maio a 1996, ni muru weera “Como obtêm essa força?” A Sentinela ola aakhalano efootu ya nikuruthu noovulala. Mwaha owo waahiiwanyeiha weera, hiihaale ntoko nikuruthu ninweraaya ovirelela otxa ni ovava nnaamweera mapupha aya evulanleene, hiyo-tho nnoowera ovirelela waakhela munepa wootteela wa Yehova ni waakhavihera atthu akina nnaamweera nreeneno maxupo a mmuupuweloni. Nyaha iya saakivaha ikuru ni yaari yootxa Yehova aakivanhaawe emaara yooreerela. (Math. 24:45) Etthu ekikhavihenre, ori othola-thola nyaha ntoko iya ni okhalano mpastani. Moovira etempu, wuupuwelela itthu soonanara iye waavukuwa.

Paul: Vaavo itthu saanaakhulelaaya weera ntthikele oLibéria, hiyo naahakalala vantxipale. Okhwipi wa eyaakha ya 2004, naakwanihera iyaakha 20 mwa yoothanleliwa ene yeele. Ekhotto yaamala. Ni yannapakiwa apalanu oopakiwa eBetheli enyowani. Mene moohipisa, naawompwa wa yoothanleliwa enyowani.

 Eyo yaari yooweerera etokweene, naakhovelela vantxipale emusi ahu yoomunepani, naarowa oviriha hayi eyo? Hiyo naahuupuwelela emaara naarowaahu oGileyadi, naahaahiya amusi ahu ni naahaakhela mareeliho mantxipale a Yehova. Mwa yeeyo, naahaakhulela nwopelo owo. Yoothanleliwa ahu enyowani yaarowa okhala elapo yoowaattamela, oGana.

Anne: Naahinla vantxipale vaavo naakhummaahu oLibéria. Mene naatikhiniheya vaavo Frank munna oowuuluvala ni amiruku, aahimmaawe ha: “Munittiwale hiyo!” Voottharelana, owo aahiiwanyeiha: “Ekhaikhai weera nyuwo khamunrowa onittiwala, mene nyuwo muntthuneya ovaherera murima anyu wa yoothanleliwa anyu enyowani. Eyo ti ya Yehova, tivawonto, mwaawehexexeke asinna ni asirokora a weiwo.” Eyo yaanilipiha vantxipale wa maxupo naaraahuno woopatxeriha veeli, weiwo atthu paahi vakhaaniini yaanisuwenlaaya ni itthu sootheene saaraaya inyowani.

Paul: Khawaapinse vantxipale, ni asinna a oGana yaakhala emusi ahu yoomunepani. Iwe yaakhala Anamoona a Yehova antxipale! Naaxuttera itthu sintxipale ni asinna oolipa ni ookhomaala moomunepani. Nivarakaru mpuwa mwa iyaakha 13 oGana, naahaakhela yoothanleliwa ekina. Naawompwa ovara eBetheli ya wÁfrica Oriental, oQuênia. Nnaamweera ninkhelinwe vantxipale ni asinna naasuwenlaahu mwa soothanleliwa sahu sa muttuli, moowaakuveya hiyo naahaakhovelela asinna oororomeleya a oQuênia. Nlelo nanniisoona okhala oovareleya muteko nivaraka muttetthe mutokweene weiwo yaathonwaayawo anamalaleera.

Anne: Mpuwa mwa iyaakha sintxipale, kooviriha itthu sintxipale sooxupa ni ikwaha ikina kannoova vantxipale. Itthu sookhulumula ni soowoopiha, pooti onikumihera maxupo a weerutthuni ni a mmuupuweloni. Hiyo khaninkosoopiwa mwa miiriira. Wakhala weera miyo kinniiwa oruma wa akapwitthi, miyo kinnoova ni kinnathukumela. Mene kooxuttera waasaasa nikhavihero Yehova onnivahaawe weera anlipihe, ohela mpuwa nikhavihero na asinna. Nave kohoona mwaneene aka weera, wakhala weera ninnavirelela okhalano sooluluwanya soomunepani, Yehova onoorowa onikhavihera ovirelela wa yoothanleliwa ahu.

Paul: Akina pooti wookohani, “Nyuwo ennoosivelani yoothanleliwa anyu?” Elapo pooti okhala yooreera, mene-tho pooti okhala yoohivareleleya ni yoowoopiha, mwa yeeyo etthu yookisivelaxa opwaha elapo, asinna oosiveleya, emusi ahu. Nnaamweera nihuuwaleene ni nireeneno sookhovelela soovirikana, nrino muupuwelo mmoharu. Nuupuwela weera naarummwa weera naalipihe asinna, menento awo yanlipinhe.

Emaara yootheene entxentxaaya yoothanleliwaahu, ninnoona mwiiriira: emusi ahu yoowiiraana. Emaara yootheene nneerelaahu eparte muloko, nnookhalano emusi ni nipuro nooreera. Ninnaroromela weera, wakhala weera nnoovirelela omuroromela Yehova, owo onoonivaha ikuru sootheene hiyo ninhaawelaahu. — Afil. 4:13.