1-2. (a) Anamalamulela akina anaapakela eheeni Anamoona a Yehova ni Anamoona a Yehova awo anoonela hayi osonttiwa iwo? (b) Onwereya moota heeni ohakalala nnamweera nsonttiwaka? (Mukomentari efootu ya vakaapani.)

 MAHIKWAANO miteko sa Anamoona a Yehova sinnakhoottihiwa ilapo soopwahaka 30. Ilapo ikina sa seiya, asinna ni asirokora aawaleliwa okadeya. Epanke eheeni yoonanara? Vamaithoni va Yehova asinna awo khepanke etthu yoonanara. Etthu epankaaya omusoma Biblya, waalaleera atthu akina, ni orowa omithukumanoni na asinna akina. Ni asinna awo annavirelela oheerela eparte nyaha sa epoliitika. Nnamweera esonttiwaka arumeyi ala oororomeleya a Muluku ennavirelela okhala oororomeleya *—yooniheraka weera khiyaavo eneera yaahiihe omuroromela waya Yehova. Mwaha woopaka eyo, ennaphwanya ohakalala!

² Nyuwo apaale mohinta woona ifootu sa asinna oolipa murima enviriha osonttiwa, apaale tho nyuwo mohoonelela weera asinna ala enkhumela ni ithoni soohakalala. Awo ankhumela etheyaka hiiha, mwaha wooweera aasuwela weera Yehova ori oohakalala naawo mwaha woororomeleya waya. (1 Sow. 29:17a) Yesu ohimme ha: “Òreriwa yale òsondiwa niwoko na exariya . . . Hakalalani ni tthapani, niwoko nlivo nanyu nri ntokotoko.”—Math. 5:10-12.

3. Moovarihana ni Miteko 4:19, 20 arummwa yaakhunle hayi yeereliwakaru ehiye olaleya ni mwaha wa heeni yaakhunlaaya hiiho?

³ Etthu enweereela asinna ni asirokora ala enoolikana niile yaaweerenle arummwa emaara yeeyo awo yaavirihaaya maxupo mwaha woolaleya voohima sa Yesu. Ikwaha sintxipale aphuki a etripunaale etokweene ya aYuda “yàhàlamula [arummwa] wera ehilaleye nari ehihusihe mwa nsina na Yesu.” (Mit. 4:18; 5:27, 28, 40) Vano arummwa ale yakhunle hayi? (Mmusome Miteko 4:19, 20.) Yuulumaka mwa nsina na arummwa ootheene, Pedru ni Yohani moolipa murima yenre weera enrowa omwiiwelela toko Muluku waapwaha anamaphukela ale. Masu aya ala yaahoonihera tthiri weera yanvirelela wuuluma voohima sa Yesu. Awo yaakhala ntoko yaaweerenle ha anamaphukela ale: ‘Nyuwo munhima weera malamulo anyu toopwaha malamulu a Muluku?’ Awo yaakhunle hiihaale mwaha wooweera mutthu orinono olamulela otokweene waapwaha atthu ale ‘ahalamulasa weera elalerye muloko wa atthu ni weera ehelele onamoona’ voohima sa Yesu.—Mit. 10:42.

4. Moovarihana ni Miteko 5:27-29 ntakihero heeni arummwa enihiyenraaya hiyo makristu nintthuneyaahu otakiha?

⁴ Arummwa ahaahiyera ntakihero nooreera makristu ootheene entthuneyaaya weera etakiheke, aani: “Entthuneyaxa omwìwelela Muluku wàpwaha atthu!” (Mmusome Miteko 5:27-29.) Ekhaikhai weera arummwa ale, yaaheepetthiwa mwaha wa ororomeleya waya, mene emaara yaakhummaaya otripunaale iwe wa aYuda, awo “yàvinya n’ohakalala vamaithoni va Esinedrio, niwoko yaphwaneliwa ohoxiwa niwoko na nsina [na Yesu]” ni avinyaka vaavale awo yaavirelela ovara muteko woolaleera.—Mit. 5:40-42.

5. Ninkela waakhula makoho heeni?

⁵ Moota arummwa ale yaakhunlaaya pooti oniwiihera makoho ntoko ala: Moota heeni arummwa ale yeeraya emwiiweleleke Muluku ntoko namalamulela waapwaha atthu ni emaara emoha-moharu “owiiwelela atthu anlamulela”? (Arom. 13:1) Ninkela “wiiwelela moota heeni iguvernu ni anamalamulela” ntoko  hiihaale murummwa Paulo uulummaawe ni emaara emoha-moharu ovirelela okhala oororomeleya wa Namalamulela ahu Namusulú, Yehova?—Tito 3:1.

6. (a) ‘Anamalamulela’ heeni ahimmwale va Aroma 13:1 ni ninkela woonihera hayi weera ninnawiiwelela? (b) Owera heeni iguvernu sootheene sa atthu iraayano?

⁶ Mmusome Aroma 13:1. Masu ala oweera “atthu anlamulela” va eversu ela, sihimmwa iguvernu sa atthu irinono owera woowaalamulela atthu akina. Makristu entthuneya weera ewiiweleleke anamalamulela ala a iguvernu. Woona weera iguvernu iyo sinnavaha malamulo ni miruku mulaponi, ni ikwaha ikina iguvernu iyo sinnaakosoopa atthu a Muluku. (Apok. 12:16) Ti vawooto vantthuneyaaya weera hiyo nliveke musonkho neve niwoonihereke nttittimiho nenno anamalamulela antthunaaya. (Arom. 13:7) Nnamweera vareene hiiho, anamalamulela a mulaponi erinono owera iwo mwaha wooweera Yehova onnakhulela. Yesu ahoonihera eyo vaavo aakohakohiwaawe ni Ponsio Pilatu guvernadori oRoma. Emaara Pilatu ahimmaawe weera ookhalano owerya womutaphuliha Yesu ni owerya womuthomeiha vamwirini va nihahaxero, Yesu waakhula enre: “Weyo khorino owerya nari vakhanene ni miyo, wahavahiwe osulú.” (Yoh. 19:11) Ntoko Pilatu, olamulelo wootheene wa iguvernu sa epoliitika wookhalano mpika.

7. Emaara heeni nihintthuneyaahu wiiwelela iguvernu sa atthu, ni iguvernu iya sintthuneya weera suupuweleleke eheeni?

⁷ Makristu enniiwelela malamulo a iguvernu sa atthu wakhala weera malamulo awo a iguvernu khenvirikanyiha malamulo a Muluku. Mene hiyo khontthuneya owiiwelela atthu wakhala weera annanivekela opaka etthu Muluku onkhottihaawe naari yaanikhoottiheraka opaka etthu Muluku onnivekelaawe opaka. Mwa ntakihero, awo pooti oneerela weera nivareke muteko weetoropa. * Apaale iguvernu pooti omukhoottiha Biblya ahu, iliivuru sahu, muteko ahu woolaleera ni mpaka mithukumano sahu. Iguvernu sahivarihelaka nnene owera evahiwaaya ni Muluku, enaattharatthara makristu, iguvernu iyo inimwaakhula vamaithoni wa Muluku mwaha wooweera Muluku onnoona itthu sootheene awo ampakaaya!—Koh. 5:7 [5:8, NM].

8. Ovirikana heeni okhanle variyari va masu oweera “atthu anlamulela” ni “Namusulú” ni mwaha wa heeni eyo eraaya yootthuneya osuwela?

⁸ Masu oweera “atthu anlamulela” entaphulela “okhalano otokweene, oreera, etthu etokweene.” Mene masu ala khentaphulela “okhalano otokweenexa, oreera opwahaxa, etthu etokweenexa,” mene masu ala entaphulela masu makina ooweera—“Namusulú”. Nnamweera iguvernu sa atthu sitthaniwaka “atthu anlamulela” ookhala mutthu orinono owera wootheene, aani, owo ori—Namusulú. Mbiblyani, Yehova onniitthaniwa “Namusulú” ikwaha ixexe.—Dan. 7:18, 22, 25, 27.

9. Mprofeti Daniyeli moolohani mwawe onne eheeni?

⁹ Mprofeti Daniyeli moolohani mwawe ahoona itthu sintxipale soonihera weera Yehova orinono owera woohimala waapwaha atthu ootheene. Woopatxerani, Daniyeli onne inama itokweene seiyo, aani, inama seiyo sinthonyera ipotencia sa elapo yootheene sa khalayi—Babilonia, Medo-Persia, Gresia, Roma ni epotencia ya mahiku ahu ala, Anglo-Americana. (Dan. 7:1-3, 17) Nto Daniyeli amoona Yehova akilathiyeene vahitxeni omukotthani naari neere otripunaale wiirimu. (Dan. 7:9, 10) Etthu onnaawe mprofeti ole  muhoolo mwaya, ohima ekhaikhai othoonyiheriwa iguvernu sa mahikwaano etthu enkela oweereela.

10. Moovarihana ni Daniyeli 7:13, 14, 27, Yehova onanvaha taani owera elapo ya vathi ni etthu eyo enoonihera eheeni voohima sa Yehova?

¹⁰ Mmusome Daniyeli 7:13, 14, 27. Muluku onnawaakha anamalamulela naari neere iguvernu sa atthu owera araayano woolamulela ni onnaavaha olamulela iwo atthu akina amphwanelela ni erinono owera otokotoko. Onanvaha taani? Aani owera iwo onvahiwa mutthu “ntoko mwana a mutthu,” Yesu kristu vamoha ni “ottela a Namusulú” 144.000 makristu othanliwa yaawo enkela olamulela “wa mahiku othene”. (Dan. 7:18) Va khuwaavoovo ohovela weera Yehova Namusulú, mwaha wooweera Yehova paahi orinono owera woopaka eyo.

11. Daniyeli olempe eheeni enoonihera weera Yehova Namusulú?

¹¹ Soolohera iya Daniyeli onnaawe sinnaakhulela ele owo ahimmaawe. Owo ahimme weera Yehova, “Muluku a wirimu”, “ti yowo ònakumiha ni onàkhaliha mamwene.” Nave tho owo olempe ha: “Namusulú t’onlamulela momweneni mwa atthu, yowo onawerya onvaha yole onamutthunaiye.” (Dan. 2:19-21; 4:14 [4:17, NM]) Neereke Yehova ohinta omukumiha mutthu voomweneni ananvaha mutthu mukina? Aani, ohinta!

12. Muhime ikwaha Yehova awaakhiyaawe omwene mamwene akhalayi. (Nwehe efootu.)

¹² Yehova ohoonihera weera owo Namusulú waapwaha “atthu anlamulela.” Ninkela woona matakihero mararu enoonihera weera Yehova ohinta omukumiha mwene voomweneni vawe. Farawo ahaapaka akaporo arumeyi a Yehova wi Xipitu ni mwa ikwaha sintxipale owo annakhootta waataphula mookaporoni. Mene Yehova ahaataphula atthu awe ni aheeriha weera Farawo akhwe mphareya mooxeera. (Ott. 14:26-28; Nsal. 136:15) Mwene oBabilonia Balthazari àhatterekhela yotxa etokotoko ni “ahivuwiha [avirikanyihaka] Apwiya a wirimu” ni avuwiha “miluku sa epratha ni etxikukhu” ohiyaka onvuwiha Yehova. (Dan. 5:22, 23) Mene Muluku amukuruxela vathi mulopwana ole owiikuxa. “Ohiyu ene yole” Balthazari ahiviwa ni omwene awe yahinnyereriwa Amedia oPersia. (Dan. 5:28, 30, 6:1 [5:28, 30, 31, NM]) Mwene Herodi Agripa I, oPalestina, amwiiva murummwa Yakobe ni aawera omutthukela murummwa Pedru ni yootthuna weera amwiive, mene Yehova khaakhulenle weera  Herodi apake etthu eyo. “Ntxelo a Muluku àmmana Herodi”, ni owo ahookhwa.—Mit. 12:1-5, 21-23.

13. Nvahe ntakihero na moota Yehova anyannyaawe igrupu sootheene sa maloko.

¹³ Yehova tho ohoonihera weera owo Namusulú emaara yeeyo, awannaawe ni igrupu naari ovarihana wa mamwene. Yehova awaakiha Ana a Israeli aavahaka ikuru mpaka owina egrupu ya mamwene 31 oKanani ni oweera okuxa elapo yoohiyeriwa. (Yeh. 11:4-6, 20; 12:1, 7, 24) Nave Yehova anwina moowuuliha muru mwene Beni Hadadi ni mwamwene 32 makina a wAsiria yaawo yaawana ni Israeli.—1 Mam. 20:1, 26-29.

14-15. (a) Nabukhodonosori ni Dario ehimme eheeni voohima sa Omwene wa Yehova? (b) Nasalmu ohimme eheeni voohima sa Yehova ni voohima sa muloko awe?

¹⁴ Yehova ohoonihera ikwaha sintxipale weera owo Namusulú! Etempu Nabukhodonosori mwene oBabilonia isunnuwihaawe ni uulummaawe voohima sa ‘ikuru sawe, owera wawe, ohano ni ovuwa’ ahiyaka onvuwiha Yehova yoowo omphwanela okokhoreliwa, Yehova aheeriha weera owo akhale naanepa. Nabukhodonosori alamakaru anvuwiha Namusulú nave ahaakhulela weera Yehova otokweene awe ti otokweene woohimala. Owo enre: “khavo onavilela ntata nawe.” (Dan. 4:27, 30-32 [4:30, 33-35, NM]) Nroromelo na Daniyeli neereriwakaru ni Yehova anvuluxakaru mulittini mwaakharamu, mwene Dario avaha nlamulo nna: “Atthu othene ethukumele ni yòve oholo wa Muluku a Daniyeli. Owo ti Muluku mukumi onakhala wa mahiku othene: omwen’awe khontoloxiwa ni otokwene awe khomala.”—Dan. 6:8-11, 20-23, 27, 28 [6:7-10, 19-22, 26, 27, enoota ya NM].

¹⁵ Nasalmu olempe ha: “Yahvéh onnìntaka mukwaha wa miloko ni onnatapanya myupuwelo sa amalapo.” “Noreriwa ti nihimo nle Yahvéh okhanle Muluku aya. Anyi, muloko othanliwe ni Muluku ntoko sohiyeriwa sawe.” (Nsal. 33:10, 12) Mwekhaikhai ela etthu enneeriha okhala oororomeleya wa Yehova!

16. Yehova onkela opaka eheeni mpuwa wa “maxupu matokweene”? Ni onkela opaka eyo mwaha wa heeni? (Nwehe efootu.)

¹⁶ Hiyo noosoma etthu Yehova apankaawe khalayi. Vano Yehova onkela opaka eheeni muhoolo? Hiyo nroromeleke weera “mpuwa mwa maxupu matokweene” Yehova onookela waavuluxa arumeyi awe, aani, maxupo yaawo enera ephiye moohipisa va. (Math. 24:21; Dan. 12:1) Yehova onkela waavuluxa arumeyi awe vaavo egrupu ya maloko yaayo Biblya onitthanaawe Agogi ni Amagogi enrowaaya waatuphela atthu a Muluku elapo yootheene. Nnamweera egrupu eyo ya maloko ehelaka mpuwa ilapo 193 sootheene sineerela eparti Nações Unidas, ilapo iyo khasinrowa olikana naari mano Nnamusulú ni anakhotto awe awiirimu! Yehova olaihenre ha: “Vavale miyo kinrowa winnuwiha, witteliha ni wisoneiha vamaithoni va miloko sintxipale, ni seiyo sini sisuwele wi miyo kà Yahvéh.”—Ez. 38:14-16, 23; Nsal. 46:10.

17. Biblya enre weera mamwene a velaponi ni atthu ooromeleya a Yehova enkela waakhumelela eheeni?

¹⁷ Otuphela wa Gogi onkela otannyera ekhotto yoomalihera ya Harmagedoni, ekhotto ene yeela nto, Yehova onkelaawewo wanyanya “mamwene a velaponi”. (Apok. 16:14, 16; 19:19-21) Nto enrowa ohala ta ‘anaxariya ekhalaka elapo ya vathi ni atthu oororomeleya enekhalemo.’—Mir. 2:21, enoota.

18. Ovinyera khalayi makristu ekhaikhai enlakela opaka eheeni, ni mwaha wa heeni? (Daniyeli 3:28)

¹⁸ Okhuma khalayi makristu ekhaikhai yaaleva ni annaleva otaphuwa ni ekumi aya mwaha woomusivela waya Yehova, yoowo ori Namalamulela aya Namusulú. Awo toororomeleya ntoko aHeberi ale araru yavuluxinwe munttukutthani mwa moro mwaha woomwiiwelela Namusulú.—Mmusome Daniyeli 3:28.

19. Moovarihana ni Nsalmu 7:9 [7:8, NM] Yehova onkela ophukela hayi muloko awe, ni eheeni hiyo nintthuneyaahu opaka ninano va?

¹⁹ Davidi aalepa tho voohima sa otthuneya waya okhala oororomeleya wa Muluku: Yahvéh, nyuwo muthorihenle miloko sa atthu. Haya mukithorihele miyo, “Yahvéh, movarihana ni oloka ni ohittheka [ororomeleya] waka, ori ni miyo.” (Nsal. 7:9 [7:8, NM]) Owo tho olempe ha: “Orera murima ni oloka okisunke.” (Nsal. 25:21) Moota wookhala nnene ori okhala mutthu oororomeleya wa Yehova nihihiyaka okhala oororomeleya wa yoowo pooti enikhumelelaka maxupo! Napaka eyo ninkela woona moota mmoharu onenlaiye Nasalmu yoowo olempe: “Òreriwa yale ari oororomeleya . . . , ni anèttela ikano sa Yahvéh.”—Nsal. 119:1, enoota.