1. Atthu antxipale anoolela hayi miruku sa mBiblyani? (Miruku 1:20, 21)

 ILAPO ikina ti wookhweya owoona anamaleela ehakalanleene eviraka mmuseweni yaavahaka atthu iliivuru. Neereke nyuwo mootoko olaaleera hiiho? Mwa yeeyo pooti weera nyuwo mwaahuupuwela itthu simphwanyeya eliivuru ya Miruku—miruku sinnakhuwela mmuseweni weera atthu yiiwe. (Mmusome Miruku 1:20, 21.) Mbiblyani ni iliivuru sahu ninnaphwanya “miruku seekhaikhai”—miruku sinkhuma wa Yehova. Seiyo atthu antthuneyaaya okhalano weera ephwanye ekumi yoohimala. Ninnahakalala vaavo mutthu onaakhelaawe iliivuru sahu nave-tho ninnaxupeya vaavo atthu akina ahintthunaaya wiiwa ele Biblya onhimaawe. Atthu akina annantheya yuupuwelaka weera Bibya eliivuru yakhalayi. Ni akina annavaanyiha ele Biblya onhimaawe sa okhala nnene, ehimaka weera ale antthara sooxuttiha sa Biblya toolipa ni annaisona okhala ootthuneya waapwaha atthu akina. Nnaamweera vareene hiiho, miruku sa Yehova sinnavirelela okhala mapuro ootheene, ni owo ompaka eyo mwa nsivelo.

2. Simphwanyeya woowini miruku seekhaikhai olelo va, ni atthu akina anoonela hayi?

² Moota Yehova osarihaawe miruku sawe olelo va, ori moorwela wa masu awe Biblya. Atthu antxipale a elapo yootheene pooti owera okhalano Biblya. Ankha woohima sa iliivuru  sahu sinkhuma mBiblyani? Mwaha wa mareeliho a Yehova, iyo sinnataphuleliwa ni muulumo anipwaha 1.000. Ale anisoma ni enavarela muteko ele ansomaaya annakhumela nnene. Mene atthu antxipale annathanla wiiwelela miruku iyo seekhaikhai. Yaapakaka soothanla saya aniiroromela muneenaaya naari anaaroromela atthu akina. Atthu akina anoona weera khannaapwattha, mwaha wooweera ninnapaka soothanla nimuttharaka Biblya ele ohimaawe. Mwa yoosoma ela ninkela woona mwaha wa heeni atthu anuupuwelaaya hiiho. Nihinaakuve, nnoorowa woona moota wookhalano miruku sinkhuma wa Yehova.

3. Nnoonihera hayi miruku seekhaikhai?

³ Biblya oneera: “Omova Yahvéh erimarima ya miruku, omusuwela ottela ti wiwamo khuluwi.” (Mir. 9:10) Miruku seekhaikhai, sinhela mpuwa ovarela muteko ele nixuttenraahu weera nipake soothanla sooreera, mene ninnoonihera weera nookhalano osuwela weekhaikhai vaavo ‘nimmusuwelaahu ootteela’, naari neere vaavo nnaasaahu osuwela moota Yehova onuupuwelaawe nihinaakuve opaka yoothanla yootthuneya. Nnoowerera opaka eyo noonaka ele Biblya ni iliivuru sahu sinhimaaya. Napakaka eyo, ninnoonihera miruku seekhaikhai.—Mir. 2:5-7.

4. Eheeni Yehova paahi ophwanenlaawe oonivaha miruku seekhaikhai?

⁴ Yehova paahi meekhawe toneera anivahe osuwela weekhaikhai. (Arom. 16:27) Mwaha wa heeni? Yoopatxera, mwaha wooweera Yehova mpattuxa ni oosuwela itthu soothesene owo opattunxaawe. (Nsal. 104:24) Ya naaveli, itthu soothesene Yehova ompakaawe onoonihera weera owo toosuwela. (Arom. 11:33) Yanaararu, mutthu onvarela muteko miruku sa Yehova onnakhavihereya. (Mir. 2:10-12) Naatthunaka miruku iyo seekhaikhai, nintthuneya waakhulela ni ohiya seettihaka soothanla sahu ni soopaka sahu.

5. Atthu yaahasaka miruku sa Yehova ti heeni enkhumelela?

⁵ Atthu antxipale nnaphwanyaahu moolaleerani, annaakhulelela weera mukhalelo wa elapo ti wootikiniha, mene khaanakhulela weera ookhala Mpattuxa, awo anoona weera itthu siroothatuwa. Atthu akina anahima weera annamuroromela Muluku, mene enuupuwela weera malamulo awe ari mBiblyani takhalayi, nto annathanla opaka itthu ntoko antthunaaya. Vanonto enkhumelela eheeni? Neereke mulaponi sinnakhumelela itthu sooreera mwaha wooweera atthu annaroromelana naari ororomela osuwela waya? Neereke aaphwanya ohakalala weekhaikhai naari aakhalano yooweherera yoovareleleya ya muhoolo? Oweha itthu sinnirukurera nnimwaakhulela ekhaikhai ela: “Oholo wa Yahvéh sinnamala miruku, ninnamala iseru ni sinnamala ikano.” (Mir. 21:30) Eyo ennanooperera ovirelela waasa miruku sa Yehova! Mooripiha murima atthu antxipale khaanuupuwela hiiho. Mwaha wa heeni?

6. Moovarihana ni Miruku 1:22-25, taani ahiniiwelela miruku seekhaikhai?

⁶ Atthu antxipale khaaniiwelela miruku seekhaikhai “saakhuwelaka mphironi”. Moovarihana ni Biblya sookhala igrupu tthaaru sinkhootta miruku seekhaikhai: “masikini”, “anamaveha” ni “alolo”. (Mmusome Miruku 1:22-25.) Mwa yeeyo, nnokela woona mikhalelo sinweeriha atthu awo okhootta  miruku sa Muluku, ni etthu nneeraahu nipake weera nihikhale ntoko yaawo.

7. Mwaha wa heeni akina anvirelelaaya okhala “masikini”?

⁷ Egrupu yoopatxera “masikini,” tiyaale anaakhulela itthu sootheene ni ookhweya owokiwa. (Mir. 14:15, enoota.) Ikwaha sintxipale nninnaaphwanya atthu moota owo naalaleeraka. Mwa ntakihero, nkawuupuweleni atthu antxipale anwokiwa ni anamahoolela a ittiini ni a ipoliitika. Atthu akina annaxupeya yoonelela weera aroowokiwa ni anamahoolela awo. Mene atthu anthalihiwa va Miruku 1:22 annathanla ovirelela okhala masikini ehisuwelaka ekhaikhai. (Yer. 5:31) Awo onnasivela opaka itthu antthunaaya, khampwattha ele Biblya onhimaawe naari wiiweelala malamulo awe. Atthu antxipale anuupuwela ntoko athiyana amoha oQuebec, oCanadá, yaawo yaamweerenle namoona a Yehova mmoha: “Mohooleli ahu aaniwonkeene nthowa ti nawawe khaiyene nawihu!” Hiyo khanintthuna okhala ntoko yaale antthuna ovirelela okhala moowokiwani!—Mir. 1:32; 27:12.

8. Eheeni enrowa onikhavihera okhala ookhomaala mmukhalelo wa omunepani?

⁸ Khaiyene ti wa mahala Biblya onoopereraawe weera ‘nikhaleke atokwene moota nniwexexaahu itthu’. (1 Akor. 14:20) Hiyo ninnakhala ookhomaala mmukhalelo wa omunepani naavarelaka muteko malamulo a mBiblyani mweekumini mwahu. Vakhani-vakhani, nnamoonelela mwaneenaahu weera malamulo awo annanikhavihera osepa maxupo ni annanikhavihera opaka soothanla sooreera. Hiyo nnoonela hayi etthu eyo? Naamusomaka Biblya okhuma khalayi ni woonela mithukumano, waamureerela wuupuwela etthu ennikhoottihera opaka matxentxo weera niivaherere wa Yehova ni obatiziwa. Naabatiziweene pooti wiipakela makoho ala: ninnakela vahoolo muteko woolaleera ni wooxuttiha mitthenka sooreera? Soothanla sahu sinnoonihera weera ninnettihiwa ni malamulo a mBiblyani? Ninnoonihera mikhalelo sa ekristu naakhalaka ni atthu akina? Noonelela weera ninatthuneya opaka matxentxo, ninatthuneya wiiwexexa sooxuttiha sa Yehova “simmutatuxa ohisuwela akhala musuweli.”—Nsal. 19:7

9. Moota heeni “anamaveha” anooniheraaya weera annakhootta miruku sa Yehova?

⁹ Egrupu ya naaveli enkhootta miruku sa Muluku “anamaveha.” Ikwaha ikina ninnaphwanya atthu moota owo naalaleeraka. Awo waasivela waaveha akhwaaya. (Nsal. 123:4) Biblya aahima varatxiru weera mahiku oomalihera yaamukhala anamaveeha antxipale. (2 Ped. 3:3, 4) Ntoko hiihaale yahaakhulenlaaya asikamwene a naxariya Lothi, atthu akina olelo va, khaanaakhulela itthu Muluku onhimaawe. (Eph. 19:14) Atthu antxipale olelo va annaaveha yaale enkhala moovarihana ni malamulo a Biblya. Awo aneettihiwa ni “mikhalelo saya soonanara,” naari ni mikhalelo sihinamusivela Muluku. (Yuda 7, 17, 18) Itthu Biblya onahimaawe woohima sa anamaveha, sinnavarihana nnene ni itthu anipakaaya anamavanyiha ni atthu akina ankhootta omwiiwelela Yehova!

10. Moovarihana ni Nsalmu 1:1, moota heeni nneeraahu naasepeke anamavanyiha?

¹⁰ Naahikosopa pooti okhalano mukhalelo wa anamavanyiha. Nnasepe hayi mukhalelo ola? Moota woosepa mukhalelo owo ori waasepa anamavanyiha. (Mmusome Nsalmu 1:1.) Eyo entaphulela ohawiriyana naari ohisoma iliivuru sa anamavanyiha. Mootoko ohovela miruku nnaakhelaahu wa Yehova ni mareherero awe? Weera musepe eyo,  onnatthuneya wiikoha ha: ‘Keereke kinnahovela wakhala weera noohaakhela miruku minyowani naari yoothaliha ekina? Keereke kinnasaasa soottheka sa ale anhoolela?’ Nareherera mukhalelo ola etthu eyo enoomuhakalaliha Yehova.—Mir. 3:34, 35.

11. “Alolo” anoonela hayi malamulo a Yehova?

¹¹ Egrupu ya naararu enkhootta miruku sa Muluku “alolo.” Awo alolo mwaha wooweera annakootta okhala moovarihana ni malamulo a Muluku. Ampaka itthu anoonaaya oreera vamaithoni vaya. (Mir. 12:15) Mwaha wa yeeyo, awo annamukhoottha Yehova yoowo ori mathipelo a miruku. (Nsal. 53:1) Naalaleeraka, awo annanuuluma moohirerela mwaha woottittimiha malamulo a mBiblyani. Mene awo khaanono etthu yooreera weera enivahe. Biblya oneera: “Miruku mwako woowalamela vamaithoni va mulolo, khahula iyano sawe omulattuni.” (Mir. 24:7) Yoolepa ela enoonihera weera alolo khanwera ovaha miruku sooreera. Khaninttikhina masu Yehova onanleelawe weera ‘omusepe nemwanomwano’!—Mir. 14:7.

12. Eheeni enrowa onikhavihera ohikhala ntoko alolo?

¹² Moovirikana naale aniitta miruku sa Muluku, hiyo sinnansivela miruku sa Muluku, ohela mpuwa malamulo awe. Hiyo ninnalipiha nsivelo nno, niwehaka ovirikana okhanle wa ale ammwiiwelela Yehova ni ale ahimmwiiwelela. Moone maxupo anakhumelela atthu mwaha woohitthara miruku sa Muluku. Ni muupuwele moota ekumi anyu eraaya yooreera mwaha woomwiiwelela Yehova.—Nsal. 32:8, 10.

13. Neereke Yehova onnanyeserera waakhulela miruku sawe?

¹³ Yehova onnaavaha osuwela atthu ootheene, owo khamunyeserera mutthu waakhulela. Mene onnahima itthu sinkhumelela wakhala weera ninnakhootta miruku sawe. (Mir. 1:29-32) Ale anthanla ohimwiiwelela Yehova “eni etxe sowima sa iphiro saya.” Animoona ovoreya mweekumini mwaya, ohaawa, ni okhwipi waya onyanyiwa. Mene nto ale ammwiiwelela annatthuneya oweherera. Mwaha wooweera Miruku 1:33 ohaalaihera ale aniiwa miruku sa Yehova ni ovarela muteko eeraka: “Koma ole onakiwiriyana anakhale ni witthala, apuhaka ni ahovaka etthu yonanara.”

14-15. Ninxuttera eheeni ni Miruku 4:23?

¹⁴ Ovarela muteko miruku sa Yehova mutthu onnaakhela mareeliho. Ntoko noonaahu, Yehova onnawiitthanela miruku sawe atthu ootheene. Mwa ntakihero, eliivuru ya Miruku, Yehova onnanivaha miruku sootthuneya otthara ni sinvareleya muteko. Ninrowa woona matakihero maxexe.

¹⁵ Okosoopa murima. Biblya oneera: “Makamaka owehexexe murim’á, wona wi  ti mwemmo enkhumaya’mo ekumi.” (Mir. 4:23) Muupuwele etthu entthuneya mutthu opaka weera mutthu akosoope murima wa weerutthuni. Onnatthuneya otxa yootxa yooreera, opaka exercício ni osepa itthu seera inanarihe ekumi ahu. Etthu emoha-moharu tho ennatthuneya ni opaka ni muupuwelo ahu. Mahiku ootheene onnatthuneya omusoma Biblya, orowela mithukumano ni olaleera. Wakhala weera ninnailipihera olaleera, nneereke osepa itthu seera inanarihe mukhalelo ahu wa omunepani. Nsepaka opaka itthu seera sinanarihe muupuwelo ahu, ntoko matthekulelo oonanara, ni asinthamwene oohireerela.

16. Mwaha wa heeni yoolepa ya Miruku 23:4, 5 envareleyaaya muteko wa hiyo olelo va?

¹⁶ Muhakalaleke ni itthu muraanyuno. Biblya onnavaha miruku eeraka: “Muhetetele muhakhu. . . . Niwoko yonakaru maitho á mihakhu, sinolakaseya vohilekela, sivavelaka wirimu ottaiwene ntoko xaka.” (Mir. 23:4, 5) Khiyaavo ethoonyera weera musurukhu onnalekela. Nnaamweera vaareene hiiho, olelo va ninnawoona anamuhakhu ni atthu oohaawa yaasaseraka musurukhu. Ti yeeyo enaweeriha opaka itthu sinnanariha nsina naya, makhalelo aya ni mpaka ekumi aya. (Mir. 28:20; 1 Tim. 6:9, 10) Miruku sinnanikhavihera okhalano moonelo wooreera woohima sa musurukhu. Etthu eyo ennanikosoopa woohima sa wiitthuna, ni ennaneeriha ohakalala ni itthu nraahuno.—Koh. 7:12.

17. Nnikhaleno hayi “nlumi na asuweli” ninthalihiwa va Miruku 12:18?

¹⁷ Muupuwele muhinaakuve wuuluma. Naahikosoope, hiyo pooti onanariha itthu sintxipale ni itthu nnuulumaahu. Biblya oneera: “Muhorahora onetha ntoko mwalo, nto nlumi na anaxariya ninalamiha.” (Mir. 12:18) Nnookhalano muretthele vaavo nihinuulumaahu soottheka sa atthu akina. (Mir. 20:19) Weera masu ahu elamiheke ohiya ovulaliha, murimaahu ontthuneya okhalano osuwela wa masu a Muluku. (Luka 6:45) Nuupuwelaka itthu Biblya onhimaawe, masu ahu anookhala  “naattuttu a iseru” naalipihaka atthu akina.—Mir. 18:4.

18. Miruku 24:6 onnikhavihera hayi okhumela nnene mmutekoni woolaleera?

¹⁸ Nitthareke miruku. Biblya onnavaha miruku sinkhavihera mweekumini eeraka “Niwoko ekhotto ennawaniwa ni miruku ni ennakuphiwa ni mapwattapwattha mantxipale.” (Mir. 24:6, enoota.) Moone moota miruku iya sineeraya sookhavihereni okhumela nnene mmutekoni moolaleera ni oxuttiha. Ohiya otthara miruku sanyu mwaalaleeraka, munoonela hayi otthara miruku nnakhelaahu omithukumanoni? Omithukumanoni iwo ninnaxuttihiwa ni nyaha ni soowonihera simpakiwa ni asinna arinono sookumanano. Opwaha mwa yeeyo, mareherero a Yehova annanivaha ikharuma soovareleya muteko—ntoko iliivuru ni iviidiyu—seiyo sinnikhavihera omwiiwexexa Biblya. Nyuwo munnavarela muteko nnene ikaruma iya?

19. Munoonela hayi miruku onvahaawe Yehova? (Miruku 3:13-18)

¹⁹ Mmusome Miruku 3:13-18. Ninneera asantte mwaha wa miruku sooreera nimphwanyaahu mBiblyani! Ekumi ahu yaarowa okhala hayi sahaakhanle miruku iyo? Yoosomeene yeela noohoona matakihero oovareleya muteko a osuwela ephwanyeya eliivuru ya Miruku. Onooneya weera Yehova oohela miruku sawe mBiblyani. Nintthuneya ovarela muteko miruku sawe mahiku ootheene a mweekumini mwahu. Atthu antxipale khanvarela muteko miruku sa Muluku, mene hiyo ninnaroromela weera “oreriwa mutthu ophwnye miruku.”