MWAHA ONTHOKORORIWA 44
Mulipihe yooweherera anyu
“Yoweherera aka ti nyuwo [Yehova].”—NSAL. 71:5.
ETXIPO 144 Nuupuweleke Etthuvo ya Muhoolo!
ELE NINKELA AHU OXUTTERA *
1. Yooweherera heeni Yehova onivanhaiye?
YEHOVA oonivaha yooweherera yooreera ya ekumi yoohimala. Akina ankela waakhela ekumi eyo yoohimala wiirimu. (1 Akor. 15:50, 53) Atthu akina anrowa waakhela ekumi eyo yoohimala elapo ela ya vathi ni animwaakhela ekumi yooreera ni yoohakalaliha. (Apok. 21:3, 4) Yooweherera ahu ti yootepa otthuneya wa hiyo, nihipwatthaka yaari wa wiirimu naari ya elapo ya vathi.
2. Yooweherera ahu enrweela woowiini ni mwaha wa heeni ninhimaahu hiiho?
2 Mbiblyani masu oowera “yooweherera” pooti otaphulela itthu sooreera sinkela weereya. Hiyo ninnaweherera “itthu sooreera sinkela weeraya muhoolo” mwaha wooweera sinkhuma wa Yehova. (Arom. 15:13) Hiyo noosuwela itthu Yehova oleihenraawe, ni noosuwela weera onookwanihera itthu soothesene onlaihenrawe. (Nam. 23:19) Nto ninnaroromela weera Yehova onnatthuna ni onoorowa opaka itthu soothesene olaihenraawe weera anoopaka. Yooweherera ahu khenrwela mwa itthu soowotha, mene mwa itthu seekhaikhai.
3. Eheeni ninkelaahu woona mwa yoosomeene yeela? (Nsalmu 71:5)
3 Tiitha ahu a wiirimu onnasivela ni ontthuna weera nimuroromeleke. (Mmusome Nsalmu 71:5.) Etempu nimmuroromelaahu Yehova, yooweherera ahu ennalipa ni ninnawera ovilela maxupo ni olipa murima niwehereraka ni ohakalala itthu sinrowa weereya muhoolo. Nto mwa yoosoma ela, nnookela woona moota yooweherera ennikosoopaaya. Yoopatxera ninkela woona weera yooweherera enoolikana ni nankura vamoha ni ekapasete. Naxuttera etthu eyo, nnookela woona moota nneraahu nilipihe yooweherera ahu.
YOOWEHERERA AHU ENLIKANA NI NANKURA
4. Wa moota heeni yooweherera enlikanaaya ni nankura? (Aheberi 6:19)
4 Mwa ekaarta awe alepenlaawe aHeberi, murummwa Paulo alikanxera yooweherara ahu ni nankura. (Mmusome Aheberi 6:19.) Owo wannamusivela weetta ekwaha anwenleene barku, ni aasuwela weera nankura annavareliwa muteko weera, amwaakihereke barku weera ahivavihiweke mookhweya. Ekwaha emoha etempu owo aaraawe mbarkuni, yaaphiya epheyo yootepa wuupa, owo annawoona ale yaamwettiha barku yavonyeraka anankura mmahini weera emwaakihere barku ole weera ahimane maluku. (Mit. 27:29, 39-41) Ntoko nankura onnamweeriha barku ohikuxiwa ni muteku teko wa maahi, yooweherera ahu tho ennanlipiha ni ennanakihera weera nihimuhiye Yehova. Mene ninnavavihiwa ntoko epheyo yaaniphwanyaka maxupo. Nto yooweherera ahu yoolipa ennanikhavihera yaaniphwanyaka maxupo ankhala ntoko epheyo mweekunini mwahu, mwaha wooweera ninnaroromela weera itthu sinoorowa oreera moohipisa. Ninnatthuneya wuupuwelela weera Yesu aahima weera naahereke osonttiwa. (Yoh. 15:20) Wuupuwelela ntthuvelo nraahuno na muhoolo, etthu eyo ennanikhavihera ovirelela onvarela muteko Yehova moororomeleya.
5. Moota heeni yooweherera yaamukhavihenraaya Yesu ovilala okhwa woovoreya?
5 Moone moota yooweherera yaamukhavihenraaya Yesu, ovirelela okhala oororomeleya nnamweera aasuwenle weera aamukela ohasuliwa ni okhwa moovoreya. Nihiku na pentekoste a 33 E.C., murummwa Pedru aathaliha eprofesiya ya Nsalmu yeeyo yaamuhima Yesu weera owo aakela okhala oomaala ni oororomeleya: “Niwoko weyo khohiya erutthu aka mmahiye nari khorwa otthunihera wera ottelá one eyunttelo onokisarihe ohakalala vamaithoni vá.” (Mit. 2:25-28; Nsal. 16:8-11) Nnamweera Yesu aasuwela weera aakela okhwa aakhalano yooweherera yoolipa yooweera Yehova amurowa onvinyereriha ni owotho amutthikela ohakalala vamoha ni Tiithawe a wiirimu.—Aheb. 12:2, 3.
6. Eheeni munna othalinhaiye woohima sa yooweherera?
6 Yooweherera ahu ennaakhavihera asinna antxipale ovilela. Moone ntakihero na munna Leonard Chinn, munna owo aakhala oororomeleya wInglaterra. Mpuwa mwa ekottho yoopatxera ya elapo yootheene, owo aatthukeliwa mwaha wookhottha orowa okhottoni nto owo atthukiwa mwa minyeeri miili okadeya solitariya ni aanyesereriwa ovara muteko wookhanyereriwa. Owo onnathaliha ariki: “Itthu kivirinhaaka sookikhavihera woona weera ninnatthuneya okhalano yooweherera weera nivelele maxupo. Mbiblyani nookhalamo ntakihero na Yesu, na arummwa, na maprofeti ni soolaihera sooreera sa mBiblya. Itthu soothesene iyo, sinnanaivaha yooweherera ya muhoolo ni sinnanivaha ikuru weera nivileleke maxupo.” Yooweherera yaari ntoko nankura wa Leonard, ni tho etthu eyo pooti okhala nankura wa hiyo.
7. Maxupo enkela olipiha moota heeni yooweherera ahu? (Aroma 5:3-5; Yakobe 1:12)
7 Emaara ninvirihaahu maxupo avinyaka nnoona moota Yehova onikhavihenraawe ninnaroromela weera owo onnanakhulela. Ni nasuwela weera owo onnanakhulela yoowoherera ahu ennavirelela okhala yoolipa. (Mmusome Aroma 5:3-5; Yakobe 1:12.) Nto mwaha wa yeeyo, yooweherera ahu ennakhala yoolipa opwaha emaara yeeyo neeraahu oxutteraru ekhaikhai. Satana ontthuna weera maxupo ahu enivalaveliheke, mene nnikhavihero na Yehova hiyo nnoowera oviriha maxupo awo.
YOOWEHERERA AHU ENLIKANA NI EKAPASETE
8. Moota heeni yooweherera enlikanaaya ni ekapasete? (1 Atesalonika 5:8)
8 Biblya onnalikanxera tho yooweherera ahu ni ekapasete. (Mmusome 1 Atesalonika 5:8.) Ekapasete ennakosoopa muru wa nakhotto aamaniwaka vale va muru ni mwiittani awe. Wa mukhalelo woomunepani hiyo nintthuneya okosoopa muupuwelo ahu ni mirakho sa Satana. Owo onneerera oniheya aneereraka ni sooweha ni miruku seiyo sinpakiwa weera inanarihe muupuwelo ahu. Ntoko hiihaale ekapasete ekosoopa aya muru wa nakhotto, na hiyo tho yooweherera ahu ennanikosoopa wa moota nnuupuwelaahu ni enikhaviheraka otthara malamulo a Yehova.
9. Eneereya eheeni mutthu aahikhalano yooweherera?
9 Yooweherera ahu ya okhalano ekumi yoohimala ennanikhavihera opaka itthu mwa miriku ni mooreera. Mene nahiya yooweherera ahu evukuwaka ni nahiya nivooleeliwaka ni miruku sa mulaponi, yooweherera ya okhalano ekumi yoohimala pooti okhala nto yooluluwaya yoorakamela. Nwehe ele yeereñye ni makristu akina yaakhala ecidade ya oKorinto. Awo yaayeleela yooweherera yootthuneya ya Muluku—aani yooweherera ya ovinyererihiwa atthu. (1 Akor. 15:12) Murummwa Paulo olempe weera ale ehinroromela yooweherera ya ovinyererihiwa atthu ookhwa, ankhala yeeraka siivaavaru. (1 Akor. 15:32) Mahikwaano atthu antxipale ehinakhulela soolaihera sa Muluku makhalelo aya enkhala ntoko weera nihiku ninkota oleloru vava, etthimakela itthu soopuhiha erutthu. Mene hiyo nri oovirikana. Hiyo ninnarorormela ele Muluku olaihenraawe muhoolo. Yooweherera ahu enkhala ntoko ekapasete, enkosoopa moota nnuupuwelaahu ni ennikhavihera ohisupuwela yeehuru, waakhanle weera nnuupuwela haawo namunanariha onthamwene nraahuno ni Yehova.—1 Akor. 15:33, 34.
10. Yooweherera ennikosoopa hayi weera nihikhaleno nyuupuwelo soonanara?
10 Atthu akina anhima weera khonwereya omusiveliha Yehova, mene yooweherera ennanikosoopa weera nuhuupuweleke hiiho. Mwa ntakihero, akina pooti wuupuwela ha: ‘Miyo nivali nkimuteko. Miyo nkinkela okhala vamoha ni atthu ale enkela waakhela ekumi yoohimala. Nkinwera okhala moovarihani ni malamulo a Muluku.’ Mene munnuupuwela taani uulume masu ntoko yaala ni Yobi? Aari nthamwene oowootha, Elifazi. Owo enre: “Mutthu taani ori ohittheka?” Ni muhoolo mwaya amwihimaka Muluku enre: “Òná! Muluku ahàroromela òttela awe, nari erimu kheri yottela vamaithoni vawe.” (Yobi 15:14, 15) Xi wootha heeni nno! Muupuwelo moota ola onkhuma wa—Satana. Ni onnapaka eyo mwaha wooweera oosuwela weera nyuwo muupuwelaka hiiha, yooweherera anyu enoovukuwa. Ti vanto mukhootteke muupuwelo ntoko ola ni nwehexexeke soolaihera sa Yehova. Muhihoveleke weera owo onnatthuna weera nyuwo mukhaleno ekumi yoohimala. Ni muroromeleke weera owo onimookhaviherani ophwanya yootthuna eyo.—1 Tim. 2:3, 4.
MULIPIHE YOOWEHERERA ANYU
11. Mwaha wa heeni nintthuneyaahu okhala oopixa murima niwehereraka etempu Muluku onkelaawe waakwanihera anatiri awe?
11 Khaiyene weera ikwaha sootheene vanookhweya okhalano yooweherera yoolipa. Eyo enneereya mwaha wooweera ninnakhulumuwa onweherera Yehova okwanihera ele olaihenraawe. Mene nintthuneya weera nuupuweleleke weera Yehova ta mahiku ootheene, ni moota onkontaraawe mahiku ti woovirikana nihiyo. (2 Ped. 3:8, 9) Yehova onookwanihera yootthuna awe mooreerela, apaale onkela okwanihera mwa moota nihintalaahu wuupuwelavo. Eheeni enkela onikhavihera okhalano yooweherera yoolipa niwehereraka moopixa murima etempu Muluku onkelaawe waakwanihera anatiri awe?—Yak. 5:7, 8.
12. Moovarihana ni Aheberi 11:1, 6 moota heeni yooweherera enlikanaaya ni nroromelo?
12 Biblya onnalikanxera yooweherera ni nroromelo nraahuno weera Yehova ookhala ni weera owo “onnalivela yale anamwàsa.” (Mmusome Aheberi 11:1, 6.) Naakhulelaka weera Yehova ookhala, nroromelo nahu nnimwaatxerereya weera owo onookwanihera itthu sootheene olaihenraawe. Nnoorowa olipiha yooweherera ahu wakhala weera nnoomwattamela Yehova, yoowo olaihera weera itthu sootheene ninwehereraahu inookwanela. Vano nrowe noone moota woolipiha onthamwene ahu ni Yehova ni okhalano yooweherera yoolipa.
Ovekela ni ophimelela onoonikhavihera okhalano yooweherera yoolipa (Nwehe eparagrafu 13-15) *
13. Ninkela omwattamela hayi Muluku?
13 Munvekeleke Yehova ni mmusomeke Biblya. Ekhaikhai weera khaninwera omoona Yehova, mene onnawereya omwattamela owo. Hiyo pooti owera wuuluma nuuwo moorweela munivekeloni nroromelaka weera owo onooniiwa. (Yer. 29:11, 12) Mene hiyo pooti wiiwa nsu na Muluku nimusomaka Biblya ni niphimelelaka ele ninsomaahu. Naasomaka vale moota Yehova akosompaawe arumeyi awe khalayi, nroromelo nahu ninnakhala noolipa. Itthu sootheene ilempwale mBiblyani “silempwé nthowa na nihusiho nahu, wera movilelani ni mohakalalihiwani mwa solempwa nikhaleno ororomela.”—Arom. 15:4.
14. Mwaha wa heeni varaaya vooreera waphimelela anatiri a Yehova akwanihenraawe?
14 Mphimeleleke moota Yehova akwanihenraawe anatiri awe. Nkuupuwelani etthu Muluku apakenlaawe Abrahamu ni Sara. Awo yaari asimookwaxa wahawereya ayavo vaavo okhalano mwaana. Nnamweera vareene hiiho, Yehova ahalaihera awo weera yammuyara mwaana. (Eph. 18:10) Mene tho Muluku alaihera etthu ekina. Biblya oneera: “anakhale nikholo na amalapo othene.” (Arom. 4:18) Naamwi vamaitho wa atthu yaari etthu yoohiwereya, Abrahamu annaroromela weera Yehova ammukwanihera natiri ammannaawe. Nroromelo na mulopwana ole oororomeleya khanaakhanle na siiyo. (Arom. 4:19-21) Sooweereya ntoko iya sinnanxuttiha weera Yehova onnakwanihera soolaihera sawe, nnamweera vamaithoni va atthu ereene etthu yoohiwereya.
15. Mwaha wa heeni nintthuneyaahu wuupuwelelaka itthu Yehova onipakenlaawe?
15 Muupuweleleke itthu Yehova oopakenlaaweni. Nkuupuwelani soolaihera sa mBiblyani sikwanihereñye mweekumi mwanyu. Mwa ntakihero, Yesu alaihera weera Atiitha awe yaamoovahani nyuwo etthu munhaweelaanyu weera mukhale mukumi. (Math. 6:32, 33) Nave tho Yesu aalaihera weera Yehova aamoovahani munepa awe wootteela mwavekela vale. (Luka 11:13) Yehova onnakwanihera soolaihera iya. Apaale nyuwo muneera muupuwelaka soolaihera ikina Yehova onkwaniheraawe mweekumini mwanyu. Owo olaihera weera ommoolevelelani, woomaalihani ni wootxihani yootxa ya omunepani. (Math. 6:14; 24:45; 2 Akor. 1:3) Ophimelela itthu sootheene Yehova oopakenlaaweni onoolipiha yooweherera anyu yooweera, owo onookwanihera ele olaiheraawe woopakelani nyuwo muhoolo.
MUHAKALALEKE MWAHA WOOKHALANO YOOWEHERERA
16. Mwaha wa heeni yooweherera ahu eraaya yoovaha ya vameekhaaya ya Yehova?
16 Yooweherera ahu ya okhalano ekumi yoohimala yoovaha ya vameekhaaya ya Yehova. Ninnaweherera ni murima wootheene weera itthu sooreera inimweereya muhoolo. Yooweherera ahu enkhala ntoko nankura, onikhaviheka oolipa weera niwere oviriha maxupo, ovilela ottharatthariwa ni mpaka oviriha okhwa. Yooweherera enkhala ntoko ekapasete mwaha wooweera enakosoopa minyuupuwelo sahu weera niwere okhootta etthu eri yootheene yoonanara ni owera opaka itthu soorera. Yooweherera ahu enkhuma mBiblyani ni ennanikhavihera omwattamela Muluku. Nave ennanoonihera moota owo onnisivelaawe hiyo. Nnookela ophwanya mareeliho mantxipale wakhala weera nookhalano yooweherera yoolipa.
17. Mwaha weeni nneerahu nihakalaleleke yoowehera ahu?
17 Murummwa Paulo ahimme ha mwa ekaarta alepenlaawe atthu oRoma: ‘Muhakalalele yooweherera’. (Arom. 12:12) Paulo aakhalano mathowa ohakalala mwaha wooweera aasuwela weera avirelela okhala oororomeleya amukhalano ekumi yoohimala wiirimu. Hiyo tho ninnatthuneya ohakalalela yooweherera nraahuno mwaha weera khaninhovela weera Yehova onookwanihera soolaihera sawe. Ntoko Nasalmu olempaawe: “Òreriwa mutthu ole, . . . ororomela wawe ori Yahvéh, Muluku awe. . . . Yahvéh okhale òroromeleya wa mahiku othene.”—Nsal. 146:5, 6.
ETXIPO 139 Muupuweleke Muryeene oParayiisu
^ Yehova oonivaha yooweherera ya muhoolo. Yooweherara ela ennahakalaliha ekumi ahu, ni ennanikhavihera ovilela maxupo ahu. Ni ennanivaha ikuru weera nivirelele okhala ororomeleya nihipwatthaka etthu eneera enikhumelele. Yooweherera ela ennanikosoopa weera nihiwokiwe ni itthu seera inanarihe muupuwelo ahu. Mwa yoosomeene yeela nnoorowa woona itthu sooreera sineera silipihe yooweherara ahu.
^ YOOTAPHUELA YA EFOOTU: Ekapasete ennakosoopa muru wa nakhotto, ni nankura onnamweeriha barku ohikuxiwa ni muteku teko wa maahi. Vamoha-moharu yooweherera ahu ennakosoopa muupuwelo ahu ni ennanlipiha neereriwaka vale. Murokora mmoha onnavekela moororomela wa Yehova. Munna aphimelelaka moota Yehova aakwanihenraawe solaihera sawe mwa Abrahamu. Munna mukina uupuwelaka moota oreelihinwaawe ni Yehova.
