1. Teevi eri “yootthunaahu ya omunepani,” ni eyo envarihana hayi ni ohakalala?

 OHAKALALA weekhaikhai khohiyono etthu emphwanyiwa mwa etempu vakhaaneene mweekumini. Uulumaka sa oohakalala, Yesu aathaliha mwaha awe va mwaako: “Òreriwa alipa òhawa mmunepani, niwoko omwene wa wirimu ti wawaya.” (Math. 5:3) Napaka eyo nnooreeriwa mahiku ootheene a mweekumini mwahu. Moota heeni? Yesu aasuwela weera atthu apakiwe ni “yootthuna ya omunepani”, naari neere ni yootthuna ya omusuwela ni omukokhorela Mpattuxa aya Yehova Muluku. Mwaha wooweera Yehova “Muluku oohakalala”, atthu ammukokhorela tho pooti opwanya ohakalala.—1 Tim. 1:11.

2-3. (a) Moovarihana ni masu a Yesu, taani tho oneera ahakalale? (b) Eheeni ninrowaahu woona mwa yoosoma ela, ni heeni eyo eraaya yootthuneya?

² Neereke ohakalala weekhaikhai omphwanyeya mwaha wookhalano ekumi yooreera? Hooye. Yesu aahima etthu yootutuxera. Owo enre “ale aninla”—mwaha woowivaha nthowa mwa itthu apankaaya, ni mwaha wookhalano maxupo ootepa mweekumini—pooti ophwanya ohakalala. Yesu tho aahima etthu emoha-moharu eeraka, “yale ansottiwa mwaha xariya” yaale anhawa ni ‘oruwaniwa’ mwaha wookhala mutthareli a Kristu. (Math. 5:4, 10, 11) Mene vanwereya hayi mutthu ohakalala avirihaka maxupo?

³ Yesu aatthuna onxuttiha weera ohakalala, khoonwa mwaha wookhalano ekumi yooreera, mene mwaha wookhalano yootthuna ya omunepani ni omwaattamela Muluku. (Yak. 4:8) Nnapake hayi eyo? Mpuwa mwa yoosoma ela, nnoorowa woona ipaasu  tthaaru sinrowa onikhavihera ophwanya ohakalala weekhaikhai.

4. Tiivi eri epaasu yoopatxera emphwanyiha ohakalala weekhaikhai? (Nsalmu 1:1-3)

⁴ EPAASU 1: Weera niphwanye ohakalala weekhaikhai nintthuneya otxaaka eyootxa ya omunepani. Atthu vamoha ni asinama antthuneya otxaakha yootxa ya weerutthuni weera evirelele okhalano ekumi. Mene atthu paahi tanwera otxaka yootxa ya omunepani. Ootheene hiyo nintthuneya otxaka yootxa ya omunepani. Ti vaavonto Yesu aahimmaawe weera: “Mutthu khanakhala ni okumi niwoko na mukattheru, mene niwoko na nsu nri nothene ninkhuma mmwanoni mwa Muluku.” (Math. 4:4) Opwaha wa yeeyo, nintthuneya otxaka yootxa ya omunepani mahiku ootheene eri masu a Muluku ari mBiblyani. Nasalmu enre: ‘Òreriwa mulopwana onasiveliwa ni ikano sa Yahvéh ni mwa ikano seiyo onnatthokelela othana ni ohiyu.’—Mmusome Nsalmu 1:1-3.

5-6. (a) Eheeni ninxutteraahu mBiblyani? (b) Wa makhalelo heeni yoosoma ya Biblya eneeraaya enikhavihere?

⁵ Mbiblyani, Yehova oonivaha miruku mwa nsivelo sa moota wookhalano ekumi yoohakalaliha. Mwa ntakihero, nooxuttera weera owo tonipattunxe, ni hiyo pooti omwaattamela ni oleveleliwa soottheka sahu. Nooxuttera woohima sa yooweherera yooreera yeeyo owo onivanhawe ya muhoolo. (Yer. 29:11) Etempu nimmusomaahu Biblya ninnaxuttera ikhaikhai iyo, murima ahu onnasareya ohakalala!

⁶ Mbiblyani sookhalamo miruku soovareleya muteko mahiku ootheene. Etempu ninvarelaahu muteko miruku iyo, nnoophwanya ohakalala  weekhaikhai. Emaara nyuwo muntteettheyaanyu mwaha wa maxupo a mweekumini, nviriheke etempu yintxipale musomaka masu a Muluku ni otthokelela. Yesu enre: “Òreriwa opwaha tiyale aniwa nsu na Muluku ni enakhapelela.”—Luka 11:28.

7. Moota heeni nyuwo muneeraanyu nvarele nnene etempu anyu mwaamusomaka Biblya?

⁷ Mwaasomaka masu a Muluku mwiisukereke etempu weera muupuwelele ele munsumaanyu: muupuwelele etthu ela, muupuwele weera mutthu onnooreherelani eyootxa enoosivelanixa weera oovaheeni. Mene pooti weera nyuwo muri mwaakuveyaka ni ooxupeya, ni munatxa yootxa ele muthukumelaka. Etempu mummalihanyu otxa, nyuwo munnuupuwela weera mwannaakuvihaxa otxa yootxa ele, nto khamoonne osiva nto mwaatthuneya otxa moomaleleya. Neereke enneereya etthu emoharu mwaatxaaka yootxa ya omunepani ya Yehova? Mwiisukereke etempu weera mmusome Biblya ari masu a Muluku, ni muupuweleke sooweereya ntoko nyuwo muri vaavo. Mwapaka eyo, enimoophwanyihani ohakalala.

8. Moota heeni “kaporo ororomeleya ni a miruku” onkwaniheraawe yoothanleliwa ovahiwaawe ni Yesu? (Nwehe tho enoota.)

⁸ Yesu oomuthanla “kaporo ororomeleya ni a miruku” weera avaheke yootxa ya omunepani mwa ehuhu yoophwanelela. Hiyo ninnatxa yootxa eyo ya omunepani. * (Math. 24:45) Ekaruma yooreerela mwa sootheene kaporo oororomeleya ompakaawe ori Biblya. (1 Ates. 2:13) Mwa yeeyo, yootxa eyo ya omunepani ennanikhavihera oxuttera moota Yehova onuupuwelaawe, ti vawonto hiyo ninsomaahu irevista sa Nwehereri ni Nvenye! ni nyaha sa va esaiti ahu jw.org. Hiyo tho ninnareherera mithukumano soothesene ni ninoonela eprograma ya vamweerini ya JW Broadcasting^®. Vaavo nintxaahu nnene yootxa ya omunepani, etthu eyo ennanikhavihera ophwanya epaasu ya naaveli yeeyo eniphwanyiha ohakalala.

9. Epaasu heeni ya naaveli emphwanyiha ohakalala?

⁹ EPAASU 2: Weera nihakalale mweekhaikhai nintthuneya okhala moovarihana ni malamulo a Yehova. Nasalmu olempe ha: “Òreriwa mutthu onamòva Yahvéh ni onèttela iphiro sawe.” (Nsal. 128:1) Ontaphulela eheeni omoova Yehova? Omoova Yehova ontaphulela omuttittimiha, ni opaka sootheene mutthu onweraawe weera amuhakalalihe. (Mir. 16:6) Mwa yeeyo, etempu nniilipiheraahu weera niiwelele malamulo a Yehova woohima sa opaka itthu sooreera ni wiitta itthu soonanara, seiyo sihimmwa mBiblyani. (2 Akor. 7:1) Nnoorowa ohakalala wakhala weera hiyo sinnansivela itthu Yehova simmusivela ni wiitta iye owo simmunanara.—Masalmu 37:27; 97:10; Arom. 12:9.

10. Moovarihana ni Aroma 12:2, muritti heeni nraahuno?

¹⁰ Mmusome Aroma 12:2. Mutthu pooti osuwela weera Yehova ookhalano edireitu woohima etthu yooreera ni yoonanara. Mene nto mutthu owo ohikhala oolikana wiiwelela malamulo awo a Muluku. Mwa ntakihero, mutthu pooti osuwela weera namalamulela ookhalano edireitu yoohima ilimite mutthu oneerawe akotelekemo mmuseweni. Mene owo pooti ohikhala ootaphuwa wiiwelela ilimite iyo. Yookhumelela aya, owo onneettiha ekaaro moophwaha ilimite iyo. Nto moovarihana ni makhalelo ahu, hiyo ninnoonihera weera ninnaroromela ni wiiwelela malamulo a Yehova ni okhala moovarihana ni yaawo. (Mir. 12:28) Davidi tho annuupuwela hiiho, owo aamuleela Yehova ha: “Nyuwo munnakisuweliha ephiro ya ekumi, ohakalala womalela ti vamaithoni vanyu, witthala wa mono anyu wolopwana ehuhu eri yothene.”—Nsal. 16:11.

11-12. (a) Etempu ninvirihaahu maxupo naari ninkhulumuwaahu nintthuneya wiikosoopa ni eheeni? (b) Moovarihana ni Afilipi 4:8 eheeni enkela onikhavihera othanla matthekulelo?

 ¹¹ Ootheene hiyo ninnaviriha maxupo naari ninnakhulumuwa ikwaha ikina. Mene vaavo enkhumelelaaya etthu eyo, ninnaasasa etthu yootthekulano weera nivirihe okhulumuwa iwo, nto etthu eyo pooti onikhavihera. Nto nintthuneya wiikosoopa weera nihipake itthu simmunanara Yehova.—Aef. 5:10-12, 15-17.

¹² Mwa ekaarta murummwa Paulo aalepenlaawe akristu oFilipi owo aawooperera akristu ovirelela wuupuwelela itthu sootheene siri sa “xariya,  . . . siri sottela,  . . . siri sosiveleya, [ni] siri sophwanelela”. (Mmusome Afilipi 4:8.) Ekhaikhai weera murummwa Paulo, khaalepa ahimaka moota akristu ale yeeraaya etthekuleke, mene etthu owo aalempaawe pooti onikhavihera othanlela matthekulelo ahu. Mweerere opaka etthu ela: muhinakuve othanla “etxipo” naari “efilme,” “eliivuru” naari “videogueme,” mpatxere toko wuupuwelela mikhalelo silempwale va Afilipi 4:8. Opaka eyo enimookhaviherani osuwela wakhala weera matthekulelo muthanliyanyu annamusivela Yehova naari hooye. Nintthuna weera ekumi ahu ekhaleke moovarihana ni malamulo a Yehova. (Nsal. 119:1-3) Napaka eyo, nnookhalano yoosuweliha ya murima yooreera ni ophwanya epaasu ekina yeeyo emphwanyiha ohakalala.—Mit. 23:1.

13. Epaasu eheeni ya naararu emphwanyiha ohakalala weekhaikhai? (Yohani 4:23, 24)

¹³ EPAASU 3: Muheleke nipuro noopatxera mweekumini mwanyu omukokhorela Yehova. Yehova mpattuxaahu ni onnaphwanela okokhoreliwa. (Apok. 4:11; 14:6, 7) Mwa yeeyo, etthu yootthuneya mweekumini mwahu, okhaleke omukokhorela Yehova moophwanelela, eyo tiiyo, “mwa munepa ni ekhaikhai”. (Mmusome Yohani 4:23, 24.) Etthu eyo entaphulela weera okokhorela wahu weettihiweke ni munepa wootteela wa Muluku ni ovarihaneke ni ikhaikhai simphwanyeya mBiblyani. Omukokhorela Yehova okhaleke nipuro noopatxera mweekumini mwahu, nnamweera nikhalaka elapo yeeyo muteko ahu onkhottihiwaaya. Asinna aniphwaha 100 ni asirokora aatthukeliwa mwaha wookhala Anamoona a Yehova. * Nnamweera vaareene hiiho, awo annahakalala mwaha woopaka ele anweraaya weera evekele, emusome Biblya ni waaleela atthu akina mitthenka sooreera sa Muluku ni Omwene awe! Etempu yeeyo ninsonttiwaahu, ninnahakalala mwaha woosuwela weera Yehova ori moono ahu ni onookela ontthuvela.—Yak. 1:12; 1 Ped. 4:14.

14. Eheeni yeereñye ni mmiravo oTadjiquistão, ni mwaha wa heeni?

¹⁴ Sooweereya sa mweekumini sa mahikwaano, sinnoonihera weera ipaasu tthaaru seiyo nisommaahu, sinnanikhavihera ophwanya ohakalala weekhaikhai nihipwatthaka itthu sinnikhumelela. Moone etthu yaakhumelenle ni munna Jovidon Bobojonov, yoowo orinono iyaakha 19 ni onkhala oTadjiquistão. Owo aakhootta orowa okhottoni, mwaha wa yeeyo nihiku na 4 a outubro a 2019 aavariwa owannyawe ni aawaleliwa mukadeya mwa minyeeri miraru, ni aathokororiwa ntoko nakrime. Nto etthu eyo yoohixariya yaahiwanyeya elapo ele. Owo aaheepetthiwa ni atoropa yaawo yamukhanyerera onwara oniforme a atoropa vamoha niiyaawo. Muhoolo mwaya, owo aatthukeliwa ni aaroihiwa ekampu wavariwaayawo muteko wookhanyereriwa. Okhwipi waya presidente a elapo ele aahima weera owo aleveleliwe ni ataphuliwe. Mwa itthu soothesene owo aavirihaawe, Jovidon aakhala oororomeleya ni khayeleenle  ohakalala wawe. Moota heeni owo aawenraawe opaka eyo? Owo khattiwanle sootthuna sawe soomunepani.

15. Moota heeni Jovidon aitxihaawe moomunepani etempu awaleliwaawe mukadeya?

¹⁵ Etempu aaraawe mukadeya Jovidon annavirelela wiitxiha mwa omunepani, nnamweera owo ahaakhanleno Biblya naari iliivuru sahu. Owo aawenre hayi opaka eyo? Asinna vamoha ni asirokora, etempu yeeyo yaamuroihelaaya yootxa, yannalepa yoolepa ya vanihikuni ni enahela musakolani yaahelaayamo yootxa. Mwa yeeyo, owo annawera omusoma Biblya mahiku ootheene ni wuupuwelela. Muhoolo mwaya owo ataphuliweene mukadeya, ovaha miruku iya wa yaale ahivirinhe maxupo a nroromelo naya ntoko owo. Nave owo ohimme ha: “Etempu ela, etempu yoovarela muteko otaphuwa wahu weera nikhaleno osuwela woowixera wa masu a Muluku ni iliivuru sahu.”

16. Itthu heeni Jovidon aithanlenlaawe ovarexexa?

¹⁶ Munnihu annailipihera weera akhaleke moovarihana ni malamulo a Yehova. Ohiya okhalano sootthuna soonanara, naari neere okhalano makhalelo oonanara, owo aanvarexexa Yehova ni itthu owo onaakhulelaawe. Jovidon annatikiniheya ni oreera wa soopattuxiwa sa Muluku. Iwoora sootheene wooixelo, owo annavinya weera aiwe wiipa wa apalame yaawo yaipa mooratta. Ohiyu owo tho annatikina vaavo aawehaawe  mweeri ni ithenyeri. Owo ohimme ha: “Miyo kannaphwanya ohakalala ni kannalipiheya mwaha wa soovaha iya sa Yehova.” Etempu yeeyo ninxukurelaahu itthu sootheene Yehova onnivahaawe mmakhaleloni a weerutthuni ni oomunepani, ninnaphwanya ohakalala weekhaikhai ni ohakalala nno, onoonivaha ikuru weera niwere ovilela.

17. Moovarihana ni 1 Pedru 1:6, 7 moota heeni yoolepa ela eneeraya emukhavihere mutthu onviriha maxupo ntoko a Jovidon?

¹⁷ Jovidon tho aahela nipuro noopatxera omukokhorela wawe Yehova. Owo aasuwela etthu yaari yootthuneya, weera owo aatthuneya okhala oororomeleya wa Muluku eekhaikhai. Yesu ohimme ha: “Onakokhorele Apwiya Muluku á ni onalapele yawo pahi.” (Luka 4:8) Ahooleli ni atoropa yaatthuna weera Jovidon ahiye ettiini awe. Ohiya opaka etthu atoropa yaavekelaaya, owo annanvekela Yehova nimurima nihiku nootheene ni ohiyu wootheene, anvekelaka weera Yehova amukhavihere weera ahihiye ororomeleya. Nnamweera aaviriha ohixariya iwe wanvoreya, Jovidon aavirelela okhala oororomeleya. Ekhaikhai weera owo aakumihiwa owannyawe, aaheepetthiwa ni aawaleliwa, mene owo ookhalano vano etthu ahakhanlaaweno woopatxerani—nroromelo noowereriwa.—Mmusome 1 Pedru 1:6, 7.

18. Etthu heeni nintthuneyaahu opaka weera nikhaleno ohakalala weekhaikhai?

¹⁸ Yehova oosuwela etthu yootthuneya weera hiyo niphwanye ohakalala weekhaikhai. Wakhala weera nnootthara ipaasu iya tthaaru simphwanyiha ohakalala, nnorowa ohalalala nnamweera nivirihaka maxupo ootepaxa. Muhoolo mwaya hiyo tho nnowera ohima ha: “Oreriwe muloko ole Muluku aya ori Yahvéh!”—Nsal. 144:15.