MWAHA ONTHOKORORIWA 43
ETXIPO 90 Nilipihaneke Mukina ni Mukhwaawe
Moota woomalamaliha ohovela
“Nwehexexe sothesene.” — 1 ATES. 5:21.
ELE NINKELA AHU OXUTTERA
Ninrowa woona moota woomalamaliha ohovela weiwo onrowa ovoleela muteko nnanvarelaahu Yehova.
1-2. (a) Emaara ekina, arumeyi a Yehova enhovela woohima sa eheeni? (b) Eheeni ninrowaahu woona mwa yoosoma ene yeela?
IKWAHA ikina ootheene hiyo ninnahovela. a Mwa ntakihero, mmiravo mmoha ori namalaleera oohipatisiwa, pooti wiikoha wakhala weera Yehova onnampwattha. Mwaha wa yeeyo owo pooti ohovela wakhala weera onnatthuneya opatisiwa. Naari nkamuupuwelani munna mmoha yoowo areene mmiravo aathanliye ohela nipuro noopatxera mweekumini mwawe sootthuna sa Omwene ohiya itthu sa elapo. Vano uuluvanlaawe ni ahinwera okhalano musurukhu wootxiha emusi awe, owo pooti wiikoha wakhala weera aapaka soothanla sooreera. Mmuupuwele murokora mmoha oowuuluvala yoowo ahikhanleno ikuru, owo pooti okhulumuwa mwaha woohiwera opaka itthu aaweraawe opaka khalayi. Neereke nyuwo mootoko wiikoha mweeraka: ‘Neereke Yehova onnakipwattha? Neereke Yehova onnavaha mwiitti itthu kimpakenlaaka? Neereke kinnavareleya muteko wa Yehova?’
2 Waakhala weera hiyo khannaasaasa waakhuliwa wa makoho ala, awo pooti oneeriha oyeleela nroromelo nahu wa Yehova naari ohiya omukokhorela. Mwa yoosoma ene yeela, nnoorowa woona moota Biblya onrowaawe onikhavihera wakhala weera ninnahovela (1) weera Yehova onnanipwattha, (2) weera noopaka soothanla sooreera khalayi, ni (3) weera nlelo ninnavareleya muteko wa Yehova.
MOOTA WOOMALAMALIHA OHOVELA
3. Moota heeni ninrowaahu omaliha ohovela wahu?
3 Mukhalelo mmoha woomalamaliha ohovela wahu, ori omusoma Biblya weera niphwanye waakhuliwa wa makoho wahu. Napaka eyo nnookhala olipa ni nnimunnuwa moomunepani, ni-tho nnookhala oolikaneene weera ‘nivirelele okhalano nroromelo.’ — 1 Akor. 16:13.
4. Moota heeni ninrowaahu ‘owehexexaka soothesene’? (1 Atesalonika 5:21)
4 Mmusome 1 Atesalonika 5:21. Biblya onhima weera hiyo nintthuneya ‘owehexexa itthu sothesene.’ Moota heeni ninkelaahu opaka eyo? Hiyo pooti ororomela weera ele ninroromelaahu ekhaikhai nlikanxeraka ni ele Biblya onhimaawe. Mwa ntakihero, mmiravo mmoha onniikoha wakhala weera owo tootthuneya vamaithoni va Muluku. Neereke owo aamwaakhulela muupuwelo owo ntoko weekhaikhai? Hoye, owo ontthuneya ‘wiiwexexa itthu soothesene’ akalakano muupuwelo wa Yehova woohima sa mwaha owo.
5. Moota heeni ‘nniiwaahu’ waakhula wa Yehova woohima sa makoho ahu?
5 Vaavo ninsomaahu masu a Muluku, ‘ninnamwiiwa’ Yehova uulumaka ni hiyo. Mene weera niphwanye waakhuliwa wa makoho ahu, ontthuneya opakavo etthu ohiya paahi omusoma Biblya. Nintthuneya osoma nyaha seiyo sinkela waakhula makoho ahu. Hiyo pooti othola-thola woohima sa mwaha owo, nivarelaka muteko ikaruma sahu sooxuttiha seiyo sinkumiheriwa ni mareherero a Yehova. (Mir. 2:3-6) Hiyo pooti onvekela Yehova emaara yeeyo ninkelaahu othola-tholaka weera anikhavihere ophwanya waakhuliwa wa makoho ahu. Muhoolo mwaya, hiyo pooti waasa miruku sa mBiblyani seiyo sinvareleya muteko weera sinikhavihere waakhuliwa wa makoho ahu. Nave-tho ti wootthuneya osoma sooweereya sa mBiblyani sa arumeyi oororomeleya a khalayi yaawo yaarino miyuupuwelo ni miyoonelo seiyo sinlikana ni sawihu.
6. Moota heeni mithukumano sinnikhaviheraaya omaliha ohovela wahu?
6 Nave “ninnamwiiwa” Yehova uulumaka ni hiyo moorwela mwa mithukumano. Navirelela woonela mithukumano, hiyo pooti wiiwa mwaha naari ekomentaariyu ya munna yeeyo enkela waakhula nikoho nahu. (Mir. 27:17) Vano ninrowa woona moota ninkelaahu ophwanya wakhuliwa wa makoho ahu.
WAKHALA WEERA MUNNAHOVELA WEERA YEHOVA ONNOOPWATTHANI
7. Makoho heeni atthu akina eniipakelaaya?
7 Nyuwo mootoko wiikoha weera, ‘Neereke Yehova onnakipwattha?’ Wakhala weera nyuwo muniisoonela hawo, muupuwelo owo pooti oweerihani wuupuwelaka weera khonwereya okhala nthamwene a Mpattuxa. Mwene Davidi pooti weera aakhalano muupuwelo owo. Owo annaxupeya wakhala weera Yehova annaapwattha atthu, ni aakoha eeraka: “Yahvéh, mutthu tani wera mmuthokorore, ni mwana Àdamu tani wera mmùpuwelele?” (Nsal. 144:3) Ninrowa opwanya woowiini waakhuliwa wa nikoho nna?
8. Moovarihana ni 1 Samuweli 16:6, 7, 10-12, etthu heeni Yehova onwehaawe wa atthu?
8 Mbiblyani hiyo ninnaxuttera weera Yehova onnaapwattha atthu ale enkhala ntoko khempwatthiwa ni atthu akina. Mwa ntakihero, Yehova aahimuruma Samuweli orowa owannyawe Yese weera amuthanle mwaana mmoha weera akhale mwene a wIsraeli. Yese aawiitthana anamwane awe 7 wa anamwane awe ale 8 aaraaweno weera yakumane ni Samuweli, mene khaamukunxe mmiravo Davidi. b Menento Yehova aamuthanliye Davidi. (Mmusome 1 Samuweli 16:6, 7, 10-12.) Yehova aahoona omutthu wa mpuwa wa Davidi, weera owo aari mmiravo aavaha mwiitti itthu soomunepani.
9. Mwaha wa heeni nyuwo muntthuneyaanyu ororomelaka weera Yehova onnoopwatthani? (Nwehe efootu.)
9 Nkuupuwelani moota Yehova onooniheraawe weera onnoopwatthani. Owo onnoovahani miruku soovareleya muteko, moovarihana ni mukhalelo munvirihaanyu. (Nsal. 32:8) Eyo enoonihera weera owo onnoosuwelani nnene. (Nsal. 139:1) Vaavo nyuwo munvarihelaanyu muteko miruku sa Yehova ni woona moota onookhaviheraaweni, nyuwo munoororomelaka weera Yehova onnoopwatthani. (1 Sow. 28:9; Mit. 17:26, 27) Yehova onnoona wiilipihera wanyu ni onnoona mikhalelo sanyu sooreera sa mpuwa. Ni onnatthuna wookhaviherani. (Yer. 17:10) Owo ontthuna weera nyuwo mwaakhulele okhala nthamwene awe. — 1 Yoh. 4:19.
“Wamwàsá [Yehova], onophwanyihiwa.” — 1 Sow. 28:9 (Nwehe eparagrafu 9) c
VAAVO NYUWO MUNHOVELAANYU WAKHALA WEERA MWAAPAKA SOOTHANLA SOOREERA KHALAYI
10. Makoho heeni nniipakelaahu vaavo nnuupuwelaahu soothanla naapankaahu khalayi?
10 Imaara ikina, atthu akina enniikoha wakhala weera aapaka soothanla sooreera. Pooti weeraka awo yaathanla ohiya muteko yoowo yaaliviwaaya musurukhu muntxipale naari nakoso yoowo yaakhumelaaya nnene, weera yaatxeerere muteko aya wonvarela Yehova. Pooti weera epanke eyo mwa iyaakha sintxipale. Vano ennawoona atthu ale yaasuwenlaaya yawo yaapanke soothanla soovirikana ni soothanla awo epankaaya ekhalaka ntoko aakhalano musurukhu muntxipale nave ntoko ekumi aya ti yoohakalaliha. Yookhumelelaaya, awo pooti wiikoha: ‘Keereke soothanla kipankaaka weera kinvarele Yehova ti sooreera? Naari iyo sookeeriha oyeleela iparakha ikina?’
11. Eheeni yaamuxupa namalepa a Nsalmu 73?
11 Wakhala weera makoho ntoko ala ennooxupani, moone moota namalepa a Nsalmu 73 iisoonenlaawe. Owo annawoona atthu akina yaawo yaakhala ntoko ekumi aya ti yooreera, ya musurukhu ni yaakhala ntoko khiyaaviriha maxupo. (Nsal. 73:3-5, 12) Vaavo aawehaawe atthu awo yaakhala ntoko tookhumela nnene, owo uupuwela weera wiilipihera wawe onvarela Yehova khiwaavareleya muteko. Owo “[aaxupeya] nihiku noothenene” ni miyuupuwelo iyo sookhulumula. (Nsal. 73:13, 14) Moota heeni owo aawinnaawe miyuupuwelo iyo saamuxupa?
12. Moovarihana ni Nsalmu 73:16-18, moota heeni namalepa ola aawinnaawe maxupo awe?
12 Musome Nsalmu 73:16-18. Nasalmu aahirowa nipuro noomaaleleya nenno naari nootteela na etemplu. Owo aahiwera wuupuwelela moomaaleleya. Owo aahoonelela weera nnaamweera atthu akina ekumi aya ekhalaka ntoko ti yookhweya, awo khiyaanoono yooweherera. Mwaha woowiiwexexa eyo, owo aaphwanya murettele ni aasuwela weera onvarela Yehova yoothanla yooreera. Ni yookhumelela aya, owo aari oolikaneene ovirelela onvarela Yehova. — Nsal. 73:23-28.
13. Moota heeni ninrowaahu ophwanya murettele wa Muluku wakhala weera ninnahovela woohima sa soothanla naapankaahu khalayi? (Nwehe efootu.)
13 Nyuwo munoowera ophwanya murettele wa Muluku nasalimu aaphwannyaawe mukhaviheriwaka ni masu a Muluku. Moota heeni? Mphimelele mwiitti muraanyuno, ohela mpuwa mihakhu sa wiirimu, ni mulikanxere itthu iyo ni yookhumelela ya atthu ale ehinanvarela Yehova yaawo nlivo naya siri soovaha sa elapo ela paahi yeeyo ehikhanleno yooweherera. Mwaha wooweera awo khiyaanoono yooweherera, awo enroromela mihakhu seiyo enweraaya ophwanya vano. Menento wa nyuwo, Yehova onnoolaiherani mareeliho yaawo muhinweraanyu wuupuwelela. (Nsal. 145:16) Opwaha mwa yeeyo nuupuwele ela: Neereke noosuwela moota ekumi ahu yaarowaaya okhala waakhanle weera noopaka yoothanla yoovirikana ni ele nipankaahu vano? Ekhaikhai ti ela: Mutthu ompaka soothanla moovarihana ni nsivelo na Muluku ni nsivelo wa atthu akina, khañyeleela itthu sooreera.
Nwehexexeke mareeliho Yehova ooreelinhaaweni (Nwehe eparagrafu 13) d
VAAVO MUNHOVELAANYU WEERA MUNNAVARELEYA MUTEKO WA YEHOVA
14. Mukhalelo heeni atthu akina envirihaaya ni makoho heeni eniipakelaaya?
14 Arumeyi akina a Yehova ennaviriha maxupo oowuuluvala, oovoreiwa, naari mwaha woorakala. Eyo pooti oweerihaka akina woona weera khiyaanoono mwiitti vamaithoni va Yehova. Awo pooti wiikoha ha, ‘Neereke nlelo miyo kinnavareleya muteko wa Yehova?’
15. Etthu heeni namalepa a Nsalmu 71 aaroromelaawe?
15 Namalepa a Nsalmu 71 aahihima maxupo awe oolikana ni awo. Owo aavekela eeraka: “Ehuhu yomala ikuru saka muhikihiye.” (Nsal. 71:9, 18) Menento, nasalmu aavirelela ororomela weera wakhala weera anonvarela Yehova moororomeleya, owo ammweettiha ni aamurowa omukhavihera. Ntoko nasalmu aaxuttenraawe, Yehova onnahakalala ni atthu ale empaka ele enweraaya mmutekoni mwawe nnaamweera ereeneno maxupo. — Nsal. 37:23-25.
16. Mwa mukhalelo heeni asinna oowuuluvala envareleyaaya muteko wa Yehova? (Nsalmu 92:13-16 [92:12-15, NM])
16 Wakhala weera mohuuluvala, nweheke mukhalelo anyu ntoko Yehova onoonaawe. Owo pooti wookhaviherani okhala oolipa moomunepani nnaamweera muhiweraka opaka itthu ntoko mwaapakaanyu khalayi. (Musome Nsalmu 92:13-16 [92:12-15, Tradução do Novo Mundo].) Ohiya owehexexa itthu muhinweraanyu opaka, nwehexexeke itthu munweraanyu opaka. Mwa ntakihero, nyuwo pooti waalipiha akina ni ntakihero nanyu noororomeleya ni woonihera wanyu waapwattha atthu. Nyuwo pooti waaleela moota Yehova ookhavihenraaweni mpuwa mwa iyaakha sintxipale ni waaleela yooweherera anyu yoolipa weera soolaihera sa muhoolo inookwanela. Muhittiwale weera waavekelela wanyu atthu akina onnavareleya muteko vantxipale. (1 Ped. 3:12) Woohipwattha maxupo ninvirihaahu, ootheene hiyo nnoowera onvaha etthu Yehova ni atthu akina.
17. Mwaha wa heeni nihintthuneyaahu wiilikanxera ni atthu akina?
17 Wakhala weera nyuwo munnaxupeya mwaha woohiwera opaka itthu sintxipale mmutekoni mwa Yehova, muroromeleke weera owo onnavaha mwiitti itthu sintxipale mumpakaanyu. Musepeke olikanxera itthu nyuwo munweraanyu opaka ni itthu atthu akina enweraaya. Mwaha wa heeni? Mwaha wooweera Yehova khanoolikanxerani ni atthu akina woohima sa itthu munweraanyu opaka. (Agal. 6:4) Mwa ntakihero, Maria aamuttikitthela Yesu makhura oowinkhela ni oorika. (Yoh. 12:3-5) Moovirikana ni eyo, naamukhweli oothoiwa aahirowa mutemplu ovaha makhoopiri meeli oohikhala mwiitti. (Luka 21:1-4) Menento, Yesu aahoona soovaha sa asithiyana ala eeli ntoko woonihera wa nroromelo naya. Tiithi awe Yehova, onnavaha mwiiti etthu eri poothe nyuwo mumpakaanyu, yeeyo enoonihera nroromelo nayu ni omusivela wanyu owo nnaamweera nyuwo moonaka weera ti yooyeva.
18. Eheeni enrowa onikhavihera omalamaliha ohovela wahu? (Nwehe ekwaadru “ Masu a Muluku pooti wookhaviherani omaliha ohovela.”)
18 Ootheene hiyo imaara ikina ninnahovela. Mene ntoko nonnaahu, masu oororomeleya ni eekhaikhai a Muluku ori Biblya, pooti onikhavihera owiina ohoovela iwo. Mwa yeeyo, mwiilipihereke weera nwine ohovela wanyu ni khamunrowa oxupeya. Yehova onnoosuwelani nyuwo nnene sene. Owo onnavaha mwiitti itthu sootheene mumpakaanyu ni onoorowa wooreelihani. Muroromeleke weera Yehova onnaaweha arumeyi awe ootheene oororomeleya ni weera awo ennaphwanela nsivelo nawe ni okosoopa wawe.
ETXIPO 111 Itthu Sinniiriha Ohakalala
a MASU OOWIIWANYEIHIWA: Yoosoma ela, enuuluma woohima sa ohovela weiwo onneeriha okhalano makoho woohima sa otthuneya wahu vamaithoni va Yehova naari soothanla nipankaahu khalayi. Khaiyene ohovela onhimmwa mBiblyani weiwo onoonihera ohikhalano nroromelo wa Yehova ni sooleihera sawe.
b Nnaamweera Biblya ahihimaka iyaakha aaraaweno Davidi emaara Yehova aamuthanlaawe, onooneya weera nlelo owo aari mmiravo. — Munwehe a Sentinela a 1 a Setembro a 2011, epaax. 29 eparag. 2.
