1-2. (a) Maxupo heeni aYuda yaavirihaaya emaara Paulo aalepelaawe ekaarta aheberi? (b) Moota heeni ekaarta eyo yoowuupuxeriwa yaakhavihenraaya?

 AKRISTU aheberi yaakhala oYerusalemu ni oYuda, yaahiviriha itthu sooxupa iyaakha soottharelana Yesu akhwiiyeene. Emaara waapakinwaaya muloko wa ekristu, muloko owo waapatxera otthara-tthariwa vantxipale. (Mit. 8:1) Nave-tho sivirakaru iyaakha 20, atthareli a Yesu yannaviriha maxupo a othoiwa, onooneya weera yaakhumelela maxupo ala mwaha wa etala yaakhumelenle elapo ele. (Mit. 11:27-30) Menento, eyaakha ya 61 Kristu awiiyeene, akristu yannaviriha etempu yoomaaleleya, nalikanxera ni itthu saarowa weereya muhoolo. Mpuwa mwa etempu ele, awo yaahaakhela ekaarta yaalempwale ni murummwa Paulo, yeeyo yaarowa waakhavihera mpuwa mwa maxupo awo.

² Ekaarta yaalepelinwaaya aheberi, yaahaakhavihera mwaha wooweera murettele yaaraayano, khiwaarowa opisa. Paulo aahaavaha miruku soovareleya muteko seiyo saarowa waakhavihera akristu ale ovilela maxupo yeeraaya ekumanekeno. Onyaanyiwa wa makhalelo a oYuda Yesu aahimmaawe khalairu, wannaattamela. (Luka 21:20) Ekhaikhai weera Paulo ni akristu ale a oYuda khiyaasuwela nnene sene ti liini onyaanyiwa iwe waakelaaya weereya. Menento, akristu ale yaamurowa ovarihela muteko etempu yaaraayano weera yiireherere ni wunnuwihera mikhalelo ntoko nroromelo ni ovilela. — Aheb. 10:25; 12:1, 2.

3. Mwaha wa heeni Eliivuru ya Aheberi eraaya yootthuneya olelo?

 ³ Moohipisa va, nnoorowa oviriha maxupo matokweene opwaha ale yaavirihaaya akristu aheberi. (Math. 24:21; Apok. 16:14, 16) Vano ninrowa woona miruku soovareleya muteko Yehova aavanhaawe akristu ale seiyo sinrowa onikhavihera-tho.

‘NIVIRELELEKE OKHALA OOLIPA’

4. Maxupo heeni akristu aYuda yaavirihaaya? (Nwehe efootu.)

⁴ Akristu yaakhala oYuda, yaahiviriha maxupo matokweene. Emaara emoharu, aYuda ale yaari atthu oothanliwa ni Yehova. Yerusalemu yaari ecidade ya Omwene wa Muluku ni etemplu yaari mathipelo a okokhorela weekhaikhai. Ayuda ootheene oororomeleya yannatthara malamulo a Mose, ntoko yaahimmwaaya ni ahooleli aya a ittiini. Sooxuttiha iyo sannakumihera malamulo a moota yoonelaaya wiineliwa ni moota yaawoonelaaya ale yahaakhanle aYuda. Menento akhwaakaru Yesu, Yehova khaawaakhulela amakeya aYuda yaapakaaya. Awo yaari maxupo aYuda ale yaavirihaaya, mwaha wooweera yaakhovelela otthara malamulo a Mose. (Aheb. 10:1, 4, 10) Nave-tho akristu akina oolipa ntoko murummwa Pedru yannawanano weera yiikhovelelihe matxentxo ale manyowani. (Mit. 10:9-14; Agal. 2:11-14) Mwaha wa sookhovelela saya inyowani, akristu ale yannatthara-tthariwa ni ahooleli a ittiini sa aYuda.

5. Etthu heeni akristu yaatthuneyaaya wiikosoopa?

⁵ Akristu aheberi yannaviriha maxupo a ale yaatthara-tthara mwa mikhalelo miili. Woopatxera, yaahikhala ahooleli a ittiini sa oYuda yaawo yaawoona ntoko anamavaanyiha. Opwaha mwa yeeyo, aYuda akina yaatthuna weera atthareli a Kristu etthareke malamulo a Mose, apaale ni yoolakela ya osepa otthara-tthariwa. (Agal. 6:12) Eheeni yaarowa waakhavihera akristu ale oororomeleya ovarexexa ekhaikhai?

6. Paulo aawooperenre asinna opaka eheeni? (Aheberi 5:14–6:1)

⁶ Mwa ekaarta awe aalepenlaawe aheberi, Paulo aawooperera asinna weera ekhalekeno  osuwela woowiixera wa masu a Muluku. (Mmusome Aheberi 5:14–6:1.) Avarihelaka muteko Soolepa sa eheberi, Paulo aahaaleela asinna mwaha wa heeni okokhorela wa ekristu waaraaya wa vasuluxa opwaha okokhorela wa aYuda. a Paulo annasuwela weera, osuwela ni wiiwexexa nnene sene ekhaikhai, waamurowa waakhavihera akristu ale osuwela ni osepa soohimmwa soowootha seiyo saarowa waahapuxa.

7. Maxupo heeni ninvirihaahu olelo?

⁷ Ntoko akristu aheberi, hiyo ninniiwa soohimmwa ni sooxuttiha seiyo sihinvarihana ni malamulo a Yehova. Anamavaanyiha, ikwaha sintxipale ennavaanyiha soororomela sahu woohima sa okonihana ehimaka weera hiyo toowuuma murima. Muupuwelo ni soopaka sa elapo, ti soovirikana ni moota Yehova onoonelaawe itthu. (Mir. 17:15) Tivawonto, nintthuneya osuwelaka itthu soowootha ni osepa, seiyo sinkumiheriwa ni anamavaanyiha yeereraka onikhulumula naari onihapuxa. — Aheb. 13:9.

8. Moota heeni ninrowaahu wunnuwa moomunepani?

⁸ Ninnapaka nnene vaavo ninttharaahu miruku sa murummwa Paulo aalepenlaawe aheberi, weera nivirelele wunnuwa moomunepani. Eyo enhela mpuwa osuwela ikhaikhai soowiixera ni osuwela moota Yehova onuupuwelaawe. Mukhalelo ola ti wootthuneya nnaamweera niivaherenreene ni opatisiwa. Nihipwatthaka etempu nivirinhaahu nreene mweekhaikhaini, ootheene hiyo nintthuneya osomaka masu a Muluku mahiku ootheene. (Nsal. 1:2) Okhalano yookhovelela ya omusoma Biblya mahiku ootheene, onoonikhavihera wunnuwihera mukhalelo mmoha yoowo murummwa Paulo attittimihenraawe va ekaarta aalepenlaawe aheberi: nroromelo. — Aheb. 11:1, 6.

‘NINTTHUNEYA OKHALANO NROROMELO WEERA NIVULUXE EKUMI AHU’

9. Mwaha wa heeni nroromelo noolipa naaraaya nootthuneya wa akristu aheberi?

⁹ Akristu ale wannatthuneya okhalano nroromelo noolipa weera evuluwe mwa maxupo yaarowa okhumelela oYudeya. (Aheb. 10:37-39) Yesu aahaaleela atthareli awe weera yamoona Yerusalemu arukureriweene ni anakhotto, wannatthuneya otthawela omwaako. Miruku iye sannavareleya muteko wa akristu ootheene, ekhale ale yaakhala mpuwa mwa ecidade naari ale yaakhala vaate. (Luka 21:20-24) Emaara ene yeele, atthu yoopopihiwa ni anakhotto, yannatthawela ixiri sa oYerusalemu weera yakosoopeye. Nto otthawela omwaako, waakhala ntoko khaiyene waari wooreera, nto yannatthuneya nroromelo noolipa.

10. Nroromelo noolipa naarowa oweeriha akristu opaka eheeni? (Aheberi 13:17)

¹⁰ Nave-tho akristu aheberi wannatthuneya waaroromela ale Yesu aathanliyaawe weera ehooleleke muloko. Ale yaahoolela muloko yannavaha miruku soowiiwanyeya weera yaakhavihere atthu ootheene mmulokoni otthara miruku sa Yesu etempu yooreerela ni mwa mukhalelo wooreera. (Mmusome Aheberi 13:17.) Masu a ekereku evarihelinwe muteko va Aheberi 13:17 ooweera “nwìweleleke” entthuna ohima weera mutthu wiiwelela mwaha wooweera onnamuroromela mutthu onvaha miruku, eyo enhela mpuwa wiiwelela ohiya paahi mwaha wooweera mutthu owo onvaha miruku oroothanliwa. Mwa mukhalelo ene yoola, akristu aheberi wannatthuneya wunnuwihera nroromelo naya wa ale yaathanlinwe weera yaahooleleke ehinaaye opatxera maxupo. Waakhanle weera etempu ele ya murettele akristu ale yannawiiwelela ale yaahoolela, waamurowa okhala wookhweya opaka eyo emaara ya maxupo.

11. Mwaha wa heeni okhalano nroromelo noolipa oraaya wootthuneya wa akristu olelo?

 ¹¹ Hiyo-tho olelo, nintthuneya okhalano nroromelo ntoko yaapankaaya akristu vaavo yaakhenlaaya ekaarta ya murummwa Paulo ekwaha yoopatxera. Ninkhala etempu yeeyo atthu antxipale ensepaaya ni envaanyaaya itthu Biblya onhimaawe woohima sa omala wa elapo ela yoonanara. (2 Ped. 3:3, 4) Opwaha mwa yeeyo, nnaamweera Biblya ohimaka itthu sintxipale sinkela weereya mpuwa mwa maxupo matokweene, sookhala itthu sintxipale nihisuwenlaahu. Nintthuneya okhalano nroromelo noolipa weera etempu yooreerela elapo ela enoomala, ni weera Yehova onoorowa onikosoopa. — Hab. 2:3.

12. Eheeni enrowa onikhavihera ovuluwa mpuwa mwa maxupo matokweene?

¹² Nave-tho nintthuneya olipiha nroromelo nahu wa atthu ale Yehova onaavarelaawe muteko weera enihooleleke olelo va, “kaporo òroromeleya ni a miruku.” (Math. 24:45) Vaavo maxupo matokweene enrowaaya opatxera, hiyo nnoorowa waakhelaka miruku soowiiwanyeya seiyo sinrowa okosoopa ekumi ahu, hiihaale ntoko akristu aheberi yaakhenlaaya vaavo anakhotto a oRoma yaaphiñyaaya. Vano, ela etempu weera nlipihe nroromelo nahu wa miruku nnaakhelaahu ni atthu ale enhoolela mareherero a Yehova. Hiyo khaninrowa owera otthara miruku ninrowaahu ovahiwaka mpuwa mwa maxupo matokweene wakhala weera viinaano va khanniiwelela.

13. Mwaha wa heeni miruku silempwale va Aheberi 13:5 siraaya soovareleya muteko?

¹³ Ewehereraka ethoonyero weera etthawe, akristu aheberi, wannatthuneya okhalano ekumi yookhweya esepaka ‘winlela musurukhu.’ (Mmusome Aheberi 13:5.) Akina a yaawo, yaari oothoiwa ni yannaviriha etala. (Aheb. 10:32-34) Nnaamweera yaari oolikaneene oviriha maxupo mwaha wa mitthenka sooreera, pooti weeraka akina yampatxera wuupuwela weera muhakhu waamurowa waakosoopa. Mene khiwaavo musurukhu waarowa waakosoopa wa maxupo ale yaarowa okhumelela. (Yak. 5:3) Ohima ekhaikhai, mutthu ori ootheene aarowa osiveliwaka ni itthu sa weerutthuni, aamurowa woona okhala wooxupa otthawa ni ohiya impa sawe ni mihakhu sawe.

14. Moota heeni nroromelo noolipa ninrowaaya onikhavihera opaka soothanla woohima sa itthu sa weerutthuni?

¹⁴ Hiyo nnoowera osepa otthuna mihakhu wakhala weera nnookhalano nroromelo noolipa weera elapo ela ehanle omala. Atthu erino mihakhu, “enevonyere mmiseweni eprath’aya” mwaha wooweera enimoonelela weera “khweli eprath’aya ni etxikukhu aya sinimòtxela wàvuluxa yawo nihiku na esara ya Yahvéh.” (Ez. 7:19) Ohiya waasa musurukhu muntxipale, nintthuneya opaka soothanla sinrowa onikhavihera okhalano ekumi yookhweya, mene yeeriyari-neeriyari. Eyo enhela mpuwa osepa opaka sookopha soohitthuneya naari oviriha etempu yintxipale naasaka itthu sa weerutthuni. Nave-tho nintthuneya osepa weera itthu nraahuno sihikhale sootepa otthuneya mweekumini mwahu. (Math. 6:19, 24) Nroromelo nahu nnimweereriwa ni mihakhu ni itthu ikina vaavo ninwehereraahu omala wa elapo ela.

“NYUWO [MUNNATTHUNEYA] OVILELA”

15. Mwaha wa heeni akristu aheberi yaatthuneyaaya ovilela?

¹⁵ Akristu aheberi wannatthuneya ovilela weereriwa wa nroromelo naya vaavo makhalelo a oYudeya yaarowaaya oxupa. (Aheb. 10:36) Nnaamweera akristu akina yaavirinhe otthara-tthariwa, antxipale yannaakhulela ekhaikhai etempu waakhanlaaya murettele. Paulo aahaaleela weera nnaamweera yaavilenle weereriwa wa nroromelo naya, awo khiyaahanwe ntoko  Yesu, naari neere, mpaka okhwa. (Aheb. 12:4) Ayuda antxipale yaanyoonyiwa ni yaari oowali mwaha wooweera atthu antxipale yannaakhulela ekhaikhai. Iyaakha vakhaani muttuli, yaakhumelela maxupo mwaha wa Paulo olaleera oYerusalemu. Ayuda oophiyeraka 40, “yàmmana natiri, yèraka wi khayatthuna otxa nari owurya etthu, ehimwìvale toko Paulo.” (Mit. 22:22; 23:12-14) Nnaamweera yaatthara-tthariwa, akristu ale wannatthuneya othukumana, olaleya mitthenka sooreera ni olipihana.

16. Moota heeni ekaarta yaalepelinwaaya aheberi ennikhaviheraaya okhalano moonelo wooreera woohima sa otthara-tthariwa? (Aheberi 12:7)

¹⁶ Eheeni yaarowa waakhavihera akristu aheberi ovilela maxupo yaavirihaaya? Paulo annasuwela weera yannatthuneya okhalano moonelo wooreera woohima sa weereriwa waya. Mwa yeeyo, Paulo aahiiwanyeiha weera Muluku pooti waakhulela weereriwa wa nroromelo nahu weera nitxentxerihe mukhalelo ahu wa ekristu. (Mmusome Aheberi 12:7.) Otxentxerihiwa iwo, onhela mpuwa oreherera ni wunnuwihera mikhalelo sooreera sa ekristu. Vaavo yaawehexexaaya itthu saakhumelela mwaha wa weereriwa waya, akristu ale yaamurowa woona okhala wookhweya ovilela weereriwa waya. — Aheb. 12:11.

17. Eheeni Paulo aaxuttenraawe woohima sa ovilela otthara-tthariwa?

¹⁷ Paulo aawooperera akristu aheberi weera eviriheke maxupo aya ni nroromelo noolipa. Owo aapaka nnene waalepela akristu woohima sa etthu ele. Okhala weera aahaatthara-tthara akristu khalayi, owo annasuwela etthu awo yaavirihaaya, ni moota woovilela. Mwaha wooweera, akhalakaru mukristu, owo aaviriha mikhalelo soovirikana sa otthara-tthariwa. (2 Akor. 11:23-25) Mwa mukhalelo ene yoola, Paulo anwera wuuluma ni murima wootheene woohima sa itthu saatthuneya weera ewere ovilela. Owo aawuupuxera akristu weera emaara envilelaaya sooweereriwa, ehiiroromeleke  mwaneene aya mene emuroromeleke Yehova, ni yaamurowa ohima ni murima wootheene: “Apwiya ti ekhavihero aka, nkinòva etthu.” — Aheb. 13:6.

18. Moota heeni osuwela ele ninkelaahu okumanano muhoolo onnikhaviheraaya ovilela otthara-tthariwa?

¹⁸ Viinaano va, asinna akina ennaviriha otthara-tthariwa. Hiyo pooti waakhavihera moorweela mwa mavekelo ahu ni ikwaha ikina nipakaka etthu. (Aheb. 10:33) Biblya oohima moowiiwanyeya, “othene ale antthuna okhala n’okumi wa phama mwa Kristu Yesu, [enootthara-tthariwa].” (2 Tim. 3:12) Mwa yeeyo, ootheene hiyo, ontthuneya wiireherera wa ele ninkelaahu okumanano muhoolo. Nivirelele omuroromela moomalela Yehova, nroromelaka weera owo onoorowa onikhavihera ovilela maxupo ootheene ninrowaahu okumanano. Yaphiya etempu yooreerela, owo onoorowa waavuluxa arumeyi awe ootheene oororomeleya. — 2 Ates. 1:7, 8.

19. Itthu heeni sinrowa onikhavihera wiireherera wa maxupo matokweene? (Nwehe efootu.)

¹⁹ Moohihovela, ekaarta Paulo aalepenlaawe aheberi, yaahaakhavihera akristu a eseekulu yoopatxera, wiirehera wa maxupo yaarowa okhumelela muhoolo. Paulo aawooperera asinna weera ekhalekeno osuwela ni wiiwexexa woowiixera wa soolepa. Opaka eyo, waahaakhavihera osuwela ni osepa sooxuttiha soowootha seiyo saarowa otteettheiha nroromelo naya. Owo aawooperera weera elipiheke nroromelo naya ni etthareke moomalela miruku sa Yesu ni sa ale yaahoolela muloko. Nave owo aahaakhavihera akristu ovilela ekhalakano moonelo wooreera woohima sa maxupo yaavirihaaya, yoonaka ntoko eparakha yootxentxerihiwa ni Tiithi aya a nsivelo. Hiyo-tho onnatthuneya ovarihela muteko miruku iya soowuupuxeriwa. Napaka eyo, nnookhala oolikaneene oviriha maxupo moororomeleya mpaka okhwipi. — Aheb. 3:14.