1-2. Eheeni enweeriha atthu a Muluku okhala oohakalala? (Yakobe 1:22-25)

 YEHOVA ni Mwanawe Yesu, entthuna weera nihakalaleke. Namalepa a Nsalmu 119:2, ohimme ha: “Òreriwa yale anasunka onamoona wa Muluku ni anamwàsa ni murima wothene.” Yesu, oororomeliha eeraka: “Òreriwa opwaha ti yale anìwa nsu na Muluku ni anakhapelela.” — Luka 11:28.

² Hiyo ninnahakalala mwaha wookhala atthu a Yehova. Mwaha wa heeni? Nookhalano mathowa mantxipale, mene kaninttuwala omusoma Biblya mahiku ootheene ni ovarihela muteko ele ninxutteraahu. — Mmusome Yakobe 1:22-25.

3. Moota heeni ninttottelaahu mureerelo emaara yeeyo ninvarihelaahu muteko ele ninsomaahu mBiblyani?

³ Sookhala mikhalelo mikina ninttottelaahu mureerelo vaavo ‘nneettelaahu nsu.’ Yoopatxera, hiyo noosuwela weera eyo ennamuhakalaliha Yehova. Osuwela eyo onnanihakalaliha. (Koh. 12:13) Vaavo ninvarihelaahu muteko ele ninsomaahu mBiblyani, ninnakhala oohakalala veemusini nave ninnalipiha onthamwene ni asinna. Apaale nyuwo mohoonelela weera eyo ekhaikhai. Opwaha mwa yeeyo, ninnasepa maxupo yaawo enaakhumelela atthu ehintthara malamulo a Yehova. Mweekhaikhai, hiyo ninnaakhulela ele mwene Davidi ohimmaawe. Vaavo aalepaawe etxipo awe ya malamulo, miruku ni othoriha wa Yehova, owo aamalinhe eeraka: “[Weettela] seiyo ti nlivo ntokotoko.” — Nsal. 19:8-12 [19:7-11, Tradução do Novo Mundo].

4. Mwaha wa heeni ikwaha ikina onkhalaaya wooxupa weettela masu a Muluku?

⁴ Mweekhaikhai, khaiyene ikwaha sootheene onnakhweya weettela masu a Muluku. Emaara nnampakaahu programa ahu, ontthuneya ohela mpuwa yoosoma ahu ya Biblya weera niiwexexeke ele Yehova ontthunaawe weera nipakeke. Vano, ninrowa  woona miruku sinrowa onikhavihera omusoma Biblya mahiku ootheene. Nnoorowa-tho woona etthu enrowa onikhavihera wuupuwelela ele nsommaahu ni moota woovarihela muteko mweekumini mwahu.

MWIIHIYEREKE ETEMPU WEERA MUSOME MASU A MULUKU

5. Itthu heeni sinneeriha okhala oowaatteliwa?

⁵ Arumeyi antxipale a Yehova, aakhalano ekumi yoowaatteliwa. Ninnaviriha etempu yintxipale nipakaka itthu sootthuneya seiyo Biblya onhimaawe weera nipakeke. Mwa ntakihero, antxipale a hiyo, ennavara vantxipale weera yiikhavihere asineene aya ni imusi saya. (1 Tim. 5:8) Akristu antxipale ennaakosoopa amusi aya envoreiwa ni oowuuluvala. Nave ootheene hiyo nintthuneya okosoopa ikumi sahu, nto eyo entthuneya etempu. Ohiya paahi miritti iyo, hiyo nookhalano miritti mikina mmulokoni. Etthu ekina yootepa otthuneya nintthuneyaahu opaka, ori ovara muteko woolaleera. Mwa miritti sootheene iya nraahuno, moota heeni ninrowaahu wiihiyera etempu weera nimusome Biblya mahiku ootheene, ophimelela ele ninsomaahu ni ovarihela muteko mweekumini mwahu?

6. Moota heeni munrowaanyu ohela nipuro noopatxera yoosoma anyu ya Biblya? (Nwehe efootu.)

⁶ Omusoma Biblya etthu emoha ‘yootthuneya’ wa akristu. Mwa yeeyo, ontthuneya niheleke nipuro noopatxera. (Afil. 1:10) Woohima sa mutthu oohakalala, nsalmu ekapiitulu yoopatxera, ehimme ha: “Koma onasiveliwa ni ikano sa Yahvéh ni mwa ikano seiyo onatthokelela othana ni ohiyu.” (Nsal. 1:1, 2) Mweekhaikhai, eyo enoonihera weera ontthuneya wiihiyera etempu weera nimusome Biblya. Etempu heeni yooreerela weera nimusome Biblya? Waakhula wa nikoho nno, pooti ovirikana wa mutthu ti mutthu a hiyo. Mene ohima mookwasa, ekhaleke etempu ninrowaahu oweraka omusoma mahiku ootheene. Munna mmoha oneeriwa Victor, ohimme ha: “Okisivela omusoma Biblya oxeexelo. Nnaamweera okinyoonyaka ovinya, nto eyo etempu yoomaaleleya. Muupuwelo aka onnakhala woomaaleleya ni kinnawera wiiwexexa ele kinsomaaka.” Neereke eyo  ennavareleya muteko wa nyuwo? Mwiikoheke ha, ‘Etempu heeni yooreerela weera kipakeke yoosoma aka ya Biblya?’

MPHIMELELKE ETTHU MUSOMMAANYU

7-8. Etthu heeni enrowa onootxeelihaka ottottela mureerelo ele ninsomaahu? Nvahe ntakihero.

⁷ Ekhaikhai ti yooweera, ikwaha ikina hiyo pooti osoma nyaha sintxipale mpaka ohiwera wuupuwelela. Neereke nyuwo mootoko osoma etthu, evirakaru etempu vakhaani muhinwera wuupuwelela etthu musommaanyu? Eyo enneereya ni ootheene hiyo. Mooriipiha murima, eyo pooti weereya ni yoosoma ahu ya Biblya. Apaale hiyo pooti othanla nummero na ikapiitulu sa mBiblyani ninrowaahu osomaka mahiku ootheene. Eyo ti yooreera. Onnatthuneya othanla opaka etthu ni wiilipihera okwanihera etthu eyo. (1 Akor. 9:26) Nto, nnaamweera omusoma Biblya oreene wooreera, iwo opatxera paahi. Ennatthuneya etthu ekina weera nttottele mureerelo yoosomaahu ya Biblya.

⁸ Moone ntakihero nna: Epula ti yootthuneya weera ipalanta sunnuwe. Nto wakhala weera ennarupa vantxipale mpuwa mwa etempu vakhaani, etthaya enrowa onaanaka vasulu-sulu paahi. Wakhala weera yoheereya eyo, epula eyo khenttotteleya mureerelo. Etthaya entthuneya etempu weera ewere onuula maahi a epula weera ipalanta sunnuwe. Moolikana ni eyo, nintthuneya osepaka omusoma Biblya moowaakuveya, naari neere, moowaakuveyaxa mpaka ohiwera wuupuwelela ni ovarihela muteko ele nsommaahu. — Yak. 1:24.

9. Etthu heeni nintthuneyaahu opaka wakhala weera nohoonelela weera nookhalano ntthuno noomusoma Biblya moowaakuveya?

⁹ Neereke nyuwo mohoonelela weera ikwaha ikina munimwaasa omusoma Biblya paahi? Etthu heeni muntthuneyaanyu opaka? Mmusomeke vakhaani-vakhaani. Mwiilipihereke weera nwereke wuupuwelela etthu musommaanyu ni munsomaanyu. Eyo ehootikhinihekeni. Wakhala weera miruku sa ophimelela onnakhala wooxupa wa nyuwo, apaale nyuwo pooti woonaka miruku iyo ntoko ophimelela etthu musommaanyu. Nyuwo pooti othanla etempu ya omusoma Biblya muhelaka mpuwa etempu yoowuupuwelela ni ophimelela.  Mukhalelo mukina, ori othanla osoma iversu vakhaaniini ni oviriha etempu yintxipale muupuwelelaka ele musommaanyu. Victor ohimmwale woopatxerani, ohimme ha, “Kinnamusoma Biblya etempu vakhaaniini, pooti okhala ekapiitulu emoha. Okhala weera kimmusoma oxeexelo, kinnawera wuupuwelela nihiku nootheene etthu kisommaaka.” Nihipwatthaka moota nimmusomaahu Biblya, ti wooreera omusoma mwa mukhalelo ninrowaahu ottottela mureerelo ele ninsomaahu. — Nsal. 119:97; nwehe ekwaadru “ Makoho nintthuneyaahu wiipakela.”

10. Nvahe ntakihero na moota munrowaanyu ovarihela muteko ele munxutteraanyu. (1 Atesalonika 5:17, 18)

¹⁰ Muhipwatthaka etempu mummusomaanyu Biblya ni etempu munvirihaanyu, muhihiye waasaasera mikhalelo sa ovarela muteko ele munsomaanyu. Vaavo munsomaanyu eparte emoha ya mBiblyani, mwiikoheke ha, ‘Moota heeni kinrowaaka ovarihela muteko miruku iya viinaano ni muhoolo?’ Mwa ntakihero, pooti weeraka yoosoma anyu ya Biblya emmuhela mpuwa 1 Atesalonika 5:17, 18. (Mmusome.) Mwasoma vale iversu iya piili, nyuwo pooti weemela ni wuupuwela imaara ikavi ni moota heeni mumpakaanyu mavekelo. Opwaha mwa yeeyo, nyuwo pooti wuupuwelela itthu munxukurelaanyu. Apaale nyuwo pooti othanla itthu iraru munrowaanyu omuxukurela Yehova vaavo mumpakaanyu mavekelo. Nnaamweera nvirihaka etempu vakhaani mphimelelaka ele munsomaanyu, noovira etempu, nyuwo munookhala mutthu oowiiwa ni ooweettela masu a Muluku. Nkuupuwelani moota munrowaanyu ottottela mureerelo mpakaka eyo mahiku ootheene ni iparte ikina sa mBiblyani munsomaanyu! Aani, nyuwo munookhala mutthu oovarela muteko masu a Muluku. Vanonto, wakhala weera munnaatteliwa ni itthu soovara, etthu heeni muntthuneyaanyu opaka?

MUKHALENO SOOLAKELA SOOREERA

11. Itthu heeni ikwaha ikina sinrowa oweerihakani wiisoona okhala oowaatteliwa? Nvahe ntakihero.

¹¹ Emaara mummusomaanyu Biblya ni waasaasera moota woovarihela muteko ele munsomaanyu, nyuwo pooti woona weera ti wooxupa. Muupuwele ha: Apaale olelo, yoosoma anyu ya Biblya enhela mpuwa miruku sa ohoonihera nthalu. (Yak. 2:1-8) Nyuwo munnoonelela weera munnatthuneya opaka matxentxo ni moota munaathokororaanyu akina, nto munnalakela opaka matxentxo awo. Eyo etthu yooreera! Ni omaalo, nyuwo munnathanla osoma otthuneya waya owehexexa moota munuulumaanyu. (Yak. 3:1-12) Nyuwo munnoonelela weera ikwaha ikina, itthu munuulumaanyu khaiyene ti soolipiha. Nto munnalakela weera wuuluma wanyu okhaleke woolipiha ni wooreera. Yoosoma anyu ya Biblya ya nihiku nikina, munnahela mpuwa otthuneya waya  osepa opaka onthamwene ni elapo. (Yak. 4:4-12) Nyuwo munnoonelela weera muntthuneya wiikosoopa ni moota munthanlaanyu matthekulelo. Evinre paahi mahiku vakhaani, nto nyuwo mohoonelela itthu sintxipale muntthuneyaanyu oreherera.

12. Mwaha wa heeni muhintthuneyaanyu okhulumuwa wakhala weera yoosoma anyu ya Biblya ennoonihera weera munnatthuneya opaka matxentxo mantxipale? (Nwehe enoota.)

¹² Wakhala weera nyuwo munnatthuneya opaka matxentxo mantxipale, muhikhulumuwe. Eyo ennoonihera weera mookhalano yoolakela yooreera. Mutthu oowiiyeviha ni oororomeleya, onnamusoma Biblya ni yoolakela ya woonelela matxentxo ontthuneyaawe opaka. a Muupuweleke weera, owara “omutthu wa nanano,” mukhalelo nintthuneyaahu ovirelela opaka. (Akol. 3:10) Etthu heeni enrowa wookhaviherani okhala mutthu ooweettela masu a Muluku?

13. Moota heeni nyuwo munrowaanyu othanlaka nummero nooreerela wa itthu munrowaanyu opaka? (Nwehe efootu.)

¹³ Ohiya weerera opaka matxentxo mootheene emaara emoha, muthanleke nummero nooreerela wa itthu muntthuneyaanyu opaka. (Mir. 11:2) Nyuwo pooti opaka ha: Mpakeke eliista ya itthu muntthuneyaanyu opaka matxentxo, avinyaka muthanleke etthu emoha naari piili muntthuneyaanyu opatxera, muhiyaka itthu ikina weera mpakeke emaara ekina. Munrowa opatxera eheeni?

14. Itthu heeni nyuwo muntthuneyaanyu opatxera?

¹⁴ Nyuwo pooti othanla opatxera ni etthu munoonaanyu weera onookhala wookhweya okwanihera. Naari nyuwo pooti othanla opaka matxentxo munoonaanyu weera tootepa otthuneya. Moonelela vale matxentxo muntthuneyaanyu opaka, muthola-thole iliivuru sahu,  apaale munvarihelaka muteko Índice das Publicações da Torre de Vigia naari Eliivuru Enaakhaliherya Anamoona a Yehova Otokosa Myaha Sikumiheriwe. Nvekeleke woohima sa yoolakela anyu, munvekeleke Yehova ‘otthuna ni-tho opaka.’ (Afil. 2:13) Muhoolo mwaya, nvariheleke muteko etthu muxuttenraanyu. Emaara nyuwo munoonelelaanyu weera moowera opaka matxentxo makina, nyuwo munoorowa okhalano ntthuno noovirelela opaka matxentxo. Nave munoorowa woonaka okhala wookhweya opaka matxentxo makina.

MUHIYE MASU A MULUKU ‘EVARAKA MUTEKO VARIYARI VA NYUWO’

15. Mwaha wa heeni atthu a Yehova eraaya oovirikana ni atthu antxipale emmusoma Biblya? (1 Atesalonika 2:13)

¹⁵ Atthu akina enhima weera aamusoma Biblya ikwaha sintxipale. Nto neereke awo ennamuroromela Biblya? Neereke ennanvarela muteko ni ennaakhulela weera atxentxe ikumi saya? Mooriipiha murima, ikwaha sintxipale waakhula wa nikoho nno ori hooye. Eyo ti yoovirikana ni atthu a Yehova! Ntoko akristu a eseekulu yoopatxera, hiyo ninnamwaakhulela Biblya “ntoko nsu na Muluku, sawasawa ninkhalaya vekhaikhai.” Opwaha mwa yeeyo, hiyo ninniilipihera woonihera weera owo onneettiha ekumi ahu. — Mmusome 1 Atesalonika 2:13.

16. Etthu heeni enrowa onikhavihera okhala atthu ooweettela masu?

¹⁶ Khaiyene ikwaha sootheene ti wookhweya weettela masu a Muluku. Hiyo pooti oviriha maxupo a ophwanya etempu weera nimusome Biblya. Naari emaara ekina hiyo pooti omusoma Biblya moowaakuveya nihinwera ophimelela ele ninsomaahu. Naari hiyo pooti woonaka weera nohaatteliwa ni matxentxo nintthuneyaahu opaka. Muhipwatthaka maxupo munvirihaanyu, nyuwo munoowera. Mukhaviheriwaka ni Yehova, nyuwo munoowera owina maxupo munvirihaanyu. Nintthuneya okhala oolikaneene waakhulela nikhavihero na Biblya nave nikhale atthu ohiya paahi oowiiwa, mene-tho ooweettela masu. Moohihovela, vaavo ninvirelelaahu osoma masu a Muluku ni ovarela muteko mweekumini mwahu, nnoorowa okhala oohakalala. — Yak. 1:25.