Emaara muniirehereraanyu weera mmusome Biblya, mwiikoheke ha, ‘Etthu heeni kintthunaaka oxuttera?’ Menento munoopaka nnene wiikosoopa weera muhihiye etthu ekina ewootxeelihakani woona etthu ekina Yehova onooxuttihaaweni. Moota heeni munrowaanyu osomaka ni muupuwelo wooreera?

Nvekeleke miruku. Munvekeleke Yehova weera ookhavihereni woonelela etthu owo ontthunaawe weera nyuwo muxuttere viinaano. (Yak. 1:5) Muxuttereke itthu inyowani muhintalaanyu othokorora. — Mir. 3:5, 6.

Muttittimiheke owera wa Biblya. “Nsu na Muluku ti ekumi.” (Aheb. 4:12) “Nsu” na Muluku nnoowera otxentxa mikhalelo sahu, vaavo ninvirelelaahu omusoma Biblya, mene eyo enkela weereya wakhala weera nnooxuttera etthu ni ele ninsomaahu naari neere, ottottela mureerelo ele ninsomaahu.

Muttotteleke mureerelo itthu sootheene Yehova onooxuttihaaweni. Yootxa awe yoomunepani enoolikana ni “[efesta] etokotoko ya inama soneneva.” (Yes. 25:6) Musepeke otupha masu yaawo munuupuwelaanyu weera khenrowa wookhaviherani. Mwapaka eyo ohiya paahi munrowa ottottela murerelo ele munsomaanyu, mene-tho munoowera wiiwexexa etthu Muluku onooxuttihaaweni!