1. Mikhalelo heeni amiravo araayano?

AMIRAVO nyuwo pooti ovareliwa muteko vantxipale mmarehereroni mwa Yehova. Nyuwo toolipa ni toosareya ikuru nyuwo mareeliho a muloko anyu pooti weera nyuwo munnoona opisa okhala murumeyi oorumela. Nyuwo pooti weeraka asinna a mmulokoni anwoonani okhala ooyevaxa, ni khamunaaye okwanela weera mwaakhele muritti sootthuneya mmulokoni. Nyuwo pooti otthara iphiro seiyo sineera sookhavihereni waasaasera okhala oottittimiheya ni ororomeleya mmulokoni.

2. Ninrowa woona eheeni mwa yoosomeene yeela?

² Mwa yoosomeene yeela ninrowa woona ntakihero na mwene Davidi. Nave ninkela wuupuwela itthu saaweerenle mamwene meeli o Yuda—Asa ni Yosafati. Ninrowa woona maxupo heeni mamwene ala mararu yaavirinhaaya, moota yoonenlaaya ni amiravo moota eneeraaya exuttere ni ntakihero naya.

3. Eheeni mmiravo okhanlaiye opaka weera amukhavihere munna oowuuluvala mmulokoni?

³ Davidi areene mmiravo, owo aakhalano mikhalelo atthu akina yahelaaya mwiitti. Vanooneya weera owo ari mmiravo oomunepani. Ni owo-tho ari mutthu ooratta wiipa, ni annavarela muteko oratta wawe weera amukhavihere mwene Sauli, mwene aathanliwe ni Muluku. (1 Sam. 16:16, 23) Ankhanto nyuwo amiravo, neereke yookhala etthu munweraanyu opaka weera mwaakhavihere atthu akina mmulokoni? Mwa ntakihero, pooti weera nyuwo munnoona weera mmulokoni aakhala asinna oowuuluvala ahinwera onvarela muteko nnene tablet naari telefoni, emaara ampakaaya yoosomaaya naari mmithukumanoni. Munoonela hayi ovarela muteko osuwela wanyu  weera mwaakhavihere? Moohihovela awo onimwaasivelavo.

4. Emutakihaka Davidi mikhalelo heeni amiravo antthuneyaya okhalano? (Nwehe elataratho ya vakaapani.)

⁴ Nenne nxiiye, Davidi annavara muteko awe ni ari oororomeleya. Mwa ntakihero, areene mmiravo, owo annakasoopa nnene iputtiputthi sa atithi awe. Moone weera muteko owo waari woowoopiha! Moone etthu amulenlaawe mwene Sauli: “Kaporo á akukhulaka inama sa atith’awe, arwiye kharamu (naari kusupa) ovara eputtiputthi munikholani, eyáá, vavale kànamusonda mpaka omwìpha ni omwàkha mmwanoni mwawe eputtiputthi.” (1 Sam. 17:34, 35) Davidi annakasoopa nnene iputtiputthi sa atithi awe, ni moolipa murima ahaakiha weera akasoope. Nyuwo amiravo, munoowera otthara ntakihero na Davidi mukasoopaka nnene miritti munvahiwaanyu.

5. Moovarihana ni Nsalmu 25:14, etthu heeni yootthuneya amiravo antthuneyaya opaka?

⁵ Areene mmiravo, Davidi aakhalano onthamwene woolipa ni Yehova. Ni khiyaavo yaari yootthuneya wa owo opwaha onthamwene awe ni Yehova, naari olipawawe murima naari owera wawe ntoko naitxipo. Vamaithoni va Davidi Yehova khaiyene aari Muluku awe paahi nto amoonela okhala nthamwene—nthamwene awe oororomeleya. (Mmusome Nsalmu 25:14.) Amiravo etthu yootthuneya muntthuneyaanyu opaka ori olipiha onthamwene anyu ni tithi anyu a wiirimu. Mweera hiiho nyuwo munimwaakhela iparakha sintxipale.

6. Atthu akina yaamoonela hayi Davidi?

⁶ Maxupo mwene Davidi aavirinhaawe waari moota atthu akina yaamoonelaaya moohireerela, mwa ntakihero, emaara Davidi aivelenlaawe weera awane ni Goliyathi, mwene Sauli aheerera omuhiiha eeraaka: “Weyo wà mmiravo’’. (1 Sam. 17:31-33) Ahinaye wuuluma ni Sauli, munnawe Davidi xaxaxa etthu uulummawe yaahoonihera weera owo amoona okhala oohikhomaala. (1 Sam. 17:26-30) Nto Yehova khamoona weera owo aari oohikhomaala naari mmiravo, owo aamusuwela nnene Davidi. Ni Davidi aroromelaka okhaviheriwa ni nthamwene awe Yehova, owo awera omwiiva Goliyathi.—1 Sam. 17:45, 48-51.

7. Muxuttenre heeni ni yooweereya ya Davidi ni Goliyathi?

⁷ Eheeni mukhanlaanyu oxuttera niile yamweerenle Davidi? Nintthuneya okhala oopixa murima. Atthu yaale awoonneni muyenveene awo pooti ohiroromela weera nyuwo mohunnuwa. Muroromeleke weera Yehova  khanoona ele maitho anoonaaya. Owo ohoosuwelani nyuwo taani, ni etthu munweraanyu opaka. (1 Sam. 16:7) Mulipihe onthamwene anyu ni Yehova. Davidi aapaka eyo awehexexaka soopattuxiwa sa Yehova. Owo annawera wuupuwelela itthu iyo saaxuttihaaya voohima sa Yehova. (Nsal. 8:3, 4; 139:14; Arom. 1:20) Etthu ekina nyuwo muntthuneyaanyu weera mpake, ontthuneya weera nyuwo munvekeleke Yehova weera oovaheeni ikuru. Mwa ntakihero, neereke nyuwo asikhwiinyu annootheyani mwaha wookhala Namoona a Yehova? Eyo yeereya, munvekeleke Yehova weera ookhavihereni ovilela maxupo awo, nvareleke muteko ele nyuwo munxutteraanyu mBiblyani, mwa ebuukhu sahu ni iviidiyu sahu. Ehuhu munoonaanyu weera Yehova onnookhaviherani oviriha maxupo anyu, omuroromela wanyu oneereke waatxeerereya. Ohiya eyo, emaara muneeraanyu nvireleleke omuroromela Yehova atthu akina eneereke woororomelani.

8-9. Eheeni yaamukhavihenre Davidi okhala oopixa murima mpaka okhala mwene? Ni eheeni amiravo akhanlaaya ooxuttera ni ntakihero nawe?

⁸ Moone maxupo makina Davidi aavirinhaawe. Athanliwakaru okhala mwene o Yuda Davidi aaweherera iyaakha sintxipale ahinaakuve opatxera olamula. (1 Sam. 16:13; 2 Sam. 2:3, 4) Ehuhu eyo aawehereraawe, eheeni yaamukhavihenre okhala oopixa murima? Ohiya okhala ookhulumuwa Davidi apaka ele aaweraawe. Mwa ntakihero, emaara owo amutthawaawe mwene Sauli mulaponi mwa afilisiti, owo aavarela muteko ehuhu eyo weera awane ni amwittani a Israeli. Mwaha woopaka eyo, owo aawera okasoopa minlaano sa Yuda.—1 Sam. 27:1-12.

⁹ Amiravo ankela oxuttera eheeni ni ntakihero na Davidi? Mpakeke ele munweraanyu weera mwaakhavihere asinna. Moone ele yaamweerenle munna Ricardo. * Emaara owo araawe mmiravo, owo aatthuna okhala piyoneiru a nthiti. Vano asitokweene a mmulokoni yaahoona weera owo khairehenre naari neere khaakhomanle moomunepani, nto yaamuleela weera aweherereke soko ni ailipihereke. Nto ohiya okhulumuwa oonaka opisa okhala piyoneiru ni onyoonyiwa, Ricardo ahilipihera weera areherere mukhalelo awe woolaleera attharaka miruku aavahinwaawe ni asitokweene owo onnahima: “Kuupuwelaka sa muttuli miyo kinnoona weera koopaka yoothanla yooreera mwaha woopaka matxentxo mweekumini mwaka. Miyo kannakhalela nthiti waaxekura ale kaasomihaka Biblya ni wiireherera moota woolaleera nnene kaatthikelaka oxekura. Nto mwaha woopaka eyo miyo kaawera okhalano yoosoma ya Biblya. Emaara miyo kaalaleyaaka, kannalipa moomunepani.” Mwaha woopixa murima ni wiiwelela miruku aavahiwaawe, vano Ricardo piyoneiru a nthiti ni murumeyi oorumeela.

10. Eheeni Davidi aapakaawe ahinaakuve opaka yoothanla yootthuneya?

¹⁰ Moone etthu ekina yaamweerenle Davidi. Emaara owo ni anakhotto awe yaatthawaaya, awo yaahaahiya amusi aya owaani weera yawane ekhotto. Emaara yaaraaya okhottoni, amwittanaaya yaahaatuphela amusi aya ni asaaraya. Davidi anwera wuupuwela weera miyo kanakhotto oolipa okhuma khalai, nto eyo yanmweeriha weera owo ooneke weera anwera waatuphela ni ikuru sawe paahi. Nto ohiya opaka eyo Davidi aahaasaasa nikhavihero na Yehova. Akhaviheriwaka ni namakeya Ebiyatari, Davidi aamukoha Yehova: “Kittharatthare etxipani ela ya alolo?” Yehova aamwakhula weera aani, ni aamuroromeliha weera Davidi aamukhumela nnene. (1 Sam. 30:7-10)  Eheeni mukhanlaanyu ooxuttera ni yooweereya ela?

11. Munkela opaka eheeni muhinaaye opaka yoothanla yootthuneya?

¹¹ Nvekele miruku sinkhuma mBiblyani muhinaakuve opaka yoothanla yootthuneya. Nvekele nikhavihero na asitithi anyu ni-tho, mwaavekele nikhavihero asitokweene arinono sookumanano sintxipale. Yehova onnaaroromela atthu awo aathanlalaawe, ni nyuwo-tho pooti waaroromela asitokweene awo Yehova onaaroromelaawe “ntoko yoovaha ya muloko naari ntthuvelo namuloko. (Aef. 4:8) Munoohakalala mwatakiha nroromelo na asinna awo ni wiiwelela miruku anoovahaayani. Vano ninkela oxuttera vakhaani ni ntakihero na mwene Asa.

12. Mikhalelo heeni Asa oonihenraawe akhalakaru mwene?

¹² Areene mmiravo mwene Asa aari mutthu oowiiyeviha ni oolipa murima. Mwa ntakihero, ekhwaakaru apapawe yaawo yeeriwa Abiya, owo aapatxera opaka ekampaanya yoomaliha okokhorela weethiru mulaponi mwawe. Owo-tho “Àmulaka Yuda wera amwàse Yahvéh Muluku aatithawe wera athokorore ikano ni malamulo.’’ (1 Sow. 13:23-14:6 [14:1-7 Traduçao do Novo Mundo]) Emaara Serahi Muthiyope amutuphenlaawe Yuda ni anakhotto emiliyawu emoha Asa aakhalano miruku ni anvekela nikhavihero Yehova, eeraka: “Yahvéh, weyo khonòtxela omukhavihera mwamukhani awanaka ekhotto ni mutokweene. Onikhavihere, txontte, Yahvéh Muluku ahu, niwoko hiyo ninnòroromela weyo.” Masu ala ooreera uulummaawe annoonihera weera owo ni atthu awe yanniroromela ovuluxiwa ni Yehova. Asa aamuroromela Tithi awe a wiirimu, ni “Yehova áwiiva anakhotto ale a wetíyope.”—2 Sow. 13:23-14:6, 7-11 [14:1-7, 8-12 NM].

13. Moottharelana eheeni yeereñye ni mwene Asa ni mwaha wa heeni?

¹³ Veekhaikhai nyuwo munnawera wuupuwela weera owana ni anakhotto ummiliyawu khawaari wookhweya. Mene Asa aakhumela nnene okhottoni. Mooripiha murima muhoolo mwaya, emaara akumannaaweno maxupo yaari ooyevaxa Asa khaavekenle nikhavihero wa Yehova. Oopopihiwakaru ni mwene a wisrayeli, Baaxa, Asa anvekela nikhavihero mwene a waarami [Awaasiriya]. Mwaha Asa woothanla opaka eyo, yaawihera maxupo mantxipale!  Moorweela mwa mprofeti Hanani, Yehova aamulela Asa: “Wohiphitera ni mwene a warami [Awaasiriya], omuhiyaka Yahvéh Muluku á tivó anakhotto amwene a waarami [Awaasiriya] yátthanwáya mmatatani mwa.” Okhuma ehuhu ele, Asa khayaammalela ekhotto ni mwene Baaxa. (2 Sow. 16:7, 9; 1 Mam. 15:32) Eheeni nikhanlaahu ooxuttera?

14. Munkela woonihera hayi weera munnamuroromela Yehova? Mwapaka eyo, moovarihana ni 1 Timotheyo 4:12, enrowa okhumela eheeni?

¹⁴ Muhihiye tthiri okhala oowiiyeviha ni otthara miruku munvahiwaanyu ni Yehova. Nyuwo mBatiziwakaru mohoonihera weera mookhalano nroromelo ni muntthuna tthiri omwiiwelela Yehova. Ni Yehova oohakalala woovahani eparakha yooweerela empari emusi awe. Nto, esiiri tiyooweera nvireleleke omuroromela Yehova. Nyuwo pooti omuroromela Yehova wakhala weera muntthuna opaka yoothanla mweekumini mwanyu, nkha nto mwaatthunaka opaka soothanla sooyeva? Tivootthuneya omuroromela Yehova mwaapakaka soothanla, pooti weera soothanla ti sooyeva, ntoko othanla moota wootthekula, naari soothanla itokweene, ntoko othanla muteko wooreera ovara ni sooluluwanya soomunepani muntthuneyaanyu okwanihera! Muhiroromele osuwela wanyu. Ohiya eyo nto mwaasaase miruku sa mBiblyani sinvarihana ni maxupo anyu. Nvareke muteko itthu munxutteraanyu. (Mir. 3:5, 6) Mwapaka etthu eyo, Yehova onoohakalala vantxipale ni nyuwo mweera haawo munoophwanya nttittimiho mmulokoni.—Mmusome 1 Timotheyo 4:12.

15. Ntoko nonnaahu va 2 Sowereya 18:1-3 ni 19:2 etthu heeni yoonanara Yosafati aapakaawe?

¹⁵ Ekhaikhai weera, atthu ootheene, toohimalela. Pooti opaka soonanara imaara ikina. Eyo ehoohiheni onvarela muteko Yehova. Moone ntakihero na mwene Yosafati. Owo aakhalano mikhalelo sooreera. Areene mmiravo, “mene amwàsale Muluku àtith’awe, attharaka malamulo awe.” Opwaha mwa yeeyo, owo aahaaruma arumeyi awe weera ehusihe mittetthe sa Yuda weera mmatatani mwaya ebuukhu ya ikano sa Yahvéh. (2 Sow. 17:4, 7) Naamwi aari mutthu ooreera murima Yosafati ahipaka soothanla soonanara. Mwaha wa soothanla iyo soonanara. Yosafati aavahiwa miruku ni murumeyi mmoha a Yehova. (Mmusome 2 Sowereya  18:1-3; 19:2.) Eheeni ninxutteraahu ni ntakihero nawe?

16. Eheeni mukhanlaanyu ooxuttera ni yooweereya ya munna Rajeev?

¹⁶ Mwaakhulele ni nvareleke muteko miruku munvahiwaanyu. Pooti weera, ntoko amiravo akina, nyuwo pooti woona oxupa othanla etthu yootthuneya mweekumini mwanyu. Nto muhikhulumuwe. Moone etthu yaamweerenle munna onitthaniwa Rajeev. Uulumaka ele yaamweerenle, owo ohimme há: “ikwaha ikina miyo nkaasuwela etthu kaatthunaaka opaka mweekumini mwaka. Ntoko amiravo akina miyo kaapwattha axooku, ohiya okela omithukumanoni naari olaleera.” Eheeni yaamukhavihenre Rajeev? Saari miruku aavahinwaawe ni mutokweene mmoha a mmulokoni ooreera murima. Rajeev onnahima: “Owo aakikhavihera wuupuwelela miruku siri va 1 Timotheyo 4:8.” Rajeev aahiiyeviha ni ahiiwelela miruku aavahiwaawe, ahuupuwela etthu yeera ekhale yoopatxera mweekumini mwawe. Owo ohimme há: “Miyo kaapatxera ohela nipuro noopatxera sooluluwanya soomunepani.” Eheeni yaakhumelenle? Rajeev onnavirelela othaliha eeraka, “Sivinreene iyaakha vakhani kivahimmwene miruku iye, miyo kaakhala murumeyi oorumela mmulokoni.”

17. Asinna oowunnuwela anwoonela hayi amiravo?

¹⁷ Asinna oowunnuwela annoohelani mwiitti nyuwo amiravo, muninvarela muteko Yehova “makhata ni makhata” Moohihiyerera! (Sof. 3:9) Awo onnaasivela yaawoonakani nyuwo mukwaniheraka soothanleliwa sanyu, ikuru sanyu ni moota munuulumaanyu. moohihovela awo annasiveliwa vantxipale ni nyuwo.—1 Yoh. 2:14.

18. Moovarihana ni Miruku 27:11, Yehova oniwoonela hayi amiravo aninvarela muteko?

¹⁸ Amiravo muhittiwale weera Yehova onnosivelani vantxipale ni onnoororomelani. Owo aalaihera weera mahiku oomalihera yaamukhala anakhotto amiravo yeera yiivaherere. (Nsal. 110:1-3) Yehova oosuwela moota nyuwo mummusivelaanyu, ni oosuwela weera nyuwo muntthuna onvarela vantxipale. Nto mukhale oopixa murima ni atthu akina ni mwiipixereke murima moone eyo ntoko nikhavihero ninkhuma wa Yehova. (Aheb. 12:6) Mukwanihereke soothanleliwa sanyu ni murimaanyu wootheene nto etthu yootthuneya, mwa itthu sootheene munkelaanyu opakaka mmuhiye Tithi anyu a wiirimu ahakalanleene.—Mmusome Miruku 27:11.