1-2. Taani aneera amukhavihere namasoma a Biblya oBatiziwa?

“MIYO yannakisivela vantxipale ele kaaxutteraaka va yoosomaaka. Miyo kaasuwela weera yaari ekhaikhai. Nto kipatxerakaru otthekula ni asinna, kapankaaka matxentxo a mweekumini mwaka weera kiBatiziwe.” Ti yeeyo nto Amy, murokora mmoha onkhala oFiji, ohimmaawe. Masu uulummaiye enttittimihera ekhaikhai yootepa otthuneya: Namasoma a Biblya onoolakela oBatiziwa wakhala weera onnaakhela nikhavihero na asinna akina a mmulokoni.

² Namalaleera ori poothe pooti okhavihera wunnuwa wa muloko. (Aef. 4:16) Piyoneira mmoha oneeriwa Leilani, onkhala Vanuatu, ohimme ha: “nxiripulo nimoha ninhima ha, muttetthe wootheene onnakhavihera weera omuxuttihe mwaana. Miyo kinoona weera eyo ennavareleya muteko naapakaka ooxuttera. Mwa sootheene, ennatthuneya asinna ootheene a mmulokoni weera enwiihe mutthu mweekhaikhai.” Atthu a veemusini, asinthamwene ni maprusoore, atthu ootheenaala aakhalano muritti woomukhavihera mwana okhalano mikhalelo sooreera. Awo annapaka eyo emuxuttihaka itthu sootepa otthuneya sa mweekumini mwawe. Emoha-moharu, anamalaleera pooti ovaha miruku, omulipiha ni ovaha ntakihero nooreera wa ale emmusoma Biblya. Yeera hiiho enimwaakhavihera ovirelela wunnuwa moomunepani mpaka oBatiziwa.—Mir. 15:22.

3. Eheeni nyuwo muxuttenraanyu ni ikomentaariyu sa Ana, Dorin ni Leilani?

³ Asinna ootheene a mmulokoni pooti omukhavihera namasoma a Biblya ni muhusiha ommuxuttiha Biblya, axukureleke mwaha wa eyo. Nwehe ele Ana, piyoneira especial oMoldevia ohimmaawe: “Ti woovila vantxipale mutthu meekhaaweru okwanihera sootthuna sa ole onimusomihaawe aapatxeraka wunnuwa moomunepani.” Dorin, Piyoneiru mukina onkhala-tho oMoldevia ohimme ha: “Anamalaleera  akina ennahima etthu enanvara murima namasoma a Biblya, etthu kahintalaaka wuuluma.” Leilani onnahima mathowa makina: “Namasoma oonaka nsivelo ni nttittimiho asinna a mmulokoni anooniheraaya, owo onnoona tthiri weera hiyo atthu a Yehova.—Yoh. 13:35.

4. Ninkela woona eheeni wa yoosomeene yeela?

⁴ Nyuwo pooti weera munniikoha ha: ‘Miyo kinrowa omukhavihera hayi namasoma a Biblya okela vahoolo kihikhanleene muhusiha awe?’ Wa yoosomeene yeela, ninkela woona etthu yoopaka naamuhoolaka munna opakiha yoosomaawe. Nave-tho, ninkela woona etthu nneeraahu nipake wakhala weera namasoma a Biblya oopatxera woonela mithukumano. Omamaliheroni ninkela woona ele asitokweene a mmulokoni eneeraya epake weera emukhavihere namasoma a Biblya oBatiziwa.

5. Mwawompwa omuhoola munna orowela yoosomaawe muteko anyu onrowa okhala toovi?

⁵ Wa yoosoma ya Biblya, orino muritti woomwiiwexexeiha namasoma a Biblya, masu a Muluku, muhusiha. Wakhala weera muhusiha ohoowopani nyuwo weera mmuhoole, nyuwo mwiisooneke okhala mukhwiinyu. Muteko anyu omukhavihera. (Koh. 4:9, 10) Eheeni nyuwo muneeraanyu mpake weera yoosoma ele ekhale ya nnene?

6. Mwamuhoola munna opakiha yoosomaawe, munkela ovarihela hayi muteko yoolepa ya Miruku 20:18?

⁶ Mwiireherereke mwaarowaka opakiha yoosoma ya Biblya. Woopatxerani, mmukohe muhusiha itthu vakhaaniini voohima sa ole onimusomihaawe. (Mmusome Miruku 20:18.) Nyuwo pooti omukoha ha: “Sooweereya heeni sa namasomaanyu? Mwaha heeni munrowaanyu osomano olelo va? Yoolakelaanyu tiivi wa yoosomeene yeela? Sookhala itthu ikina kineeraaka kuulume, emaara muneeraanyu mwamuxuttiheke? Eheeni eneera yamukhavihere namasomaanyu orowa vahoolo?” Ekhaikhai weera muhusiha khankela wooleelani itthu sootheene sa namasomaawe, mene ele onkelaawe wooleelani enimookhaviherani. Missionariya mmoha oneeriwa Joy onnuuluma inyaha iyo, areene naasirokora emmuhoola wa yoosomaawe ya Biblya. Ola ohimme ha: “Miyo onnikisivela wuuluma nyaha iya kireene ni murokora onkihoola moolaleerani mwaha weera eyo ennamukhavihera ole onkihoola woonihera ntthuno wa yoosomaaka ni osuwela ele aneeraawe apake emaara ninkelaahu osoma.”

7. Ohiya omuhoola paahi munna wa yoosomaawe, heeni varaaya wooreerela wiireherera?

⁷ Wakhala weera nyuwo moowompwa weera mmuhoole munna wa yoosomaawe, onnireerela wiireherera muhinaaye mwaha onkela othokororiwa. (Ezara 7:10) Dorin, ohimmwale woopatxerani, oneera: “Miyo onnikisivela vantxipale munna ankihoola mmutekoni woolaleera weera iirehereraka. Eera hiiho, owo onnavaha ikomentaariyu sooreerela.” Opwaha mwa yeeyo, wakhala weera muhusiha ni mutthu ole onahoola ohiireherera, namasoma a Biblya onimoonana eyo ni enoohiya ntakihero nooreera wa namasoma ole. Naamwi  muhiwenre oreherera nnene mwaha ole onkela wuulummwa, muhiye ehuhu vakhaaneene weera mwiikhovelelihe ipontu iye sinkela wuulummwa.

8. Munkela ororomela hayi weera nivekelo nanyu nnoomukhavihera namasoma a Biblya?

⁸ Nivekelo etthu yootepa otthuneya emaara empakiwaaya yoosoma. Mwaha wa yeeyo, muupuwele etthu munkelaanyu ovekela ovekela wakhala weera muhusiha ohoovekelani opaka nivekelo. Mweera hiiho, pooti weera nivekelo munkelaanyu opaka nnookhala nookhavihera. (Nsal. 141:2) Nwehe ele yaakhumelenle ni Hanae, onkhala oJapão. Emaara aamusomaaiye Biblya, murokora aamusomiha emaara ekina annaakuxa asirokora akina yaamuhoola wa yoosomaawe. Mpaka olelo va Hanae onnuupuwela mavekelo murokora owo aapakaawe. Owo ohimme ha: “Miyo kannoona moota awo yaakhalannaaya onthamwene woolipa ni Yehova, ni miyo kaatthuna okhala antoko awo. Emaara yootheene yaaromolaaya nsinanaka yaapakaka nivekelo, miyo kannoona weera miyo kaari oosiveleyaxa.”

9. Moovarihaa ni Yakobe 1:19, eheeni muneeraanyu mpake weera mmukhavihere ole onipakiha yoosoma ya Biblya?

⁹ Mmukhavihe muhusiha emaara onsomihaawe. Omamuyovbi, piyonera especial onkhala oNigeria ohimme ha: “Mukhwaaka ooreera onkihoola ti yoole onwiriyana. Owo onnavaha ikomentaariyu emaara nimpakaahu yoosoma, nto owo ahuulumeke vantxipale, mwaha weera oosuwela weera muhusiha taneera eettiheke yoosoma.” Nto, emaara heeni munkelaanyu wuuluma ni eheeni munkelaanyu ohima? (Mir. 25:11) Mukhale oowiriyana emaara muhusiha ni namasoma a Biblya enuulumaaya. (Mmusome Yakobe 1:19.) Mweera hiiho, munoowera okhavihera ehuhu yoophwanelela. Ekhaikhai weera, nyuwo ontthuneya okhalano moonelo wooreera. Mwa ntakihero, nyuwo khontthuneya wuuluma vantxipale, okwasa muupuwelo wa muhusiha naari otxentxa mwaha. Nto nyuwo pooti omukhavihera wiiwexexiha epontu enuulummwa ni nvarelaka ikomentaariyu sanyu, naari nvarelaka niphwanaphwaniho naari mpakaka nikoho. Ikwaha ikina, nyuwo pooti woona weera khamunkhavihenra vantxipale yoosoma eyo. Yeereya eyo, mmuttottopele namasoma a Biblya ni moonihere weera munnampwattha. Mweera hiiho munoomukhavihera namasoma a Biblya okela vahoolo.

10. Sookumanano sanyu sinkela omukhavihera hayi namasoma a Biblya?

¹⁰ Muthalihe sookumanano sa mweekumini mwanyu. Muthalihe sookumanano sanyu, wakhala weera onnareerela, nyuwo pooti ohima moowakuveya mmuleelaka namasoma a Biblya moota nyuwo muxuttenraanyu ekhaikhai, moota nvirinhaanyu maxupo naari moota Yehova ookhavihenraawene mweekumini mwanyu. (Nsal. 78:4, 7) Sookumanano sanyu pooti okhala yeeyo namasoma a Biblya anhaawelaawe wiiwa. Mwahima sookumanano sanyu, munoolipiha nroromelo nanyu ni omuttuttha namasoma a Biblya mpaka oBatiziwa. Taani onsuwela wakhala weera sookumanano sanyu sinoomukhavihera oviriha maxupo a mweekumini mwawe. (1 Ped. 5:9) Gabriel, onkhala oBrazil  yoowo olelo va onvara muteko woopiyoneiru, onnuupuwela etthu yaamukhavihere emaara aaraawe namasoma a Biblya. Owo ohimme ha: “Emaara kiiwaaka sookumanano sa asinna, miyo kannoona weera Yehova annoona maxupo aka. Awo yaawenre oviriha maxupo awo miyo tho kinoowera.”

11-12. Mwaha wa heeni ontthuneyaaya owaakhela nnene anamasoma a Biblya yaapatxerihaka orowela mithukumano?

¹¹ Weera namasoma a Biblya aBatiziwe, ontthuneya woonela mithukumano veeli-veeli ni ottottela mureerelo. (Aheb. 10:24, 25) Pooti weera, muhusiha awe toneera anwope weera oonele muthukumano awe woopatxera. Owo aphiya empa ya Omwene, ootheene hiyo ontthuneya omuttottopela weera avirelele woonela mithukumano. Ninkela opaka moota heeni eyo?

¹² Mmwaakhele nnene namasoma a Biblya. (Arom. 15:7) Oona weera ohaakheliwa nnene namasoma a Biblya, pooti weeraka owo onootthuna-tho otthika nihuku nikina empa ya Omwene. Muhimuhiye oowiikhuraaneene mene mmuulumihe ni nwoonihere asinna akina. Muhuupuweleke weera ookhala munna mukina onampwattha. Pooti weeraka munna ommusomiha khanaakuve ophiya naari pooti weeraka ookhala onvaraiye. Nwiriyaneke ele namasoma a Biblya onhimaiye ni moonihereke weera munnampwattha. Mwamwaakhela nnene namasoma a Biblya, onkela woonela hayi? Moone ele yaamukhumelenle owo oBatiziwe iyaakha sa muttuli, olelo va owo Murumeyi oorumeela. Nihuku aapatxenraiye woonela mithukumano, owo onnahima: “Miyo keemenle vaate Empa ya Omwene kiwehereraka ni kannahaawela ovolowa. Munna aakoona ni mwansivelo aakikuxa anakivoloiha. Asinna antxipale yaahoowa okuulumiha. Miyo kaatikhinihiwa vantxipale. Miyo kaahuupuwela, kannatthuna mahuku ootheene avasumanani woonela mithukumano. Miyo kaahoona etthu, kihintalaaka woona nipuro nri poothe.”

13. Moota heeni mukhalelo anyu onkelaaya omukhavihera namasoma a Biblya?

¹³ Nvahe ntakihero nooreera. Mukhalelo anyu pooti omukhavihera namasoma a Biblya woona weera oophwanya ekhaikhai. (Math. 5:16) Olelo onvara muteko wa opiyoneiro oMoldavia, owo enre ha: “Miyo kannawehexexa moota yaakhalaaya, moota yuupuwelaaya ni moota woopaka itthu a sinna a mmulokoni yaapakaaya. Miyo kaaroromela weera Anamoona a Yehova, aneetta tthiri ni Muluku.”

14.Ntakihero nanyu ninkela omukhavihera hayi ole onimusoma Biblya okela vahoolo?

¹⁴ Namasoma a Biblya ahinaakuveene oBatiziwa, owo ontthuneya ovarihela muteko ele onxutteraawe. Eyo kheiyono etthu yookhweya. Nto namasoma a Biblya aawoonakani weera munnavarela muteko miruku sa mBiblyani, ni-tho weera onnoophwanyihani ohakalala, owo tho aneereke otthuna opaka etthu emohamoharu. (1 Akor. 11:1) Nwehe ntakihero na Hanae, ohimmwale woopatxerani. Owo ohimme ha: “Asinna a mmulokoni  yaari ntakihero nooreera wa ele kaaxutteraaka. Kaaxuttera moota woowaahakalaliha atthu akina, woowaalevelela ni woowoonihera nsivelo. Imaara sootheene asinna yannuuluma itthu sooreera mukina ni mukhwaawe. Ni miyo tho kaatthuna okhala antoko awo.”

15. Moovarihana ni Miruku 27:17, mwaha wa heeni oraaya wootthuneya opaka onthamwene ni ole onimusoma Biblya?

¹⁵ Mpake onthamwene ni ole onimusoma Biblya. Emaara ole onimusoma Biblya onvirelelaawe woonela mithukumano, moonihere weera tthiri munnampwattha. (Afil. 2:4) Mwiivahe ehuhu weera mutthekule ni namasoma a Biblya. Muhithola-tholaka isiiri sawe, mmuttottopele namasoma a Biblya ni matxentxo ootheene opankaawe. Mmukohe moota eneettaaya yoosomaawe ya Biblya, emusi awe ni muteko awe. Otthekula ni inyaha iya, nyuwo eeli munookhalano onthamwene wooreera. Eyo pooti omukhavihera namasoma a Biblya okhalano ntthuno nooBatiziwa. (Mmusome Miruku 27:17.) Hanae olelo va piyoneira a nthiti (regular) ohimaka emaara owo aapatxenraaiye woonela mithukumano, owo enre ha: “Emaara kaapakaaka asinthamwene mmulokoni, miyo kannitthuna woonela mithukumano. Naamwi kaareene ookhulumuweene, miyo kannarowa omithukumanoni. Miyo kannatthuana okhala ni asinthamwenaaka kaapankaaka vaanaanoru. Ni eyo yaakikhavihera othikila onthamwene ni ale yahaamukokhorela Yehova. Miyo kaatthuna okhalano onthamwene woolipa ni Yehova ni asinna a mmulokoni. Nto kaalakela oBatiziwa.”

16. Etthu heneni ekina muneeraanyu mpake weera mmukhavihere namasoma a Biblya okhala ootaphuwa mmulokoni?

¹⁶ Emaara namasoma a Biblya onvirelelaawe wunnuwa moomunepani ni apakaka matxentxo mweekumini, mmukhavihere woona weera onneerela empari ya muloko. Moota woopaka eyo ori omwaakhela nnene owannyinyu. (Aheb. 13:2) Uupuwelaka emaara owo aaraawe namasoma a Biblya, Denis onvara oMoldavia, ohimme ha: “Ikwaha sintxipale miyo ni amwaaraka, nannawompwa orowa otthekula mmawannyaya asinna. Ikwaha iya, yannahima moota yaakhaviherinwaaya ni Yehova, ni eyo yannanilipiha. Nto eyo yaanivara murima nnalakela onvarela Yehova, nitho naamukhalano ekumi yooreera” Namasoma a Biblya aakhuleliwa okhala namalaleera, nyuwo pooti onwopa weera mwalaleere ootheene, namalaleera onkhala oBrazil, ohimme ha: “Asinna antxipale yannakiwopa weera navare muteko woolaleya ootheene. Eyo yaakeeriha waasuwela nnene asinna ale. Kannaxutta itthu sintxipale ni asinna awo, miyo kannoona weera kannakhala nthamweni a Yehova ni Yesu.”

17. Asitokweene a mmulokoni ankela waakhavihera hayi anamasoma a Biblya?

¹⁷ Mwiivahe ehuhu weera mwaakhavihere anamasoma a Biblya. Asitokweene a mmulokoni nsivelo naya, ni waapwatthawaya anamasoma a Biblya, pooti waakhavihera oBatiziwa. Munoonela  hayi wiivaha ehuhu emaara mithukumano simphiyaaya okhwipi ni otthekula ni anamasoma a Biblya? Awosa yapatxera ovaha ikomentaariyu saya, nwiitthaneleke nsinanaya. Mweera hiiho awo animoona weera nyuwo munnaapwattha. Emaara ekina, mwiireherere weera mmutthare namalaleera onrowa opakiha yoosomaawe. Mweera hiiho moota muneeraanyu mmukhavihere namasoma pooti okhumelela etthu mwahuupuwelaanyu, piyoneiru onkhala oNigeria, ohimme ha: “Anamasomaaka a Biblya annatikhiniheya vantxipale yoonelela weera munna aakihonle wa yoosomaaka aari mutokweene a mmulokoni. ‘Namasomaaka mmooha mpaka aakeerela ha: Pastoore aka khankhalakhala apakaka yeeyo owo onaaxekura paahi atthu ookhalano muhakhu nitho yamuliva vale!’” Namasoma owo vano onnoonela mithukumano.

18. Asitokweene a mmulokoni anrowa okwanihera hayi muritti avahiwaaya ori va Miteko 20:28?

¹⁸ Mwaaxuttihe ni mwaalipihe anamahusiha. Asitokweene a mmulokoni, nyuwo mookhalano muritti mutokotoko mmulokoni: waaxuttiha anamalaleera okhumela nnene moolaleerani ni opakiha yoosoma ya Biblya. (Mmusome Miteko 20:28.) Pooti weera namalaleera woona wuuliha muru opakiha yoosoma ya Biblya nyuwo mureene vaavo. Yeereya hiiho, mwiivaherere weera mpakihe yoosoma eyo. Jackie, yoole oromoliwe woopatxerani iwe, ohimme ha: “Asitokweene a mmulokoni ennakikoha voohima sa yoosomaaka. Kaphwanya maxupo wa yoosomaaka, awo ennakivaha miruku wa yoosomaaka.” Asitokweene a mmulokoni aakhalano muritti woowaalipiha anamasomiha ni waakhavihera weera ehihiye ovirelela wiilipihera. (1 Ates. 5:11) Jackie onnaatxeerera: “Miyo onnakisivela vantxipale vaavo asitokweene a mmulokoni yaakilipihaka ni yaakeerelaka weera muteko aka tiwootthuneya. Masu ntoko awo, ennakilipiha, ntoko maahi ari mmwaapuni ehuhu yooviha. Ottottopela waya, onnaatxeerera nroromelo naka, nave waatxeerera ohakalala waka kipakihaka yoosoma.”—Mir. 25:25.

19. Ohakalala heeni atthu ootheene hiyo nneeraahu niphwanye?

¹⁹ Naamwi viinaano vaava muhipakihaka yoosoma ya BIblya, nyuwo pooti omukhavihera mutthu mpaka oBatiziwa. Mwaamuhoolaka munna opakiha yoosomaawe, mwiireherere weera nvahe ikomentaariyu sooreerela sinkela omukhavihera muhusiha, mwiikasoopaka weera muhuulume vantxipale. Mpake onthamwene ni anamasoma a Biblya ampatxeriha oweela mithukumano ni anrowa Empa ya Omwene, ni mukhale ntakihero nooreera wa yaawo. Wakhala weera nyuwo mutokweene a mmulokoni, mwaalipihe anamasoma a Biblya mwiivahaka ehuhu weera mutthekuleno. Ni mwaalipihe anamasomiha mwaahusihaka ni mwaattottopelaka. Mweera hiiho, nyuwo munohakalala omukhavihera mutthu omusivela tithiihu a wiirimu.