1. Moovarihana ni Matheyo 24:9, mwaha wa heeni niittiwaka vale nihintikhinaahu?

YEHOVA onipattunxe weera nsivelaneke, tiyeeyonto emaara nniittiwaahu ninxupeyaahu ni nnoovaahu. Mwa ntakihero, murokora mmoha oneeriwa Georgina, onkhala w’Europa, enre ha: “Emaara kaaraakano iyaakha 14, amayaka yannakiitta mwaha woothanla okhala Namoona a Yehova. Miyo kannoona weera nkaapwatthiwa, kaapatxera wiihovela weera khaiyono kaari mutthu a nnene.” * Munna mmoha oneeriwa Danylo olempe ha: “Ekimanakaru anakhotto, okiveeha ni okoopopiha mwaha wookhala Namoona a Yehova, kaahoova ni kaahuuliwa muru.” Wiittiwa moota owo onnanivoreya, mene eyo khennitikhiniha. Mwaha weera Yesu aahima weera naarowa wiittiwaka.—Mmusome Matheyo 24:9.

2-3. Mwaha wa heeni atthareli a Yesu aniittiwaaya?

² Atthu ennawiitta atthareli a Yesu. Mwaha wa heeni? Mwaha wooweera nimmutakiha Yesu, “niheerelaka empari elapo.” (Yoh. 15:17-19) Naamwi naattittimihaka anamalamulela a elapo, hiyo ninnakhootta waakokhorela ni okokhorela ithoonyero saya. Hiyo nimmukokhorela Yehova paahi. Hiyo ninnaroromela weera Yehova taneera awere waalamulela atthu nnene—Satana ni osuulu awe annavirelela “ovirikanyiha” olamulela wa Muluku. (Eph. 3:1-5, 15) Hiyo ninlaleya weera Omwene wa Muluku teri yooweherera yooreera ya atthu ni weera tho onimwaamaaliha atthu ootheene anvirikanyiha Omwene owo. (Dan. 2:44; Apok. 19:19-21) Mitthenka iya sinnaasivela ale ari anaxariya nave-tho sinnaananara ale ari oonanara murima.—Nsal. 37:10, 11.

³ Etthu ekina eneeriha weera niittiweke, eri yooweera ninkhala moovarihana ni malamulo a Muluku. Hiyo nalikanxera malamulo  a Muluku ni malamulo aatthu, ninnoona ovirikana waya. Mwa ntakihero, Muluku aanyaanya mittetthe sa oSodoma ni Gomora. Mwaha wa itthu soonanara saapakiwa mittetthe iyo! Mahikwaano sinnipakiwa itthu imohamoharu saapakiwa oSodoma ni oGomora. (Yuda 7) Mwaha wootthara malamulo a mBiblyani ni niittaka itthu iyo simpakiwa, atthu antxipale annaniveeha ni ehimaka weera nookhalano nthalu!—1 Ped. 4:3, 4.

4. Mikhalelo heeni sinnikhavihera ovilela naittiwaka?

⁴ Eheeni enrowa onikhavihera naittiwaka ni naaruwaniwaka ni atthu? Ontthuneya okhalano nroromelo noolipa weera Yehova onoonikhavihera nroromelo ninkhala ntoko exikudu ennikhavihera “otxipiha mavaka othene a mulipa oonanara.” (Aef. 6:16) Onnitthuneya tho okhalano nsivelo ohiya nroromelo paahi. Mwaha wa heeni? Mwaha wooweera ole onsivela “khanaakuvela onyoonyiwa.” Mutthu owo onnavilela itthu soothesene naamwi anyoonyihiwaka. (1 Akor. 13:4-7, 13) Vano ninrowa woona omusivela wahu Yehova, waasivela wahu asinna, ni waasivela amwiittani ahu oneeraawe onikhavihere naittiwaka vale ni amwiittani ahu.

5. Eheeni yanvahe ikuru Yesu weera awere oviriha maxupo yeera emukhumelele muhoolo?

⁵ Ahinaaye wiiviwa ni amwittani awe, Yesu aahaleela atthareli awe oororomeleya weera: “Kinnatthuna atithi [ni tho,] ntoko atithi akilamunlaya siso kinnapanka.” (Yoh. 14:31) Nsivelo Yesu aakhalannaawe ni Yehova, nanvaha ikuru weera awere ovilela maxupo yeera emukhumelele muhoolo. Nave-tho omusivela wahu Yehova onoonikhavihera ovilela naavirihaka maxupo.

6. Moovarihana ni Aroma 5:3-5, moota heeni arumeyi a Yehova enoonelaaya yiittiwaka ni elapo?

⁶ Omusivela Yehova waahakhavihera arumeyi akhalayi ovilela emaara yaasonttiwaaya. Mwa ntakihero, nihiku nimoha etribunale etokweene ya aYuda, yaahaakhoottihera atthareli olaleera. Nto arummwa yannamusivela vantxipale Muluku tiyeeyo yaaweerinhe olakela othanla “omwiiwelela Muluku waapwaha atthu.” (Mit. 5:29; 1 Yoh. 5:3) Etthu emoharu ennaweereela tho anna olelo va. Asinna antxipale ennihaawa vantxipale mwaha woosonttiwa ni anamalamulela oowera ni oowuuma murima, nto nsivelo asinna awo ekhalannaaya ni Yehova, ninnaavaha ikuru ni ovilela. Mwa yeeyo, elapo ya niitta hiyo khaninkhala ootteettheya. Opwaha mwa yeeyo, ninnoona okhala ntoko eparakha.—Mit. 5:41; Mmusome Aroma 5:3-5.

7. Nooneleke hayi emaara ninsonttiwa ahu ni amusaahu?

⁷ Pooti weera yoowereriwa ahu etokweene enrweela mwa amusi ahu. Naasiveliwaka ni ekhaikhai, amusi ahu pooti wuupuwelaka weera nnoowokiwa. Akina pooti wuupuwelaka weera noomaniwa mpalaka. (Munwehe tho Marko 3:21.) Awo pooti opatxera ontthara-tthara noowali, nto owali owo ohintikhiniheke. Yesu enre: “Amwittana a mutthu ahim’awe yowo.” (Math. 10:36) Naamwi amusi ahu awo evirelelaka oniitta, hiyo khaninwoona ntoko amwiittani. Moovirikana, emaara nnaatxeereraahu omusivela Yehova nave-tho naatxeerereke waasivela wahu atthu. (Math. 22:38, 39) Mene nihihiye weettela malamulo a mBiblyani weera naasivelihe amusi ahu naari atthu akina.

8-9. Eheeni emukhavihenre murokora naamwi aaviriha maxupo mantxipale?

⁸ Georgina, yoole ahimmwale woopatxerani, owo aawera ovilela naamwi aahaawa osonttiwa ni amannye. Georgina onnathaliha ha: “Miyo ni amayaka naapatxera omusoma Biblya ni Anamoona a Yehova. Sivirakaru minyeeri mithanu namosa (6) kilakelakaru woonela mithukumano, mukhalelo wa amayaka waatxentxeya. Kaahoonelela weera awo yootothiwa ni anamavirikanyiha ni awo, yaalokolola itthu sa anamavirikanyiha awo emaara yuuluma aya ni miyo.  Yannakiruwana okittuttha maihi, yannikitthuka ni yannariha ibuukhu saka. Kikwanihakaru iyaakha muloko niithanu (15) kaaBatiziwa. Yaasaaseraka okihiiha onvarela muteko Yehova, amayaka yaakiroiha nipuro anroihiwaaya amiravo ampaka onasusuki. Nipuro nne miyo kaakhala ni amiravo yaatxa mirette soohapala, ompaha soona ni yaapaka ikirime. Onnikhala wooxupa wuupuwela waamoonaka mutthu yoole eera oosiveleke ni oothokororeke apatxeraka woosontta.”

⁹ Georgina aavilela hayi maxupo awe? Owo ohimme ha: “Nihiku amayaka yaapatxenraaya okisontta, keera kimalinheene omusoma Biblya otheene. Nto miyo kannaroromela weera koophwanya ekhaikhai nto kannoona weera Yehova aari vakhiviru vaka. Nto miyo kannanvekela Yehova nave owo annakiiwa. Emaara miyo kaakhalaaka nipuro yaakhala aya anasusuki, murokora mmoha aakiwopa owannyawe weera namusomeke Biblya ni omwiiwexexa. Mpuwa mwa ehuhu ele anna ni arokora yannakilipiha. Awo yaakithokorora ntoko amosaaya miyo kahoona weera Yehova toowera waapwaha atthu ootheene ale annisontta.”

10. Etthu heeni nneeraahu nroromeleke wa Yehova?

¹⁰ Murummwa Paulo aalepa weera “khavo enera onimwalanyiha onitthuna wawe Muluku, iwo ori mwa Kristu Yesu, Apwiy’ahu.” (Arom. 8:38, 39) Naamwi nipatxenreene ohaawa okhuma khalayi, nroromeleke weera Yehova khanrowa oninyanyala, onoonivaha ikuru ni onimaaliha. Ntoko enoonihera aya ni yookumanano ya Georgina, Yehova tho onkela onikhavihera moorweela mwa emusi ahu ya omunepani.

11. Etthu heeni ehimmwale ni Yesu va Yohani 15:12, 13 yeera yaakhavihere atthareli? Nvahe ntakihero.

¹¹ Ohiyu woomalihera ahinaakuve ene okhwa, owo aahaaleela atthareli awe weera waatthuneya waasivela atthu akina. (Mmusome Yohani 15:12, 13.) Owo aasuwela weera okhalano nsivelo nno, nnookhala oowiiraana nivilelaka wiittiwa ni elapo. Nwehe ntakihero na Atesalonika. Okhumelelakaru muloko ole, asinna a muloko ole yannasonttiwa. Naamwi vaareene hiiho, asinna ale yaavaha ntakihero noororomeleya. (1 Ates. 1:3, 6, 7) Paulo awooperera asinna oTesalonika weera yoonihereke nsivelo, awo yaatthuneya ovirelelaka opaka eyo, “murele wopwahaxa.” (1 Ates. 4:9, 10) Nsivelo ninnaakhavihera ooripiwa murima ni waakhavihera ootteettheya. (1 Ates. 5:14) Asinna oTesalonika moohihovela yaatthara miruku sa  Paulo. Eyo yaahoonihera ni ekaratta awe aalempaawe. Muhoolo mwaya yeeyo aahimmaawe ha: “Osivelana wanyu mukina ni mukhw’awe onnàntxerereya variyari vanyu vothene.” (2 Ates. 1:3-5) Nsivelo na asinna a oTesalonika naahaakhavihera ovilela maxupo ni osonttiwa.

12. Mpuwa mwa ekhotto, asinna yaamukhavihenre hayi munna a elapo ekina?

¹² Moone yookumanano ya Danylo ni amwaarawe, yoole aromoliwe woopatxerani. Elapo aakhalaawe yaapatxera owaniwa ekhotto. Naamwi vaareene hiiho, Danylo ni amwaariye khiyaahiyerenre woonele mithukumano, olaleera ni okawana yootxa yaakhalannaaya ni asinna akina. Nihuku nimoha anakhotto ni akapwitthaaya yaaphiya owannyawe Danylo. Owo onnathaliha eeraka: “Anakhotto awo yaakinyeserera weera kikhoottele nroromelo naka.’’ Thooni , Danylo onnahima eeraka “Emaara kaahimmaaka weera nkimpaka eyo, awosa yaapatxera okimana ni ekoopopiha weera yaamukoopela. Ehinaakuvesa opwaha yaakoopopiha ehimakasa weera nihiku yeeraaya etthike enimwaakoniha amwaaraka. Moowaakuveya asinna yaaniweliha mukaaroni entthawiheraka ecidade ekina. Nkinkela ottiwala nsivelo nne asinna yaakoonihenraaya. Niphiyakaru ecidade ele enyowani asinna yaanikhavihera enivahaka yootxa, empa neeraahu nikonekemo ni muteko neeraahu nivareke. Yookhumelelaaya, naakhalano ebarakha yoowaakhelela asinna yaatthawa tho ekhotto.” Sookumanano ntoko iya sinoorowa onikhavihera ntoko weera nsivelo na makristu nnoowera ovilela maxupo ninkumanaahuno.

13. Moota heeni munepa wootteela onnikhaviheraawe ovilela muteko nninvarelaahu Yehova naamwi niittiwaka ni atthu?

¹³ Yesu aahima weera atthareli awe waatthuneya waasivelaka amwiittanaaya. (Math. 5:44, 45) Neereke eyo tiyookhweya? Waakhula ori yooweera hooye! Eyo enwereya ni nikhavihero na munepa wootteela wa Muluku. Ohiya nsivelo yoowiima ya munepa woottela wa Muluku onhela mpuwa ovilela, okhapelela, wiiwelela, ni omaala murima. (Agal. 5:22, 23) Mikhalelo soothesene iya, sinnanikhavihera ovilela wiittiwa. Atthu akina yaari anamavirikanyiha naari ale yaanisontta, olelo va aatxentxa muupuwelo aya. Mwaha woowoona asilopwana yaathenle, asaaraya, anamwane aya naari ale yaattamannaayano yooniheraka mikhalelo iya. Antxipale a yaawo olelo va awo asinna. Mwa yeeyo, nyuwo pooti wooxupani waasivela ale amwiittani mwaha wooweera nyuwo munninvarela muteko  Yehova ni munnivekela munepa awe woottela. (Lu. 11:13) Nto muroromeleke weera moota Yehova ompakaawe itthu ti sooreera emaara yootheene.—Mir. 3:5-7.

14-15. Aroma 12:17-21 omukhavihenre hayi Yasmeen owoonihera nsivelo aiyawe, naamwi yaamusontta?

¹⁴ Moone ntakihero na murokora Yasmeen, onkhala w’Oriente Médio. Owo akhalakaru Namoona a Yehova, aiyawe yoona weera aamootothiwa nto yaaheerera omukhoottihera onvarela muteko Yehova aiyawe yaamuruwana, yaahaawopa amusi, ale anhoolela ittiini, mpaka waawopa anahako weera emoopopihe weera onnanariha emusi. Nihuku nimoha, aiyawe Yasmeen yaarowa Empa ya Omwene weera yamukaxari wa asinna sivinreene mithukumano Yasmeen aamakela wiinla paahi mwaha wa maxupo ale aavirihaawe.

¹⁵ Yasmeen akela woonela mithukumano, anniphwanya nimaaliho nave annilipihiwa ni asinna oororomela. Asitokweene a mmulokoni yannamooperera ovarela muteko miruku siri va Aroma 12:17-21. (Mmusome.) “Waari wooxupa wa miyo” Yasmeen aatxeerenre-tho eeraka ha: “kannanvekela Yehova weera akikhavihere ni kaaniilipihera ovarela muteko ele Biblya onhimaawe. Mwaha wookihasula aiyaka, yannarihela ikokhola okosinya kaapeyaaka miyo kivelakawo. Ehuhu yaakuulumelaaya noowali miyo kaawaakhula moomaala murima. Nto ehuhu yaavoreiwaaya miyo kannaathokorora nnene.”

16-17. Nyuwo muxunttenre heeni ni yooweereya ya Yasmeen?

¹⁶ Yasmeen oophwanya mareeliho mwaha woowoonihera nsivelo aiyawe. Owo onnahima: “Aiyaka yaapatxera okiroromela mwaha weera yaasuwela weera kannuuluma ekhaikhai emaara yootheene. Nto awo yaapatxera okiiwa mwa nttittimiho ehuhu naatthekulaahu voohima sa ittiini nto awo yaahaakhulela okhaliha murettele owannyihu. Vano awo annakooperera orowa omithukumanoni. Ekumi ahu vano ya vatthokoni ti yooreera vantxipale ni vaate vahu tho vookhalavo murettele. Nto etthu kinwehereraaka ti yooweera aiyaka exuttere ekhaikhai ni ninvareleke muteko Yehova vamoha.”

¹⁷ Ntakihero na Yasmeen enoonihereya weera orino nsivelo “onnatexa sothene, onnaroromela sothene ni onnavilela sothene.” (1 Akor. 13:4, 7) Ekhaikhai weera wiittiwa pooti okhalano owera ni-tho pooti onivoreya mene nsivelo ti nootepaxa owera. Nto nsivelo ninnawera mirima opwaha mwa sootheene ninnamuhakalaliha Yehova. Mene naamwi ale annisontta ehihiyaka oniitta, nnoowera okhala oohakalala. Moota heeni?

18. Heeni nneeraahu nihakalale naamwmi niittiwaka ni atthu?

¹⁸ Yesu enre: ‘Ooreeriwa nyuwo vaava atthu eneeraaya ewiittekeni.’ (Lu. 6:22) Hiyo khaninthanla wiittiwa. Hiyo khonnisivela ohaawa mwaha wa nroromelo nahu. Nto mwaha wa heeni nneeraahu nihakalaleke naamwi niittiwaka? Mwaha wa mathowa mararu. Nthowa noopatxera, emaara ninvilelaahu ninnaphwanya mahala oowaakhuleliwa ni Muluku. (1 Ped. 4:13, 14) Nthowa nanaaveeli, nroromelo nahu ninnaatxeerereya ni ninnalipa. (1 Ped. 1:7) Ni nthowa nanaararu, ninnakhalano yooweherera yoowaakhela—ekumi yoohimala.—Arom. 2:6, 7.

19. Heeni atthareli yaavirelenlaaya okhala oohakalala naamwi yaamaniwa?

¹⁹ Yesu avinyererihiwakaru, atthareli yaaphwanya ohakalala yoole Yesu aahimmaawe. Emaniwakaru ni weereliwa yeemexere muteko woolaleera, awo yaahakalala. Mwaha wa heeni? “Niwoko yaphwaneliwa ohoxiwa niwoko na nsina na [Yesu].” (Mit. 5:40-42) Nsivelo awo yaakhalannaaya wa Yesu naari noopwaha ohiya owoova amwiittanaaya. Yahoonihera nsivelo nno evirelelaka olaleya mitthenka sooreera, “ehihiyaka.” Olelova asinnihu antxipale ennavirelela onvarela Yehova naamwi ekumanakano maxupo. Awo aasuwela weera Yehova khanrowa ottiwala muteko envarenlaaya ni nsivelo yoonihenraaya ni nsinanawe.—Aheb. 6:10.

20. Eheeni ninkelaahu woona muru onittharelana?

²⁰ Mpakana ophiyera omala elapo ela, atthu eneereke oniitta. (Yoh. 15:19) Nto khontthuneya woova. Ntoko ninkelaahu woona muru onittharelana, Yehova “onimwaalipiha ni . . . Wasunka” arumeyi awe oororomeleya. (2 Ates. 3:3) Mwa yeeyo, nvirelele omusivela Yehova, waasivela asinna oororomela ni-tho waasivela amwiittanaanyu. Naattharaka miruku iya, ninnavirelela okhala oowiiraana moomunepani moolipa, ninnavuwiha nsina na Yehova ni ninnaroromela weera nsivelo nookhalano owera opwaha wiitta.