1. Eheeni enaahoveliha atthu antxipale olelo va?

OLELO va sookhala ittiini sintxipale siniihima weera makristu ni sinroromela weera sinnamukokhorela Muluku moophwanelela. Khoiyono wa mahala olelo va atthu antxipale anhovelaaya! Awo anniikoha: “Neereke yookhala ettiini emoha ya ekhaikhai naari ittiini sootheene sinnamuhakalaliha Muluku?” Ankha voohima wa hiyo, neereke ninnaroromela weera ninnaxuttiha ekhaikhai? Neereke ninnaroromela weera Anamoona a Yehova ennamukokhorela Muluku olelo va ntoko owo ontthunaawe? Mwaha ola ninkela woona itthu sineera sinroromelihe weera noophwanya ekhaikhai.

2. Mwaha wa heeni Paulo aahimmaawe va 1 Atesalonika 1:5, weera owo oophwanya ekhaikhai?

² Mwaha wa heeni murummwa Paulo aaroromelaawe weera oophwanya ekhaikhai? Murummwa Paulo annaroromela tthiri weera oophwanya ekhaikhai. (Mmusome 1 Atesalonika 1:5.) Ororomela iwo khuwaakhanle woowootherera, mene owo aari mutthu aasoma moowiiwexexa masu a Muluku. Owo annaroromela weera “yolempwa eri yothene yúhùpuxeriwe ni munepa wa Muluku.” (2 Tim. 3:16) Paulo aaxuttenre eheeni mpuwa mwa yoosomaawe? Mwa soolempwa Paulo aaphwanya weera Yesu aari Mesiya—aalaiheriwe. Mwa empari ekina, ahoolali a ettiini ya aYuda yaahiithanlela oramusa wa soohima iyo. Moowootha, awo yannahima weera yannamukokhorela Muluku mene yannapaka itthu owo oniittaawe. (Tito 1:16) Mene Paulo khaakhanle ntoko ahooleli awo, owo khaathanla empari ya masu a Muluku eeraawe aroromeleke. Owo aari oolikaneene oxuttiha ni ovarela muteko “miruku sa masu a Muluku.”—Mit. 20:27, nwehe enoota.

3. Weera nroromele weera noophwanya ekhaikhai ontthuneya ophwanya waakhuliwa wa makoho ootheene? (Moone tho equaadru “ Miteko sa Yehova ni nyuupuwelo sawe—ti sootepa waatta sihinweraneya okontariwa.’”)

³ Atthu akina anoona weera ettiini yeekhaikhai ewereke waakhula makoho ootheene mpaka yaale ehinwereya waakhuliwa  mBiblyani. Mene neereke eyo ekhaikhai? Moone ntakihero na Paulo, owo aahaaleela makristu weera ‘esuweleke itthu sootheene’. Mwaneeneru aahaakhulela weera aasuwela itthu sintxipale nave saakhala itthu ikina. (1 Ates. 5:21) Owo aalempe ha: “Khweli osuwela ninsuwelahu, khokwanenle ni oprofetizera nnèrahu, khokwanenle . . . Vekhaikhai vanano vava ninnòna itthu mulolani ni mmaxiripuloni.” (1 Akor. 13:9, 12) Paulo khiiwexexa itthu sootheene ni hiyo tho khanniiwexexa. Mene Paulo annawera osuwela yootthuna ya Yehova. Etthu owo aasuwenlaawe yaakwana ni yannamuroromeliha weera owo aaphwanya ekhaikhai!

4. Eheeni enkela olipiha nroromelo nahu weera noophwanya ekhaikhai ni eheeni ninkelaahu woona voohima sa makristu eekhaikhai?

⁴ Hiyo ontthuneya olipiha nroromelo nahu weera noophwanya ekhaikhai. Moota woopaka eyo ori olikanxa okokhorela wa Yesu aahiyaawe ni ele Anamoona a Yehova ampakaaya olelo va. Mwa yoosomeene yeela ninkela woona etthu, (1) makkristu eehaikhai khaanivoliihera okokhorela ineneero, (2) annittittimiha nsina na Yehova, (3) ennisiveliwa ni ekhakhai (4) ennisivelana mukina ni mukhwaawe.

5. Yesu aanixuttinhe eheeni voohima sa omukokhorela Muluku vooreera ni moota heeni nneeraahu nimutakihe?

⁵ Yesu annimusivela vantxipale Muluku. Amukokhorelaka paahiru Yehova, emaara araawe wiirimu ni tho araawe vathi va. (Lu. 4:8) Yesu aahaaxuttiha atthareli awe opaka emoharu. Yesu ni atthareli awe oororomeleya khenavarihele muteko eneneera vookokhorelani. Mwaha wooewera Muluku munepa, eneneero eri yootheene mutthu ompakaawe khennaattameliha wa Yehova! (Yes. 46:5) Ninkha voohima sa ineneero sa atthu ootteela ni  waavekela yaawo? Nlamulo nanaaveli wa malamulo Muloko Yehova aahima ha: “Ohìpakele weyo enenero nari ethonyero yeyo eri wirimu osulú iwe, nari ya yeyo eri vathi vava, nnakhala ya yeyo eri mmahini vathi va etthaya . . . Ohùramele seiye nari ohirumele.” (Ott. 20:4, 5) Wa atthu ale entthuna omusiveliha Muluku masu ala toowiiwanyea nnenesene.

6. Mikhalelo heeni Anamoona a Yehova anttharaaya olelo yaamukokhorelaka Muluku?

⁶ Mpaka anamathaliha sooweeraya makristu oopatxera aasuwela weera yaamukokhorela Muluku paahi. Mwa ntakihero, buukhu a História da Igreja Cristã * onnahima weera makristu a eseekulu yoopatxera “khiyaakhanleno muupuwelo” wookokhorela ineneero mapuro aya ookokhorela. Olelo va Anamoona a Yehova, ennatthara mikhalelo sa makristu a eseekulu yoopatxera ahiyalaaya. Hiyo khannivekela ineneero sa atthu “ootteela” naari tho malaika. Khanninvekela mpaka Yesu. Nave khannipaka etthu envarihana ni okokhorela itthu sinvarihana ni itthu sa elapo ahu. Nihipwatthaka etthu eneera enikhumelele, hiyo nohiithanlela wiiwelela masu a Yesu aahimmaawe: ‘Omukokhorele Yehova, Muluku á’—Math. 4:10.

7. Ohiyana heeni okhanle eriyari ya Anamoona a Yehova ni atthu a ittiini ikina?

⁷ Olelo va, atthu antxipale waasivela waatthara ahooleli a ikereja yaawo ari oowiiwanyeya. Emaara ekina, enaatikhina alopwana ala mpaka waakokhorela. Atthu annasareya mmakerejani mwaya, ennethuma ibuukhu saya ni ennaveleela sooveleela saya mwaha wa ahooleli awo anaahoolela. Atthu akina annaakhulela masu ootheene awo anuulumaaya. Ni tho tiwoovila wuupuwela weera atthu awo, yammutikhina Yesu waakhanle weera ohaakhumelela! Opwaha mwa yeeyo, ale enimukokhorela Yehova, khenaatthara atthu. Ekhaikhai weera, ninnaattittimiha ale enhoolela, mene ninnuupuwela miruku sa Yesu aaxuttinhaawe sineera: “Othene asinna.” (Math. 23:8-10) Hiyo khannaakokhorela atthu, nihipwatthaka waari weera ahooleli a ittiini naari a epoliitika. Hiyo khaninkhavihera miruku saya. Opwaha mwa yeeyo, ninnavirelela ohipakela empari ni ohiivoliihera ni soopakeya sa elapo ela. Mapuro mootheene noosuweliwa weera nri oovirikana ni igrupu ikina siniihela okhala makristu.—Yoh. 18:36.

8. Ninsuwela hayi weera Yehova ontthuna weera nsinanawe nivuwihiwe nave-tho nisuweliwe?

⁸ Ehuhu ekina Yesu aavekela: “Tithi, ovuwihe nsina ná.” Mene nto mwaneene Yehova ahaakhula ni masu oowiiwanyeya areene wiirimu alaihereka weera anvuwiha nsina nawe. (Yoh. 12:28) Mwa ihuhu aalaleyaawe, Yesu aavuwiha nsina na atithawe. (Yoh. 17:26) Mwa yeeyo, niweherereke weera makristu eekhaikhai anniiteexa mwaha woovarela nsina na Muluku ni waasuweliha atthu akina.

9. Makristu a eseekulu yoopatxera yoonihenre hayi weera yannattittimiha nsina na Muluku?

⁹ Makristu a eseekulu yoopatxera, evinreene ehuhu vakhaaniini opakiweene muloko wa ekristu, Yehova aahima weera, “Muluku ùpuwenlaiye othanla variyari va amalapo awe nthowa na nsina nawe”. (Mit. 15:14) Makristu a ehuhu ele, yanniiteexa mwaha woovarela nsina na Muluku ni waakhavihera atthu akina. Awo yannavarela nsina na Muluku ikwaha sintxipale elaleyaka ni olepa ibuukhu sa mBiblyani. * Awo yaahoonihera weera yaari atthu yaasuweliha atthu akina nsina na Muluku.—Mit. 2:14, 21.

10. Itthu heeni sinoonihera weera Anamoona a Yehova eri atthu a nsina nawe?

 ¹⁰ Neereke Anamoona a Yehova atthu anvuwiha nsina na Yehova? Moone itthu sinoonihera. Olelo va, ahooleli a ittiini annapaka ele enweraaya weera evithe nsina na Muluku. Mpaka awo aakumihamo emaara yaataphulelaaya aBiblyaaya; mwa imaara ikina, yannikhoottiha ovarela muteko nsina na Muluku mmavekeloni mwa ittiini saya. * Neereke wookhala muhovihero weera Anamoona a Yehova ti yaawo anvuwiha nsina na Muluku ni ottittimiha nsina na Muluku omphwanelelaawe? Kheekhanle egrupu ensuweliha nsina na Muluku ehikhanle Anamoona a Yehova! Ninnawera opaka ele ninweraahu weera nivuwihe nsina nne naakhelaahu, na Anamoona a Yehova. (Yes. 43:10-12) Hiyo ninnikumihera ikoopiya sintxipale sinkwana 240 milhões sa Tradução do Novo Mundo da Bíblia Sagrada yoowo nrimomo nsina na Yehova mapuro oottheene yaale anamataphulela yaakuminhaayamo mBiblyani. Hiyo tho ninnakumihera ibuukhu seiyo sinrweera mBiblyani seiyo sinvuwiha nsina na Yehova ni muulumo enkwana 1.000!

11. Akristu a eseekulu yoopatxera yoonihenre hayi weera yannaasivela ekhaikhai?

¹¹ Yesu annisiveliwaxa ni ekhaikhai, naari neere, ikhaikhai voohima sa Muluku ni  yootthunaawe. Yesu annikhala moovarihana ni ekhaikhai ni owo annaasuweliha atthu akina. (Yoh. 18:37) Atthareli ekhaikhai a Yesu tho, yannasiveliwa ni ekhaikhai. (Yoh. 4:23, 24) Tiyeeyo murummwa Paulo iitthannaawe ekristu okhala ‘ephiro yeekhaikhai’. (2 Ped. 2:2) Nsivelo na makristu a eseekulu yoopatxera ni ekhaikhai, naari noolipa ni khiyaakhulela soxuttiha sa ettiini ni sookhovelela ni soohima saatthu sahaavarihana ni ekhaikhai. (Akol. 2:8) Etthu emoharu eneereya ni makristu eekhaikhai. Awo tho enniilipihera “ovirelela weetta mweekhaikhaini”, soororomela saya sinkhuma mBiblyani eri Masu a Yehova.—3 Yoh. 3, 4.

12. Waatthuneyaka opaka matxentxo oowiiwexexa yoolepa emoha, asinna anhoolela ampaka eheeni, nave mwaha wa heeni?

¹² Anamoona a Yehova khenaakhulela weera aakhalano osuwela weekhaikhai naari wookwanela wa ekhaikhai. Emaara ekina pooti ohiiwexexa vaavo antaphulelaaya yoolepa ya mBiblyani naari yaavahaka miruku seiyo sineettiha muloko. Etthu eyo ehintutuxereke. Biblya onnahima moowiiwanyeya weera, osuwela weekhaikhai waamwaatxeerereya moovira ehuhu. (Akol. 1:9, 10) Yehova onnaaleela ekhaikhai sa mBiblyani asikhaani ni hiyo nikhaleke oolikaneene weera waara iwo onimwaleele. (Mir. 4:18) Vaavo asinna anhoolela anoonelelaaya weera annitthuneya opaka matxentxo mwaha woowiiwexexa wa yoolepa emoha awo annapaka moowaakuveya weera yookolele moowaakuveya. Eyo ennavirikana ni ittiini ikina soowootha. Ikwaha sintxipale, atthu awo ennipaka matxentxo weera yaahakalalihe atthu aya naari atthu antxipale. Opwaha mwa yeeyo, mareherero a Yehova empaka matxentxo weera yaakhavihere atthu omwaattamela Muluku ni makhalelo a okokhorela Yesu ovanhaawe. (Yak. 4:4) Awo matxentxo ahinkhumelela mwaha wa itthu sa vaanaano naari mwaha wootthara mikhalelo saatthu, mene ankhumelela mwaha woomwiiwexexa Biblya. Hiyo ennansivela vantxipale ekhaikhai!—1 Ates. 2:3, 4.

13. Mukhalelo heeni wootthuneya makristu eekhaikhai anooniheraaya ni eyo enooneya hayi wa Anamoona Yehova?

¹³ Makristu a eseekulu yoopatxera yaakhalano mikhalelo sintxipale, mene mukhalelo wootepa otthuneya waari nsivelo. Yesu enre: “Ti mwemmo atthu othene enèraya esuwele wi muri òhuser’aka—mwarino osivelana mukina ni mukhw’awe.” (Yoh. 13:34, 35) Olelo va Anamoona a Yehova a elapo yootheene, annoona nsivelo nno na elapo yootheene ni wiiraana. Hiyo noovirikana ni ittiini ikina, nri emusi yoowiiraana. Nnaamweera nreene a ilapo soovirikana ni makhalelo oovirikana eyo khenanikawanya. Ninnawera woona nsivelo nno neekhaikhai mmithukumanoni sa assembleya ni wa akongresu. Mithukumano iyo sinnanilipiha ni sinnalipih tho nroromelo nahu wooweera Yehova onaakhulela okokhorela wahu.

14. Moovarihana ni Akolosi 3:12-14, moota heeni nneeraahu nooniheraneke osivelana mukina ni mukhwaawe?

¹⁴ Bíblya oneera: “Musivelaneke mukina ni mukhw’awe vohihiyerereya.” (1 Ped. 4:8) Moota woowoonihera nsivelo nno, ori olevelelana mukina ni mukhwaawe ni ovilelana mwaha wooweera nri atthu oohimalela. Hiyo tho, pooti waasaasera eyo niwaakhela aletto ni atthu ootheene a mmulokoni mpaka yaale annipakela soonanara. (Mmusome Akolosi 3:12-14.) Vaavo nnooniheranaahu osivelana mukina ni mukhwaawe, ninnoonihera weera hiyo makristu eekhaikhai.

15. Moota heeni nnooniheraahu weera ninnatthara mikhale yaahiyalaaya makristu a eseekulu yoopatxera?

¹⁵ Sookhala mikhalelo mikina sinoonihera weera ninnatthara mikhalelo sa makristu a eseekulu yoopatxera yaahiyalaaya. Mwa ntakihero, mareherero ahu aakhala asitokweene a Esirkwiitu, asitokweene a mmulokoni—ni arumeyi oorumeela—itthu sootheeneiyo sinnalikana ni akristu a eseekulu yoopatxera. (Afil. 1:1; Tito 1:5) Opwaha mwa yeeyo, moonelo ahu woohima sa okonihana, othelana, ovarela muteko ephome, ni okosoopa muloko mwaha wa anamattheka ahinttharuwa, onvinyera wa makhalelo a makristu a eseekulu yoopatxera yaahiyalaaya.—Mit. 15:28, 29; 1 Akor. 5:11-13; 6:9, 10; Aheb. 13:4.

16. Eheeni ninxutteraahu ni etthu onhimaawe Aefeso 4:4-6?

¹⁶ Yesu aahima weera antxipale yaakela ohimaka weera atthareli awe, mene tho khaiyene ootheene yaarowa okhala eekhaikhai. (Math. 7:21-23) Biblya tho aahima vahinaaye weera, mahuku oomalihera atthu antxipale yaakela “okhalano elapelo, koma ekhottaka owerya waya”. (2 Tim. 3:1, 5) Ni Biblya onnaiwanyeiha nnene vaavo onhimaawe weera “nrino nroromelo nimoharu paahi” Muluku onaakhulelaawe.—Mmusome Aefeso 4:4-6.

17. Egrupu heeni emmutthara Yesu epakaka yookokhorela yeekhaikhai?

¹⁷ Egrupu heeni olelo va erino okokhorela weekhaikhai? Hiyo nohoona ithoonyero. Hiyo nohoona mukhalelo yoowo Yesu aaxuttinhaawe ni waatthariwa ni makristu a eseekulu yoopatxera. Waakhula ti wavamoha paahi—Anamoona a Yehova paahi. Moohihovela ti eparakha etokweene weerela empari emusi ya Yehova ni osuwela ekhaikhai voohima sa yootthunaawe! Ootheene a hiyo niithanleleke ovarexera ikhaikhai sa mBiblyani moolipa.