Davidi aawera omwiiva Goliyathi mwaha wooweera owo annamuroromela Yehova. (1Sam 17:45) Yehova onnatthuna waavaha ikuru arumeyi awe ootheene. (2Sow 16:9) Ohiya ororomela owera wahu moota woopaka itthu, nintthuneya weera nroromeleke nikhavihero na Yehova. Moota heeni? Nwehe mikhalelo miraru:

• Nvekeleke moohihiyerereya. Munvekeleke Yehova ohiya weera paahi alevelele soottheka sanyu, mene tho, munvekeleke weera oovaheeni ikuru soowera osempa opaka yoottheka. (Mt 6:12, 13) Munvekeleke Yehova ohiya paahi weera ooreeliheni mwa soothanla mpankaayu, mene tho, munvekeleke weera oovaheeni miruku ni osuwela muhinaaye opaka yoothanlaanyu.—Yak 1:5

• Mukhaleno yoolakela yoomusoma Biblya vameekhaanyu. Muhihiye niviraka nihuku muhimusomme Biblya. (Nsa 1:2) Mwasomavale, mutthokeleleke ni nvariheleke muteko ele muxuttenraayu. (Yak 1:23-25) Ohiya wiiroromela mwaha wa osuwela wanyu opaka itthu, mwaasaasereke ehuhu yowiireherera weera nvare nnene muteko woolaleera. Ni wakhala weera nyuwo mooreehera nnene empari eri yootheene ya muthukumano, nyuwo munoowera ottottela mureerelo mithukumano iyo.

• Muthareke miruku sinvahiwa mmarehereroni mwa Yehova. Mwiiwexexeke ni mutthareke miruku sinvahiwa ni mareherero ahu. Ni mwaakuveke, ovarihele muteko miruku iyo. (Nam 9:17) Mukhaleke owiiwelela vavo asitokweene ammulokoni anookololaaya itthu naari anvahaaya miruku.—Aheb 13:17

MOONELE EVIIDIYU ENEERA: MUHOOVE OTTHARATTHARIWA, AVINYAKA MWAAKHULE MAKOHO ALA:

• Itthu heeni saaweerinhe woova asinna ni asirokora?

• Ti eheeni yaakhavihenre asinna ni asirokora awo oviriha woova?