Imaara sootheene nintthikelaahu naari nnamusomihaahu Biblya. Onnitthuneya waakhavihera atthu weera yiiwexexeke ipontu sootthuneya sa mBiblyani. Wakhala weera ninnavarihela muteko malikanyiho weera niiwexexihe ipontu iyo, nnoowera ovara mirima saatthu, nave onkela okhala wookhweya weera atthu awo yuupuwelele ele exuttenraaya.

Wakhala weera munnuupuwelela otthikela oxekura naari okela opakiha yoosoma ya Biblya mureherere nlikanyiho weera muxuttihe ipontu sootthuneya ohiya waatxeera itthu Mene nto nvariheleke muteko malikanyiho ookhweya ni itthu atthu ensuwelaaya vantxipale. (Mt 5:14-16; Mk 2:21; Lk 14:7-11) Mpakeke malikanyiho envarihana ni mutthu munuulumanaanyu, nave ovarihela muteko itthu noonaawe nenne nxiiye. (Lk 5:2-11; Yoh 4:7-15) Wakhala weera munnimoona ole munimusomihaanyu Biblya ahakalanleene, nyuwo munkela otepa ohakalala.

MOONELE EVIIDIYU ENEERA: MUHAKALALE MWAAPAKAKA ATTHARELI—MUREHERE MIKHALELO SANYU—MOONIHERE IPONNTU SOOTTHUNEYA, MWAVINYAKA MWAAKHULE MAKOHO ALA:

• Moovarihana ni ele monnaannyu nviidiyuni, mwaha wa heeni oraaya wootthuneya waakhavihera ale nnaasomihaahu Biblya wiiwexexa yoolepa ya mBiblyani?

• Nlikanyiho heeni Sara aavarihenlaawe muteko weera amwiiwexexeihe Aroma 5:12?

• Ikuru heeni nlikanyiho noothanliwa nnene nikhanlaayano?

• Mwaha wa heeni munoonaanyu weera ti wootepa otthuneya naalaleyaka vale ovarihela muteko iviidiyu naari ikaruma ikinasene sa mareherero ahu?