Nttaruxo ninvareliwa muteko weera mutthu ahusihiwe ni alakiwe mwa exariya. Nave-tho ninnavareliwa muteko weera okooleliwe mutthu naari tho ottaruxiwa. Yehova onnanivaha nttaruxo weera nimukokhoreleke nnene. (Arom 12:1; Aheb 12:10, 11) Pooti woonaka nttaruxo okhala ntoko etthu yoonanara. Nto nno, ninnanikhavihera omusiveliha Yehova ni waakhela mareeliho awe. (Mir 10:7) Entthuneya wuupuwela eheeni mwaattaruxaka atthu akina? Mutthu onvahiwa nttaruxo, ontthuneya uupuweleke eheeni?

Mutthu waavahaka nttaruxo. Ntoko mutokweene a mmulokoni, tiithi naari mutthu mukina, onnatthuneya ovaha nttaruxo ni nsivelo amutakihaka Yehova. (Yer 46:28) Naari nttaruxo ntokotoko ninnatthuneya oveleeliwa mwa eriyari-neeriyari, nihikhale nooveyaxa naari nootepa oxupa. Nave nttaruxo niveleliweke moorweela mwa nsivelo.—Tito 1:13.

Mutthu wavahiwa nttaruxo. Ontthuneya waakhulela miruku onvahiwaawe ni opaka matxentxo antthuneya. (Mir 3:11-12) Hiyo atthu oohimalela, nto, mwaha wa yeeyo, emaara ekina nneereke otthuneya ottaruxiwa. Nttaruxo pooti orweela moohiyana-hiyana, mwa ntakihero, ninnattaruxiwa moorweela mwa ele ninsoomaahu mBiblyani naari ele nniiwaahu mmuthukhumanoni. Apaale akina, ontthuneya ottaruxiwa ni ekomisau yoophukela. Naakhulelaka nttaruxo na Yehova, nnokhalano ekumi yoohakalala vanano ni muhoolo.—Mir 10:17.

MOONELE EVIIDIYU ENEERA “YEHOVA OMMUTTARUXA OLE OMMUSIVELAAWE”. AVINYAKA MWAAKHULE MAKOHO ALA:

• Munna Canon ohuuwale moota heeni, ni eheeni yeereñye vahoolo vaya?

• Nikhavihero heeni munna Canon akhenlaawe weera atthikele omukokhorela Yehova?

• Muxuttenre eheeni ni yookumanano ya munna Canon?