Moohipisa va opixa murima wa Yehova wa elapo ela onoomala. Ittiini yoowootha enonyanyiwa, agogi a magogi onimwaatuphela atthu a Muluku, ni Yehova onkela waanyaanya atthu oonanara murima ni Harmagedoni. Makristu ennaweherera etempu ela yoowiiniha murima.

Ekhaikhai weera khanisuwenle itthu sootheene sinkela weereya mpuwa mwa maxupo matokweene. Mwa ntakihero, khanisuwenle mwekhaikhai nihiku ankelaaya opatxera. Khanisuwenle etthu anapoliitika enkelaaya wootherera vaavo ankelaaya onyaanya ittiini soowootha. Khanisuwenle salini ni moota agogi a magogi enkelaaya waatuphela atthu a Muluku. Nave-tho khanisuwenle moota Yehova onkelaawe waanyaanya atthu oonanara murima mwa Harmagedoni.

Mene Biblya onnanivaha itthu sootheene weera niwehexexeke muhoolo ni olipa murima ni nroromelo. Mwa ntakihero, hiyo noosuwela weera ninkhala okhwipi wa “mahiku omalihera.” (2Tim 3:1) Noosuwela weera ‘onyaanyiwa wa ittiini soowootha onkela okhala woowakuveya’ weera ettiini yeekhaikhai ehinyaanyiwe. (Mt 24:22) Noosuwela weera Yehova onkela owoopola atthu awe. (2Ped 2:9) Nave hiyo noosuwela weera Yehova ohaathanla atthu weera yaanyaanye atakhali ni ovuluxa muloko mutokotoko wa atthu mpuwa mwa Harmagedoni, nto awo ta axariya ni ikuru.—Apok 19:11, 15, 16.

Mwaha wa itthu sinkela okhumelela muhoolo atthu “enekomoke nthowa noowova”. Mene eyo khenkela weereya ni hiyo. Hiyo noosuwela etthu Yehova aapankaawe khaalayi weera aavuluxe atthu awe. Osoma nyaha iyo ni wuupuwelela inoonikhavihera okhala oolipa niwehereraka weera ovuluxiwa wahu ori vakhiviru.—Lk 21:26, 28.