•  Masu Oopacerya 2

•  Mihakhu Sinikhuma MBiibiliyani 3-5

  •  Mwaha 3

  •  Otokosa Itthu sa Efaita Soomunepani 4

  •  Omusoma Biibiliya 5

•  Mukhaleleke Nthiti Muteko Woolaleerya 6-​11

  •  Ovaanela Woopacerya Erumeeliwaka Eviidiyu 7

  •  Ovaanela Woopacerya 8

  •  Otthikela Oxukurya 9

  •  Yoosoma ya Biibiliya 10

  •  Mwaha 11

•  Makhalelo a Makristau 12-​13

  •  Yoosoma ya Biibiliya ya Muloko 13

•  Masu Oowuuluula 14

•  Mwiilipiheryeke Osoma ni Wiixuttiha 15

•  Ovaha Miruku 16

•  Okathi 17

•  Esumana Enixukurya Mutokweene a Esirkwiitu 18

•  Esumana ya Asembeleya Wala Kongresu 19

•  Esumana ya Wuupuwelela Okhwa wa Kristu 20

•  Mutokweene a Muthukumano wa Okumi ni Orummwa Ahu 21

•  Muhooleli a Muthukumano wa Okumi ni Orummwa Ahu 22

•  Mutokweene Onuuraanyiha Nikhuuru na Axitokweene 23

•  Namavaha Miruku Ookhaliherya 24

•  Isaala Sikina 25

•  Iviidiyu 26

1. Muthukumano wa Okumi ni Orummwa Ahu, ohaana opakiwa atthariwaka malakiheryo ala anittharelana ni moovarihana ni Ekaderno​​—⁠Okumi ni Orummwa Ahu wa Ekristau. Anamalaleerya otheene, ahaana otumereriwa wira yiivahereryeke wira apakeke ipantte sa anaxikola. Nave-tho ale animusoma Biibiliya ni ahincompela mithukumano pooti wiirela mpantta, akhala wira anneemererya ni anneettela malakiheryo a mBiibiliyani.​—⁠be-T epax. 282

 2. 1 minutu. Khula esumana, nuumala wiipa nsipo ni opakiwa nivekelo noopacerya, muhooleli a Okumi ni Orummwa Ahu ohaana olavula masu vakhaani wira aakhaliherye alipa-oowiriyana osuwela vahinatthi myaha sinrowa othokoreriwa, nave ohaana ottittimiherya iponto sinrowa waakhaliherya vanceene alipa-oowiriyana.

  3. Mwaha: 10 minutu. Muru ni otthokiheriwa iponto piili wala tthaaru onikumiheriwa muhina mwa Okumi ni Orummwa Ahu, Ekaderno Enirumeeliwa Omuthukumanoni. Mwaha ola ahaana ovahiwa axitokweene aahiiso arummwa oorumeela oophwanelela. Khula esumana enipaceriwa aya eliivuru esya ya mBiibiliyani, yookhala eviidiyu enrowa wooniheriwaka erina masu oopacerya a eliivuru eyo. Mulipa-oolavula mwaha ohaana wooniherya ovarihana okhanle eviidiyu eyo ni mwaha onilavula awe. Masi owo ohaana othokorerya iponto sotheene sa mwaha siniphwanyaneya Ekaderno Enirumeeliwa Omuthukumanoni. Nave wakhala okathi, ohaana othokorerya Soolepa, ilatarato ni ifootu sinittittimiherya mwaha owo.

 4. Otokosa Itthu sa Efaita Soomunepani: 10 minutu. Ola mpantta wa makoho ni waakhuliwa, khivanitthuneya olavula masu oopacerya aahiiso oomaliherya. Ehaana opakiwa ni mutokweene wala murum­mwa oorumeela oophwanelela. Ohaana orumeela okathi orina awe wira othokorerye saana makoho awo 3 moovarihana ni makhalelo a muloko owo. Masi ohaana opaka makoho otheene. Nave ohaana othanla vaareerelaka osoma iveersu sotheene sa makoho manli oopacerya wala nnaari. Ale anithanliwa wira yaakhule, ahaana okomentari isegundo 30 aahiiso ohiphiya.

  5. Omusoma Biibiliya: 4 minutu wala ohiphiya. Mpantta ola ohaana ovahiwa munna. Owo ohaana osoma paahi mpantta ovahiwe awe, voohilavula etthu wanipacerya hata wanikisa. Muhooleli a muthukumano ohaana ophavela woona vakhala wira munna ole ovahiwe onnisoma oratteene, vowiiwanyeya, ottittimiherya masu voophwanelela, oturuka nsu, omumulela olavula ni olavula voohimutakiha mutthu. Okhala wira iversu sikina sa mBiibiliyani ti sookhuveya ni sikina ti soorakama muhooleli a muthukumano ohaana osuwela makhalelo anaxikola ohinatthi waathanlela ipantte saya.

 6. 15 minutu wala ohiphiya. Mpantta ola wa muthukumano, opakiwe wira waavaheke eparakha atthu otheene wiilokiherya wira yalaleeryeke ni olokiherya inamuna saya sa olaleerya ni wiixuttiha. Anaxikola ahaana opaka ipantte saya avarihelaka muteko ovaanela woopacerya ni otthikela oxukurya woopacerya, ori mpantta oni: Ovaanela Voohimya sa Biibiliya, epaaxina yoopacerya ya Okumi ni Orummwa Ahu wa Ekristau, Ekader­no Enirumeeliwa Omuthukumanoni. Anamalaleerya pooti othanla akhala wira anrowa orumeela eliivuru aahiiso iviidiyu siniphwanyaneya mpantta oni: Ikaruma Sinnikhaliherya Wiixuttiha. Wira yaakhaliherye anaxikola, mpantta wa Ovaanela Voohimya sa Biibiliya eri ekaderno ahu sooheliwa muhina ipantte sini: “Mwaaphavelaka Ovaha Eliivuru”. Anaxikola pooti othanla akhala wira anoorumeela okathi wa soothanleliwa saya. Okathi mukina, Okumi ni Orummwa Ahu, Ekaderno Enirumeeliwa Omuthukumanoni, pooti waavaha malakiheryo makina anaxikola awo. Anaxikola awo khanitthuneya wuncererya myaha avahiwe aya aphavelaka orumeela okathi wotheene avahiwe aya. Akhala wira anoolokiherya saana pooti wooniherya mpantta aya munutu mmosa aahiiso ohiphiya. Vaatthuneyaka, axitokweene pooti ovahiwa mipantta sa anaxikola.

 7. Ovaanela Woopacerya Erumeeliwaka Eviidiyu: Iviidiyu sa Ovaanela Voohimya sa Biibiliya sinrowa wooniheriwaka ni othokoreriwa khula mweeri. Iviidiyu iyo sinrowa wooniheryaka ovaanela woopacerya ni otthikela oxukurya. Mpantta ola onrowa ohooleliwaka ni Muhooleli a Muthukumano wa Okumi ni Orum­mwa Ahu.

 8. Ovaanela Woopacerya: Mpantta ola pooti ovahiwa munna aahiiso murokora. Awo ahaana okhala alopwanaru aahiiso athiyanaru wala ahaana okhala amusi. Anna aahiiso arokora awo pooti weemela wala okilaathi. Naxikola owo ohaana omukhomasa moovarihana ni makhalelo a muttetthe owo. Mpan­tta ola ohaana opakiwa atthariwaka malakiheryo a Okumi ni Orummwa Ahu wa Ekristau Ekaderno Enirumeeliwa Omuthukumanoni.

 9. Otthikela Oxukurya: Mpantta ola pooti ovahiwa munna aahiiso murokora. Awo ahaana okhala alopwanaru aahiiso athiyanaru. (km-T 5/97 epax. 2) Anna aahiiso arokora awo pooti weemela wala okilaathi. Moota naxikola owo onilavula awe ohaana wooniherya wira onimuxukurya mutthu aatonko awe olavulana. Mpantta ola ohaana opakiwa atthariwaka malakiheryo a Ovaanela Voohimya sa Biibiliya ori Okumi ni Orummwa Ahu wa Ekristau, Ekaderno Enirumeeliwa Omuthukumanoni.

 10. Yoosoma ya Biibiliya: Mpantta ola pooti ovahiwa munna aahiiso murokora. Awo ahaana okhala alopwanaru aahiiso athiyanaru. (km-T 5/97 epax. 2) Anna aahiiso arokora awo pooti weemela wala okilaathi. Mpantta ola onooniherya epakiwaka yoosoma ya Biibiliya. Nto, khivanitthuneya olavula masu oopacerya aahiiso ookiserya vahikhanle wira yoosoma ethanleliwa awe enivekela opaka eyo. Khivanitthuneya osoma ittima sotheene aahiiso soolepa, nnaamwi vahikhoottihiwaka opaka eyo. Naxikola ohaana wooniherya moota wowiixuttiha saana.

 11. Mwaha: Mpantta ola ohaana ovahiwa munna wira olavule ntoko sinilavuliwa aya mwaha wa atthu otheene.

 12. Nuumala wiipa nsipo, minutu 15 sinittharelana sinrowa orumeeliwa wira opakiwe mpantta mmosa aahiiso miili, sinrowa waakhaliherya alipa-oowiriyana ovarihela muteko saana Nuulumo na Muluku. Vahikhanle wira avahiwe malakiheryo makina, mpantta ola ohaana ovahiwa axitokweene wala arummwa oorumeela oophwanelela. Masi akhala wira ti sootthuneya sa mmulokoni, ahaana ovahiwa axitokweene paahi.

  13. Yoosoma ya Biibiliya ya Muloko: 30 minutu wala ohiphiya. Okhala wene mpantta ola ohaana ovahiwa mutokweene oosuwela wiixuttiha. (Miloko seiye sirina axitokweene vakhaani, pooti waarumeela arum­mwa oorumeela, vaatthuneyaka.) Nikhuuru na axitokweene nihaana waathanla ale aniphwanelela ohoolela Yoosoma ya Biibiliya ya Muloko. Ale anithanliwa ahaana osuwela weettiha muthukumano owo wira ahivirihe okathi. Nave ahaana wiiwanyeiha saana soolepa suulupale, ni waakhaliherya alipa-oowiriyana woona ovareleya waya muteko mwaha owo onithokoreriwa. Nto ahaana otthara malakiheryo a moota woweettiha saana sintoko Yoosoma ya Owehaweha. Nuumala woona wira mwaha onithokoreriwa oohiiwanyeya saana khivanitthuneya waattiha soohimya. Vaweryaneya ahaana orumeeliwa anna oovirikana wira ahooleleke ni asomeke ittima khula esumana. Akhala wira muhooleli a muthukumano Okumi ni Orummwa Ahu onnivekela wira yoosoma eyo ehiphiye minutu 30, ole onihoolela yoosoma eyo ohaana weettiha moovarihana ni yooveka eyo. Nto, owo pooti othanla opaka makoho ittima sikina.

  14. 3 minutu wala ohiphiya. Muhooleli a Muthukumano Okumi ni Orummwa Ahu, ohaana wuuluula ipon­to suulupale sithokoreriwe. Ohaana ohimya myaha sinrowa othokoreriwa. Owo pooti ohimya masina a anaxikola a esumana enittharelana, minutu iya 3 sinoophiyerya opaka itthu iya sotheene. Vahikhanle wira aruuhiwe malakiheryo makina, khula yoohimmwa wala epaphelo enitthuneya, sihaana osommwa ni muhooleli okathi wa masu ookiserya. Soohimmwa ntoko mareheryo a orattela Empa ya Omwene ni muteko woolaleerya, ahisommweke vatribuna masi ahaana othomeiwa va kwaaturuni a soohimmwa. Vakhala wira yoohimmwa emosa wala epaphelo yootepa wunnuwa vahinaweryaneya osommwa muhina mwa okathi ola, muhooleli a muthukumano ohaana omananiha ophavela okathi, woonasa wene aavekelaka anna anipaka ipantte sa Makhalelo a Makristau wira amuhiyerye okathi vakhaani onitthuneya. (Nwehe  ittima 13 ni  17.) Muthukumano ohaana omalihiwa ni nsipo ni nivekelo.

 15. Khula naxikola ohaana oruuha ebroxura awe Osoma ni Wiixuttiha, yowimpirimiriwa wala ya mutelefonini ya Muthukumano Okumi ni Orummwa Ahu. Muhooleli a Muthukumano Okumi ni Orummwa Ahu onrowa orumeelaka ebroxura wira aaxukhurele ni waavaha miruku anaxikola. Khula naxikola, ohaana olokiherya yoosoma othanleliwe awe eri muhina mwa iparentese mwa epaphelo ya soothanleliwa sa Muthukumano Okumi ni Orummwa Ahu. Mpantta oni: “Moone Orowa Wanyu Vahoolo” opakeliwe anaxikola paahi, nto muhooleli khoneemereriwa olepa-vo etthu.

  16. Nuumala khula naxikola opaka mpantta awe, muhooleli a Muthukumano Okumi ni Orummwa Ahu, ohaana orumeela munutu mmosa wira omuxukhurele ni onvaha miruku sinitthuneya naxikola owo ovarihelaka muteko ebroxura Osoma ni Wiixuttiha. Okathi muhooleli onimwiitthana awe khula naxikola, khivanitthuneya ohimya yoosoma othanleliwa awe. Masi wanikisa wa khula mwaha, nuumala omuxukhurela itthu sooloka opanke awe, muhooleli pooti ohimya yoosoma aathanleliwe awe olokiherya ohimyaka etthu enooniherya wira oopaka saana ni omulakiherya mpantta onireerela awe olokiherya muhoolo. Aphavela, muhooleli pooti olavula itthu sikina sooloka sinivarihana ni yoosoma eyo, onoona awe wira sinoomukhaliherya naxikola ni atthu otheene. Nave vaareerelaka, wanikisa wa muthukumano aahiiso okathi mukina pooti onvaha malakiheryo makina a moota opanke awe ni ele enireerela awe olokiherya anikhuma ebroxura Osoma ni Wiixuttiha wala eliivuru Beneficie-se. —Soohimmwa sikina voohimya sa muteko wa muhooleli a Muthukumano Okumi ni Orummwa Ahu ni namavaha miruku ookhaliherya nwehe  ittima 17,  22, ni  24.

     17. Khuuvo oneemereriwa oviriha okathi nnakhala muhooleli a Okumi ni Orummwa Ahu. Anaxikola yaviriha okathi avahiwe aya, ahaana ohiihiwa olavula mooreerela murima. Vakhala wira aakhala atthu akina aniviriha okathi yaalavulaka, okathi mukina, ahaana ovahiwa miruku ni namavaha miruku ookhaliherya. (Nwehe  ettima 24.) Muthukumano wotheene ohela muhina isipo ni mavekelo ohaana omala muhina mwa ewoora 1 ni 45 minutu.

 18. Okathi mutokweene a esirkwiitu onixukurya awe muloko, muthukumano ohaana opakiwa moovarihana ni Ekaderno Okumi ni Orummwa Ahu. Masi Yoosoma ya Biibiliya ya Muloko ehaana oranttelihiwa ni mwaha woopacerya wa mutokweene a esirkwiitu. Ohinatthi olattuliwa mutokweene a esirkwiitu, mun­na onihoolela muthukumano wa Okumi ni Orummwa Ahu ohaana wuuluula myaha sithokoreriwe ni ohimya sa esumana enittharelana, opaka soohimmwa sinitthuneya, aahiiso osoma ipaphelo saakheliwe, nuumala-vo omwiitthaneke mutokweene a esirkwiitu. Nuumala olavula mwaha awe, mutokweene a esir­kwiitu onrowa omaliha muthukumano ni nsipo nithanlale awe. Nave pooti omulattula munna wira opake nivekelo nookiserya. Okathi mutokweene a esirkwiitu onixukurya awe muloko, khivanitthuneya okhalana esaala ekina enipakiwa ipantte sa nttaava na muloko owo. Akhala wira muloko owo wookhalana egrupu, pooti opaka mithukumano esaala ekina. Masi egrupu eyo ehaana okhala ni muloko onixukuriwa okathi wa mwaha wa mutokweene a esirkwiitu.

 19. Esumana ya asembeleya wala kongresu, khasinipakiwa mithukumano mmulokoni. Khula mutthu wala etthoko ehaana othokorerya owaani eprograma ya esumana eyo.

 20. Akhala wira Wuupuwelela onrowa okhala variyari va esumana, Muthukumano wa Okumi ni Orum­mwa Ahu onipaka ahu eriyari ya esumana, khonrowa okhala. Masi ohaana opakiwa muthukumano wa muteko woolaleerya nihiku nlo.

 21. Khula esumana, mutokweene mmosa ohaana ohoolela Muthukumano wa Okumi ni Orummwa Ahu. Mutokweene a Muthukumano wa Okumi ni Orummwa Ahu torina muritti wa wiiriha muthukumano owo weetta mwa enamuna yootthokiheya ni moovarihana ni malakiheryo. Owo ohaana wiiwanana ni namavaha miruku ookhaliherya. Nuumala okumiheriwa Ekaderno Okumi ni Orummwa Ahu ya mweeri onittharelana, mutokweene a Muthukumano wa Okumi ni Orummwa Ahu ohaana opaka soothanleliwa sa anaxikola. (Nwehe  ittima 5-​11.) Khula naxikola ohaana ovahereriwa yoothanleliwa awe sihalaka isumana tthaaru, erumeeliwaka eformulaario Soothanleliwa sa Muthukumano Okumi ni Orummwa Ahu wa Ekris­tau (S-89).

  22. Khula esumana, mutokweene mmosa ohaana ohoolela Muthukumano wa Okumi ni Orummwa Ahu. (Miloko sirina axitokweene vakhaani pooti waarumeela arummwa oorumeela aniphwanelela.) Munna owo ohaana olavula masu oopacerya ni ookiserya a muthukumano ni othokorerya iviidiyu sa Ovaanela Voohimya sa Biibiliya vamosa ni iviidiyu sinooniherya iponto sa ebroxura Osoma ni Wiixuttiha. Nave munna owo tonrowa owiitthanaka anna otheene aniirela mpantta eprograma eyo ni moovarihana ni mwaattelo wa axitokweene, owo pooti opaka mipantta sikina sa muthukumano owo. Ohilavuleke itthu sinceene okathi onimulattula awe mulipa-oolavula mwaha onittharelana. Nikhuuru na axitokweene ti nimmuthan­la mutokweene oniphwanelela okhala muhooleli. Anna awo aniphwanelela anrowa oranttelanaka khula esumana. Moovarihana ni makhalelo a mapuro awo, mutokweene a Muthukumano a Okumi ni Orum­mwa Ahu, ohaana ohoolelaka ikwaha sinceene muthukumano ola waavikana axitokweene akina. Akhala wira mutokweene mmosa onniphwanelela wiiriha Yoosoma ya Biibiliya ya Muloko, owo onniphwanelela-tho ohoolela muthukumano ola. Xontte musuweleke wira mutokweene onithanliwa wira ohooleleke muthukumano ola ohaana waaxukhurela, waavaha miruku ni waalakiherya anaxikola otheene. Muhooleli torina muritti wa wiiriha muthukumano owo omala muhina mwa okathi. (Nwehe  ettima 14 ni  17.) Mutokweene owo onihoolela muthukumano aphavela ni opuro waaphiyeryaka pooti weemexiwa mikrofooni mukina onrowa awe orumeelaka wira owiitthaneke ale anrowa olavula myaha, okathi omosaru, ole onrowa olavula mwaha ohaana orowa vari mikrofooni sa vaplataforma. Nave owo pooti othanla okilaathi opalkuni nipuro nri meesa okathi naxikola ommusoma awe Biibiliya ni okathi wa mpantta oni: Mukhaleleke Nthiti Muteko Woolaleerya. Eyo enookhaliherya orumeela saana okathi.

 23. Mutokweene onuuraanyiha nikhuuru na axitokweene wala mutokweene onimukhaliherya, tonaathan­la anna otheene anrowa opaka mipantta sihikhanle sa anaxikola. Eyo enihela muhina omuthanla muhooleli a muthukumano a khula esumana, awo ahaana okhala ale yeemereriwe ni nikhuuru na axitokweene. Owo ni mutokweene a Muthukumano a Okumi ni Orummwa Ahu, ahaana opaka elista yoomalela ya anna otheene avahiwe myaha ni opweha va kwaaturuni va soohimmwa.

   24. Vaaweryaneyaka ohaana othanliwa mutokweene onlavula saana myaha wira ovareke muteko ola. Muteko wa munna ola waavaha miruku okhwipi axitokweene ni arummwa oorumeela akhala wira annitthuneya olakiheriwa okathi anilavula aya khula mwaha ohela muhina myaha sa Okumi ni Orummwa Ahu, myaha sa atthu otheene, ohoolela, ale anisoma ittima sa Owehaweha ni Yoosoma ya Biibiliya ya Muloko. (Nwehe  ettima 17.) Vakhala wira muloko owo aakhala axitokweene anisuwela olavula myaha saana ni wiixuttiha, nto pooti omuthanla mutokweene mukina khula mwaakha. Namavaha miruku khonitthuneya onvaha miruku khula mutthu onilavula mwaha ohikhanle wira ori moona wira vannireerela.

 25. Moovarihana ni mwaattelo wa anaxikola ari mmulokoni, anaxikola akina pooti othanleliwa opaka isaala sikina. Khula esaala ohaana okhalana namavaha miruku oophwanelela vanceenexa ohaana okhala mutokweene. Yathowa axitokweene pooti othanliwa murummwa oorumeela oophwanelela wira ovaheke miruku. Munna owo ohaana othanliwa ni nikhuuru na axitokweene, nave axitokweene pooti othan­laka wira munna owo oranttelaneke ni mukina. Namavaha miruku owo ohaana ottharihela malakiheryo ari  ettima 16. Miloko sirina esaala ekina, anaxikola ahaana ovekeliwa wira arowe esaala eyo nuumala Otokosa Itthu sa Efaita Soomunepani yeeyo eri muhina mwa Mihakhu Sinikhuma mBiibiliyani. Awo ahaana ohokolowela mapuro aya nuumala mpantta wa Mukhaleleke Nthiti Muteko Woolaleerya. Okathi enooniheriwa aya eviidiyu ya Ovaanela Voohimya sa Biibiliya, anna awo ahaana oweha aahiiso owiriyana eviidiyu eyo isaala ari aya vaaweryaneyaka. Nave namavaha miruku pooti wooniherya eviidiyu eyo omurumeelaka tablet aahiiso selulari.

 26. Sinrowa orumeeliwaka iviidiyu okathi wa muthukumano ola. Iviidiyu iyo sinrowa okumiheriwaka aplikativo JW Library®, nave pooti orumeeliwa ikaruma siniwerya wooniherya iviidiyu iyo sa mithukumano sa eriyari ya esumana. Okathi mukina iviidiyu iyo pooti orumeeliwa ntoko yowooniherya ya ovaanela voohimya sa Biibiliya, nave pooti wooniheriwa okathi wa muthukumano wa muteko woolaleerya nuumala wooniheriwa okathi wa Muthukumano Okumi ni Orummwa Ahu.