1, 2. (a) Etthuvo xeeni arumeyi a Muluku anlipelela aya? (b) Exeeni enrowa onikhaliherya owehexexa etthuvo eyo? (Nwehe elatarato yoopacerya.)

MAKRISTAU oothanliwa ni munepa wa Yehova aakhalana yoolipelela yootepa otthuneya. Awo annilipelela orowa okhalaka wiirimu. Murummwa Paulo aahihimya yoolipelela eyo okhala ‘etthuvo onkìhanelawe Muluku”. (aFilipi 3:14) Wiirimu, awo anrowa olamulelaka hoothe ni Yesu Moomweneni mwawe, ni waakhaliherya apinaatamu okhala oomalela. (Wisupulula 20:6) Tthiri yoolipelela eyo ti yoohakalaliha! Ipwittipwitthi sikina sinnilipelela waakhela etthuvo ekina. Iyo sinrowa okhalaka mParayiisu valaponi, nave yoolipelela ela ti yoohakalaliha!​—2 Pedru 3:13.

² Paulo aaphavela waakhaliherya maKristau akhwaawe oothanliwa wira ekhale oororomeleya ni yaakhele etthuvo. Owo aalenle so: “Mupuweleke sana itthu sa wirimu”. (aKolosi 3:2, Biblia Solempwa sa Muluku) Awo yaahaana ovarexexa yoolipelela aya ya orowa wiirimu. (aKolosi 1:4, 5) Wuupuwelela mareeliho a Yehova a muhoolo onnaakhaliherya arumeyi otheene a Muluku owehexexa  etthuvo ya muhoolo. Eyo ennivareleya muteko wa atthu otheene ale anlipelela orowa wiirimu naale anrowa okhalaka valaponi.​—1 aKorinto 9:24.

3. Muxankiho xeeni Paulo aaloponle awe maKristau?

³ Nave-tho Paulo aahaalopola maKristau voohimya sa itthu saarowa owooceeliha waakhela etthuvo. Mwa ntakiheryo, owo aahaalepela aKolosi voohimya sa maKristau oowootha yaawo yaamananiha omusiveliha Muluku ettharaka Nlamulo na Moise ohiya omwaamini Yesu Kristu. (aKolosi 2:16-18) Nave Paulo aahiromola itthu sowoopiha olelo-va, seiyo sikhanle oonooceeliha waakhela etthuvo. Owo aahitthokiherya moota woosyaka soophavela soohiloka ni etthu yoopaka okathi nihiniiwanana ahu vatthokoni vahu aahiiso ni annihu mmulokoni. Miruku sa Paulo pooti onikhaliherya olelo-va. Vano nrowe nithokorerye soolopola sikina siri epaphelo aalepenle awe aKolosi.

4. Xeeni wuupuwelela itthu soonanara okhanle aya oonooceeliha wakhela etthuvo?

⁴ Nuumala Paulo owuupuxerya axinnawe voohimya sa yoolipelela aya yoohakalaliha, owo aalempe so: “Vano, mpwetexe mwettelo anyu wa vathí-va: enamuttompe, oraruwa, osiveliwa n’itthu sonanara n’uphavela seiyo, wunlela muhakhu”. (aKolosi 3:5) Osiveliwa ni itthu soonanara pooti oniirihaka ohiwerya wiikasoopa ni ohonona wataana wahu ni Yehova ni yoolipelela ahu ya muhoolo. Munna mmosa aatonko oraruwa ni muhoolo mwaya otthikela mmulokoni, onihimya wira miyuupuwelo sawe soohiloka saahincerereya vanceene, nto “ohinawerya-tho wiikasoopa mpakha opaka etampi”.

5. Ninrowa wiikasoopa sai okathi nimpaka ahu mikwaha sa nakoso, wala ninvara ahu muteko ni mutthu ohithelanne ahu?

⁵ Nihaana okhalana ephoole akhala wira niri opuro wala ni atthu akhanle ooniiriha ohiiwelela malamulo a Yehova. Mwa ntakiheryo, ti vamiruku mulopwana ni muthiyana aniphavela othelana ohela mikano itthu sintoko ovarelana, obexarana, ni okhala mekhaya. (Miruku 22:3) Itthu sikina sikhanle oohonona waamini wahu pooti okhumelelaka okathi nimpaka ahu mikwaha sa nakoso wala okathi ninvara ahu muteko ni mulopwana wala muthiyana ohithelanne ahu. (Miruku 2:10-12, 16) Munrowa wiikasoopa sai? Mwaaleeleke atthu akina wira nyuwo mwa Namoona a Yehova. Mukhalaneke mweettelo wooloka, ni muhiliyale wira olavula moovekana pooti okumiherya ehasara. Nave nihaana okhalana ephoole okathi ninriipiwa ahu murima wala onniphwanya aya omeekha. Okathi owo hiyo pooti omphavelaka mutthu mukina wira onihakalalihe. Naahikhalane ephoole pooti oriipiwa murima nto nneemererya nikhaliheryo na khula mutthu. Eyo etthu yowoopiha. Akhala wira munimakela wuupuwela siiso, muhipake etthu enrowa owooceelihani waakhela etthuvo. Munvekele nikhaliheryo Yehova ni anna aahiiso arokora.​—Musome Esalimo 34:18; Miruku 13:20.

6. Exeeni nintthuneya ahu wuupuwelela okathi ninthanla ahu matthekulelo?

⁶ Wira nisyake miyuupuwelo soohiloka, nihaana osyaka matthekulelo oohireerela. Matthekulelo manceene olelo-va, annuupuxerya itthu soohiloka saapakiwa oSodoma ni oGomora. (Yuda 7) Atthu anipaka ifilme anniwiiriha anamunceene woonaka onamuttompe okhala etthu yoohitthekeya ni yooreera. Nto  okathi wotheene nihaana wiikasoopa. Khanikhanle oweemererya matthekulelo otheene a olumwenku ola. Ohiya-vo nihaana othanla matthekulelo ahinrowa onooceeliha waakhela etthuvo ya okumi.​—Miruku 4:23.

7. Mixankiho xeeni sikhanle ookhumelela mmulokoni mwa eKristau?

⁷ Ninnihakalala wiirela mpantta muloko wa eKristau. Ninnisoma Nuulumo na Muluku mmuthukumanoni, ni ninnikhaliheryana moophenta. Eyo enninikhaliherya owehexexaka etthuvo. Okathi mukina mixankiho saamukhaani pooti oniiriha ohiiwanana ni anna wala arokora. Akhala wira khanimphuka mixankiho iyo moowaakuveya, iyo pooti oniiriha ohiphavela olevelela.​—Mmusome 1 Pedru 3:8, 9.

8, 9. (a) Mikhalelo xeeni sinrowa onikhaliherya waakhela etthuvo? (b) Exeeni enrowa onikhaliherya okhala oomaaleleya okathi muKristau mukina onnitthekela awe?

⁸ Khanimphavela weemya wira ohiphavela olevelela onooceelihe waakhela etthuvo. Paulo aahitthokiherya etthu maKristau anitthuneya aya opaka, oriki: “Nyuwo mophentiwa ni Muluku, mothanliwa ni yowo wira mukhale atthu awe. Tivó, mukuxe murima w’othunku, murima worera, wowiyeviha, womàla, ni wovilela. Nvilelaneke, mulevelelaneke imara sothene muntthekelananyu. Ntoko Muluku òlevelenlyaweni nyuwo, siso-tho nyuwo mwaleveleleke akwinyu. Wovikana sothene iya, mukuxe murima w’ophenta, weiwo ommaleliha orera murima”.​—aKolosi 3:12-14.

⁹ Niphento ni oreera murima pooti onikhaliherya waalevelela akina. Akhala wira nootthekeliwa, vannireerela wuupuwela okathi hiyo naamutthekenle ahu mutthu mukina, masi onilevelela. Tthiri naahimuxukhurela vanceene mwaha woonilevelela. (Mmusome Musuweli 7:21, 22.) Ninnimuxukhuru Kristu mwaha wowiiraaniha anamakokhorela eekeekhai. (aKolosi 3:15) Otheene ahu nnimphenta Muluku mmosaru, ninlaleya ihapari simosaru, ni anamunceene sinniniphwanya mixankiho simosaru. Nto nooniherya ophenta ni olevelelana, muloko wa eKristau onrowa okhala wowiiraana vanceene ni nnoowerya owehexexa etthuvo ya muhoolo.

10, 11. (a) Xeeni nrima niri aya etthu yowoopiha? (b) Nipake exeeni wira nrima nihinooceelihe waakhela etthuvo?

¹⁰ Nrima pooti onooceeliha waakhela etthuvo. Matakiheryo a mBiibiliyani annooniherya woopiha waya nrina. Mwa ntakiheryo, Kayini aanimukhalela nrima Abeli ni aahimwiiva. Kore, Datani, ni Abirami yaanimukhalela nrima Moise ni yaahihiya omwiiwelela. Mwene Sawuli aanimukhalela nrima Davidi ni aahimananiha omwiiva. Tthiri Nuulumo na Muluku ninhimya ekeekhai, okhala wira “vavo vari-vo nrima n’uhìwanana, vavo-tho wokhala owanawana ni miteko sothene sonanara”.​—Yakobo 3:16.

¹¹ Akhala wira nnimwiimananiha vanceene wooniherya ophenta ni oreera murima, khaninrowa okhala ananrima. Nuulumo na Muluku ninhimya wira: “Ole omphenta t’òvilela, t’òwarumela akhw’awe, khanakhalela nrima”. (1 aKorinto 13:4) Wira nihikhale ananrima, nihaana omananiha oweha itthu mwa enamuna Yehova onoona awe. Nihaana waathokorerya anna ni arokora sintoko ipantte sa erutthu emosaru, eyo piiyo, muloko wa eKristau. Biibiliya onihimya so: “Epantte ekina y’erutthu yattittimihiwaka, sothene sinnitteliwa  vamosá ni yeyo”. (1 aKorinto 12:16-18, 26) Akhala wira munna ennimukhumelela etthu yoohakalaliha, hiyo nihaana ohakalala ni yena, ohiya omukhalela nrima. Muupuwele ntakiheryo nooloka na mwanawe Mwene Sawuli, Yonathani. Owo khaarina nrima okathi Davidi aathanliwe awe okhala mwene ohiya yena. Ohiya-vo aahimulipiha ni omukhaliherya Davidi. (1 Samuweli 23:16-18) Niireke nnoowerya okhala ooreera murima ni oophenta sintoko Yonathani?

12. Malakiheryo xeeni a mBiibiliyani anrowa okhaliherya etthoko ahu waakhela etthuvo?

¹² Vaavo atthu otheene a vatthokoni vahu aneettela aya malamulo a Biibiliya, etthoko ahu ennikhalana murettele, ohakalala ni nnimwaakhela etthuvo muhoolo. Paulo aahivaha malakiheryo anikhaliherya itthoko, ohimyaka so: “Nyuwo, athiyana: mukhaleke òwiwelela aiy’anyu, sisale simphwanelaya atthu Àpwiya. Nyuwo alopwana: mwaphenteke amwar’inyu, muhahaxeké. Nyuwo, anamwane: nwiweleleke atith’inyu n’amam’inyu mwa sothene, okhala wira ela t’inasivela Apwiya. Nyuwo, alipa-òyara: muhanyonyiheké an’inyu, wira ehojeyé”. (aKolosi 3:18-21) Niireke mooweha moota malakiheryo ala anrowa aya okhaliherya etthoko anyu?

13. Moota xeeni murokora muKristau okhanle awe oomukhaliherya iyawe ophavela omurumeela Yehova?

¹³ Woonasa wene nyuwo mwa murokora otheliwe ni mutthu ohimmurumeela Yehova. Nto exeeni enrowa anyu opaka akhala wira munoona wira iyanyu khonoothokoreryani mwa enamuna yookhalela? Woonasa wene nyuwo pooti ophavelaka waakhulana, masi niireke eyo enoolokiherya itthu? Nto mwiira siiso, niireke eyo enoomwiiriha yena omurumeela Yehova? Woonasa wene nnaari. Masi  akhala wira munoomuttittimiha sintoko muhooleli a etthoko anyu, nyuwo pooti okhaliherya etthoko anyu okhala yoowiiwanana ni munoomwiiriha Yehova ovuwihiwa. Ntakiheryo nanyu nooloka pooti omwiiriha iyanyu ophavela omurumeela Yehova, ni waakhela etthuvo hoothe.​—Mmusome 1 Pedru 3:1, 2.

14. Mulopwana muKristau opakeke exeeni akhala wira mwaarawe oohaamini khonimuttittimiha?

¹⁴ Woonasa wene mwaarinyu khonimurumeela Yehova. Nto exeeni mukhanle anyu oopaka akhala wira owo khonoottittimihani? Vakhala wira munnimpwapwela wira mooniherye wira nyuwo muri xeefi, niireke owo pooti woottittimihani? Naari! Muluku oniphavela wira mukhale mulopwana oophenta ni mmutakiheke Yesu. (aÉfeso 5:23) Yesu yoowo ori muhooleli a muloko, okathi wotheene toopixa murima ni toophenta. (Luka 9:46-48) Akhala wira munoomutakiha Yesu, nuuvira okathi mwaarinyu pooti ophavela omurumeela-tho Yehova.

15. MuKristau oothela onrowa omooniherya sai mwaarawe wira onnimphenta?

¹⁵ Yehova onniwiixuttiha alopwana oothela ohimyaka so: “Mwaphenteke amwar’inyu: muhahaxeké”. (aKolosi 3:19) Mulopwana oophenta onnimuttittimiha mwaarawe. Moota xeeni? Owo onniwiriyana moonelo awe ni onnimwiiriha yena oweha wira moonelo awe ti wootthuneya. (1 Pedru 3:7) Hata okathi wotheene ohipakaka ele mwaarawe oninvekela awe, masi onwiriyana ni ephoole pooti omukhaliherya mulopwana owo opaka soothanla sooloka. (Miruku 15:22) Mulopwana oophenta khonimukhanyererya mwaarawe omuttittimiha yena. Ohiya-vo, mwaarawe onnipaka eyo moohikhanyereriwa. Vaavo mulopwana onimphenta awe mwaarawe ni anaawe, awosa anoomurumeelaka Yehova moohakalala, ni anrowa waakhela etthuvo.

16, 17. Akhala wira mwa mmiravo, munrowa osyaka sai onyoonyiheya ni anamuyari anyu?

¹⁶ Akhala wira mwa mmiravo, woonasa wene munoona wira anamuyari anyu khanoona mixankiho sanyu, wala annitepa woowehawehani. Eyo pooti woonyoonyihani vanceene ni owiirihani wuupuwela ohiya omurumeela Yehova. Masi akhala wira munoomuhiya Yehova, munooweha wira khuuvo mutthu moolumwenkuni onoophentani vanceene waavikana anamuyari anyu maKristau, ni apatthani anyu a mmulokoni.

¹⁷ Muupuwelele ela: Vaakhanle wira okathi wotheene munipaka anyu itthu soohiloka anamuyari anyu anoomaala paahi, niireke mwaamukupali wira annoophentani? (aHéberi 12:8) Ekeekhai wira awo atthu oohimalela, ti maana aya ehinoosivela ayani enamuna aniwiixuttiha ayani. Masi muhiwehexexe ohimalela waya. Ohiya-vo, mmananihe osuwela nthowa naya anipaka aya etthu eyo wala olavula. Mmaaleleyeke, ni muhaavanyiheke, akhala wira aavonya. Nuulumo na Muluku ninhimya so: “Òpixa murima n’ulavula òkhalana ankhili: mutthu ànkhili onnitthokelela ohinatthi olavula”. (Miruku 17:27) Mukhalane yoolukama ya okhala mutthu oowunnuwa mmukhalelo wa omunepani yoowo oneemererya miruku ni wiixutta ni itthu sotheene onileeliwa awe. (Miruku 1:8) Muhikhalakhale muliyalaka wira okhalana anamuyari animphenta Yehova eparakha yuulupale. Awo aniphavela wookhaliheryani ophwanya okumi woohimala.

18. Xeeni mulakenle anyu owehexexa etthuvo anyu ya muhoolo?

¹⁸ Hata nlipelelaka orowa wiirimu wala okhalaka mparayiisu valaponi, otheene ahu ninniwehererya mareeliho oohakalaliha muhoolo. Yoolipelela ahu ti yekeekhai, maana enivarihana ni yooleiherya ya Mpattuxa a erimu, yoowo onihimya so: “Tthiri atthu othene a mulaponi anosareya osuwela w’Apwiya [Yehova]”. (Yesaya 11:9) Nto atthu otheene anrowa okhalaka valaponi anrowa wiixuttihiwaka ni Muluku. Tthiri vannireerela wiimananiha wira naakhele etthuvo eyo yookuxa murima. Tivonto, okathi wotheene muupuweleleke etthu Yehova ooleihenrye aweni, ni ehikhale etthu enrowa owooceelihani waakhela etthuvo!