1. Etthu xeeni murummwa Paulo aalepenle awe maKristau a oKolosi? (Nwehe elatarato yoopacerya.)

MURUMMWA Paulo aahaalepela epaphelo maKristau a oKolosi eyaakha 60-61, ori ene mukhatteya oRoma. Aahaatthokiherya nthowa naya yaatthuneya aya “osuwela” itthu somunepani. (aKolosi 1:9) Paulo aahimmye so: “Kinohimeryani itthu iya wira muhimuhiyé mutthu awotothakani ni molumo owèpesa. Mwipasopeke: muhimuhiyé mutthu òvarakani ni molumo òwòtotha ni miruku sihikhanle etthu. Atthu ntoko s’awo khanimwamini Kristu, masi anitthara solimalela s’atthu n’ikuru s’olumwenku”. (aKolosi 2:4, 8) Nuumala-vo, aahaatthokiherya nthowa naya miyuupuwelo sowuulaana saari aya soohiloka, ni etthu yawiiriha anamunceene osiveliwa miyuupuwelo iyo. Mwa ntakiheryo, miyuupuwelo sikina pooti owiirihaka atthu wuupuwela wira toosuwelexa waavikana akina. Nto Paulo aalepenle epaphelo anna a oKolosi wira akhootte miyuupuwelo sa mulaponi ni miteko soohiloka.​—aKolosi 2:16, 17, 23.

2. Nthowa xeeni ninrowa ahu othokorerya miyuupuwelo sa mulaponi?

² Mutthu orina miyuupuwelo sa mulaponi onnikhootta malakiheryo a Yehova, nto naahikhalane ephoole, miyuupuwelo iyo  vakhaani-vakhaani pooti ovukula ororomela wahu miruku sa Yehova. Otheene ahu ninniweha miyuupuwelo sa mulaponi mutelevisauni, munternetini, omutekoni wala oxikola. Ninrowa osyaka sai miyuupuwelo soohiloka sa mulaponi? Mwaha ola ninrowa othokorerya matakiheryo mathanu a miyuupuwelo sa mulaponi ni oweha moota woosyaka miyuupuwelo iyo.

3. Muupuwelo xeeni wa mulaponi atthu anceene arina aya? Mwaha wa xeeni?

³ ‘Miyo pooti okhala mutthu ooreera murima kihimukupaliki Muluku’. Muupuwelo ola ohuulaana ilapo sinceene olelo-va. Atthu onuupuwela siiso, woonasa wene khanavarerye akhala wira Muluku ookhala tthiri. Awo khino anuupuwela wira ohimukupali Muluku onniwiiriha okhala ootaphuwa opaka etthu aniphavela awe. (Musome Esalimo 10:4.) Atthu akina anuupuwela wira anoohimmwa okhala a miruku, akhala wira annihimya wira “miyo kinoowerya okhalana mweettelo wooloka vahitthuneyaka omukupali Muluku”.

4. Exeeni enrowa ahu ohimya wira nimukhaliherye mutthu ohinikupali wira ookhala Mpattuxa?

⁴ Niireke ti vookhalela okupali wira khokhanle Mpattuxa? Atthu anceene aneererya waakhula nikoho nlo amuroromelaka siensia, khaniphwanya etthu enaahakalaliha. Masi khivanixankiha ophwanya waakhuliwa wa nikoho nlo. Mwa ntakiheryo, niireke empa enoowerya okhumelela mekhayaru? Nnaari! Ehaana otekiwa ni mutthu. Masi itthu sirina okumi ti sootepa otikiniha ovikana empa. Hata iseelula saamukhaani sinniwerya orelana, masi empa kheniwerya. Ela enitaphulela wira iseelula sinniwerya osuka mikhalelo sotheene sa mutthu, nto okathi sinrelana aya sinnivahana mikhalelo iyo. Ti pani opanke iseelula wira siweryeke opaka itthu iyo sotheene? Biibiliya onaakhula oriki: “Vekekhai, khul’empa entekiwa ni mutthu: vano Muluku t’upanke itthu sothene”.​—aHéberi 3:4.

5. Niireke vanniweryaneya okhala mutthu ooloka nihikupaliki wira Muluku ookhala?

⁵ Ankhi atthu yaale anikupali wira vanniweryaneya okhalana mweettelo wooloka ahitthuneyaka omukupali Muluku? Ekeekhai wira Biibiliya onnihimya wira hata atthu ahinimukupali Muluku annipaka itthu sooreera. (aRoma 2:14, 15) Mwa ntakiheryo mutthu pooti waattittimiha ni waaphenta anamuyari awe. Masi akhala wira khoneettela malamulo a Yehova, muttho owo pooti opaka soothanla soohiloka. (Yesaya 33:22) Atthu anceene oosuwela, annikupali wira nihaana okhaliheriwa ni Muluku wira mixankiho sinceene sa mulaponi simale. (Mmusome Yeremiya 10:23.) Tivonto nihuupuweleke wira nnoowerya opaka itthu sooloka, nihikupaliki wira Muluku ookhala wala niheettelaka malamulo awe.​—Esalimo 146:3.

6. Etthu xeeni atthu anceene anuupuwela aya voohimya sa etiini?

⁶ “Khivanitthuneya weettela etiini wira mutthu ohakalale”. Atthu anceene anuupuwela wira etiini etthu yoonyoonya ni kherina efaita. Nave-tho itiini sinceene siniixuttiha wira atakhali anoopahiwa omooroni, enaakhanyererya atthu ovaha musurukhu aya, wala enikhaliherya ipoliitika. Ti nthowa naya atthu anceene anihimya aya wira annihakalala aheettelaka etiini. Awo pooti ohimyaka so: “Miyo kinniphavela omusuwela Muluku, masi nkiniphavela wiirela mpantta etiini”.

7. Etiini yekeekhai enrowa woohakalalihani sai?

 ⁷ Niireke vanniweryaneya ohakalala niheettelaka etiini? Aayo, mutthu pooti ohakalala oheettelaka etiini yoowoka. Masi khaavo oniwerya ohakalala mwekeekhai ohikhanle mpatthani a Yehova, yoowo ori Muluku oohakalala. (1 Timótheyo 1:11) Khula etthu Yehova onipaka awe, ennaakhaliherya atthu akina. Nto okhala wira na arumeyi awe, ninnisiveliwa opaka itthu sinaakhaliherya akina. (Miteko 20:35) Mwa ntakiheryo, muupuwele moota etiini yekeekhai enikhaliherya aya imusi ohakalala. Ninniixutta omuttittimiha ni okhala oororomeleya wa ole othelanne ahu, waahuwa anamwane oottittimiha, ni ophentana saana vatthokoni. Etiini yekeekhai ennaakhaliherya arumeyi a Yehova ovara muteko vamosa ni murettele, ni ophentana ni annihu.​—Mmusome Yesaya 65:13, 14.

8. Luka 11:28 onnikhaliherya sai osuwela etthu eniphwanyiha ohakalala wekeekhai?

⁸ Nto niireke vanniweryaneya ohakalala nihimurumeelaka Muluku? Exeeni enaahakalaliha atthu? Akina annisiveliwa vanceene ni muteko aya, axooku ni matthekulelo. Nave akina annihakalala yaakhapelelaka amusi wala apatthani aya. Nnaamwi itthu iyo sihakalalihaka, masi iwo khahiyo ohakala wekeekhai. Okhala wira hiyo noovirikana ni inama, nto nnoowerya omusuwela ni omukokhorela Mpattuxa ahu. Okathi oniira ahu siiso, nto nnoophwanya ohakalala wekeekhai. (Mmusome Luka 11:28.) Mwa ntakiheryo ninnihakalala ni olipihiwa vaavo vanithukumana ahu ni anna ni arokora nimukokhorelaka Yehova. (Esalimo 133:1) Nave-tho ninnihakalala wiirela mpantta nikhuuru na olumwenku wotheene na arumeyi a Yehova, okhalana mweettelo wooloka, ni nlipelelo noohakalaliha.

9. (a) Anamunceene anoonela sai orupihana? (b) Xeeni Nuulumo na Muluku nnihimya aya wira orupihana ohinatthi othelana etampi?

⁹ “Niireke ti vootthekeya mulopwana ni muthiyana orupihana ehithelanne?” Atthu pooti okohaka so: “Xeeni ottharaka malamulo oovila? Mulyeeke elapo”. Masi Nuulumo na Muluku ninnikhoottiha orupihana woohiloka. * (Nwehe enoota.) (Mmusome 1 aTesalonika 4:3-8.) Yehova ookhalana ehakhi ya onivaha malamulo, maana owo tonipattunxe. Nto owo onihimya wira paahi mulopwana ni muthiyana alepinhe ekasamento aya taneemereriwa orupihana. Yehova onninivaha malamulo mwaha woowi onniniphenta. Owo onnisuwela wira natthara malamulo awe, okumi ahu onrowa okhala wooloka. Etthoko eniiwelela malamulo a Muluku enrowa otepaka ophentana ni okhala ni murettele. Masi Muluku onrowa waahukhumu ale anisuwela malamulo awe, ahineettela.​—aHéberi 13:4.

10. MuKristau onrowa owerya sai okhootta osyaka orupihana woohiloka?

¹⁰ Biibiliya onniniixuttiha moota woosyaka orupihana woohiloka. Nihaana wiikasoopa ni itthu ninweha ahu. Yesu aahimmye so: “Ole oninweha muthiyana anwereihaka murima, òraruwana muthiyan’owo ni murima. Nitho nanyu nolopwana notthekihakani, musyole, murihé”. (Matheyo 5:28, 29) Nto nihaana osyaka oweha epornografia ni owiriyana isipo sintumererya orupihana. Paulo olempe so: “Mpwetexe makhalelo anyu a  vathí-va: enamuttompe, oraruwa”. (aKolosi 3:5) Nave-tho nihaana wiikasoopa ni itthu sinuupuwela ahu wala olavula.​—aÉfeso 5:3-5.

11. Exeeni ekhanle ooniiriha ophavela okhalana muteko woovuwa?

¹¹ “Muteko woovuwa onimoophwanyihani ohakalala”. Atthu pooti onileela wira nihaana ophavela ni murima ahu wotheene muteko woovuwa mulaponi, vanceenexa yoole onrowa oniiriha okhala atthu oovuwa ni oothaachiri. Okhala wira anamunceene anikupali wira muteko oniliviwa musurukhu munceene toniphwanyiha ohakalala, naahikhalane ephoole ni hiyo pooti opacerya wuupuwelaka siiso.

12. Niireke muteko woovuwa onimoophwanyihani ohakalala?

¹² Niireke ekeekhai wira muteko woovuwa onniphwanyiha ohakalala? Nnaari. Nkahaya muupuwele ela: Satana aaphavela okhala oowerya ni oovuwa. Yena oophwanya aaphavela awe. Masi owo khohakalanle, ohiya-vo, toonanariwa. (Matheyo 4:8, 9; Wisupulula 12:12) Moovirikana ni Satana, nkahaya muupuwele ohakalala orina ahu mwaha wa waakhaliherya akina omusuwela Muluku ni osuwela mareeliho a muhoolo. Khuuvo muteko wa mulaponi onrowa woophwanyihani ohakalala wekeekhai. Ohiya-vo, wira akhalane muteko woovuwa, ikwaha sinceene atthu annilupatthana ni okhalelana nrima. Hata vari siiso, atthu awo khanihakalala. Biibiliya onihimya wira atthu awo ‘anomola epheyo’.​—Musuweli 4:4.

13. (a) Nooneleke sai muteko ahu? (b) Exeeni yamphwanyihale Paulo ohakalala wekeekhai?

¹³ Ekeekhai wira nihaana ophavela etthu yowiikhuriha, ni khahiyo vootthekeya ophavela muteko onnisivela. Masi muteko ahu ohikhaleke etthu yootepexa otthuneya mookumini mwahu. Yesu aahimmye so: “Khavo onwerya warumela mamwene manli: mana onomunyokha mmosá, amphenteke mukina pahi; walá onomurumela mmosá, mukina amuthanyeke. Khamunwerya omurumela Muluku vamosá ni muhakhu”. (Matheyo 6:24) Omurumeela Yehova ni owiixuttiha Biibiliya akina tonirowa oniphwanyiha ohakalala vanceene. Murummwa Paulo aahoona eyo. Oryeene mmiravo, owo aaphavela okhalana muteko woovuwa wa mulaponi. Muhoolo mwaya, aahiweha wira waakhaliherya atthu akina orukunuxa mirima saya toniphwanyiha ohakalala wekeekhai. (Mmusome 1 aTesalonika 2:13, 19,  20.) Khuuvo muteko wa mulaponi onrowa oniphwanyiha ohakalala wekeekhai, ovikana omurumeela Yehova ni waakhaliherya akina omusuwela yena!

14. Xeeni atthu onaasivela aya muupuwelo woowi apinaatamu anoowerya ophuka mixankiho sa molumwenkuni?

¹⁴ “Apinaatamu anoowerya ophuka mixankiho saya”. Atthu anceene waasivela muupuwelo owo. Mwaha wa xeeni? Vaakhanle wira ekeekhai, eyo yaataphulela wira hiyo khanintthuneya olakiheriwa ni Muluku, ni pooti opaka khula etthu enitthuna ahu. Atthu akina annihimya wira ikhotto, iretta ni ohaawa sinnivukuwa. Erelatoorio emosa enihimya wira “etthu emosa eniiriha olumwenku ola okhala saana, mwaha woowi apinaatamu aalakela okhaliha elapo ela nipuro nooloka”. Masi eyo ekhweeli? Niireke apinaatamu anniwerya vano ophuka mixankiho sa mulaponi? Nrowe nthokererye saana mwaha ola.

15. Xeeni nikhanle ahu oohimya wira mixankiho sinootepa moolumwenkuni?

¹⁵ Niireke apinaatamu aawerya omaliha ikhotto? Okathi wa Ekhotto Yoopacerya ni ya Nenli ya Olumwenku wotheene, ahookhwa atthu anivikana imilyau 60. Mwaakha wa 2015 paahi, atthu imilyau 12.4 yaahitthyawa ilapo saya mwaha wa ikhotto wala olupatthiwa. Mpakha-va, atthu atthyanwe ilapo saya mwaha wa ekhotto ari imilyau 65. Ankhi ekrime?  Ilapo sikina, mithinto sikina sa ekrime sinnivukuwa, masi sinnincerereya mithinto sikina, ntoko ekrime ya mwinternetini, otuphelana vatthokoni, terrorismo, ni wiiya. Voohimya sa iretta? Ekeekhai wira apinaatamu ahiixutta mirette siniwerya oloola iretta kamosa-kamosa. Masi erelatoorio emosa ya mwaakha wa 2013 yaahimmye wira khula mwaakha annookhwa atthu imilyau 9, nlelo ahirina iyaakha 60, mwaha wa eretta ya murima, supiyaana, kanser, iretta sa masasu ni diabete. Ankhi osikhini? Ebanko ya Olumwenku wotheene enihimya wira atthu a wAfrika ari amasikhini ahincerereya vanceene. Mwaakha wa 1990 yaari imilyau 280 masi mwaakha wa 2012 yaari imilyau 330.

16. (a) Exeeni ennikupaliha wira Omwene wa Muluku paahi toniwerya omaliha mixankiho sotheene sa molumwenkuni? (b) Yesaya ni nasalimo ahimmye wira Omwene onrowa opaka exeeni?

¹⁶ Hiyo khanintikinihiwa ni itthu iyo. Olelo-va, mitthenkeso siniweherya muhakhu ni epoliitika sinihooleliwa ni ananrima. Atthu awo khaniwerya omaliha ekhotto, ekrime, iretta ni ohaawa. Omwene wa Muluku paahi tonrowa owerya omaliha itthu iyo. Muupuwele ele Yehova onrowa awe waapakela apinaatamu. Omwene awe onoomaliha itthu sotheene sinikumiherya ikhotto, ntoko wunlela muhakhu, wiiya, etiini yoowoka ni Satana mwaneene ene. (Esalimo 46:9, 10) Omwene wa Muluku onoomaliha ikrime. Okathi ola onikhala ahu, Omwene wa Muluku onniwiixuttiha atthu anceene ophentana ni ororomelana. Khiivo eguvernu ekina eniwerya opaka eyo. (Yesaya 11:9) Moohipisa Yehova onoomaliha iretta ni atthu otheene anookhalana ekumi yooloka. (Yesaya 35:5, 6) Onoomaliha osikhini, nto atthu otheene anrowa ohakalalaka ni okhala apatthani a Muluku. Ohakalala ni okhala mpatthani a Muluku ti wootthuneya ovikana musurukhu wotheene wa mulaponi.​—Esalimo 72:12, 13.

17. Munrowa okhootta sai miyuupuwelo sa mulaponi?

¹⁷ Nto mwaiwa muupuwelo woovuwa mulaponi, yoowo oniwiirihani opacerya ohimukupali Muluku, muhaana toko otokosa moota Biibiliya onoonela awe mwaha owo. Mulavule mwaha owo ni munna wala murokora oolipa momunepani. Muupuwele nthowa naya atthu anisiveliwa aya ni muupuwelo owo, musuwele nthowa naya ori aya woohiloka ni mukhootte. Nihaana otthara miruku sa Paulo wira niikasope ni miyuupuwelo sa mulaponi. Owo olempe so: “Mwetteke ni miruku oholo w’ale ahikhanle aKristu . . . Musuweleke omwakhula khula mutthu ntoko vanrerelaya”.—​aKolosi 4:5, 6.