1, 2. (a) Yesu oonela sai Nlamulo na Muluku? (b) Alipa-oolepa ni aFarisi yaarumela sai Nlamulo moohikhalela?

YESU aanisiveliwa vanceene Nlamulo na Moise. Owo aanisiveliwa vanceene mwaha woowi Nlamulo nlo naakumiheriwe ni Yehova, yoowo aari mutthu ootepaxa otthuneya mookumini mwa Yesu. Esalimo 40:9, enihimya so: “Muluku aka! Wira otthuna wanyu t’unkisivela. Kinnettela ikano sanyu ni murim’aka wothene”. Moolumo awo anooniherya moota Yesu aasiveliwa awe Nlamulo na Muluku. Moolumo ni soovara sa Yesu sihooniherya wira Nlamulo na Muluku naari noomalela, naakumiherya mireerelo ni naamwiiraneya tthiri.​—Matheyo 5:17-19.

² Yesu aaniriipiwa murima vanceene vaavo aaweha awe alipa-oolepa ni aFarisi avarihelaka muteko Nlamulo na Tiithi awe mwa enamuna yoohikhalela. Awo yaaniiriha Nlamulo nlo okhala noovila weettela. Owo aahaahimya aFarisi oriki: “Nyuwo munnihavula epantte yanamuloko ya sowima sa mmatta mwanyu, hatá epantte ya itthu ixikhanixa”. Yesu aaphavela ohimya wira awo yaaniiwelela Nlamulo, hata itthu saamukhaanixa. Nto niireke eyo yaari etthu yoohiloka? Nnaari. Masi Yesu aahivikaniha oriki: “[Masi]  munnithanya soruma sulupale sa ikanó, ntoko exariya n’ikharari n’ororomeleya”. (Matheyo 23:23) AFarisi khiyaaweha tiivi yaari yoolakela ya Nlamulo, ni yaixoona okhala oolokexa waavikana akina. Masi Yesu aanisuwela yoolukama ya Nlamulo ni ele khula yooruma yaathoonyerya aya voohimya sa Yehova.

3. Mwaha ola ninrowa othokorerya exeeni?

³ Olelo-va, maKristau khanivekeliwa weettela Nlamulo na Moise. (aRoma 7:6) Masi xeeni Yehova aalakenle awe wira Nlamulo na Moise nikhale mBiibiliyani? Owo oniphavela wira niiwexexe saana ni neetteleke “soruma sulupale”, niire so, malakiheryo a Nlamulo. Mwa ntakiheryo exeeni eniixutta ahu ni mureheryo wa mittetthe sa ntthyawelo? Mwaha ovinre, nihiixutta ele mulipa-ootthyawa aavekeliwa awe opaka. Mwaha ola, ninrowa wiixutta ele mittetthe sa ntthyawelo sinniixuttiha aya voohimya sa Yehova ni moota wootakiha mikhalelo sawe. Ninrowa waakhula makoho mararu: Mittetthe sa ntthyawelo sinooniherya sai wira Yehova toomoriwa ikharari? Muluku onoonela sai okumi? Sinooniherya sai exariya yoomalela ya Muluku? Nto mweererye omutakiha Tiithi anyu a wiirimu mwa inamuna iya tthaaru.​—Mmusome aÉfeso 5:1.

4, 5. (a) Mareheryo xeeni yaapakiwe wira akhweiheryeke ophiya muttetthe wa ntthyawelo, ni nthowa xeeni? (b) Ela enniixuttiha exeeni voohimya sa Yehova?

⁴ Yehova aahipaka mareheryo wira mittetthe iye 6 sa ntthyawelo sikhaleke sookhweya ophiya. Owo aahaaruma aIsarayeli wira yaahaana othanla mittetthe miraru sootthyawela khula ekhopela ya muro Yordani. Mwaha wa xeeni? Wira mulipa-ootthyawa aakuveke ophiya mittetthe iye voohikhala mixankiho. (Mothakoni 35:11-14) Iphiro saaviriwa oroiwaka mittetthe iyo, saanikhapeleliwa oratteene. (Otumererya 19:3) Moovarihana ni soolema sa aYuda, vanihimmwa wira mphironi saahikhala ikanyeryo saamukhaliherya mutthu osuwela mittetthe iyo. Okhala wira saahikhala mittetthe iyo, nto mwIsarayeli aamwiiva mutthu moohilakela, khaatthuneya otthyawela ilapo sa amalapo, yaawo yaakokhorela amuluku eethiru.

⁵ Nkahaya muupulele ela: Yehova aahiruma wira ole aamwiiva mutthu aahaana wookotthiwa. Masi aahipaka mareheryo wira ole aamwiiva mutthu moohilakela aahaana omoreliwa ikharari, ni okhapeleliwa. Namatokosa mmosa a Biibiliya ohimmye so: “Itthu sotheene saahilokiheriwa  mwa enamuna yootepa okhweya”. Yehova khahiyo mphuki ootakhala, yoowo oniphavela waahukhumu atthu paahi. Ohiya-vo, “onimorela wawe ikharari Muluku ti wowatta”.​—aÉfeso 2:4.

6. Niireke aFarisi yaanitakiha omoriwa ikharari wa Yehova? Mutthokiherye.

⁶ Masi aFarisi khiyaaphavela waamorela ikharari akina. Mwa ntakiheryo, soolema sa aYuda sinihimya wira aFarisi khiyaamulevelela mutthu aatthekela ovikana ikwaha tthaaru opakaka etthu emosaru. Yesu aahirumeela nlikanyiho na nFarisi aavekela waattamela opuro aari awe namaliviha mpoosito. Owo aaphavela owooniherya aFarisi wira muupuwelo aya khiwaalonke. Mulopwana ole nFarisi aahimmye so: “Múluku! Kinnoxukhuruni mwaha w’ohilikanaka miyo n’atthu akina, akhanle anawiye, òtakhala murima, anamararuwa: nnakhala nkikhanle ntoko natampi ula”. Yesu aaphavela ohimya exeeni? AFarisi ‘yanathanya akhw’aya’, ni yuupuwela wira atthu awo khiyaaphwanela omoreliwa ikharari.—Luka 18:9-14.

7, 8. (a) Munrowa otakiha sai omoriwa ikharari wa Yehova? (b) Xeeni vanitthuneya aya okhala oowiiyeviha wira naaleveleleke akina?

⁷ Nto mmutakiheke Yehova, ohiya aFarisi. Mwaamoreleke ikharari ni waareerela murima atthu. (Mmusome aKolosi 3:13.) Muhiwiiriheke akina woona ovila woovekelani muswammaha. (Luka 17:3, 4) Muhaana wiikoha so: ‘Kinnaalevelela akina moohipisa, nnaamwi atthu awo akitthekelaka ikwaha sinceene? Kinniphavela ophuka mulattu orina aka ni mutthu okitthekenle wala okiveeha?’

⁸ Wira niwerye waalevelela akina, nihaana okhala oowiiyeviha. AFarisi yaixoona otthuneyaxa waavikana akina, tivo yahaaphavela aya waalevelela akhwaaya. Masi okhala wira na maKristau, hiyo ‘ninniwonela vatthu akhw’ihu vowivikana mmansihu’ ni ninnaalevelela ni murima wotheene. (aFilipi 2:3) Niikoheke so: ‘Kinnimutakiha Yehova, kooniheryaka wiiyeviha?’ Nakhala atthu oowiiyeviha, vanrowa okhweyaka atthu onivekela muswammaha, ni waalevelela akina. Mwaakuveleke waamorela ikharari akina ni mpiseke otthekeleya.​—Musuweli 7:8, 9.

9. Yehova aakhalihenrye sai aIsarayeli oweha wira yena aanivaha efaita okumi?

⁹ Nthowa nimosa saakhumiheriwe aya mittetthe sa ntthyawelo, naari waakhapelela aIsarayeli wira ahivahiwe nthowa na ephome mwaha wa omwiiva mutthu ohitthenke. (Onamukuttho 19:10) Yehova onniphenta okumi ni onninyokha omwiiva mutthu. (Miruku 6:16, 17) Mwaha wookhala Muluku a xariya ni oowaarya, owo khaakhanle oomaala paahi okathi aiviwa awe mutthu hata moohilakela. Ekeekhai wira ole aamwiiva mukhwaawe moohilakela aaniwerya oleveleliwa. Masi aahaana  toko waasuweliha mulattu awe axitokweene. Nto axitokweene yaweha wira mutthu ole khaalakenle, namattheka owo aahaana omaka mmuttettheni-mme mpakha muulupale a anamukuttho okhwa. Nto eyo enitaphulela wira ikwaha sikina, namattheka ole aahaana okhala muttetthe ole okumi awe wotheene. Nto mareheryo ala yaaniwooniherya aIsarayeli otheene wira Muluku onnivaha efaita okumi. Wira amuttittimihe Mpattuxa a okumi, awo yahaana opaka khula etthu yaawerya aya wira ohiiviwe mutthu.

10. Yesu oonihenrye sai wira alipa-oolepa ni aFarisi khiyaawoonela vatthu atthu?

¹⁰ Moovirikana ni Yehova, aFarisi yaahooniherya wira khiyaavaha efaita okumi. Yesu aahaaleela wira: “Nyuwo mokuxa mihulelo s’ankhili: siso nyuwo khamukenle, mowojeliha ale yaphavela okela-mo”. (Luka 11:52) Yesu aaphavela ohimya exeeni? Alipa-oolepa ni aFarisi yaahikhalana muritti wa owiixuttiha atthu Nuulumo na Muluku ni waakhaliherya ophwanya okumi woohimala. Masi, awo yeererya waakhoottiherya atthu omutthara Yesu, yoowo ori “mwanene ekumi”. (Miteko 3:15) Mwa enamuna ela, awo yaaroiha atthu wookhwaani. Alipa-oolepa ni aFarisi yaari oowiixinnuwiha ni ananrima, nto khiyaawoonela vatthu atthu. Awo yaari ootakhala tthiri!

11. (a) Murummwa Paulo oonihenrye sai wira onnivaha efaita okumi ntoko siniira awe Yehova? (b) Exeeni enrowa onikhaliherya ophavelaka waalaleerya atthu otheene ni nthiti?

¹¹ Ninrowa omutakiha sai Yehova ni osyaka okhala ntoko alipa-oolepa ni aFarisi? Nnoowerya opaka eyo naavahaka efaita okumi. Murummwa Paulo aanivaha efaita okumi, aalaleeryaka atthu anceene ihapari soreera sa Omwene. Tivonto aawerya awe ohimya wira “akhalá mutthu a nyuwano onrowa orimela, miyo nkina mulattu”. (Musome Miteko 20:26, 27.) Niireke Paulo aalaleerya paahi wira ohivahiwe mulattu, wala mwaha woowi Yehova aahimuruma opaka eyo? Nnaari. Paulo aanaaphenta atthu. Owo aanivaha efaita yinceene okumi aya, ni aaphavela wira atthu awe yaakhele okumi ohinimala. (1 aKorinto 9:19-23) Hiyo-tho nihaana ovaha efaita okumi ntoko siniira awe Yehova. Owo oniphavela wira atthu otheene arukunuxe mirima saya wira yoopowe. (2 Pedru 3:9) Naphavela omutakiha Yehova nihaana waaphenta atthu. Mwaha wa waamorela ikharari atthu akina, hiyo ninrowa ophavelaka waalaleerya atthu otheene, nto eyo enoonihakalaliha.

12. Xeeni arumeyi a Muluku anitthuneya aya okhalana ephoole?

¹² Enamuna ekina ya ovaha efaita okumi ti okhalana ephoole. Nakhalana ekaaro wala mukukutta mukina, nihaana weettiha ni ephoole, hata okathi onirowa ahu omuthukumanoni. Nave-tho nihaana okhalana ephoole okathi onivara ahu muteko, ntoko oteka wala olokiherya empa. Atthu ni ekumi ti sootepa otthuneya ovikana musurukhu. Yehova onnipaka itthu sooloka okathi wotheene, nto hiyo nihaana omutakiha yena. Axitokweene ahaana wuupuwelela mwaha ola wa okhalana ephoole. Nave ahaana waatumererya anna okhalanaka ephoole. (Miruku 22:3) Akhala wira mutokweene onniwuupuxeryani malakiheryo a moota woovara etthu ni ephoole, muhaana wiiwelela. (aGalasia 6:1) Muthokoreryeke okumi ntoko Yehova onithokorerya awe, nto ‘khamunikumiheriwa mulattu mwaha wa mutthu iviwe’ wala okhwiiye.

13, 14. Axitokweene a wIsarayeli yaarowa otakiha sai exariya ya Yehova?

¹³ Yehova aahaaruma axitokweene a wIsarayeli otakihaka exariya awe. Ahinatthi olamula,  axitokweene yahaana otokosa oratteene mwaha owo. Moottharelana, yahaana osuwela saana mathowa amwiirinhe mutthu ole omwiiva mukhwaawe. Nave yahaana osuwela akhala wira mutthu ole khaatonko opaka etthu yootakhala khalai. Axitokweene ale yahaana otokosa akhala wira nawiive ole khaamunyokha mukhwaawe owo nto khiyaphavela omwiiva. (Mmusome Mothakoni 35:20-24.) Ohinatthi olamuliwa mutthu ole, nto yaahaana okhumelela anamoona anli, vakhala wira yaahikhala.​—Mothakoni 35:30.

¹⁴ Nuumala axitokweene otokosa saana mwaha owo, yaahaana ovarerya saana mweettelo wa mutthu owo iivale, ohiya paahi etthu opanke awe. Axitokweene yahaana okhalana miruku wira ahiweheke paahi etthu ele epakiwe, masi asuweleke mathowa ene yiirinhe okhumelela etthu ele. Etthu yootepa otthuneya, awo yahaana onvekela Yehova munepa awe woottela wira awerye otakiha miruku sawe, omoriwa wawe ikharari ni exariya.​—Okhuma 34:6, 7.

15. Moota Yesu aawoonela awe anatampi waavirikanne sai ni aFarisi?

¹⁵ Okathi aFarisi yaaphuka aya myaha saya, khiyooniherya omoriwa ikhari. Awo yaawehexexa yoottheka paahi, khiyaathokorerya mweettelo wa mutthu ole. Okathi yanwehale aya Yesu olyaaka owannyawe Matheyo, awo yahaakoha awiixutti awe ariki: “Vanikhala sai mwixuttihi anyu olyaka n’alipa a mpósito n’anatampi?” Yesu aahiwaakhula wira atthu akumi khanimphavela meediku, masi ale aniwereiwa. Aahincererya-tho ori: “Murowe mwaixuttihe enihimyaya molumo ala wira: ‘Miyo onkisivela omoriwa ikharari: mikuttho nkimphavela’. Tthiri miyo nkirwenle owihana atthu òrera murima, masi alipa-òttheka”. (Matheyo 9:9-13) Niireke Yesu aaphavela owaakiha anamattheka? Nnaari. Owo aaphavela wira atthu awo arukunuxe mirima saya. Eyo yaari etthu emosa Yesu aarwenle awe valaponi. (Matheyo 4:17) Yesu aahiweha wira “alipa-òliviha mpósito n’atthu [akina] yanyiheriwa okhala anatampi”, yaaniphavela orukunuxa murima aya. Awo khiyaarwenle olya paahi vatthokoni va Matheyo. Yaari vale mwaha woowi yaamutthara Yesu. (Marko 2:15) Moothananiha, aFarisi anceene khiyaathokorerya atthu ntoko Yesu aathokorerya awe. Awo khiyaakupali wira atthu yanwerya orukunuxa mirima saya. Nto yaawoona okhala anatampi yahaarowa ottharuwa. Tthiri moonelo aya waahivirikana vanceene ni Yehova, yoowo ori a xariya ni oomoriwa ikharari!

16. Ekomisau eniphuka milattu ehaana ophavela osuwela exeeni?

¹⁶ Okathi aniphuka aya myaha, axitokweene olelo-va ahaana omutakiha Yehova, yoowo oniphenta exariya. (Esalimo 37:28) Wanipacerya, awo ahaana ‘okohakoha’ wira asuwele tthiri yaapakiwe ene etampi. Vakhala wira yoopakiwa etampi, nto awo anrowa otthara malakiheryo a mBiibiliyani wira asuwele etthu yoopaka. (Otumererya 13:13-15) Okathi aniirela aya mpantta ekomisau eniphuka milattu, axitokweene ahaana okhalana ephoole yuulupale wira asuwelexe akhala wira namattheka owo oottharuwa wala nnaari. Eyo khahiyo etthu yookhweya, maana enihela muhina osuwela moota namattheka ole onoonela awe etthu opanke awe ni osuwela ele eri vamurimani vawe. (Wisupulula 3:3) Namattheka ohaana ottharuwa mwekeekhai wira omoreliwe ikharari. *​—Nwehe enoota.

17, 18. Axitokweene anrowa osuwela sai wira mutthu otthenke oottharuwa mwekeekhai? (Nwehe elatarato yoopacerya.)

¹⁷ Yehova ni Yesu annisuwela saana etthu eri  vamurimani va mutthu, okhala wira awo anniwerya osoma murima. Masi axitokweene khaniwerya osoma mirima sa atthu. Nto akhala wira mwa mutokweene, munrowa osuwela sai wira mutthu otthenke oottharuwa tthiri? Muhaana opacerya onvekela Yehova miruku ni ankhili. (1 Mamwene 3:9) Nuumala-vo, murumeeleke Nuulumo na Muluku ni iliivuru sikumiheriwe ni murumeyi oororomeleya wira musuwele ohiyaniha “oripiwa murima ohinrwa wa Muluku” ni “oripiwa murima mwaha wa Muluku”, eyo piiyo, ottharuwa mwekeekhai. (2 aKorinto 7:10, 11) Nwehe moota Biibiliya onaalavula awe atthu yaattharunwe itampi saya ni ale yahaattharunwe, ni muthokorerye moota atthu awo yaixoona aya, muupuwelo aya ni miteko saya.

¹⁸ Etthu ya neeraru, ori omuupuwela mutthu ole othenke, ohiya paahi oweha etthu opanke awe. Mwiikoheke so: xeeni oryaawe siisa? Xeeni ohalaka opaka etthu siisa? Mixankiho xeeni orina awe? Biibiliya aahihimya vahinatthi wira Yesu, yoowo ori muhooleli wa muloko wa eKristau, khonirowa ‘ophuka milattu mwaha wo wiwa pahi. Masi onowirela exariya amasikhini, onowakiha n’ikekhai alipa-òhawa’. (Yesaya 11:3, 4) Nyuwo axitokweene, Yesu ohoothanlani okhapelela muloko awe, nto onrowa wookhaliheryani ophuka milattu mooniheryaka exariya ni omoriwa ikharari. (Matheyo 18:18-20) Ninnixukhurela okhalana axitokweene annikhapelela saana! Nave anninikhaliherya wiirelana exariya ni omorelana ikharari yoohiru.

19. Itthu xeeni mwiixuntte anyu ni mittetthe sa ntthyawelo muniphavela anyu ovarihela muteko?

¹⁹ Nlamulo na Moise nookhalana “ephattuwelo y’osuwela ni y’ekekhai”, eyo piiyo, ethoonyeryo ya itthu sekeekhai. Ninniixuttiha voohimya sa Yehova ni malakiheryo awe. (aRoma 2:20) Mittetthe sa ntthyawelo sinniwiixuttiha axitokweene ophuka milattu “n’ixariya”, nave sinniniixuttiha otheene ahu ‘orerelana murima n’umoriwa ikharari mukina ni mukhw’awe’. (Zakariya 7:9) Nnaamwi nihivekeliwaka weettela Nlamulo na Moise, masi Yehova khoturunke muupuwelo awe. Owo onnivaha efaita yuulupale exariya ni omoriwa ikharari. Tthiri eparakha yuulupale omurumeela Muluku ahu. Nto nrowe ntakiheke mikhalelo sawe wira nikhapeleliwe nuuwo!