1. Mwaha wa etampi, exeeni enaakhumelela arumeyi anceene a Muluku?

MURUMMWA Paulo aalempe so: “Miyo nkirere otakhaliwa!” (aRoma 7:24) Moolikanasa ni Paulo, olelo-va arumeyi anceene a Muluku anniriipiwa murima ni okhulumuwa. Mwaha wa xeeni? Mwaha woowi hata niimananihaka omuhakalaliha Yehova, otheene ahu noorava etampi ni khanimalenle. Ti maana aya ninriipiwa ahu murima okathi nimmutthekela ahu Muluku. MaKristau makina yaatonko opaka etampi yuulupale pooti omakelaka wuupuwela wira Yehova khaalevelenle moomalela.

2. (a) Moota xeeni Esalimo 34:23 enooniherya aya wira arumeyi a Muluku khanitthuneya wiivaha nthowa mootepana? (b) Exeeni ninrowa ahu wiixutta mwaha ola? (Nwehe ekaaxa eni: “ Niireke Sowiixuttiha Wala Sootaphulela sa Nthoonyeryo?”)

² Biibiliya onninlipiherya wira namutthyawelela Yehova, khanintthuneya wiivaha nthowa mootepana. (Musome Esalimo 34:23.) Ontaphulela exeeni omutthyawelela Yehova? Exeeni nintthuneya ahu opaka wira Yehova onimorele ikharari ni onlevelele? Wiixutta voohimya sa mareheryo a mittetthe sa ntthyawelo sa wIsarayeli wa khalai, onoonikhaliherya ophwanya waakhuliwa wa makoho ala. Mareheryo awo yeettihiwa ni Nlamulo na Moise, nenlo  naaranttelihiwe nihiku na Pentekoositi a mwaakha wa 33. Nlamulo nlo naakhuma wa Yehova. Nto mareheryo ale a mittetthe sa ntthyawelo anoonikhaliherya osuwela moonelo wa Yehova voohimya sa etampi, anamattheka, ni atthu yaale anittharuwa. Woopaceryani, nrowe niwehe nthowa naya wIsarayeli saakhanle aya mittetthe sa ntthyawelo, ni moota mittetthe iyo saarumeeliwa aya.

3. Etthu xeeni aIsarayeli yaamwiiriha aya nawiive?

³ Yehova aanixanka okathi iiviwa awe mutthu. Akhala wira mwIsarayeli ammwiiva mukhwaawe, mmusi awe mutthu owo iiviwe, wala “mulipaowùnlela ikuhu”, aahaana omwiiva nawiive owo. (Mothakoni 35:19) Eyo yaaniiriha wira nawiive owo oliveryeke ekumi ya mutthu ole omwiivale awe. Vakhala wira nawiive owo khaiviwe moowaakuveya, Elapo ele Yooleiheriwa yaamunanarihiwa wala khiyarowa okhala yowaarya. Yehova aahimmye so: “Muhinanarihé elapo enikhalanyu” mmuhiyaka nawiive, masi muhaana omwiiva.—Mothakoni 35:33, 34.

4. Exeeni yaakhumelela vaavo mwIsarayeli moohilakela aamwiiva awe mutthu?

⁴ Masi, exeeni yaakhumelela okathi mwIsarayeli aamwiiva awe mutthu moohilakela? Hata mutthu aivale moohilakela, owo aahikhalana mulattu wa ephome ya mutthu oohittheka aamwiivale awe. (Maphattuwelo 9:5) Masi okathi yaakhumelela aya eyo, Yehova aahihimya wira vaanitthuneya wooniherya omoriwa ikharari. Ole omwiivale mukhwaawe moohilakela aahaana otthyawela muttetthe mmosa wa ntthyawelo wira ohinleliwe ikuhu ni mmusi awe mutthu ole omwiivale awe. Vaavo eemereriwa awe okhala mmuttettheni mmo, owo aanikhapeleliwa. Owo aahaana okhala mmuttettheni mmo mpakha okhwa muulupale a anamukuttho.​—Mothakoni 35:15, 28.

5. Moota xeeni mareheryo a mittetthe sa ntthyawelo annikhaliherya aya omusuwela saana Yehova?

⁵ Mareheryo a mittetthe sa ntthyawelo khahiyo yaakumiheriwe ni apinaatamu. Yehova  taakumihenrye. Yehova aahimuruma Yoxuwa waahimeerya aIsarayeli wira ‘yithanlele mittetthe s’otthyawela’. (Yoxuwa 20:1, 2, 7, 8) Yehova aahihimya-tho wira mittetthe iye saahaana okhala sa vameekhaaya. Nto mareheryo awe pooti oniixuttiha itthu sinceene voohimya sa Yehova. Mwa ntakiheryo, anninikhaliherya wiiwexexa omoriwa ikharari wa Yehova. Ni anniniixuttiha voohimya sa moota ninrowa ahu owerya omutthyawelela Yehova olelo-va.

6, 7. (a) Mutthokiherye etthu makhulupale yaakhanle aya omwiiriha mutthu aivale voohilakela. (Nwehe elatarato yoopacerya.) (b) Xeeni vaari aya vamiruku nawiive owo waaleela makhulupale?

⁶ Akhala wira mwIsarayeli moohilakela oomwiiva mutthu, owo aahaana otthimakela muttetthe wa ntthyawelo, weemela vamukhora ni ‘wahimerya akhulupale a mmuttettheni’ etthu yaamukhumelenle. Makhulupale awo yaahaana omwaakhela. (Yoxuwa 20:4) Nuuvira okathi awo yaahaana omuroiha nawiive owo wa makhulupale a epooma yaakhumelenle ehasara eyo. (Mmusome Mothakoni 35:24, 25.) Akhala wira makhulupale awo yanweha wira nawiive owo kholakenle, awo yaanimuttikiherya muttetthe wa ntthyawelo.

⁷ Xeeni nawiive aatthuneya awe waaleela makhulupale etthu yaamukhumelenle? Makhulupale yaahaana okhalana ephoole wira nloko na aIsarayeli nivikanihe okhala noowaarya ni emukhaliherye ole iivale voohilakela ottottela mureerelo omoriwa ikharari wa Yehova. Musomi mmosa a Biibiliya ohimmye wira akhala wira nawiive owo khaarowa waaleela axitokweene etthu yaamukhumelenle, owo aaniiviwa. Nto Yehova aahihimya-tho wira nawiive taarowa okhalana nthowa na ephome awe okhala wira khaiwelenle sooruma sa Muluku. Mutthu aamwiiva mukhwaawe voohilakela, aahaana ovekela nikhaliheryo ni weemererya etthu aarowa awe orummwa opaka wira ohiiviwe. Akhala wira owo khaarowa mittetthe sa ntthyawelo, mmusi awe mutthu owo aiviwe aaneemereriwa omwiiva nawiive owo.

8, 9. Xeeni mukristau opanke etampi yuulupale onitthuneya awe waaleela axitokweene?

⁸ Olelo-va, wira muKristau opanke etampi yuulupale otthikele wataana ni Yehova, ohaana waaleela axitokweene wira okhaliheriwe. Xeeni vaari aya vootthuneya opaka eyo? Nthowa noopacerya, okhala wira Yehova taavanhe axitokweene muritti wa ophuka itampi suulupale. (Yakobo 5:14-16) Na nenli, axitokweene tarina muritti wa omukhaliherya namattheka oottharuwa otthikela weemereriwa ni Muluku ni osyaka otthikela opaka etampi emosaru. (aGalasia 6:1; aHéberi 12:11) Na neeraru, axitokweene anneemiheriwa ni wiixuttihiwa waakhaliherya anamattheka oottharuwa ovukula woona owereya ni wiivaha nthowa. Yehova onnaahimya axitokweene awo okhala ‘opuro wa ntthyawelo okathi wa epula’. (Yesaya 32:1, 2) Muluku onnaarumeela axitokweene wira onimorele ikharari.

⁹ Arumeyi anceene a Muluku nuumala waaleela axitokweene itampi saya, vaakhala wira yaaruliwe muritti woolemela. Mwa ntakiheryo, munna mmosa oniitthaniwa Daniyeli aahipaka etampi yuulupale, nuumala-vo saahivira myeeri sinceene ohironwe waaleela axitokweene. Owo onihimya so: “Nuumala ovira okathi munceene, kuupuwela wira axitokweene khiyaarowa owerya okikhaliherya”. Hata vari siiso owo aanoova osuweliwa etampi ele, nto khula okathi anvekela awe Yehova aapacerya onvekela oleveleliwa. Wanikisa waya, aahaavekela  nikhaliheryo axitokweene. Daniyeli onihimya so: “Ohimya ekeekhai, kaanoova waaleela axitokweene. Masi nuumala, waaleela vaakhala wira waakumihiwe muritti woolemela mmakhatani mwaka”. Nuumala-vo Daniyeli aahitthikela wataana ni Yehova. Vano owo ookhalana yowuupuxerya ya murima yooloka, ni oothanliwa okhala murummwa oorumeela.

10. Etthu xeeni mutthu iivale voohilakela aatthuneya awe opaka?

¹⁰ Wira mutthu iivale voohilakela oleveleliwe, aahaana otthyawela muttetthe wa ntthyawelo aattamenle awe. (Mmusome Yoxuwa 20:4.) Okumi awe waalipa ni otthyawela mmuttettheni mwa ntthyawelo ni okhala memmo mpakha okhwa muulupale a anamukuttho. Khivaakhweya opaka eyo, maana eyo yaataphulela ohiya muteko awe, empa awe, ni oheetta mikwaha. * (Nwehe enoota.) (Mothakoni 35:25) Masi eyo yaanoopola ekumi awe. Akhala wira nawiive owo aamukhuma muttetthe owo wa ntthyawelo eyo yooniherya wira yena khaavaha efaita ekumi ya mutthu ole aamwiivale awe, nto eyo yanwerya omwiiriha opweteiwa ekumi awe.

11. Moota xeeni muKristau oottharuwa, onrowa awe oxukhurela vanceene omoriwa ikharari wa Muluku?

¹¹ Olelo-va namattheka oottharuwa ohaana opaka etthu wira oleveleliwe ni Muluku. Owo ohaana ohiya opaka itampi. Eyo enihela muhina osyaka khula etthu ekhanle oomwiiriha mutthu opaka etampi yuulupale. Murummwa Paulo aahihimya itthu maKristau oottharuwa a oKorinto yaapanke aya. Owo aalempe so: “Mòneke vano sorera sulupale sòruhenlyayani oripiwa murima mwaha wa Muluku: nyuwo mothokorerya orattene mulatt’uwo, muhisakiha sìralyanyu, monanariwa ni sotakhala, momòva Muluku, vano munniphavela-tho okona, munnikithokoreya nave momuttaruxa ole inre sotakhala”. (2 aKorinto 7:10, 11) Nto akhala wira nnimwiimananiha ohiya opaka itampi, nnoomooniherya Yehova wira ninniriipiwa murima vanceene mwaha wa etampi ahu, ni khannuupuwela wira owo onoonilevelela hata nihinvekenle.

12. Exeeni muKristau okhanle awe oopaka wira otthikele ottottela mureerelo omoriwa ikharari wa Yehova?

¹² Etthu xeeni muKristau ontthuneya awe opaka wira ottottele mureerelo omoriwa ikharari wa Yehova? Owo ohaana ohiya itthu sotheene sinimusivela masi sikhanle oomutthekiha. (Matheyo 18:8, 9) Mwa ntakiheryo, akhala wira apatthani anyu annoorumani opaka itthu sinimunanara Yehova, niireke munoovikaniha weetta ni atthu awo? Akhala wira vannoovilani wiiphimela eviinyu, niireke khamunrowa osyaka makhalelo akhanle oowiirihani owurya vanceene? Akhala wira vannoovilani wiihiiha voohimya sa miyuupuwelo soohiloka, niireke munoosyaka ifilme, isaiti, wala itthu sikhanle oowiirihani wuupuwelela orupihana woohiloka? Muhiliyale wira Yehova onnoona itthu sotheene sooloka nnimpakela ahu. Khiivo etthu yootepa owereya ohikhanle onyanyaliwa ni Yehova. Khiivo etthu yootepa oreera envikana ‘ophenta wuncene vohimala-tho’, Yehova onnivaha awe.​—Yesaya 54:7, 8.

13. Mutthokiherye nthowa naya nawiive aakhala awe oovareleleya, oohakalala, mmuttettheni mwa ntthyawelo.

¹³ Akhala wira nawiive aanitthyawela mmuttettheni  mwa ntthyawelo okumi awe waanivareleleya. Olavulaka sa mittetthe iye, Yehova aahimmye so: “Mmo onowerya otthyawela-mo mutthu ti mutthu”. (Yoxuwa 20:2, 3) Yehova khaaruma wira nawiive otthikeleke ophukeliwa mwaha wa mulattu mmosaru. Nave, mulipa-oowunla ikuhu kheemiheriwa okela epooma eyo wira omwiive nawiive ole. Vaavo nawiive aakhala awe mmuttettheni mmo, owo aanaakihiwa ni Yehova. Moohaaniherya owo khahiyo aari mukhatteya. Owo anwerya ovara muteko, waakhaliherya atthu akina, ni omurumeela Yehova mootaphuwa. Tthiri owo aaniwerya ophwanya ohakalala ni okumi wooloka!

14. MuKristau ottharunwe okupaliki exeeni?

¹⁴ Arumeyi akina a Muluku yaatonko opaka itampi suulupale annivikaniha wiivaha nthowa hata nuumala ottharuwa. Akina anuupuwela wira Yehova khonirowa waalevelela moomalela. Akhala wira munuupuwela siiso, xontte mukupali wira okathi Yehova onoolevelela aweni, owo onipaka eyo moomalela. Khamunitthuneya wiivaha-tho nthowa. Eyo ti etthu yaamukhumelenle Daniyeli, yoowo oromoliwe ottuli. Nuumala okhaliheriwa ni axitokweene, owo aahitthikela okhalana yowuupuxerya ya murima yooloka ni okumi wootaphuwa. Owo onihimya so: “Kaahihiya wiivaha nthowa. Etampi ele yaahimala. Sintoko Yehova ohimmye awe owo onnikuxa etthu ennixankiha onarihela ottaiwene. Nto mutthu khoniwerya-tho woona etthu ele”. Okathi nawiive aakhala awe mmuttettheni mwa ntthyawelo, owo khoova wiiviwa ni mulipa-oowunla ikuhu. Moolikanasa, nuumala Yehova onilevelela itampi sahu, hiyo khanintthuneya woova wira owo  onootthikela onihukhumu mwaha wa itampi iyo.​—Musome Esalimo 103:8-12.

15, 16. Xeeni ninroromela ahu omoriwa ikharari wa Yehova?

¹⁵ Moovirikana ni aIsarayeli, hiyo nookhalana mathowa manceene anniiriha ororomela omoriwa ikharari wa Yehova. Okhala wira Paulo khaawerya omwiiwelela Yehova moomalela, aahihimya wira “miyo nkirere otakhaliwa”. Masi aahihimya-tho wira: “Kinnimuxukhuru Muluku, onikòpola mwa Yesu Kristu Pwiy’ahu”. (aRoma 7:25) Moolumo ala yaataphulelani? Nnaamwi Paulo aawana ni soophavela sawe, ni aapanke itampi suulupale khalai, owo aahittharuwa. Nto aaniroromela wira Yehova aahimulevelela orweela wa mukuttho wa Yesu. Mukuttho wa Yesu onninikhaliherya okhalana yowuupuxerya ya murima yooloka ni murettele. (aHéberi 9:13, 14) Okhala wira Yesu Namukuttho ahu Muulupale, “tivo onweryawe owòpola wa mahiku othene ale animwattamela Muluku mwa Yowo”. (aHéberi 7:24, 25) Khalai, muulupale a anamukuttho aanaakhaliherya aIsarayeli okupalixa wira Yehova anwerya waalevelela. Nikhaliheriwaka ni Yesu, Namukuttho ahu Muulupale, nookhalana mathowa manceene annikupaliha wira “nnomoreliwa ikharari, nnophwanya eparakha ennikhaliherya okathi wophwanelela”.​—aHéberi 4:15, 16.

¹⁶ Wira nimutthyawelele Yehova, nihaana waamini mukuttho wa Yesu. Muupuweleke wira mukuttho owo onnimphwanyiha mureerelo khuta mutthu. Mwaaminiki wira nyuwo munnittottela mureerelo mukuttho. (aGalasia 2:20, 21) Mwaaminiki wira mwaha wa mukuttho, Yehova onnoolevelelani itampi sanyu. Mukupaliki wira mukuttho onnoovahani yoolipelela ya okumi ohinimala. Yehova ohoovahani nyuwo mukuttho wa Yesu!

17. Xeeni muniphavela anyu omutthyawelela Yehova?

¹⁷ Mittetthe sa ntthyawelo sinninikhaliherya oweha omoriwa ikharari wa Muluku. Mareheryo ala a Muluku anniniixuttiha wira yena onnivaha efaita yuulupale okumi. Nave eyo ennooniherya moota axitokweene akhanle aya oonikhaliherya, exeeni enitaphulela aya ottharuwa wekeekhai, ni moota nikhanle ahu ookupali wira Yehova onninlevelela. Niireke munnimutthyawelela Yehova? Khuuvo opuro mukina woovareleleya! (Esalimo 91:1, 2) Mwaha onittharelana, ninrowa oweha moota mittetthe sa ntthyawelo sinnikhaliherya aya omutakiha Yehova, nooniheryaka exariya ni omoriwa ikharari.