MBiibiliyani nuulumo na eGriki nenlo ikwaha sikina nintaphuleliwa ‘ororomeleya’ ninthoonyerya okhala “etthu yooloka mwa inamuna sotheene”. Nave-tho pooti otaphulela etthu enireerela ottittimihiwa.

MaKristau aneettela moolumo oowuupuxeriwa a murummwa Paulo yaawo ani: “Miteko sothene ephwanyiweke òrumeyene ni òroromeleya”. Antaphulelani moolumo ala?

Atthu anceene anniiweha valoolani khuta voosisu ehinatthi orowa opuro ori atthu. Mwaha wa xeeni? Mwaha woowi aniphavela wiiweha moota siri aya. Masi yookhala etthu yootepa otthuneya ovikana olokiherya ikharari, wala ophwaneliwa: murima ahu. Tthiri murima ahu pooti olokiherya aahiiso onanariha omutthu ahu.

Biibiliya onnooniherya wira hiyo onisivela opaka itthu sootakhala. Maphattuwelo 8:21, oni: “Murima wa mutthu ti wosiveliwa n’itthu sotakhala okhuma omiravo awe”. Tthiri wira nikhale oororomeleya, nihaana owana ni mukhalelo woottheka oyaraniwa ahu. Murummwa Paulo aahilavula sa ekhotto eyo oriki: “Mmurimani mwaka kinnisiveliwa n’ikano sa Muluku: nto kinnona mwerutthuni mwaka makhalelo makina anvirikanya simphavelaya murim’aka. Makhalelo awo annikikhaliha epottha ya ikano s’etampi, eri mwerutthuni mwaka”.​—aRoma 7:22, 23.

Mwa ntakiheryo, okathi murima ahu onnikhanyererya awe opaka etthu yoohiloka ni okhala oohiroromeleya, hiyo khannikhanyereriwa okhala epottha ya soophavela sa murima ahu. Hiyo pooti othanla ele eniphavela ahu. Nto vaavo ninkhootta ahu muupuwelo woohiloka, nnoowerya ovikaniha okhala oororomeleya nnaamwi nirukureriwe ene ni atthu oohiroromeleya.

Wira nikhale oororomeleya, nihaana okhalana malamulo maalupale a mweettelo wooloka. Mooriipiha murima, anamunceene annivaha efaita makhalelo a ota ohiya mweettelo wooloka. Nto awo annoothererya mweettelo woohiloka ephavelaka mureerelo aya. Eliivuru The (Honest) Truth About Dishonesty, ([Ohiroromeleya] Ekeekhai Voohimya sa Ohiroromeleya) eni: “Ohimya ekeekhai, hiyo ninnootha mwaha woowi nimphavela wooniwa okhala atthu oororomeleya”. Nto niireke ehaavo etthu enrowa onikhaliherya osuwela akhala wira vannireerela okhala oohiroromeleya ikwaha sikina? Aayo.

Imilyau sinceene sa atthu olumwenku wotheene, aaweha wira Biibiliya onnikhaliherya vanci. Biibiliya ookhalana malamulo a mweettelo ahinlikanyihiwa. (Esalimo 19:8) Owo onninivaha malakiheryo oororomeleya annikhaliherya okhalana mweettelo wooloka vatthokoni, omutekoni, ni wataana saana ni Muluku. Malamulo ni malakiheryo awe annivareleya muteko okathi wotheene, ni wa atthu a ilapo sotheene, maloko ni mahimo otheene. Vaavo nimmutokosa ahu Biibiliya, wuupuwelela ele enihimya awe ni weettela miruku sawe, ninniixuttiha murima ahu okhala oororomeleya ni a xariya.

 Okhala wira ninkhala olumwenku onnikhanyererya opaka itthu soohiloka, khivaniphiyerya paahi omusuwela saana Biibiliya. Wira nixintte ekhotto voohimya sa ohiroromeleya nihaana onvekela Muluku wira onikhaliherye. (aFilipi 4:6, 7, 13) Niira siiso, nnoowerya okhala oolipa murima wira nipake itthu sooloka ni okhala oororomeleya mwa itthu sotheene.

Hitoshi, oromoliwe wanipacerya wa mwaha ola, onnisuweliwa ntoko mulopwana ooloka mwaha wa ororomeleya wawe. Vano, owo onvara empereesa ya muthiyana onixukhurela ororomeleya wawe. Hitoshi oni: “Kinnixukhurela vanceene ophwanya muteko onikeemererya okhalana yowuupuxerya ya murima yooloka”.

Atthu akina ahoona-tho wira eyo ekeekhai. Moone matakiheryo makina a atthu aphwannye mureerelo mwaha woweettela malamulo a Biibiliya yaawo annikhaliherya okhala “òroromeleya” mwa itthu sotheene.

• Yowuupuxerya ya Murima Yooloka

  Muthiyana mmosa a wIrlanda onihimya so: “Kaahihiya oxikola, kirina ene iyaakha 13 nto khupaceryaka wiiya. Nto 95 pursento ya itthu kaarina aka kaaphwannye kirumeelaka olavilavi. Muhoolo mwaya kaahitheliwa, nto miyo ni iyaka naahipacerya omusoma Biibiliya ni Anamoona a Yehova. Nuumala wiixutta wira Yehova * Muluku onninyokha wiiya, nahoona wira naahaana oturuka mweettelo ahu. Eyaakha ya 1990 naahivahererya ekumi ahu wa Yehova nto khubatiziwa ntoko Anamoona a Yehova”.​—Miruku 6:16-19.

  Chery, oni: “Khalai owannyaka saahikhala itthu sinci sowiiyiwa, masi vano nkirina-tho itthu iyo. Eyo ennikiiriha okhalana yowuupuxerya ya murima yooloka. Kuupuwelaka iyaakha sinci kaari aka oohiroromeleya, kinnimuxukhurela Yehova mwaha wa omoriwa wawe ikharari. Kinnihakalala vaavo khuta ohiyu kinrowa aka orupa kisuwelaka wira Yehova onnihakalala ni mweettelo aka”.

  Sonny, oHong Kong onihimya so: “Okathi xeefi aka aasuwenle awe wira kaahikhootta ovahiwa makhwankwa ni kiliente mmosa oottittimihiwa, owo aahimmye so: ‘Muluku anyu oowiirihani okhala mutthu oororomeleya! Tthiri ti voohakalaliha nyuwo ovara empereesa ela’. Okhala oororomeleya mwa itthu sotheene wookikhaliherya okhalana yowuupuxerya ya murima yooloka vamaithoni va Yehova Muluku. Nave-tho eyo ennikeemererya waakhaliherya amusi aka ni atthu akina opaka etthu emosaru”.

• Muupuwelo Woomaaleleya

  Tom, a wEstados Unidos, oni: “Miyo ka namakhaliherya a mukhulupale oniweherya ebanko internacional. Muteko owo, atthu annivaha efaita yuulupale othaaciri ovikana ororomeleya. Olelo-va ohuulaana muupuwelo oni: ‘Phataari wootha vakhaani akhala wira mutthu onoothaaciri’. Nave-tho okhala oororomeleya wookikhaliherya okhalana muupuwelo woomaaleleya. Kimphavela ovikaniha okhala oororomeleya moohicala mixankiho sikhanle ookhumelela. Atthu anvarana aka muteko aasuwela wira nkinkhala-khala koothaka”.

• Ottittimihiwa

  Kaori oJapão oni: “Xeefi aka aahikitumererya wootha mwaha wa itthu sikina saarimenle omutekoni, masi kaahikhoottha. Okathi anawiiye ale yaasuweliwe aya, patarau aka aahikixukhurela mwaha woororomeleya. Wira mutthu okhale oororomeleya ohaana olipa murima, maana ninkhala olumwenku woohiroromeleya. Masi wanikisa waya, atthu akina annipacerya onittittimiha ni oniroromela”.

Tthiri ororomeleya onniphewanyiha mireerelo sinceene ntoko yowuupuxerya ya murima yooloka, muupuwelo woomaaleleya, ni ottittimihiwa. Niireke nyuwo khamunikupali wira eyo ekeekhai?