Xeeni vahineemereriwa aya ohela iliivuru sa Anamoona a Yehova isaite sikina aahiiso redes sociais?

Okhala wira iliivuru sahu ninvaha mahala, atthu akina anuupuwela wira pooti okopiyari aahiiso ohela iliivuru iyo isaite sikina wala redes sociais. Masi eyo ennikumiherya mixankiho sinceene ni khenivarihana ni Malamulo Oorumeela * (nwehe enoota) a esaite ahu. Malamulo awo annihimya moowiiwanyeya wira khuuvo oneemereriwa “ohela ifootu, ilatarato, iliivuru eletroniku, marcas registradas, isipo, iviidiyu aahiiso myaha sa esaite ela munternetini, (ohela muhina isaite sikina, redes sociais, ni onvaha mutthu mukina iviidiyu ni iliivuru orumeelaka isaite sikina)”. Xeeni malamulo awo ari aya ootthuneya?

Iliivuru sotheene siri websaite ahu sookhalana copyright, eyo enooniherya wira sinnikhapeleliwa ni nlamulo. Eyo etthu yootthuneya okhala wira ennikhaliherya ohirumeeliwa moohikhalela. Okathi mukina, anammwareya ni atthu akina, yaawo aniphavela ohonona muteko ahu, annihela iliivuru sahu awebsaite aya aphavelaka waahapuxa Anamoona a Yehova ni atthu akina. Nave annihela isaite iyo itthu wira yaakanyerye muupuwelo wa atthu. (Esalimo 26:4; Miruku 22:5) Nave atthu akina annirumeela iliivuru ni esaite ahu jw.org musaitini mwaya aahiiso aplikativo aya wira atumiheke. Masi, okhala wira iliivuru sahu ni websaite ahu onnikhapeleliwa ni nlamulo, hiyo pooti waaroiha otribunaali wira ahiye opaka eyo. (Miruku 27:12) Nto itribunaali khisaarowa onikhaliherya, vaakhanle wira ninniweemererya atthu akina aahiiso anna, ohela iliivuru sahu awebsaite akina wala omurumeela jw.org wira atumiheke.

Obaxari iliivuru sahu isaite sikina ohikhanle jw.org paahi, pooti okumiherya maxakha. Yehova onninivaha yoolya yomunepani omurumeelaka “murumeyi òroromeleya ni ànkhili”. (Matheyo 24:45) Nave “murumeyi” owo onnaarumeela awebsaite ooweemereriwa wira onivahe yoolya yomunepani, eyo piiyo, www.pr418.com, tv.pr418.com, ni wol.pr418.com. Nave nookhalana aplikativo araru ooweemereriwa, anirumeeliwa mutelefonini, eyo piiyo, JW Language^®, JW Library^®, ni JW Library Sign Language^®. Isaite ni aplikativo awo, kheniphwanyaneya etthu yoohiloka aahiiso ya olumwenku wa Satana. Masi, akhala wira ninnibaxari iliivuru sahu nimurumeelaka websaite aahiiso aplikativo akina, eyo pooti okumiherya maxakha. Maana pooti wira aaturuka enamuna elempwale aya eliivuru eyo.​—Esalimo 18:27; 19:9.

Nave, akhala wira ninnihela iliivuru sahu awebsaite akina, wira atthu ahimye moonelo aya, eyo pooti owiiriha anammwareya ni atthu akina onyohola mutthenkeso wa Yehova. Anna akina annivaanyihana ni atthu awo, nto eyo enniwiiriha atthu omunyohola Yehova. Ovaanyihana munternetini, khahiyo enamuna yooloka ya omukhaliherya mutthu orina moonelo woohiloka, wiiwexexa ekeekhai. (1 Timótheyo 6:3-5; 2 Timótheyo 2:23-25) Nave, atthu akina annaapaka aplikativo aahiiso redes sociais anikhala ntoko akumiheriwe ni mutthenkeso ahu aahiiso ni munna a Nikhuuru Noolamulela. Masi eyo khahiyo ekeekhai, maana animwaakopiyari. Nave-tho, anna a Nikhuuru Noolamulela kharina websaite aahiiso ekontha esaite ya redes sociais.

Vaavo ninwooniherya ahu atthu esaite ahu jw.org, ninnikhaliherya olaleya ‘ehapari yorera’. (Matheyo 24:14) Khula okathi awebsaite ni aplikativo ahu annilokiheriwa. Nto nimphavela wira khula mutthu aattotteleke mureerelo. Tivonto, ninneemereriwa waavaha atthu eliivuru nimurumeelaka e-mail aahiiso waavaha elink ya websaite ahu. Wira siiso, onimwaakhaliherya atthu orumeela enamuna Yehova onivaha awe yoolya yomunepani, eyo piiyo, omurumeelaka “murumeyi òroromeleya ni ànkhili”.