1, 2. (a) Nuumala wiiwa mwaha, nipakeke exeeni? Nthowa xeeni? (b) Mwaha ola, ninrowa othokorerya exeeni?

OTHEENE AHU, nihaana wiixutta otokosa mwaha wira nisuwele ekeekhai. (Miruku 3:21-23; 8:4, 5) Akhala wira khanintokosa, nnoomukhweiherya Satana ni olumwenku awe ohonona muupuwelo ahu. (aÉfeso 5:6; aKolosi 2:8) Tthiri, wira nisuwele ekeekhai, nihaana osuwela itthu sotheene sa mwaha owo. Miruku 18:13, onihimya wira: “Onakhula ahinatthi wiwa [saana], muloló: onimùliwa muru vamaithoni v’atthu othene”.

² Mwaha ola, ninrowa woona moota ikwaha sikina vanvila aya ophwanya soohimmwa sinnikhaliherya osuwela ekeekhai. Nave, ninrowa wiixutta moota malakiheryo ni matakiheryo a mBiibiliyani, annikhaliherya aya otokosa mwaha.

3. Xeeni vanitthuneya ahu otthara malakiheryo ari Miruku 14:15? (Nwehe elatarato yoopacerya.)

³ Olelo-va, sinniphwanyaneya myaha sa khula enamuna.  Iyo pooti ophwanyaneya munternetini, mutelevisauni ni ikaruma sikina sinilaleya ihapari. Nave apatthani ihu anninruuhela e-mail, mensaxe ni sowiiraneya sikina. Tthiri soohimmwa iyo khasireere. Tivonto, nihaana okhalana ephoole. Pooti wira apatthani ihu awo aniphavela mureerelo ahu, masi aakhala atthu akina animwarexa moolakelela ihapari soohiloka. Malakiheryo xeeni a Biibiliya anrowa onikhaliherya otokosa itthu siniiwa ahu? Miruku 14:15, Biibiliya Solempwa sa Muluku, oni: “Òhipasopa onnikupali sothene sinihimeriwawe: nankhili onniwehaweha mwettelo awe wothene”.

4. (a) AFilipi 4:8, 9 onnikhaliherya sai othanla myaha ninsoma ahu? (b) Xeeni vari aya vootthuneya osuwela soohimmwa sekeekhai? (Nwehe ekaaxa eni: “ Itthu Vakhaani Sinikhaliherya Osuwela Ekeekhai”.)

⁴ Wira nipake soothanla sooloka, nihaana ophavelasa soohimmwa soororomeleya. Tivonto, nihaana okhalana ephoole ni itthu ninsoma ahu. (Mmusome aFilipi 4:8, 9.) Nihihononeke okathi ahu niwehaka itthu soohiroromeleya munternetini aahiiso nisomaka e-mail sinuulaanyiha itthu sowoothiwa. Eyo pooti onikhaliherya waasyaka awebsaite a anammwareya. Maana aniphavela ohonona ekeekhai ni waamini wa atthu a Muluku. Soohimmwa soohiloka sinnimwiiriha mutthu opaka soothanla soohiloka. Nto muhikhala-khale mwiiwokaka wira soohimmwa soohiloka khasinoohapuxani.​—1 Timótheyo 6:20, 21.

5. Soohimmwa xeeni soohiloka aIsarayeli yaiwale aya, ni yoonenle sai?

⁵ Soohimmwa sowoothiwa pooti okumiherya mixankiho. Mwa ntakiheryo, Moise aahaaruma anamahottela 12 orowa Elapo Yooleiheriwa. Masi anamahottela 10 yaahihimya itthu soohiloka. (Mothakoni 13:25-33) Awo yaahitepiha itthu yaawenhe aya, nto atthu a Yehova yaahipacerya woova ni ovolola. (Mothakoni 14:1-4) Xeeni atthu ale ahalaka woova? Woonasa wene, awo yuupuwela wira yoohimmwa ele yaari yekeekhai, maana yaahimmwale ni anamahottela 10. Nto yaahikhootta wiiwa itthu sooloka sa Elapo Yooleiheriwa saahimmwale ni anamahottela anli. (Mothakoni 14:6-10) Ohiya ophavela osuwela ekeekhai ni omuroromela Yehova, moololo yaahithanla okupali yoohimmwa yoohiloka.

6. Xeeni vahinitikinihiwa ahu vaavo nniiwa ahu itthu anootheriwa aya Anamoona a Yehova?

⁶ Nihaana okhalana ephoole vaavo nniiwa ahu itthu anootheriwa aya Anamoona a Yehova. Muupuweleke wira nwanani ihu Satana ‘onniwootherya’ annihu. (Wisupulula  12:10) Yesu aahimmye wira awanani ihu yaarowa ‘onotheryaka sotakhala sothene’. (Matheyo 5:11) Akhala wira nnimwiiwelela nlopolo na Yesu, khaninrowa okhumuwa vaavo nniiwa ahu itthu anootheriwa aya Anamoona a Yehova.

7. Nihinatthi oroiha e-mail aahiiso mensaxe, nihaana wiikoha exeeni?

⁷ Niireke vannoosivelani waaroihela e-mail ni mensaxe apatthani inyu? Vaavo muniiwa anyu mwaha wookuxa murima aahiiso yowiiraneya ya vameekhaaya, niireke onnookhumani murima munaphavela olaleya ntoko jornalista? Muhinatthi oroiha e-mail aahiiso mensaxe, mwiikoheke so: ‘Kiireke yowiiraneya ela ekeekhai? Kinnisuwela itthu sotheene siiraneyale?’ Mwaahikhalane ephoole pooti omwara-mwarya itthu sowoothiwa. Nto akhala wira khamunsuwela ekeekhai ya mwaha owo, xontte muhiroihe. Fataari ottipiha!

8. Ilapo sikina, awanani ihu yaapanke exeeni? Ninrowa osyaka sai maxakha awo?

⁸ Nave-tho, ti vootakhala oroiha e-mail aahiiso mensaxe naakhenle ahu nihinatthi otokosa. Ilapo sikina, muteko ahu onnikhoottihiwa. Awanani ihu a ilapo iyo, pooti ohimya itthu sowoothiwa wira anivarihe aahiiso wira nihoveryaneke. Nkahaya muupuwele ele yaakhumelenle mapuro anivariwa muteko mookhanyereriwa União Soviética. Egrupu ya mapoliisia yaasuweliwe okhala KGB, yaahuulaanyiha muhupi wowoothiwa woowi anna akina yaarina miritti yaahaavariha atthu a Yehova. * (Nwehe enoota.) Mooriipiha murima, anna anceene yaahikupali itthu iye sowoothiwa khuhiya mutthenkeso wa Yehova. Muhoolo mwaya, anamunceene a yaawo yaahitthikela mmutthenkesoni mwa Yehova,  masi akina nnaari. Awo yaahihiya itthu iyo sowoothiwa sihononaka waamini waya. (1 Timótheyo 1:19) Ninrowa osyaka sai maxakha awo? Nisyakaka omwara-mwarya soohimmwa nihinsuwela ahu saana. Nave muhikupaliki khula etthu muniiwa anyu. Masi, mpaceryeke osuwela itthu sotheene sa mwaha owo.

9. Etthu xeeni ekina eniiriha ovila ophwanya soohimmwa sekeekhai?

⁹ Ikwaha sikina, ninniiwa myaha sinihimya itthu vakhaani sekeekhai. Masi myaha sikina khasinihimya itthu sotheene siiraneyale. Nto eyo enniiriha ovila osuwela ekeekhai. Nihikupaliki yoohimmwa yoohimalela! Ninrowa opaka exeeni wira nihihapuxiwe ni soohimmwa iyo soohimalela?​—aÉfeso 4:14.

10. Xeeni aIsarayeli akina yaahala aya vakhaani orowa owana ni annaya, ni exeeni yaakhalihenrye ohipaka eyo?

¹⁰ Ninniixutta etthu ni ele yaawiiranenle aIsarayeli yaakhala mpantta onikela nsuwa wa Muro Yordani, mahiku a Yoxuwa. (Yoxuwa 22:9-34) Awo yaahileeliwa wira aIsarayeli yaakhala mpantta onikhuma nsuwa wa Yordani, yaahimpaka altari muulupale waattamela mmuro. Nnaamwi eyo yaari ekeekhai, khisaahimmwale itthu sotheene sa mwaha owo. Eyo yaahiwiiriha aIsarayeli a onikela nsuwa wuupuwela wira annaya yaahimmwareela Yehova. Nto yaahithukumana wira yawane ni annaya ale yampanke altari. (Mmusome Yoxuwa 22:9-12.) Masi ahinatthi orowa waatuphela, awo yaahaaruma alopwana akina wira yatokose mwaha ole. Exeeni yaaphwannye aya? Awo yaahoona wira annaya khiyampanke altari ole wira yaavaheke mukuttho amuluku eethiru. Masi yampanke wira okhale ntoko nthoonyeryo noowi yaamukokhorela Yehova paahi. Okhala wira aIsarayeli yaapacenrye osuwela ekeekhai, awo yaahihakalala maana khiyaaronwe owana ni annaya.

11. (a) Moota xeeni Mefiboxethi aathokoreriwa awe moohixariya? Xeeni Davidi ohalaka omuthokorerya moohixariya?

¹¹ Waaniheryasa, pooti wira muhoolo atthu anoonootherya etthu enrowa oniwereya. Eyo yaahimwiiraneela Mefiboxethi. Mooreerela murima, Mwene Davidi aahimuttikiherya Mefiboxethi imatta sotheene saari sa atatawe, yiihaniwa Sawuli. (2 Samuweli 9:6, 7) Muhoolo mwaya, Davidi aahiiwa itthu ootheriwa awe Mefiboxethi. Nto Davidi aahimwaakha Mefiboxethi imatta sotheene ohinatthi osuwele ekeekhai ya mwaha ole. (2 Samuweli 16:1-4) Nuumala olavula ni Mefiboxethi, Davidi aahoona wira aahivonya. Vano aahimuttikiherya Mefiboxethi imatta sikina. (2 Samuweli 19:24-29) Vaakhanle wira Davidi aapacenrye osuwela ekeekhai ohinatthi omwaakha imatta iye, Mefiboxethi khaarowa othokoreriwa moohixariya.

12, 13. (a) Yesu aapaka exeeni okathi ootheriwa awe? (b) Hiyo nipakeke exeeni okathi nnootheriwa ahu?

¹² Munrowa opaka exeeni akhala wira munimootheriwa etthu? Moone wira Yesu ni Yohani Mbatiza aatoko wootheriwa. (Mmusome Matheyo 11:18, 19.) Yesu aapanke exeeni? Owo khaahononne okathi awe ni ikuru sawe wira owiirihe atthu woona wira aamootheriwa. Masi aatumerenrye  atthu ale woona miteko sawe. Maana aaphavela wira aweheke ele aapaka awe ni iixuttiha awe. Yesu aahimmye so: “Ankhili annòneya okhala òloka mwaha wa miteko saya”.​—Matheyo 11:19.

¹³ Ele yaamwiiranenle Yesu enniniixuttiha etthu yuulupale. Okathi mukina, atthu pooti onootherya etthu, vano nnoova wira anoohonona omutthu ahu. Masi mweettelo ahu onimooniherya akhala wira eyo ekeekhai aahiiso nnaari. Ntakiheryo na Yesu, ninnooniherya wira mweettelo ahu wooloka onimwaakhaliherya atthu woona wira nnimootheriwa paahi.

14, 15. Xeeni vahinitthuneya ahu otepa wiiroromela?

¹⁴ Ekeekhai wira vannivila osuwela itthu sotheene siiraneyale. Etthu ekina eniiriha ovila, okhala wira na atthu oohimalela. Nave, pooti wira nipacenrye khalai omurumeela Yehova ni ninnisuwela opaka itthu sikina. Atthu akina pooti onttittimiha mwaha woowi ninnisuwela itthu sinceene. Niireke itthu iyo pooti onikumiherya muxankiho?

¹⁵ Aayo. Hiyo pooti opacerya wiiroromela vanceene, woonasa wene, nittharaka moonelo ni muupuwelo ahu paahi. Nikupaliki wira ninnisuwela saana mwaha owo, variki nihirina soohimmwa sa mwaha owo. Opaka eyo etthu yootakhala! Maana Biibiliya onninlopola wira nihiroromeleke muupuwelo ahu.​—Miruku 3:5, 6; 28:26.

16. Nvahe ntakiheryo na etthu yiiraneya orestaurante? Exeeni Pakeleke uupuwela awe?

¹⁶ Mwa ntakiheryo, nkahaya muupuwele yowiiraneya ela: Ohiyu omosa, mutokweene ninrowa ahu omwiitthana Pakeleke yoowo orina sookumanana sinceene, onnirowa orestaurante onamphwanya mutokweene mukina, onrowa ahu omwiihana Mwaapasa. Nto Mwaapasa okilanthe ni muthiyana ohikhanle mwaarawe. Vanikhala wira Mwaapasa khoreere ohakalala ni muthiyana ole. Nto Pakeleke onnaaweha atheyaka okathi anilya aya. Vano Pakeleke oxankale ene, onniikoha wira: ‘Niireke Mwaapasa oomwalana amwaarawe? Nto anaawe ari sai?’ Maana, Pakeleke  ootoko waaweha atthu yaamwalanne mwaha wa etthu ntoko eyo. Mwaarowa woonela sai vaakhanle wira mwa Pakeleke?

17. Exeeni muhoolo mwaya Pakeleke aasuwenle awe? Ntakiheryo nna ninniixuttiha exeeni?

¹⁷ Masi nkahaya muupuwele. Nnaamwi Pakeleke oonaka wira Mwaapasa khoniroromeleya wa mwaarawe, niireke oosuwela itthu sotheene sa mwaha owo? Masi ohiyu ene yoole, Pakeleke onnimulikarela Mwaapasa onasuwela wira muthiyana ole murokorawe Mwaapasa ni onikhala ottaiwene. Nave awo aaviriha iyaakha sinceene ahiwehanne. Okhala wira murokorawe khaarowa opisa, Mwaapasa aahuupuwela orowa olya ni murokorawe orestaurante. Nto mwaarawe Mwaapasa khaawenrye waatthara. Vano Pakeleke aahihakalala woona wira khaamulenle mutthu mukina mwaha ole! Yowiiraneya ela enniixuttiha exeeni? Enniixuttiha wira, hata nipacenrye ene khalai omurumeela Yehova, nihaana otokosa mwaha owo wira nisuwele ekeekhai.

18. Exeeni ekhanle ooniiriha okupali etthu onootheriwa awe munnihu?

¹⁸ Nave pooti oxankiha ophavela osuwela ekeekhai akhala wira mwaha owo ti wa munna nihinoonana ahu saana. Navikaniha ohiiwanana, eyo pooti oniiriha opacerya ohiwoona saana anna ni arokora. Nto akhala wira ninniiwa etthu yoohiloka voohimya sa munna owo, hiyo pooti okupali mwaha owo, nihinatthi otokosa saana. Exeeni nniixutta ahu? Akhala wira nnoovikaniha ohiwoona saana annihu, eyo pooti oniiriha woona wira itthu anootheriwa aya anna awo ti sekeekhai. (1 Timótheyo 6:4, 5) Tivonto, niheemererye moonelo woohiloka ntoko nrima nthaamelaka vamurimani vahu. Nave, muhiliyale wira Yehova oniphavela wira naaphenteke ni waalevelela annihu ni murima wotheene.​—Mmusome aKolosi 3:12-14.

19, 20. (a) Malakiheryo xeeni a Biibiliya anrowa onikhaliherya osuwela ekeekhai? (b) Mwaha onittharelana, ninrowa othokorerya exeeni?

¹⁹ Olelo-va, vannivila ophwanya soohimmwa soororomeleya wira nisuwele ekeekhai. Nthowa xeeni? Nthowa noowi, soohimmwa sinceene nimphwanya ahu, ti soohimalela nave hiyo na atthu oohimalela. Exeeni ekhanle oonikhaliherya? Malakiheryo aniphwanyaneya mBiibiliyani pooti onikhaliherya! Mwa ntakiheryo, yoolakiherya emosa enihimya wira mulolo, onnaakhula ohinatthi osuwela saana itthu sotheene. (Miruku 18:13) Yoolakiherya ekina enninikhaliherya ohikupali khula etthu nniiwa ahu nihinatthi otokosa saana. (Miruku 14:15) Nave, hata nipacenrye ene khalai omurumeela Yehova, nihiroromeleke osuwela wahu paahi. (Miruku 3:5, 6) Malakiheryo a Biibiliya, anoonikhaliherya osuwela itthu sotheene siiraneyale wira nisuwele ekeekhai ni opaka soothanla sooloka.

²⁰ Nave, nookhala nthowa nikina nniiriha ovila osuwela ekeekhai ya mwaha owo. Okhala wira na apinaatamu oohimalela, ninnaakuvela waaphukela atthu nittharaka itthu nnoona ahu. Mwaha onittharelana, ninrowa othokorerya inamuna sinrowa onikhaliherya osyaka opaka yoovonya eyo.