1. Mwa inamuna xeeni ninvara ahu vamosa ni Yehova?

OKATHI Yehova aapattunxe awe apinaatamu, owo aaphavela wira avareke vamosa ni yena. Hata ari ene oohimalela, atthu oororomeleya anoowerya ovara vamosa ni Yehova khula nihiku. Mwa ntakiheryo, hiyo “ninvara vamosá muteko . . . [ni] Muluku”, vaavo ninlaleya ahu ihapari sooreera sa Omwene ni waapaka awiixutti. (1 aKorinto 3:5-9) Tthiri eparakha yuulupale othanliwa ni Mpattuxa oowerya sotheene wira nivareke muteko wootepa otthuneya! Masi sookhala inamuna sikina nikhanle ahu oovara vamosa ni Yehova. Mwaha ola, ninrowa oweha moota woovara vamosa ni Yehova nikhaliheryaka etthoko ahu ni anna mmulokoni, okathi ninwaakhela ahu aletto, ninkhaliherya ahu muteko wooteka wa mutthenkeso ahu onivariwa olumwenku wotheene ni nnincererya ahu muteko nninvarela ahu Yehova.​—aKolosi 3:23.

2. Xeeni nihintthuneya ahu olikanyiha muteko oninvarela ahu Yehova ni wa atthu akina?

² Vaavo ninthokorerya ahu mwaha ola, ti vootthuneya wuupuwela wira mikhalelo sahu ti soovirikana. Maana iyaakha  sahu, ekumi ahu, mikhalelo sahu ni owerya wahu khonlikana. Nto muhilikanyiheke muteko muninvarela anyu Yehova ni wa atthu akina. Murummwa Paulo ohimmye so: “Khula mutthu athokoreryeke mwettelo awe: òna vale wira onniwerya wittottopa, aittottopeke mekhaweru, nto ahìlikanyiheké n’atthu akina”.​—aGalasia 6:4.

3. Xeeni ohimyaka wira ole onikhapelela etthoko awe onivara vamosa ni Muluku?

³ Yehova oniphavela wira nikhapeleleke etthoko ahu. Mwa ntakiheryo, nyuwo muhaana ovara muteko wira mukhapelele etthoko anyu. Aximaama anceene anikhala owaani ni anaaya. Nave, vaavo anamuyari ahu ahiniwerya aya wiikhapelela, hiyo nihaana waakhapelela. Eyo ti yootthuneya. Biibiliya onihimya wira: “Akhalá mutthu ohinimuthokorerya mmusi awe, vanjenexa a vatthokoni vawe, mutth’uwo òhiya wamini wawe: owo t’òtakhala murima onvikana mutthu ohinamini”. (1 Timótheyo 5:8) Nto akhala wira mookhalana miritti sinceene vatthokoni, pooti wira khamunwerya ovara muteko wa Yehova ntoko mwaaphavela anyu. Masi muhikhulumuwe! Yehova onnihakalala vaavo munikhaliherya anyu etthoko anyu.​—1 aKorinto 10:31.

4. Anamuyari anipweha sai Omwene nipuro noopacerya ni exeeni enikhumelela?

⁴ Anamuyari maKristau anoowerya ovara vamosa ni Yehova, yaakhaliheryaka anaaya okhalana soolukama mmutthenkesoni mwa Yehova. Anamuyari anceene aapaka eyo. Nto eyo, yoowiiriha anaaya okela muteko wa Yehova wa okathi wotheene, hata arowaka orumeela opuro woorakamela. Akina a yaawo, mamisionaario, akina mapioneero anirumeela mapuro oothowa anamalaleerya ni akina anirumeela oBetheli. Vaavo anamwane awo anirowa aya opuro woorakamela, anamuyari aya khaniwerya oviriha okathi hoothe ntoko yaaphavela aya. Masi annaalipiha anaaya wira avikaniheke omurumeela Yehova opuro ari aya. Nthowa xeeni? Nthowa noowi, annihakalala waaweha anaaya apwehaka muteko wa Yehova opuro woopacerya mookumini mwaya. (3 Yohani 4) Anamuyari anceene annoona ntoko Ana, yoowo aahimmye wira ‘kinninvaha’ Yehova, mwanaka Samuweli. Anamuyari awo annoona okhala eparakha yuulupale ovara vamosa ni Yehova mwa enamuna eyo.​—1 Samuweli 1:28.

5. Munrowa waakhaliherya sai anna ni arokora a muloko anyu? (Nwehe efootu yoopacerya.)

⁵ Vakhala wira khamurina miritti sinceene vatthokoni vanyu, niireke munoowerya waakhaliherya anna ni arokora aniwereiwa, oowuuluvala ni oothoiwa? Aahiiso, niireke munoowerya waakhaliherya ale anaakhapelela amusi aya arina mixankiho iyo? Nyuwo pooti waaweha anna a muloko anyu anitthuneya okhaliheriwa. Mwa ntakiheryo, pooti wira muloko anyu ookhala murokora onimukhapelela namuyari awe oowuuluvala. Niireke munoowerya omukhaliherya murokora owo wira owerye okhapelela itthu sikina? Aahiiso pooti omukhaliherya munna orowa omuthukumanoni, omuhoola omerkaatu wala oxipitaali. Opaka eyo, enamuna yoovara vamosa ni Yehova mwaakhulaka nivekelo naya.​—Mmusome 1 aKorinto 10:24.

6. Nnooniherya sai owaakhela aletto?

⁶ Ale anivara vamosa ni Muluku annisuweliwa okhala atthu oowaakhela aletto. MBiibiliyani, nuulumo na eGriki noowi “owakhela aletto”, nintaphulela “waareerela murima amalapo”. (aHéberi 13:2) Hiyo ninnisoma mBiibiliyani matakiheryo anniixuttiha moota wowaareerela murima atthu. (Maphattuwelo 18:1-5) Nihaana waakhaliherya atthu akina okathi wotheene ninwerya ahu, hata ari ene “aKristu” aahiiso nnaari.​—aGalasia 6:10.

7. Mareeliho xeeni muniphwanya anyu owaakhela arumeyi a okathi wotheene?

⁷ Niireke munoovara vamosa ni Yehova mwaavahaka opuro wookhala arumeyi anivara muteko wa Muluku wa okathi wotheene? (Mmusome 3 Yohani 5, 8.) Niira siiso, nnoophwanya mureerelo vamosa naawo. Eyo ti etthu Biibiliya oniitthana awe okhala ‘olipihana’. (aRoma 1:11, 12) Muthokorerye yowiiraneya ya Olaf. Okathi aari awe mmiravo, mutokweene a esirkwiitu oohithela aaniphavela opuro woomaka vaavo aarowa awe oxukurya muloko awe. Masi khuuvo munna aarina opuro. Nto Olaf aahaavekela anamuyari awe yahaakhanle Anamoona wira mutokweene ole amake owannyeya. Awo yaaheemererya, masi yaahimuleela Olaf wira munna ole aarowa orupaka vasofani. Olaf aahittottela mureerelo esumana ele ya vameekhaaya ni mutokweene a esirkwiitu. Nto eyo yaahimusivela Olaf. Okathi yaalya aya khula voosiisu, awo yaanithokorerya myaha sootthuneya. Mutokweene a esirkwiitu aahimulipiha vanceene Olaf, nto eyo yaahimwiiriha Olaf okela muteko wa Yehova wa okathi wotheene. Vano soovira iyaakha 40, Olaf orumeelaka ntoko misionaario ilapo sinceene.

8. Xeeni nintthuneya ahu waaphenta atthu, hata awo ahixukhurelaka? Nvahe ntakiheryo.

⁸ Nnoowerya waaphenta aletto mwa inamuna sinceene hata ahixukhurelaka. Mwa ntakiheryo, murokora mmosa a wEspanha, aanimusoma Biibiliya ni Yesica, muthiyana a elapo ya wEquador. Nihiku nimosa, okathi aasomihiwa awe Biibiliya, Yesica aahipacerya wunla. Nto murokora aamusomiha aahimukoha etthu yaamwiiriha wunla. Yesica, aahimmye wira ohinatthi orowa wEspanha, owo aari mmasikhini. Nihiku nimosa khaarina yoolya wira onvahe mwanawe, masi aarina maasi paahi. Yesica aahivekela nikhaliheryo vaavo eererya awe omwaatalela mwanawe. Moohipisa, Anamoona anli yaahimuxukurya, khunvaha erevista. Yesica khaawaakhunle saana ni aahikhera erevista ele ohimyaka wira: “Ela yoolya wira kinvahe mwanaka?” Arokora ale yaaheererya ommaaliha, masi Yesica khaawiriyanne. Nto okathi mukina, arokora ale yaahikuxa yoolya khuhiya vamukhora va Yesica. Muhoolo mwaya, vaavo aasomihiwa awe Biibiliya, Yesica aahinla maana aahoona wira enamuna Muluku aakhunle awe nivekelo nawe wanipacerya, kheemerenrye. Okhuma okathi ole, Yesica  aahilakela omurumeela Yehova. Tthiri eyo ehiiraneya mwaha wa ovaha wa arokora ale.​—Musuweli 11:1, 6.

9, 10. (a) Inamuna xeeni sookhaliherya aIsarayeli yaarina aya? (b) Olelo-va, inamuna xeeni anna akhanle aya ookhaliherya mmulokoni?

⁹ Khalai, aIsarayeli yaahikhalana inamuna sinceene wira akhaliherye muteko wa Muluku. (Okhuma 36:2; 1 Wahala 29:5; Nehemiya 11:2) Nave olelo-va, nyuwo mookhalana inamuna sinceene wira murumeele okathi anyu, mireerelo sanyu ni osuwela wanyu ovara muteko wira mwaakhaliherye anna ni arokora. Mwapaka eyo, munoohakalala ni Yehova onimooreelihani.

¹⁰ Nuulumo na Muluku ninnaatumererya alopwana mmulokoni ovara vamosa ni Muluku, akhalaka arummwa oorumeela aahiiso axitokweene. (1 Timótheyo 3:1, 8, 9; 1 Pedru 5:2, 3) Annipaka eyo wira yaakhaliheryeke atthu akina omukokhorela Muluku. (Miteko 6:1-4) Niireke axitokweene aatoko woovekelani itthu iya: okhala namathoonyerya, okhapelela iliivuru, muttetthe woolaleerya, olokiherya itthu sihononeyale aahiiso muteko mukina? Anna anikhaliherya mwa inamuna iyo, annihakalala vanceene.

11. Mireerelo xeeni aaphwannye awe murokora mmosa vaavo aakhaliherya awe muteko wooteka?

¹¹ Ale anikhaliherya oteka ipa sa Omwene annaapaka apatthani asya. Murokora oniihaniwa Margie, aahikhaliherya oteka Ipa sa Omwene iyaakha 18. Opuro mmosa aateka awe empa ya Omwene, aahipatthana ni aximwali ni aahiwiixuttiha ovara muteko owo. Murokora owo onihimya wira, eyo enamuna yooloka ya olipihana mukina ni mukhwaawe. (aRoma 1:12) Okathi aakumanne awe muxankiho, apatthani awe ale yaahimulipiha. Niireke mootoko okhaliherya  muteko ola wooteka? Hata muhisuwelaka oteka, nyuwo pooti wiivahererya.

12. Munrowa okhaliherya sai nuumala wiiraneya ehasara?

¹² Nave nnoowerya ovara vamosa ni Yehova, naakhaliheryaka anna aphwanyiwe ehasara. Mwa ntakiheryo, hiyo pooti okhaliherya nivahaka musurukhu ahu. (Yohani 13:34, 35; Miteko 11:27-30) Enamuna ekina nikhanle ahu ookhaliherya ti orattela ni olokiherya itthu sihononeyale nuuvira ehasara. Gabriela, murokora a oPolônia yoowo empa awe yaamonre mwaha wa osarya maasi, aahihakalala waaweha anna a muloko wowaattamela arwaaka omukhaliherya. Okathi onuupuwela awe yowiiraneya ele, owo onihimya wira khonixanka mwaha wa mireerelo sawe sihononeyale, masi oniweha itthu ophwannye awe, oriki: “Ehasara ela, yookiiriha woona wira eparakha yuulupale wiirela mpantta muloko wa eKristau, ni ti etthu enihakalaliha vanceene”. Atthu anceene akhaliheriwe nuuvira ehasara arina moonelo mmosa-ru. Nave, ale anivara vamosa ni Yehova yaakhaliheryaka anna awo annihakalala vanceene.​—Musome Miteko 20:35; 2 aKorinto 9:6, 7.

13. Wiivahererya onlipiha sai omphenta wahu Yehova? Nvahe ntakiheryo.

¹³ Murokora oniihaniwa Stephanie ni anamalaleerya akina a muttetthe awe, aavara vamosa ni Muluku yaakhaliheryaka Anamoona atthyanwe elapo aya mwaha wa ekhotto arowaka wEstados Unidos. Nto awo ahaakhaliherya anamurwa ophwanya opuro woomaka ni mireerelo sikina. Stephanie onihimya so: “Ohakalala ni oxukhurela waya nikhaliheryo avahiwe aya ni anna a olumwenku wotheene, woonivara murima. Atthu ale yuupuwela wira hiyo naakhalihenrye, masi ohimya ekeekhai, hiyo nikhaliheriwe. Maana ophentana wahu, wiiraana, waamini ni omuroromela wahu Yehova, woolipiha omphenta wahu Yehova. Nave eyo yoonikhaliherya oxukhurela itthu sotheene ninvahiwa ahu ni mutthenkeso wa Yehova”.

14, 15. (a) Moonelo xeeni aarina awe profeta Yesaya? (b) MaKristau anrowa omutakiha sai Yesaya?

¹⁴ Niireke munniphavela wuncererya muteko muninvarela anyu Yehova? Niireke munoowerya othaamela opuro woothowa anamalaleerya? Ekeekhai wira khula opuro nnoowerya ovaha. Nave, aakhala anna ni arokora aniwerya othaamela opuro mukina. Anna awo, arina moonelo mmosa-ru wa profeta Yesaya. Vaavo Yehova aakonhe  awe wira: “Kinrowa omuruma pani? Onrowa olaleya mitthaka saka t’ani?” Yesaya aakhunle so: “Miyo kiri va: kirumekeni”. (Yesaya 6:8) Niireke munoowerya ni munniphavela okhaliherya mutthenkeso wa Yehova? Munrowa okhaliherya sai?

¹⁵ Olavulaka sa muteko woolaleerya ni waapaka awiixutti, Yesu aahimmye wira: “Solya khirere mmatta: masi alipa-òhatta ari vakhani. Munvekeleke mwanene ematta, wira àrumihele anamuteko mmatta mwawe”. (Matheyo 9:37, 38) Niireke munoowerya okhala pioneero muttetthe woothowa anamalaleerya? Aahiiso munoowerya omukhaliherya munna wala murokora opaka eyo? Anna ni arokora anceene, anoona wira orumeela ntoko pioneero muttetthe woothowa anamalaleerya, eri enamuna yoolokexa ya omphenta Muluku ni anamwaattamanani aya. Niireke sookhala inamuna sikina mukhanle anyu oowuncererya muteko muninvarela anyu Muluku? Mwiira siiso, munoohakalala vanceene.

16, 17. Inamuna xeeni mukhanle anyu oowuncererya muteko muninvarela anyu Yehova?

¹⁶ Niireke munniphavela orumeela oBetheli aahiiso okhaliherya muteko wooteka, okathi vakhaani, nihiku nimosa wala mahiku manceene vasumanani? Okathi wotheene, mutthenkeso wa Yehova onnaaphavela anna oowiivahererya wira akhaliheryeke, okathi vanitthuneya aya, yavekeliwa okhaliherya hata asuwelaka ovara saana muteko mukina. Yehova onnaavaha efaita anna otheene aniivahererya okhaliherya khula opuro onitthuneya.​—Esalimo 110:3.

¹⁷ Niireke munniphavela wuncererya osuwela wanyu wira nweryeke omurumeela vanceene Yehova? Akhala wira ti siiso, mulepe eformulaario wira murowe Exikola ya Anamalaleerya a Omwene. Exikola ela enniwiixuttiha anna ni arokora olipa momunepani, yaawo aniphavela ovara muteko wa Yehova okathi wotheene, wira mutthenkeso ahu otepeke waarumeela. Ale anrowa exikola eyo, ahaana ophavela orumeela khula opuro. Niireke munniphavela wuncererya muteko muninvarela anyu Muluku mwa enamuna ela?​—1 aKorinto 9:23.

18. Mireerelo xeeni nimphwanya ahu ovara vamosa ni Yehova khula nihiku?

¹⁸ Okhala wira na arumeyi a Yehova, hiyo na atthu oovaha, ooreera murima ni oophenta. Nave ninnaathokorerya saana atthu khula nihiku. Nto eyo, enninihakalaliha, oniphwanyiha murettele ni otteeliwa murima. (aGalasia 5:22, 23) Moohicikha makhalelo anyu, munoowerya ohakalala mwatakiha mukhalelo woovaha wa Yehova ni ovara vamosa ni Muluku!​—Miruku 3:9, 10.