OLELO-VA vanitthuneya ovilela vanceene, okhala wira ninkhala “okathi wokiserya” ni wooxankiha. (2 Timótheyo 3:1-5) Atthu anceene khanivilela aahiiso opixa murima. Maana toowiitthuna, oowana-wana ni khaniihiiha. Nto nihaana wiikoha so: ‘Kiireke miyo kinnipixa murima? Ovilela aahiiso opixa murima exeeni? Kipakeke exeeni wira kikhale mutthu oovilela?’

Nintaphulela exeeni nuulumo noowi “ovilela”, ninrumeeliwa mBiibiliyani? Nuulumo noowi ovilela, khanintaphulela paahi ohiyererya etthu yoohiloka evikanihaka oniiraneela. Maana mutthu onivilela ni yoolakela, onnilipelela wira itthu sinooloka. Mutthu owo khoniisuupuwela mmansawe paahi, masi onnittittimiha moonelo wa atthu akina hata atthu awo amunyoonyinhe ene aahiiso omuhaaxa. Mutthu owo, onnilipelela wira wataana wawe ni atthu awo, onooloka. Tthiri eyo khennitikiniha maana Biibiliya onihimya wira ole omphenta, toovilela. * (Nwehe enoota.) (1 aKorinto 13:4) Ovilela oniirela mpantta yoowiima ya munepa wootteela. (aGalasia 5:22, 23) Nto nipakeke exeeni wira nivileleke mwekeekhai?

Wira nikhale atthu oovilela, nihaana onvekela Yehova wira onivahe munepa awe, yoowo onaavaha awe atthu animwaamini. (Luka 11:13) Munepa wa Yehova ti wootepa owerya, masi nihaana opaka itthu moovarihana ni mavekelo ahu. (Esalimo 86:10, 11) Eyo enitaphulela wira nihaana wiimananiha waavilela atthu khula nihiku ni ovilela ohaana wiirela mpantta omutthu ahu. Hata vari siiso, okathi mukina pooti ovila waavilela atthu. Exeeni enrowa onikhaliherya?

Nihaana osoma ni otthara ntakiheryo noomalela na Yesu. Vaavo murummwa Paulo aalavula awe sa “omutthu wa nanano”, yoowo onihela muhina ovilela, Paulo aahivikaniha oriki: “Murettele wa Kristu wettihe mirima sanyu”. (aKolosi 3:10, 12, 15) Nto wira nipake eyo, nihaana otthara ntakiheryo na Yesu ni ororomela wira Muluku onoolokiherya itthu okathi wooreerela. Nakupali eyo, khula okathi sinkhumelela aya mixankiho ninrowa ovilelaka.​—Yohani 14:27; 16:33.

Otheene ahu, ninniphavela okhala elapo esya enirwa moohipisa. Othokorerya moota Yehova onnivilela awe, nnoowerya okhala atthu oovilela vanceene. Biibiliya onihimya so: “Apwiya khampisa omaliherya itthu sinihimyaya: ale anvanya etthu ila annivonya. Vano Muluku onnovilelani, mana khantthuna wira mutthu apweteye, nnákhala mmosá. Ontthunexawe wira atthu othene erukunuxe murima”. (2 Pedru 3:9) Vaavo nnuupuwela ahu moota Yehova onnivilela awe, ninrowa-tho waavilelaka atthu akina. (aRoma 2:4) Nto myaha xeeni nintthuneya ahu ovilela?

Tthiri sookhala myaha sinceene khula nihiku nintthuneya ahu ovilela. Mwa ntakiheryo, nihaana ovilela aahiiso opixa murima wira nihaakwase  masu atthu vakhala wira nimphavela waaleela etthu yootthuneya. (Yakobo 1:19) Nave, nihaana ovilela vaavo ninnyoonyihiwa ahu. Ohiya waakuvela onyoonyiheya, ti vooloka wuupuwela wira Yehova ni Yesu annivilela sootteettheya sahu. Awo khanithokorerya khula yoovonya yaamukhaani nimpaka ahu. Masi aniweha mikhalelo sooloka nrina ahu, ni moopixa murima anninivaha okathi wira nilokiherye mikhalelo sahu.—1 Timótheyo 1:16; 1 Pedru 3:12.

Nave-tho, nintthuneya ovilela vaavo mutthu onnileela awe wira noohimya aahiiso opaka etthu yoohiloka. Woonasa wene, okathi owo nnaakuvela onyoonyiheya ni ophavela wiixaakiha. Masi Nuulumo na Muluku ninninikhaliherya okhalana moonelo wooloka, nriki: “Omaliha muteko ti worera ovikana opajerya mutek’owo: nthiti ti norera ovikana wakuviha. Mphaveleke opixa murima: òwakuva onanariwa muloló”. (Musuweli 7:8, 9) Hata yoohimmwa eri ene yowoothiwa, nintthuneya ovilela ni wuupuwela saana nihinatthi ohimya aahiiso opaka etthu. Ti etthu Yesu aapanke awe, okathi atthu akina yaamootherya aya.​—Matheyo 11:19.

Vanceenexa, anamuyari anitthuneya ovilela okathi anaakhaliherya aya anaaya olokiherya mweettelo aya wira asyake soophavela soohiloka. Mutthare ntakiheryo na Mattias, yoowo onirumeela oBetheli ya wEscandinávia. Okathi Mattias aari awe mmiravo, anaxikola akhwaawe yaanimunyohola mwaha wa sookupali sawe. Woopaceryani, anamuyari awe khiyaasuwela. Masi awo yaahoona wira aahipacerya ohoverya sookupali sawe. Anamuyari awe Mattias, anihimya wira yaatthuneya ovilela vanceene okathi owo. Maana Mattias aapaka makoho ala: “Muluku ti Pani? Niireke Biibiliya Nuulumo na Muluku? Ninsuwela sai wira ela yootthuna ya Muluku ni wira ti etthu ennivekela awe?” Nave aanimukoha paapa awe wira: “Xeeni kiniphukeliwa aka hata kiheettelaka ele munikupali anyu?”

Gillis onitthokiherya so: “Ikwaha sikina mwanihu aanooniherya wira aakoha onanariwe ene ohiya mwaha wa hiyo, masi mwaha wa ekeekhai, maana oona wira yaanimuxankiha”. Nto Gillis aamukhalihenrye sai mwanawe? Owo onihimya so: “Miyo ni mwanaka naanikilaathi iwoora sinceene  nivaanelaka”. Tthiri Gillis aaninwiriyana Mattias ni aanimukoha wira osuwele moonelo awe. Okathi mukina, Gillis aanimutthokiherya mwanawe itthu sikina, ni aanimuleela wira uupuweleleke nihiku nno notheene, aahiiso ohinatthi otthikela olavula mwaha owo. Nave Gillis onihimya wira, okathi mukina yaanivira mahiku uupuwelelaka etthu mwanawe aahimmye awe. Nto ovaanela iwo waahimukhaliherya Mattias osuwela yootaphulela ya mukuttho wa Yesu, woona wira Yehova onniniphenta ni wira ookhalana ehakhi yoonilamulela. Paapa awe Mattias onihimya so: “Kaahiviriha okathi, ni waari woovila, masi vakhaani-vakhaani, omphenta wawe Yehova waaninnuwa vamurimani vawe. Miyo ni mwaaraka, ninnihakalala okhala wira ovilela wahu ni wiimananiha omukhaliherya mwanihu okathi wa omiravo awe wookumiherya mireerelo”.

Vaavo Gillis ni mwaarawe moovilela yaamukhaliherya aya mwanaya, yaaniroromela wira Yehova aamwaakhaliherya. Gillis onihimya wira: “Kaamakela omuleela Mattias wira omphenta wahu yena vanceene waaniniiriha ovikaniha onvekela Yehova wira omukhaliherye wiiwexexa”. Tthiri anamuyari awo annihakalala mwaha wa ovikaniha ovilela ni ohooceya!

Nave-tho, hiyo nihaana ovilela naamukhapelelaka mmusi, aahiiso mpatthani ihu vaavo oniviriha awe okathi munceene owereiwaka. Nwehe ntakiheryo na Ellen * (Nwehe enoota), yoowo nave-tho onikhala wEscandinávia.

Nuuvira iyaakha 8, iyawe Ellen yaahimphwanya eretta yaahononne oramattha aahiiso ottoopare awe. Mwaha wa eretta eyo, owo khaahakalala, khaariipiwa murima nnakhala onyoonyiheya. Nto eyo yaanimuxankiha vanceene Ellen. Owo onihimya so: “Kaahaana ovilela ni ovekela vanceene”. Ellen onincererya oriki: “Yoolepa enikimaaliha ti aFilipi 4:13, yeeyo enihimya wira: ‘Kinniwerya sothene mwa . . . [Muluku] onkivaha ikuru’”. Okhaliheriwaka ni Yehova, moovilela Ellen onniwerya oxintta muxankiho owo.​—Esalimo 62:6, 7.

Tthiri, Yehova tori ntakiheryo noolokexa na ovilela. (2 Pedru 3:15) Ikwaha sinceene, ninnisoma mBiibiliyani wira Yehova toovilela. (Nehemiya 9:30; Yesaya 30:18) Pooti wira munnuupuwela moota Yehova aavilenle awe okathi aakhula awe makoho a Abrahamu, voohimya sa yoolakela awe ya opwetexa oSodoma. Yehova khaamuhiihale Abrahamu okathi aakoha awe. Masi moopixa murima, aahiwiriyana makoho ni oxankiheya wa Abrahamu. Nuumala-vo, Yehova aahimooniherya Abrahamu wira aahiiwa yooveka awe, ni khaarowa opwetexa oSodoma akhala wira yamphwanyaneya anaxariya 10 epooma ele. (Maphattuwelo 18:22-33) Okhala wira Yehova toopixa murima, okhala wene onipaka itthu mwa xariya!

Ovilela mukhalelo wootepa otthuneya wa omutthu musya maKristau otheene anitthuneya aya okhalana. Nto naimananiha okhala atthu oovilela, ninrowa onvuwihaka Tiithi ihu Yehova, yoowo onnikhapelela moovilela. Nave ninrowa okhala eriyari ya ‘atthu ale anamini ni arina nthiti, ni siso anakhela sohiyeriwa Muluku salaihenryawe’.​—aHéberi 6:10-12.