XEENI paapa aka aananariwe awe vanceene? Mukihiye kitthokiherye. Kiyariwe nihiku 29 a Julyo, 1929, ni kinnuwale muttetthe mmosa wa eprovinsia ya oBulacan, oFilipina. Khinaarina musurukhu munceene, nto naari atthu oohaawa. Nlelo kiryeene mmiravo, anakhotto a oJapão yaahituphela elapo ya oFilipina, khupacerya ekhotto. Okhala wira muttetthe ahu waakhala ottaiwene, nto ekhotto eyo khiyaaphiyale. Khinaarina raadio, televisau nnakhala ijornaali, nto naawiiwa atthu paahi alavulaka sa ekhotto.

Kirina anna ni arokora 7, nto okathi kaarina aka iyaakha 8, kaahirowa okhalaka ni ataata ni apiipi. Nnaamwi neetta ekerexa Katoolika, ataata yaaneemererya waakhela iliivuru sa etiini ekina yaavahiwa aya ni apatthani aya. Kinnuupuwela wira aahitoko okooniherya ilivrinyu saarina muru oni: Proteção, Segurança ni Descoberto, sa nttaava na eTagalog vamosa ni Biibiliya. *(Nwehe enoota). Waanikisivela omusoma Biibiliya, vanceenexa Ivangelyo. Nto eyo yaahikiiriha ophavela otthara ntakiheryo na Yesu.​—Yohani 10:27.

Mwaakha wa 1945, anakhotto a oJapão yaahikhuma oFilipina. Nto okathi ene yoowo, anamuyari aka yaahikikoha kaaphavelaka otthikela owaani. Ataata yaahikitumererya wira kaahaana orowa, nto kaahirowa.

Mweeri wa Dezembro mwaakha wa 1945, Anamoona a Yehova a muttetthe wa Angat, yaahirwa olaleerya muttetthe ahu. Namoona mmosa oowuuluvala aahirwa vatthokoni vahu ni aahinleela ele Biibiliya oniixuttiha awe voohimya sa “okathi wokiserya”. (2 Timótheyo 3:1-5) Aahinilattula orowa oweha yoosoma ya Biibiliya muttetthe waattamenle ahu. Miyo kaahirowa, nnaamwi anamuyari aka yahaaronwe. Yaahikhala atthu oowiiraka 20, nto akina yaanikoha itthu sa mBiibiliyani.

Nkaiwexexa saana etthu yaathokoreriwa, tivonto kaanuupuwela okhuma opuro ole. Masi  naahipacerya wiipiwa nsipo na Omwene. Nsipo nle naahikisivela vanceene, nto kaahihala. Nuumala nsipo ni nivekelo, otheene ahu naahilattuliwa orowela muthukumano wAngat, Ettiminku yaattharelana.

Muthukumano owo waari vatthokoni va emusi ya Cruz, nto akina a hiyo naahaana weetta ikiloomo sowiiraka 8. Yaahirwa atthu oowiiraka 50, nave anamwane acikhaani yaanaakhula makoho a mBiibiliyani oovila. Eyo yaahikitikiniha vanceene. Kaahirowa mithukumano sinceene. Nto aahikhala munna mmosa oowuuluvala aitthaniwa Damian Santos, yoowo aari pioneero, ni aatonko okhala mukhulupale a epooma ele. Owo aahikilattula orupa owannyawe nihiku nimosa. Ohiyu wotheene waavinre nithokoreryaka myaha sa Biibiliya.

Okathi ole, mutthu aanibatiziwa nuumala wiixutta soowiixuttiha soopacerya sa mBiibiliyani. Nto nuumala miyo ni atthu akina orowela mithukumano mahiku vakhaani, anna yaahinikoha so: “Munniphavala obatiziwa?” Miyo kaahaakhula wira “Aayo”. Kaanisuwela wira kaahaana okhala epottha ya “Pwiya Kristu”. (aKolosi 3:24) Nto naahirowa muro waari vakhiviru, weiwo miyo ni munna mukina naabatiziwe ahu, nihiku 15 a Feverero, 1946.

Kaahoona wira maKristau oobatiziwa ahaana olaleerya ntoko iira awe Yesu. Paapa aka uupuwela wira kaahitepa oyeva wira kilaleeryeke, ni uupuwela wira mwaha wa obatiziwa khonitaphulela wira kaahaana okhala namalaleerya. Kaahimutthokiherya wira Muluku oniphavela wira nilaleyeke ihapari sooreera sa Omwene wa Muluku. (Matheyo 24:14) Nave-tho kaahimuhimeerya wira kahaana opaka etthu kaamuleihenrye aka Muluku. Nto ti vaavo paapa aka aalavunle awe masu ari woopaceryani wa mwaha ola. Owo aahilakela okihiiha olaleerya. Nihiku nle, kaahipacerya ohiya itthu ottuli wira kimurumeele Yehova.

Emusi ya Cruz yaahikilattula orowa okhala naawo wAngat. Awo yaahikitumererya miyo ni mwanaya muthiyana ookiseriwa, aitthaniwa Nora, okela muteko wa opioneero. Oowanli ahu naahipacerya muteko wa opioneero nihiku 1 a Novembro, 1947. Nora aalaleerya muttetthe mukina, masi miyo kaahanle wAngat.

Nuumala okhala pioneero iyaakha piili, munna Earl Stewart, aakhuma oBetheli, aahilavula mwaha mmosa ohoolo wa atthu 500, epooma ya wAngat. Owo aalavunle mwaha awe ni Enkelexi, nto moottharelana kaahuuluula mwaha owo ni eTagalog. Ola waari mwaha woopacerya kaataphulenle aka. Masi kaawenrye sai otaphulela? Nnaamwi keettale oxikola iyaakha 7 paahi, maprusoore aka yaamakela olavula Enkelexi. Nave-tho kaanisoma iliivuru sa mutthenkeso ahu sa Enkelexi okhala wira saanithowa sa  eTagalog. Nto eyo yaahikikhaliherya wiixutta Enkelexi, yaaphiyerya otaphulela myaha.

Munna Stewart aahihimya wira mamisionaario yaamukhuma wira yanwehe Asembeleya oNova York, E.U.A, yoowo aarina muru oni Aumento da Teocracia, mwaakha wa 1950. Nto efiliyaali yanimphavela pioneero mmosa wala anli wira yakhaliherye oBetheli. Nto miyo kaahilattuliwa. Nave-tho okathi ola kaahihiya itthu sotheene ottuli wira karumeeleke oBetheli.

Kaahiphiya oBetheli nihiku 19 a Junyo, 1950. Ebetheli yaari empa emosa yuulupale ya khalai, yeeyo yaari nipuro na ekitaari emosa, yaarukureriwe ni miri suulupale. Yaahikhala anna 12 oohithela yaavara muteko opuro ole. Voosiisu, kaakhaliherya opuro waapeiwa. Okhuma 9 oora, kaakhaliherya opasari ikuwo. Othana kaanitthikela miteko iyo. Nuumala mamisionaario otthika waasembleyani a olumwenku wotheene kaahihala oBetheli. Kaanivara khula etthu kaavekeliwa aka. Kaanitthukwa irevista saarowa okaiwa, kaanilokiherya iliivuru wira yavahiwe atthu yaaveka ni kaaniwaakhela aletto yaarwa oxukurya.

Mwaakha wa 1952 miyo ni anna akina 6 a oFilipina naahilattuliwa orowa eturma 20 ya Exikola ya oGileadi. Kaahihakalala vanceene! Niryeene wEstados Unidos, naahiweha itthu sinceene seiyo sahaalimalenle ahu. Itthu sinceene saahivirikana ni iye kaalimalenle aka muttetthe kiyariwe aka.

Mwa ntakiheryo, nahaana wiixutta moota woorumeela ikaruma kamosa-kamosa nahaatonko ahu woona. Hata oriirya wa elapo ele waari woovirikana ni elapo ahu. Nihiku nimosa, nuumala okhumela ota, kaahiweha itthu sotheene siri ene sootteela. Eyo yaari ekwaha yoopacerya oweha eneevi. Yaari etthu yooreera oweha, masi vaahitepa oriirya!

Itthu kaixutta aka oGileadi, saanikisivela vanceene nto mixankiho iyo khisaakinyoonya. Maprusoore ahu yaaniixuttiha saana ni yaahinikhaliherya moota woosoma oratteene ni otokosa myaha sa mBiibiliyani. Exikola ya Gileadi yookikhaliherya olipiha wataana waka ni Yehova.

Nuumala ograduwari, kaahithanliwa okhala pioneero a vameekhaaya, muttetthe wa oBronx, oNova York. Nto mwaakha wa 1953, kaahirowa wAsembeleyani Sociedade do Novo Mundo, yoowo aapakiwe oBronx. Nuumala asembeleya, kaahitthikela oFilipina.

Kaahithanliwa orowa oxukuryaka miloko. Muteko owo wookivaha eparakha ya omutakiha Yesu, yoowo eetta mittetthe sinceene soorakamela wira aakhaliherye atthu a Yehova. (1 Pedro 2:21) Esirkwiitu aka yaahela muhina muttetthe muulupale wa Luzon central, esisiro yuulupalexa ya oFilipina. Nave  waahela muhina iprovinsia sa Bulacan, Nuevwa Ecija, Tarlac, ni Zambales. Wira kixukurye mittetthe sikina, kaahaana ovira Miyaako Sierra Madre. Mapuro awo khaaphiya karera nnakhala kampoi, nto kahaana waavekela alipa yeettiha ikamiyau wira kiwele vasulu va ikhuni yaalovola aya. Ikwaha sinceene awo yaanikeemererya owela ikamiyau saya, masi mukwaha owo waaniwereya vanceene.

Miloko sinceene saari saamukhaani ni sa ninaano. Nto anna yaanihakalala vanceene vaavo kaakhaliherya aka olokiherya saana mithukumano ni muteko woolaleerya.

Muhoolo mwaya, kaahithanleliwa esirkwiitu yaahela muhina muttetthe wotheene wa oBicol. Muttetthe owo saahikhala igrupu sinceene saarina mapioneero a vameekhaaya, yaalaleerya mittetthe sahaatonko ophiya Anamoona. Empa emosa, exoworo aya yaarina miri miili paahi saavira eriyari. Nto okathi kaanyakenle aka miri iyo, saahimorela mulatrina ni miyo-tho kaanimorela memmo. Ikwaha sinceene kaanipisa olya voosiisu, kimananihaka wiirapiha.

Okathi kaarumeela aka esirkwiitu ele, kaahipacerya omuupuwela Nora, yoole naapacenrye ahu opioneero hoothe. Vano owo aari pioneera a vameekhaaya, epooma ya Dumaguete, nto kaahirowa omuxukurya. Nuumala-vo, naanilepelana ipaphelo, nto mwaakha wa 1956 kaahimuthela. Esumana yoopacerya nuumala othelana, naaxukurya muloko wa esisiro ya Rapu Rapu. Nahaana owela miyaako ni weetta mikwaha soorakama, masi naanihakalala okhala vamosa ni waaxukurya anna yaakhala mapuro oorakamela.

Nuumala ovira iyaakha xexe nixukuryaka miloko, naahilattuliwa orowa orumeelaka ofiliyali. Nto naapacenrye ovara muteko mweeri wa Janero, 1960. Mwa iyaakha sinceene ninrumeela ahu oBetheli, kihiixutta itthu sinceene ni anna arina miritti suulupale mmutthenkesoni mwa Yehova. Nave Nora oovara miteko sinceene soovirikana, sa oBetheli.

Eparakha yuulupale waaweha atthu anceene amusuwelaka ni omurumeela Yehova oFilipina. Okathi kaari aka oBetheli, kiri ene mmiravo oohithela, anamalaleerya yaari 10.000 elapo ela yotheene. Vano, elapo yotheene ya oFilipina yookhalana anamalaleerya 200.000, ni anna anceene ni arokora annikhaliherya muteko woolaleerya eri ene oBetheli.

Nuuvira okathi, waanitthuneya opuro munceene oBetheli. Nto Nikhuuru Noolamulela naahinivekela ophavela opuro wira niteke efiliyaali esya yuulupale. Nto miyo ni munna aahoolela edepartamento yoopaka iliivuru, naahirowa mmawaani waattamela oBetheli, naakohaka atthu akhala wira yaaniphavela onitumiherya ipa saya. Khuuvo aaphavela. Masi mutthu mmosa aahinleela wira: “aChina khanitumiha. Anoothuma paahi”.

Masi nihiku nimosa yaahiiraneya etthu yahaalipelela ahu. Waattamela efiliyali ahu, aahikhala mutthu aaphavela othaamela wEstados Unidos, nto aahinikoha naaphavelaka othuma empa awe. Nave-tho mukina aahilakela otumiha empa awe ni aahaatumererya akina opaka etthu emosaru. Hata mulopwana yoole aahimmye wira “aChina khanitumiha”, owo aahinitumiherya empa awe. Moohipisa, naahithuma opuro muulupale ovikana opuro naarina ahu khalai. Kinnikupali wira Yehova aaphavela wira yiiraneye siiso.

Mwaakha wa 1950, miyo kaari mmiravo ootepexa oyeva aarumeela oBetheli. Masi vano, atthu ootepexa wuuluvala anirumeela eBetheli ahu ti miyo ni mwaaraka. Nkinthanana mwaha wa omutthara Yesu khula opuro aakiruma awe orowa. Nnaamwi anamuyari aka yaakoomonle vatthokoni vaya, Yehova ookivaha emusi yuulupale ya atthu animphenta yena. Kinnikupali wira Yehova onninivaha khula etthu ennithowa, wa khula muteko onniruma awe ovara. Miyo ni Nora ninnimuxukhurela Yehova mwaha wa itthu onnivaha awe, nave ninnaatumererya akina wira amuhiye Yehova aarumeelaka.​—Malakhiya 3:10.

Ekwaha emosa, Yesu aahimulattula namaliviha mpoosito aitthaniwa Matheyo Levi wira okhale muthareli awe. Exeeni Matheyo aapanke awe? “Ahivenya, ahihiya sothene, khumuttharaka Yesu”. (Luka 5:27, 28) Miyo-tho kookhalana eparakha ya ohiya itthu sotheene ottuli khiyamutthara Yesu, nave kinnaatumererya atthu akina opaka etthu emosaru wira aphwanye mareeliho manceene.